Ana Akumanyilila?
Ligongo chichi yaliji yakamuchisya kuti Yehofa ŵakundile Aisalaeli kupeleka mbopesi ngunda soni njuŵa?
CHILAMUSI, chakundaga Aisalaeli kupeleka mbopesi kwa Yehofa njuŵa ni ngunda syakwe. M’chilamusichi yijuni yiŵili yeleyi akusayikolanga pampepe soni mundu naga jwangali njuŵa jwakombolekaga kupeleka ngunda. (Lef. 1:14; 12:8; 14:30) Ligongo chichi yeleyi yaliji yakamuchisya? Ligongo limo lyaliji lyakuti njuŵa nganisisimanikwaga ndaŵi syosope. Ligongo chichi yaliji myoyo?
Njuŵa
Njuŵasi syasimanikwaga ku Isalaeli m’miyesi jachitukuta. Mmwesi wa Okotoba wuliwose, yijuniyi yasamaga kutyoka kummwela ni kwawula ku yilambo ya chitukuta. Yeleyi yatendekasyaga kuti yisimanikwesoni ku Isalaeli mundaŵi ja chitukuta. (Nyi. 2:11, 12; Yel. 8:7) Mwamti Aisalaeli nganakombolaga kupeleka mbopesi njuŵa mundaŵi jakusisima.
Ngunda jamwitinji
Nambo ngunda nganisisamaga. Syasimanikwaga ku Isalaeli chaka chosope. Nambosoni ngunda syaliji syakulanga. (Alole Yohane 2:14, 16.) Buku jine (Bible Plants and Animals) jasasile kuti, “m’matawuni ni m’misi josope ja ku Palesitina mwapali ngunda. Panyumba jilijose papali chitundu cha ngunda, kapena ŵalinganyaga mbanga pepupa kuti ngundasyo sitameje mwelemo.”—Alole Yesaya 60:8.
Ngunda jili pambanga
Myoyo Yehofa jwalosisye kuti jwaliji jwalunda soni jwachinonyelo, pakunda kuti Aisalaeli apelecheje mbopesi yijuni yayasimanikwaga kwa chaka chosope.