Yiwusyo Yakutyochela Kwa Ŵakuŵalanga

Ana ngani jakuti, “Lina Lyawo Liswejesyedwe” jajakopweche mu Sanja ja Mlonda ja Juni 2020, jalondesye chamtuli yatukusakulupilila pakwamba ya lina lya Yehofa soni ulamusi wakwe?

Munganiji twalijiganyisye ngani jakusosekwa mnope, jajikwakwaya ŵandu soni malayika gosope. Ngani jakwe jili jakwamba kuswejesya lina lyekulungwa lya Yehofa. Ngani jakuti Yehofa ni jwakwenela kulamulila jikusakwaya kuswejesya lina lyakwe. Mwakulandana ni yeleyi, kukulupichika kwa mundu jwalijose kukusakwayasoni kuswejesya kwa lina lya Yehofa.

Ligongo chichi sambano tukugombelechesya mnope kuti ngani jakusosekwa mnope jigonile pakuliswejesya lina lya Yehofa. Kwende tulole magongo gatatu.

Chandanda, Satana jwanyosisye lina lya Yehofa kapena kuti kusakasya mbili jakwe mu mgunda wa Edeni. Yiwusyo yakalamuka yaŵamwusisye Satana Hawa yalosisye kuti Yehofa ali Mlungu jwakusiŵajima ŵandu ŵakwe yindu yambone, nambosoni jwakusapeleka malamusi gakusawusya kugakuya. Kaneko Satana jwasasile yindu yakulekangana ni yaŵasasile Yehofa. Mwamti jwalosisye kuti Mlungu ali jwaunami. Apatu jwalakwe jwanyosisye lina lya Mlungu. Mwakutenda yeleyi jwalakwe jwaŵele “Satana” kugopolela kuti “jwakwaŵechetela achimjakwe yakusakala.” (Yoh. 8:44) Ligongo lyakuti Hawa jwakulupilile mabosa ga Satana jwalakwe nganampikanila Mlungu. Yeleyi yalosisye kuti jwalakwe ngakusaka kuti Mlungu aŵe jwakumlamulila. (Gen. 3:1-6) Satana akupitilisyape kusakasya mbili ja Yehofa mpaka lelo. Mwamti ŵandu wosope ŵakusakulupilila mabosa ga Satana akusalepela kumpikanila Yehofa. Nambo ŵakutumichila ŵa Mlungu akusakuwona kunyosya lina lyeswela lya Yehofa kuŵa chindu chakulemwecheka mnope. Mwamti kunyosya lina lya Yehofa ni kwakutendekasisye kuti pachilambopa paŵe yakusawusya soni yakusakala yejinji.

Chaŵili, pakusaka kuyikamuchisya yakupanganyidwa yosope, Yehofa jwalinganyisye yakuswejesya lina lyakwe mwakutyosya kunyosyedwa kulikose. Yeleyitu yaliji yakusosekwa mnope kwa Yehofa. Ni ligongo lyakwe jwalakwe jwasasile kuti, “Lina lyangu lyakupikanika chinjililosya kuti lili lyeswela.” (Esek. 36:23) Nombe Yesu jwalosisye chenene chindu chakusosekwa mnope m’mapopelo ga ŵakutumichila ŵa Yehofa ŵakulupichika, pajwasasile kuti, “Lina lyawo liswejesyedwe.” (Mat. 6:9, maloŵe gamwiŵanda.) Mwakuwilisyawilisya Baibulo jikusagombelechesya mnope kusosekwa kwa kulichimbichisya lina lya Yehofa. Agambe ganichisya yisyasyo yakuyichisyayi: “Mlichimbichisye lina lyalumbili lya AMBUJE.” (1 Mbi. 16:29; Sal. 96:8) “Jimbani nyimbo syakulilumba lina lyawo lyalumbili.” (Sal. 66:2) “Tinjililumba lina lyawo yaka yosope.” (Sal. 86:12) Pandaŵi jine Yehofa jwaŵechete ali kwinani yakwamba kulichimbichisya lina lyakwe. Yeleyi yatendechele ku nyumba ja Mlungu ku Yelusalemu Yesu pajwaŵechete kuti, “Atati alichimbichisiye lina lyawo.” Pelepo Yehofa jwajanjile kuti, “Nalichimbichisye soni chinjilichimbichisya.”—Yoh. 12:28.a

Chatatu, ndaŵi syosope chakulinga cha Yehofa chikusakamulana ni lina lyakwe kapena kuti mbili jakwe. Aganichisye mwalichiŵela lyakusosekwa lina lya Yehofa panyuma pakulinjidwa kakumalisya chakumbesi kwa Yaka 1,000 ya Ulamusi wa Klistu. Ana malayika soni ŵandu wosope chachipikana uli pakwamba ya lina lya Yehofa pandaŵi jelejo? Kuti tujanje chiwusyo chelechi kwende tuwanichisye ya yindu yiŵili yakusosekwa mnope yayili kulupichika kwa ŵandu soni kusosekwa kwa ulamusi wa Yehofa. Ana ŵandu ŵachachilosya kuti akwete chikulupi chachilagaga kulosya kuti ali ŵakulupichika? Iyayi. Jemanjaji chachiŵa ŵamlama soni chachiŵa kuti alinjidwe mu yindu yosope. Mwamti jemanjajo chachipochela umi wangamala. Ana ngani jakuti Yehofa ni jwakwenela kulamulila jichipagwape kapena jichitendekasya ŵandu ni malayika kuŵa ŵakulekangana? Iyayi. Ligongo pandaŵi jelejo malayika soni ŵandu wosope chachiŵa ŵakamulana mwamti chachijitichisya ulamusi wa Yehofa. Nambi uli pakwamba ya lina lya Yehofa?

Pandaŵi jelejo jwalijose chachimanyilila yisyesyene yakwamba Yehofa, soni lina lyakwe lichichimbichikwa mnope. Nambope lina lya Yehofa lichipitilisya kuŵa lyakusosekwa mnope kwa ŵakutumichila ŵakwe wosope. Ligongo chichi yichiŵa myoyo? Yichiŵa myoyo ligongo jemanjajo chachimwona Yehofa ali mkupitilisya kutenda yindu yakusimonjesya. Ligongo lyakuti Yesu mwakulinandiya chachipeleka ulamusi kwa Yehofa, pelepo Mlungu “chachiŵa yindu yosope kwa jwalijose.” (1 Akoli. 15:28) Payichitendekwa yeleyi, ŵandu ŵachachiŵa pachilambo chapasi chachisangalalaga ni “ufulu wakuchimbichikwa wa ŵanache ŵa Mlungu.” (Alo. 8:21) Pandaŵi jelejo Yehofa chachikwanilisya chakulinga chakwe chakola liŵasa limpepe lyakamulana lya ŵanache ŵakwe ŵakwinani soni ŵapachilambo chapasi.—Aef. 1:10.

Ana yakutendekwa yeleyi yichikwaya chamtuli liŵasa lya Yehofa lyakwinani soni lyapachilambo chapasi? Ngatukukayichila kuti yeleyi yichitutendekasya kukola mtima wakusachilila kulichimbichisya lina lyambone mnope lya Yehofa. Jwamasalimo Daudi jwasalilidwe kulemba kuti, “Achimbichikwe Ambuje Mlungu . . . Mlilumbe lina lyawo lyalumbili kwa yaka yosope.” (Sal. 72:18, 19) Mwamti kwa umi wetu wosope tuchipataga matala gasambano gakumchimbichisya Yehofa.

Kusala yisyene, lina lyakuti Yehofa likusajimila yiliyose yakwamba jwalakwe. Mwachisyasyo, patukuganichisya ya lina lya Yehofa ni patukusaganichisyasoni ya chinonyelo chakwe. (1 Yoh. 4:8) Mwamti ndaŵi syosope tuchikumbuchilaga kuti Yehofa jwatupanganyisye ligongo lya chinonyelo. Nambosoni jwapeleche mbopesi jakutuwombola ligongo lya chinonyelo. Tuchikumbuchilagasoni kuti jwalakwe pakulamulila akusatenda yeleyi mwachilungamo soni mwachinonyelo. Nambope tuchipitilisya kuchiwona chinonyelo cha Yehofa kwa m’weji mpaka kalakala. Myoyo, kwa umi wetu wosope tuchipitilisya kuŵa paunasi wambone ni Atati ŵetu nambosoni kwimba nyimbo syakulichimbichisya lina lyakwe lyakusosekwa mnope.—Sal. 73:28.