NGANI JAKULIJIGANYA 26
NYIMBO NA. 123 Tupikanileje Mwakulupichika Mwakusajendechesya Yindu Yehofa
Ajitichisyeje Mwakulinandiya Yindu Yangakuyimanyilila
“M’weji nganituŵa tukombwele kumpikanichisya Jwamachiligosopejo.”—YOB. 37:23.
CHAKULINGA CHA NGANIJI
Chitukambilane yampaka tutende kuti tuŵeje ŵakulinandiya pa yindu yangatukuyimanyilila ni kuganichisyaga mnope yindu yatukuyimanyilila kwineku ni kumdalilaga mnope Yehofa.
1. Ana Yehofa jwatupanganyisye m’litala lyakuti tukomboleje kutenda yindu yapi, soni ligongo chichi?
YEHOFA jwatupanganyisye kuti tukomboleje kuganisya, kulijiganya yindu, kupikanichisya yindu, soni kulosya lunda. Ana ligongo chichi jwalakwe jwatupanganyisye m’litala lyeleli? Yehofa jwatupanganyisye chamti myiyi, ligongo lyakuti akusasaka kuti ‘tummanyilile [jwalakwejo] yisyesyene’ soni kuti tumtumichileje pakamulichisya masengo lunda lwetu lwakuganisya chenene.—Mis. 2:1-5; Alo. 12:1.
2. (a) Ana ŵanduwe nganituŵa tukombwele kutenda chichi? (Yobu 37:23, 24) (Alolesoni chiwulili.) (b) Ana kwitichisya kuti nganituŵa tukombwele kumanyilila yosope kukusatukamuchisya chamti uli?
2 Atamose kuti twapanganyidwe kuti tukomboleje kulijiganya yindu, nambope nganituŵa tukombwele kumanyilila yosope. (Aŵalanje Yobu 37:23, 24.) Aganichisye yayamtendechele Yobu. Yehofa ŵamwusisye Yobu yiwusyo yejinji yayamtendekasisye Yobujo kuyiwona kuti pana yindu yine yejinji yangakuyimanyilila. Yeleyi yamtendekasisye jwalakwejo kutanda kulinandiya soni yamkamuchisye kuti ajongolele kaganisye kakwe. (Yob. 42:3-6) Mpela muyaŵelele ni Yobu, m’wejisoni yindu yikusatujendela chenene patukuŵa ŵakulinandiya ni kwitichisyaga kuti ngatukusamanyilila yosope. Kulinandiya kweleku kukusatukamuchisya kuti tumdalileje mnope Yehofa kuti pandaŵi jakwe jwalakwejo chachitumanyisya yindu yatuchisosekwa kuyimanyilila ni chakulinga chakuti chitusagule yindu mwalunda.—Mis. 2:6.
Kwitichisya kuti pana yindu yangatukuyimanyilila kukusatukamuchisya mnope mpela muyaŵelele ni Yobu (Alole ndime 2)
3. Ana mungani ajino chitukambilane chichi?
3 Mu ngani ajino, chitukambilane yine mwa yindu yele ngatukusayimanyilila soni yakusawusya yampaka tusimane nayo ligongo lyangamanyilila yinduyi. Chitulolesoni umbone wawukusapagwa ligongo lyangamanyilila yindu yine. Mwamti kukambilana mfundo syelesi chikutukamuchisye kukulupilila mnope kuti Yehofa “jwakusamanyilila yosope” jwangatusisa yindu yatukusasosekwa kuyimanyilila.—Yob. 37:16.
NGATUKUSAMANYILILA LISIKU LYA ALAMAGEDO
4. Mwakamulana ni Mateyu 24:36, ana ni chindu chimo chapi changatukusachimanyilila?
4 Aŵalanje Mateyu 24:36. Ŵanduwe ngatukusamanyilila ndaŵi jisyesyene ja kwika kwa mbesi ja chilambo chakusakalachi. Nombenajo Yesu pajwaliji pachilambopa nganamanyililaga “lisikulyo ni ndaŵi jakwe.”a Kaneko, Yesu jwasalile ŵandumetume ŵakwe kuti Yehofa jwalisoni Jwakusunga Ndaŵi Jwamkulungwa, akusasunga ndaŵi ja yakutendekwa yineyakwe pakuŵa yinduyo yikusaŵa “mmyala” mwakwe. (Mase. 1:6, 7) Mwamti Yehofa jwalinganyile chile ndaŵi ja kwika kwa mbesi ja chilambochi, nambo m’weji nganitukola udindo wakumanyilila lisiku lisyesyene lya Alamagedo.
5. Ana kungamanyilila lisiku lisyesyene lya kwika kwa mbesi ja chilambochi kukusatukwaya chamti uli?
5 Mwakamulana ni yajwasasile Yesu, ngatukumanyilila ulewu wa ndaŵi jatukusosekwa kwembecheya mpaka mbesi jili jiyiche. Mwamti yeleyi mpaka yitutendekasyeje kuti tulagasicheje mnope nganisyo soni kuŵa ŵandu ŵangawusimana mtima mnopemnope naga tuŵele tuli mkwembecheya kwa ndaŵi jelewu kwika kwa lisiku lya Yehofa. Mwinesoni mpaka tuyiwoneje kuŵa yakusawusya mnope kupilila ŵachinasi ŵetu kapena ŵandu ŵane pakutulagasya soni kutunyosya. (2 Pet. 3:3, 4) Mwamti ndaŵi sine mwine mpaka tuyiwoneje kuti komboleka tukakombolaga kupilila yakusawusya yatukusasimana nayoyi yikaŵe kuti tukumanyilila lisiku lisyesyene lyakwika kwa mbesi ja chilambochi.
6. Ligongo chichi kungamanyilila lisiku lyakwika kwa mbesi ja chilambochi kuli kwambone mnope kwa m’weji?
6 Ligongo lyakuti Yehofa nganatumanyisya lisiku lyakwika kwa mbesi ja chilambochi, yikusatupa upile wakulosya kuti tukusamtumichila jwalakwejo ligongo lyakumnonyela soni kumkulupilila. Utumiki wetu kwa Yehofa nganiwukola malile, ligongo tuchimtumichila jwalakwe mpaka kalakala. Myoyo, mmalo mwagambaga ganichisya mnope ya ndaŵi ja kwika kwa “lisiku lya Yehofa,” tukusosekwa ganichisyaga mnope yindu yayichitendekwa panyuma pa lisikuli. Kutenda yeleyi kuchitukamuchisya kuti tulipelecheje mnope pakumtumichila Yehofa soni kutenda yindu yakumsangalasya jwalakwejo.—2 Pet. 3:11, 12.
7. Ana ni yindu yapi yatukusamanyilila?
7 Tukusasosekwa ganichisyaga mnope yatukusamanyilila. Tukusamanyilila kuti masiku gambesi gatandite mu 1914. Kupitila m’Baibulo, Yehofa atupele yakulochesya yayikusatukamuchisya kumanyilila kuti masiku gambesi gatandite mu 1914. Konjechesya pelepa, jwalakwe jwasasilesoni mwayichiŵela yindu pachilambopa panyuma pa chele chakachi. Mwamti yeleyi yikusatukamuchisya kumanyilila kuti ‘lisiku lyekulungwa lya [Yehofa] liŵandichile.’ (Sef. 1:14) Tukusamanyililasoni kuti Yehofa akusaka kuti twasalileje ŵane ‘ngani syambone syakwamba ya Uchimwene.’ (Mat. 24:14) Ngani syambonesi sikulalichidwa m’yilambo chiŵandika 240 soni mu yiŵecheto yakupunda 1,000. Myoyo, ngatukusasosekwa kumanyilila “lisikulyo soni ndaŵi jakwe” ni chakulinga chakuti tulipelecheje mnope pakumtumichila Yehofa.
NGATUKUSAMANYILILA YACHACHITENDA YEHOFA
8. Ana maloŵe gakuti “masengo ga Mlungu” gakusagopolela chichi? (Jwakulalichila 11:5)
8 M’weji ŵandu nganituŵa tukombwele kumanyililaga ndaŵi syosope “masengo ga Mlungu.” (Aŵalanje Jwakulalichila 11:5.) Maloŵega gakusala ya yindu yayikusakomboleka ligongo lya machili ga Yehofa kapena kuti yindu yakusayitendekasya jwalakwejo kuti yikomboleche pakusaka kukwanilisya chakulinga chakwe. Mwamti m’weji nganituŵa tumanyilile ligongo lyakwe Yehofa ayikundile yineyakwe kutendekwa, kapena kumanyilila yachachitenda jwalakwejo pakusaka kutukamuchisya. (Sal. 37:5) Baibulo jikusalandanya kungamanyilila masengo ga Mlungu ni kungamanyilila kakule ka mwanache pali mchitumbo cha mamagwe. Atamose ŵa sayansi ŵangapikanichisya yosope yayikusatendekwa kuti mwanache akuleje mchitumbo cha mamagwe. Myoyo, m’wejisoni nganituŵa tupikanichisye yindu yosope yachachitenda Yehofa.
9. Ana ni yindu yapi yampaka yitutendechele ligongo lyakuti ngatukumanyilila yachachitenda Yehofa pakutukamuchisya?
9 Kungamanyilila yachachitenda Yehofa pakusaka kutukamuchisya mpaka kutulepelekasyeje kutenda yindu yine. Mpaka tulepeleje kutenda yejinji pakumtumichila Yehofa, mpela kutama umi wangasaka yejinji ni chakulinga chakuti tusamile kudela kwakukusosekwa ŵakulalichila ŵajinji. Mwinesoni mpaka tukayichileje naga Mlungu akusangalala ni m’weji patukulepela kutenda yindu yatukusasaka kutenda pakumtumichila jwalakwejo. Nambosoni patukulepela kuyiwona yakuyichisya yambone ya utumiki wetu, mwinesoni patukusimana ni yakusawusya yejinji pa utumiki watukutenda.
10. Ana kungamanyilila kwetu yachachitenda Yehofa pakutukamuchisya kukusatutendekasya kola ndamo syambone syapi?
10 Kungamanyilila kwetu yachachitenda Yehofa pakutukamuchisya kukusatutendekasya kola ndamo syambone mpela kulinandiya soni kufasa. Yikusatukamuchisyasoni kumanyilila kuti nganisyo soni matala ga Yehofa yili yapenani mnope kupundana ni yetu. (Yes. 55:8, 9) Nambosoni yikusatujiganya kuti tumdalileje mnope Yehofa, soni tuyiwoneje kuti yindu ngaŵa mkutujendela chenene pali pangali chikamuchisyo chakwe. Yindu payitujendele chenene pa utumiki wetu, tukusampaga Yehofa uchimbichimbi wosope. (Sal. 127:1; 1 Akoli. 3:7) Naga yindu yitendekwe m’litala lyele nganitulijembecheyaga, tukusasosekwa kumbuchila kuti Yehofa akumanyilila yosope. (Yes. 26:12) M’weji tukusasosekwa kwamba kutenda mbali jetu, kwineku tuli tukwete chikulupi chakuti nombe Yehofa chachitenda mbali jakwe. Chinga Yehofa chachitupaga malangiso mwakulekangana ni mujwatendelaga kalakala, nambope tukusakulupilila kuti jwalakwejo ngasalepela kutupa malangiso gatuchisosekwa.—Mase. 16:6-10.
11. Ana ni yindu yapi yatukusamanyilila yampaka yitukamuchisye?
11 Tukusamanyilila kuti ndaŵi syosope Yehofa akusalosya chinonyelo, chilungamo soni lunda. Tukusamanyililasoni kuti jwalakwe akusayamichila mnope yiliyose yatukusamtendela jwalakwejo soni Aklistu achimjetu. Nambosoni tukusamanyilila kuti ndaŵi syosope Yehofa akusapeleka upile kwa ŵandu ŵali ŵakulupichika kwa jwalakwejo.—Aheb. 11:6.
NGATUKUSAMANYILILA YAYICHITENDEKWA MALAŴI
12. Mwakamulana ni Yakobo 4:13, 14, ana ŵanduwe ngatukusamanyilila chichi?
12 Aŵalanje Yakobo 4:13, 14. Ŵanduwe ngatukusamanyilila mwawuchiŵela umi wetu malaŵi. Patukutama m’chilambo chakusakalachi, ndaŵi jilijose tukusajembecheya kusimana ni “yakutendekwa yangayijembecheya.” (Jwak. 9:11) Yeleyi yikusatendekasya kuti tukamanyililaga naga yatukusaka kutenda chiyikomboleche. Nambosoni ngatukusamanyilila naga tuchikola umi soni kola upile wakulola mapulani getu gali mkukwanilichikwa.
13. Ana kungamanyilila yosope yayichitendekwa msogolo kukusatukwaya chamti uli?
13 Yikusaŵa yakusawusya kuti tukomboleje kupilila yakusawusya ligongo lyakuti ngatukusamanyilila yosope yayichitendekwa msogolo. Tukuŵecheta yeleyi ligongo lyakuti patukudandawula mnope ni yindu yayichitendekwa msogolo ngatukusasangalalaga. Paumi wetu yindu mpaka yichenje mwangajembecheya, mwinesoni yakusakala mpaka yitutendechele ndaŵi jilijose. Konjechesya pelepa, naga yindu yatwayijembecheyaga nganiyitendekwa, tukusatenguka.—Mis. 13:12.
14. Ana chichi chachikusatukamuchisya kuŵa ŵakusangalala yisyesyene? (Alolesoni yiwulili.)
14 Chinga tukusimana ni yakusawusya yamti uli paumi wetu, yili yakomboleka kulosya kuti tukusamtumichila Yehofa ligongo lyakumnonyela. Baibulo jikusalosya kuti ngatukusosekwa kwembecheyaga kuti Yehofa chatuchenjeleje pa yakusakala yiliyose yatusimene nayo. Jikusatukamuchisyasoni kumanyilila kuti jwalakwe jwangalinganyila chile yindu yayichitutendechela paumi wetu. Yehofa akusamanyililasoni kuti chisangalalo chatukusakola changadalilaga kumanyilila yayichitutendechela msogolo. Mmalomwakwe, tukusaŵa ŵakusangalala patukusosasosa soni kukuya malangiso gakwe soni patukumpikanila jwalakwejo. (Yel. 10:23) Mwamti patukumdalila mnope Yehofa pa yindu yatukusaka kutenda paumi wetu, yikusaŵa mpela tukuŵecheta maloŵe gakuti, “Naga Yehofa akusaka, malaŵi tuchiŵa ni umi soni tuchitenda yamtiyamti.”—Yak. 4:15.
Kusosasosa malangiso ga Yehofa soni kumpikanila kukusatuchenjela mu yejinji (Alole ndime 14-15)b
15. Ana ni yindu yapi yatukusamanyilila pakwamba ya msogolo?
15 Atamose kuti ngatukusamanyilila yindu yampaka yitutendechele lisiku lililyose, tukusamanyilila kuti Yehofa jwasasile yakuti chachitupa umi wangamala chinga kwinani kapena pachilambopa. Tukusamanyililasoni kuti jwalakwe nganaŵa alambwisye soni kuti pangali champaka chimlepelekasye kukwanilisya yajwasasileyi. (Tit. 1:2) Yehofa jikape ni jwakusapakombola ‘kuŵecheta chile ya kumbesi kutyochela pandanda pene.’ Konjechesya pelepa, jwalakwe jikape ni ‘jwakusayilochesya chile yatiyichitendekwa.’ Yindu yosope yajwasasile Yehofa kuti yichitendekwa munyumamu yatendekwe, mwamti kusogoloku tukwembecheyasoni kuyiwona yindu yosope yajwasasile jwalakwe yili mkutendekwa. (Yes. 46:10) Tukusamanyilila kuti pangali champaka chimlepelekasye Yehofa kutunonyela m’weji. (Alo. 8:35-39) Jwalakwe ali jwakoseka kutupa lunda, kutulimbikasya, soni kutupa machili gatukusosechela kuti tukombole kuyipilila yakusawusya yatusimene nayo. Mwamti kwende ndaŵi syosope tukakayichilaga yakuti Yehofa chachitukamuchisya soni kutupa upile.—Yel. 17:7, 8.
NGANITUŴA TUPIKANICHISYE YAKUSATI YEHOFA PAKUTUMANYILILA M’WEJI
16. Mwakamulana ni Salimo 139:1-6, ana ni yindu yapi yakusamanyilila Yehofa yanganituŵa tuyipikanichisye?
16 Aŵalanje Salimo 139:1-6. Mlungu juŵatupanganyisye akusamanyilila chilichose chakwamba m’weji. Jwalakwe akusamanyilila yayikututendekasya kuganisya m’litala linelyakwe soni mwatukupikanila. Akusamanyililasoni yindu yatukusaŵecheta soni yayili mumtima mwetu. Nambosoni akusamanyilila yiliyose yatukusatendaga soni magongo gatutendele yinduyo. Mwenye Daudi jwasasile kuti ndaŵi syosope Yehofa akusaŵa jwakoseka kutukamuchisya. Kusala yisyene, yili yakulimbikasya kumanyilila kuti Yehofa jwali Ambuje Ŵamachiligosope soni Mlungu juŵapanganyisye kwinani ni chilambo chapasichi akusamanyilila yosope yayikusatutendechela. Daudi jwasasile kuti, “Lunda lwawo lwakumanyilila une luli lwakusimonjeka, soni ngingupakombola kupikanichisya.”—Sal. 139:6.
17. Ligongo chichi ndaŵi sine mpaka tuyiwoneje kuŵa yakusawusya kupikanichisya yakuti Yehofa akusatumanyilila chenene?
17 Ndaŵi sine mpaka yitusawusyeje kumwona Yehofa mpela Atati ŵetu ŵakusatunonyela soni kutusamalila. Yeleyi mpaka yitendekwe ligongo lya yindu yayikusatendekwa mu liŵasa lyetu, ndamo ja kwatwakulile, mwinesoni ligongo lya yindu yatwakulupililaga mkanitutande kumtumichila Yehofa. Kombolekasoni mpaka tutande ganisya kuti Yehofa ngaŵa mkutunonyela ligongo lya yakulemwa yatwatesile kala. Nombe Daudi jwapikanaga myoyo ndaŵi sine. (Sal. 38:18, 21) Nambosoni mundu jwakulingalinga kuchenga umi wakwe kuti akole ndamo syambone mpaka atande kuliwusya kuti, ‘Naga Mlungu akusambikanichisya, ligongo chichi jwalakwejo akusasaka kuti ndeche kutenda yindu yayikusasangalasya?’
18. Ana kulupilila mfundo jakuti Yehofa akusatumanyilila chenene kupunda yatukusati pakulimanyilila achimsyewe kukusatukamuchisya chamti uli? (Alolesoni yiwulili.)
18 Mpaka tukombole kutanda kulupilila mfundo jakuti Yehofa akusatumanyilila chenene kupunda yatukusati pakulimanyilila achimsyewe. Nambosoni mpaka tutande kulupilila mnope mfundo jakuti jwalakwe akusalola yambone mwa m’weji yanganituŵa tuyiweni jika. Yehofa jwangaleka kutunonyela atamose kuti akusayiwona yakulepela yetu. Jwalakwe akusapikanichisyasoni mwatukupikanila nambosoni yayitutendekasisye kutenda yineyakwe. (Alo. 7:15) Mwamti patutandite kulupilila mnope mfundo jakuti Yehofa akusalola yambone mwa m’weji, yikusatukamuchisya kuti tupitilisye kumtumichila mwakulupichika soni mwakusangalala.
Yehofa akusatukamuchisya kukola chikulupi chakulimba mwakutupa chembecheyo cha umi wambone mnope. Mwamti chembecheyochi chikusatukamuchisya kuti tukomboleje kuyipilila yakusawusya (Alole ndime 18-19)c
19. Ana tukusamanyilila chichi pakwamba ya Yehofa?
19 Tukusamanyilila kuti Yehofa ali chinonyelo. Mwamti ngatukusakayichila mfundo jeleji ata panandi. (1 Yoh. 4:8) Tukusamanyilila kuti chinonyelo ni chachikusamtendekasya jwalakwe kutusalila kuti tutendeje yineyakwe kapena kuti tukatendaga. Jwalakwe akusatenda yeleyi ligongo akusasaka kuti yindu yitujendeleje chenene. Yehofa akusasaka kuti chitupate umi wangamala. Mwamti jwatupele mbopesi jakutuwombola kuti yeleyi yikomboleche. Mbopesi jakutuwombolaji jikusatusimichisya kuti mpaka tukombole kupitilisyape kuŵa ŵakulupichika atamose kuti tuli ŵangali umlama. (Alo. 7:24, 25) Tukusamanyililasoni kuti, “Mlungu ali jwamkulungwa kujipunda mitima jetu, soni akusamanyilila yosope.” (1 Yoh. 3:19, 20) Yehofa akusalola yiliyose yakwamba m’weji, mwamti akusayiwona kuti mpaka tukombole kupitilisya kutenda yakusasaka jwalakwejo.
20. Ana chichi champaka chitukamuchisye kuti tukadandawulaga mnope?
20 Yehofa jwangatusisaga yiliyose yatukusasosekwa kuyimanyilila. Kulupilila mfundo jeleji, mpaka kutukamuchisye kuti tukatamilaga kudandawula ligongo lya yindu yangatukuyimanyilila. Mmalomwakwe tuchiganichisyaga mnope yindu yayili yakusosekwa mnope. Patukutenda yeleyi, tuchilosya kuti tukusamdalila mnope Yehofa “jwakusamanyilila yosope.” (Yob. 36:4) Atamose kuti apano tukwete malile ga kapikanichisye ka yindu, tukwembecheya msogolomu ndaŵi jele tuchikola upile wakulijiganya yakwamba Mlungu jwetu mpaka kalakala.—Jwak. 3:11.
NYIMBO NA. 104 Mtuka wa Mlungu wa Msimu Weswela
a Pakuŵa Yesu chachilongolela ngondo ja kuchigomeka chilambo cha Satanachi, yili yakupikanika kusala kuti apano jwalakwe akumanyilila lisiku lya Alamagedo nambosoni ndaŵi jele ‘chachimalisya kugomekako.’—Chiw. 6:2; 19:11-16.
b KULONDESYA YIWULILI : Mtati yimpepe ni mwanache jwakwe jwamlume akuŵika yindu mkachikwama kawo ka pangosi kuti chayikamulichisye masengo pandaŵi jakusawusya.
c KULONDESYA CHIWULILI: M’bale jwakusimana ni yakusawusya, akuganichisya yachachijila pakusangalala mchilambo chasambano.