Yakusatenda Yehofa Pakutukamuchisya Kuti Tupilileje

1. Ligongo chichi tukusasosekwa kuŵa ŵakupilila soni ana ni ŵani ŵampaka atukamuchisye? (1 Petulo 5:10)

M’MASIKU gakumalisya soni gakusawusyaga, ŵakutumichila ŵa Mlungu akusosechela ndamo ja kupilila. Tukuŵecheta yeleyi ligongo lyakuti ŵane aŵele ali mkulwala kwa ndaŵi jelewu, soni ŵane akulaga ni chiwa cha mundu jwakusamnonyela. Nambosoni ŵane akusalagasidwa ni ŵachinasi ŵawo soni ŵakulamulila ŵa boma. (Mat. 10:​18, 36, 37) Atamose yili myoyo, akusosekwa kuŵa ŵakusimichisya kuti Yehofa chachakamuchisya kupilila yakusawusya.—Aŵalanje 1 Petulo 5:10.

2. Ana machili gakutukamuchisya kupilila tukusagapata kwapi?

² Kupilila kukusagopolela ngawujila munyuma soni ngajasa chembecheyo patukusimana ni yipwetesi, patukulagasidwa, kapena patukulinjidwa. Aklistuwe ngatukusakombola kupilila ligongo lya machili getu. Nambo tukusakombola kutenda yeleyi ligongo lya chikamuchisyo cha Yehofa jwakusatupa “machili gakupunda ga ŵandu.” (2 Akoli. 4:7) Munganiji chitukambilane yindu mcheche yatupele Yehofa pakusaka kutukamuchisya kuti tupilileje. Chitukambilanesoni yampaka tutende kuti yinduyi yitukamuchisyeje.

LIPOPELO

3. Ligongo chichi lipopelo lili litala lyakusimonjesya lyakuŵechetanila ni Yehofa?

³ Yehofa jwatupele chindu chakusimonjesya champaka chitukamuchisye kupilila. Atamose kuti tuli ŵakulemwa, jwalakwe jwalinganyisye litala lyakuti yiŵeje yakomboleka kuŵechetana najo. (Aheb. 4:16) Aganichisye ayi. Mpaka tupopele kwa Yehofa ndaŵi jilijose soni mpaka tumsalile ngani jilijose. Nambosoni jwalakwe mpaka atupikane m’chiŵecheto chilichose, soni kulikose kwatuli, chinga kwajika atamosesoni mundende. (Yon. 2:​1, 2; Mase. 16:​25, 26) Atamose payiyikene kuti tukulepela kulilondesya mwatukupikanila mumtima, Yehofa akusamanyililagape yatusachileje kumsalila. (Alo. 8:​26, 27) Kusala yisyene, yili yakusimonjesya kuti mpaka tukombole kupopela kwa Yehofa.

4. Ligongo chichi mpaka tujile kuti mapopelo getu gakuŵenda kuti tupilile gakusaŵa gakamulana ni yakusasaka Yehofa?

⁴ Kupitila m’Baibulo, Yehofa akusatusimichisya kuti “chilichose champaka tuŵende mwakamulana ni yakusasaka jwalakwe, akusatupikanila.” (1 Yoh. 5:14) Nambo ana yili yakomboleka kumŵenda Yehofa kuti atukamuchisye kupilila? Elo mpaka tumŵende, ligongo yeleyo yili yakamulana ni yakusasaka jwalakwe. Tukwanga myoyo ligongo lyakuti, patukukombola kupilila yakusawusya tukusamkamuchisya Yehofa kuti akombole kumjanga Satana jwele akusamnyosya jwalakwejo. (Mis. 27:11) Konjechesya pelepa, Baibulo jikusasala kuti Yehofa ali jwakusachilila “kuti alosye machili gakwe pakwakamuchisya ŵandu ŵakusamtumichila jwalakwejo ni mtima wosope.” (2 Mbi. 16:9) Myoyo, tukakayichila kuti Yehofa akwete machili soni ali jwakusachilila kutukamuchisya kupilila.—Yes. 30:18; 41:10; Luk. 11:13.

5. Ana lipopelo mpaka litukamuchisye chamti uli kola mtendele wa mumtima? (Yesaya 26:3)

⁵ Baibulo jikusasala kuti patumsalile Yehofa yakudandawula yetu, “mtendele wa Mlungu wele ukusapunda kupikanichisya yindu kulikose wuchichenjela mitima [jetu].” (Afil. 4:7) Mwamti kumanyilila yeleyi kukusatutendekasya kuti tumyamichileje Yehofa. Ŵandu ŵangakusamtumichilaga Yehofa pasimene ni yakusawusya, akusatenda yakulekanganalekangana kuti akole mtendele wa mumtima. Mwachisyasyo, ŵane akusakamulichisya masengo mitela jakusokonasya mtwe soni ukana kuti amalane ni yayikwalagasya nganisyo. Nambotu kutenda yeleyi mpaka kusokonasye unasi wetu ni Yehofa. (Alole yayili pa Mateyu 12:​43-45.) Konjechesya pelepa, mtendele watukusawupata patupopesile kwa Yehofa, ukusawa wambone mnope kupunda mtendele uliwose wampaka awupate mundu ligongo lyakukamulichisya masengo mitela jakusokonasya mtwe. Mwamti patukupopela kwa Yehofa, tukusalosya kuti tukusamkulupilila mnope jwalakwe yayikusatendekasya kuti Yehofajo apitilisye kutupa “mtendele usyesyene.” (Aŵalanje Yesaya 26:3.) Litala limo lyakusatendela yeleyi lili kutukumbusya lilemba linelyakwe lyampaka litulimbikasye. Mwamti malembaga gakusatutamika mtima pasi ligongo gakusatukumbusya yakusati Yehofa pakutunonyela soni pakutukamuchisya.—Sal. 62:​1, 2.

6. Ana mpaka apwatiche yindu yapi pakupopela? (Alolesoni chiwulili.)

⁶ Yampaka atende. Pakusimana ni yakusawusya, ‘amtulileje [Yehofa] yakudandawula yawo’ soni amŵendeje kuti ŵape mtendele wakwe. (Sal. 55:22) Amŵendejesoni Yehofa kuti ŵape lunda lwakamuchisya kulimbana ni yakusawusya yawo. (Mis. 2:​10, 11) Pakupeleka mapopelo gakumchondelela Yehofa kuti ŵakamuchisye kupilila yakusawusya yawo, akumbuchilejesoni kupeleka mapopelo gakuyamichila. (Afil. 4:6) Alinjeje kuganichisya yakutenda Yehofa pakwakamuchisya kuti apilile yakusawusya yawo. Kaneko amyamichileje jwalakwejo pachikamuchisyo chiŵapelecho. Akakunda yakusawusya yakusimana nayo kwalepelekasya kulola yindu yambone yajwapele kala Yehofa.—Sal. 16:​5, 6.

MALOŴE GA MLUNGU

7. Ana kulijiganya Baibulo mpaka kutukamuchisye chamti uli kupilila?

⁷ Yehofa atupele Maloŵe gakwe kuti gatukamuchisyeje kupilila. M’Baibulo mwana malemba gejinji gagakusatusimichisya kuti Yehofa akusaŵa jwakoseka kutukamuchisya. Aganichisye ya lilemba lya Mateyu 6:8 lyalikusati, “Atati ŵenu akusamanyilila yamkusaka jemanja mkanimwaŵende.” Maloŵega gaŵechetedwe ni Yesu soni jwalakwe ni jwakusammanyilila Yehofa kupunda mundu jwalijose. Myoyo, tukakayichilaga kuti Yehofa akusamanyilila yakusawusya yatukusimana nayo soni kuti chachitukamuchisya. Mwamti m’Baibulo, mwana malemba gejinji gampaka gatukamuchisye kupilila.—Sal. 94:19.

8. Asale mfundo jimpepe ja m’Baibulo jampaka jitukamuchisye kupilila. (b) Ana ni chichi champaka chitukamuchisye kukumbuchila mfundo sya m’Baibulo?

⁸ Mfundo sya m’Baibulo mpaka situkamuchisye kupilila. Mwamti mfundosi mpaka situkamuchisye kupata lunda lwakutukamuchisya kusagula yindu mwalunda. (Mis. 2:​6, 7) Mwachisyasyo, Baibulo jikusatulimbikasya kuti tulimbaneje ni yakusawusya ya palisikulyo mmalo mwakudandawula ni yindu yachiyitendekwe malaŵi. (Mat. 6:34) Myoyo, naga tukusanonyela kuŵalanga Baibulo lisiku lililyose soni kuganichisyaga yatuŵalasileyo, yichiŵa yangasawusya kukumbuchila mfundo syampaka situkamuchisyeje kupilila.

9. Ana ngani syatukusaŵalanga m’Baibulo sikusatukamuchisya mwamtuli kulupilila kuti Yehofa chachitukamuchisya?

⁹ M’Baibulo mwanasoni ngani sisyesyene syakwamba ŵandu ŵaŵamkulupililaga Yehofa soni ŵaŵapochele chikamuchisyo chakwe. (Aheb. 11:​32-34; Yak. 5:17) Patukuganichisya yisyasyo ya ŵanduŵa, yikusatukamuchisya kulupilila kuti Yehofa ali “malo getu gakutilila soni machili getu. Kwa jwalakwe ni kwampaka tupate chikamuchisyo mwangasawusya mundaŵi ja yipwetesi.” (Sal. 46:1) Mwamti patukulola kulupichika kwa jemanjaji, yikusatulimbikasya kuti tusyasyeje kulupichika soni kupilila kwawo.—Yak. 5:​10, 11.

10. Ana mpaka atende chichi kuti yakusaŵalangaga m’Baibulo yakamuchisyeje mnope?

¹⁰ Yampaka atende. Aŵalanjeje Baibulo lisiku lililyose soni asunjeje malemba gakusagawona kuti gakusigakamuchisyaga. Ŵane ayiweni kuŵa yakamuchisya kutanda lisiku mwakukambilana mfundo jakulimbikasya kutyochela mu lilemba lyesiku. Mwamti mlongo Mariea jwayiweni yeleyi kuŵa yakamuchisya pandaŵi jele achinangolo ŵakwe wosope ŵapatile ni ulwele wa kansa. Ana ni chichi chachamkamuchisye kupilila, achinangolo ŵakwewo ali asigele panandi kuwa? Jwalakwe jwatite, “Kundaŵi kulikose naŵalangaga ndemanga sya m’buku ja Kulijiganya Malemba Lisiku Lililyose soni naganichisyaga yambalasileyo. Kutenda yeleyi, kwangamuchisyaga kuti nganichisyeje mnope ya Yehofa soni ya yindu yambone yakusatujiganya kupitila m’Baibulo mmalo mwagamba ganichisya ya yakusawusya yangu.”—Sal. 61:2.

AKLISTU ACHIMJETU

11. Ana kumanyilila kuti nganituŵa jika ŵatukupilila yakusawusya kukusatulimbikasya chamti uli?

¹¹ Pachilambo chosope, Yehofa atupele abale ni alongo ŵetu pakusaka kutukamuchisya kuti tupilileje. Mwamti tukusalimba mtima patumanyilile kuti ‘achalongo achimjetu pachilambo chosope akusimanasoni ni yakusawusya yakulandana ni yatukusimana nayo m’weji.’ (1 Pet. 5:9) Kusala yisyene, yakusawusya yiliyose yampaka tusimane nayo, yikusaŵa kuti nombenawo Aklistu achimjetu pakwete pasimene nayo soni ŵakombwele kuyipilila. Mwamti yeleyi yikulosya kuti nombe m’weji mpaka tupilile.—Mase. 14:22.

12. Ana Aklistu achimjetu mpaka atukamuchisye chamti uli soni ana m’weji mpaka twakamuchisye uli? (2 Akolinto 1:​3, 4)

¹² Aklistu achimjetu mpaka atukamuchisye kuti tukombole kupilila. Yeleyi ni yayamtendechelesoni ndumetume Paulo. Jwalakwe pajwaliji mundende, Aklistu achimjakwe ŵamlimbikasyaga soni ŵampaga yindu yajwasosechelaga. Mwamti kwa maulendo gejinji, Paulo jwayamichilaga Aklistu achimjakweŵa mwakwakolanga mena gawo. (Afil. 2:​25, 29, 30; Akolo. 4:​10, 11) Masiku aganosoni, abale ni alongo mpaka atukamuchisye pandaŵi jatukusosechela chikamuchisyo chawo. Nombenawo pasimene ni yakusawusya, m’wejosoni mpaka twatendele yakulandanayo.—Aŵalanje 2 Akolinto 1:​3, 4.

13. Ana ni chichi chachamkamuchisye Mlongo Maya kupilila?

¹³ Mu 2020, ŵapolisi wajinjile m’nyumba ja Mlongo Maya jwa ku Russia ni kutanda kuwungunya yindu. Kaneko ŵamjigele ni kumjawusya ku luŵala lwamagambo kuti akajanje magambo. Kumagamboko jwasosekwaga kuchenjela yakusakulupilila. Pandaŵiji, Mlongo Maya jwasasile kuti abale ni alongo ni ŵaŵamlimbikasisye mnope. Jwalakwe jwatite, “Pandaŵi janalagasikaga mnope nganisyo, abale ni alongo ŵanjimbilaga foni soni kulembela yikalata yakulosya kuti akusanonyela mnope. Kutandila ni kala kose, namanyililaga kuti abale ni alongo akusanonyelaga mnope soni kuti tuli liŵasa limpepe. Nambo yayatendekwe mu 2020, yangamuchisye kusimichisya ya yeleyi.”

14. Ana mpaka tutende chichi kuti abale ni alongo wetu atukamuchisyeje kupilila? (Alolesoni chiwulili.)

¹⁴ Yampaka atende. Akaleka kutenda yindu ni Aklistu achimjawo pakulingalinga kuyipilila yakusawusya yawo. Mpaka atende chenenesoni kwaŵenda achakulungwa wa mumpingo kuti ŵakamuchisye. Jemanjaji ali ‘mpela malo gakutilila mbepo soni gakulijuŵisya ku chimbunga.’ (Yes. 32:2) Akumbuchilejesoni kuti Aklistu achimjawo akupilila yakusawusya yakulekanganalekangana. Myoyo kwatendela ŵane yambone kuchakamuchisya kuŵa ŵakusangalala soni chachikombola kupilila.—Mase. 20:35.

CHEMBECHEYO CHATUKWETE

15. Ana chembecheyo chamkamuchisye chamti uli Yesu soni mpaka chitukamuchisye chamti uli m’weji? (Ahebeli 12:2)

¹⁵ Yehofa atupele chembecheyo chisyesyene chachikusatukamuchisya kuti tupilileje. (Alo. 15:13) Mwamti chembecheyochi ni chachamkamuchisye Yesu kupilila pa lisiku lyakusawusya mnope paumi wakwe pachilambopa. (Aŵalanje Ahebeli 12:2.) Yesu jwamanyililaga kuti lina lya Yehofa mpaka lichimbichikwe naga akuŵape jwakulupichika. Kupwatika pelepa, jwalakwe jwajembecheyaga kuwujilasoni kwinani ni kuja kutama ni Atati ŵakwe soni kutumichilaga yalumo ni ŵasagulwe mu Uchimwene wakwinani. Mwakulandana ni yeleyi, kwembecheya kuti tuchitama ni umi mpaka kalakala, kukusatukamuchisya kuti tupilileje yakusawusya m’chilambo cha Satanachi.

16. Ana chembecheyo chamkamuchisye chamti uli mlongo jwine, soni ana yajwaŵechete mlongoju yajiganyisye chichi?

¹⁶ Alole yachatite chembecheyo pakumkamuchisya Mlongo Alla jwa ku Russia jwele ŵamkwakwe ŵataŵidwe soni ŵajembecheyaga kwajimba magambo. Yeleyi yili yigambile kutendekwa, Mlongo Alla jwatite, “Kupopelela soni kuyiganichisya yindu yatukwembecheya kusogolo ni yayangamuchisyaga kuti ngatengukaga mnope. Nambosoni ngumanyilila kuti yakusawusyayi nganiyiŵa mbesi ja yosope. Mwamti pachangakaŵapa Yehofa soni m’weji tuchipunda.”

17. Ana mpaka tulosye chamti uli kuti tukusayamichila mnope chembecheyo chatukwete? (Alolesoni chiwulili.)

¹⁷ Yampaka atende. Apateje ndaŵi jakuganichisya yindu yambone yatusunjile Yehofa kusogoloku. Aliwanichisyeje ali m’chilambo chasambano ni kuganichisya muchachisangalalilaga ni upile watuchipata. Naga akutenda yeleyi, chachiyiwona kuti yakusawusya yakusimana nayo apano yili “yakandaŵi soni nganiyiŵa yekulungwa mnope.” (2 Akoli. 4:17) Nambosoni atendeje yampaka akombole pakwasalila ŵane yakusakulupilila. Agambe ganisya mwayiŵelele yindu kwa ŵandu ŵangakusamtumichilaga Yehofa. Jemanjajo akulimbana ni yakusawusya ya m’chilambo cha Satanachi ali ŵangali chembecheyo chilichose chakuti Mlungu chachimasya yakusawusya yawo. Myoyo, atamose kwamba kwasalila yamnono, mpaka yakamuchisye kusachilila kumanyilila yakwamba Uchimwene wa Mlungu.

18. Ligongo chichi mpaka tukulupilileje yindu yajwasasile Yehofa kuti chachiyitenda?

¹⁸ Panyuma pakuti Yobu apilile yakusawusya yosope mwakulupichika, jwamsalile Yehofa kuti, “Sambano une manyilile kuti wawojo akusakombola kutenda yindu yosope soni pangali chindu chilichose champaka asache kutenda chele wawojo nganaŵa achikombwele.” (Yob. 42:2) Pelepatu Yobu jwalijiganyisye kuti pangali chilichose champaka chimlepelekasye Mlungu kukwanilisya chakulinga chakwe. Mwamti kumbuchila mfundoji mpaka kutukamuchisye kupilila yakusawusya yetu. Mwachisyasyo, tuwanichisye kuti msimayi jwine jwakulwala, jutengwiche mnope ligongo lyakuti madokotala gejinji galepele kumposya. Nambo pasimene ni dokotala jwakumanyilila chenene masengo akupata chachikumsawusya soni akumsalila yachajile pakumkamuchisya kuti apole. Atamose kuti msimayiju nganapola pandaŵi jijiji, nambo yapikeneyi yikumtendekasya kuŵa jwakusangalala. Jwalakwe mpaka apilile ligongo lyakuti ngakukayichila kuti chapole. Mwakulandana ni yeleyi, kulupilila mnope ya chembecheyo chetu cha paladaiso kukusatukamuchisya kuti tupilileje.

19. Ana tukusosekwa kutenda chichi kuti tukomboleje kupilila?

¹⁹ Munganiji, tuyiweni kuti Yehofa akusatukamuchisya kuti tupilileje yakusawusya mwakutupa upile wa lipopelo, Baibulo, Aklistu achimjetu soni chembecheyo. Myoyo, naga tukukamulichisya masengo yinduyi, nikuti Yehofa chachipitilisya kutukamuchisya pachakusawusya chilichose mpaka pajichiyika ndaŵi jele chilambo cha Satanachi chichimala.—Afil. 4:13.