Yehofa ni Jwakusatutendekasya Kuŵa ‘Ŵakusangalala Mnope’

1-2. (a) Ana ŵandu ŵajinji masiku agano akusimana ni yamti uli? (b) Ana chitukambilane chichi munganiji?

ŴANDU ŵajinji masiku agano akusatenda yiliyose yakomboleka pakusaka kusangalala. Atamose kuti akusatendaga yeleyi, jemanjaji ŵangasangalalaga. Ŵajinji mwa jemanjaji akusadandawulaga mnope soni akusayiwona kuti yindu nganiyiŵa yijesilesoni chenene paumi wawo. Nombenawo ŵakutumichila ŵa Yehofa ŵane akusalipikanaga m’litala lyeleli. Mwamti ligongo lyakuti tuli ‘m’masiku gakumalisya’ tukusosekwa kwembecheya kuti chitusimaneje ni yindu ‘yakusawusya.’—2 Tim. 3:1.

² Munganiji chitukambilane yindu yampaka yitutendekasye kuti tukasangalalaga soni yampaka tutende kuti tutandilesoni kusangalala. Nambo chandanda tukusosekwa kummanyilila jwampaka atutendekasye kuti tusangalaleje yisyesyene.

YEHOFA NI JWAMPAKA ATUTENDEKASYE KUŴA ŴAKUSANGALALA YISYESYENE

3. Ana yakupanganyidwa yikusatujiganya chichi pakwamba ya Yehofa? (Alolesoni yiwulili.)

³ Yehofa akusaŵa jwakusangalala ndaŵi syosope. Mwamti akusasaka kuti m’wejisoni tusangalaleje. Yakuti Yehofa ali jwakusangalala yikusawonechela chenene mu yindu yaŵapanganyisye. Tukusayiwona yeleyi m’chilambo chakusalala chatukutamachi, m’mitundu jakulekanganalekangana jatukusajiwona, kusangalasya kwa yinyama payikung’anda, soni yakulya yejinji yakunong’a. Mwamti yindu yeleyi yikusalosya kuti Mlungu akusatunonyela soni akusasaka kuti tusangalaleje.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Ana yikusakomboleka wuli Yehofa kuŵa jwakusangalala atamose kuti akusayiwona yakusawusya? (b) Ana Yehofa atupele mtuka wamti uli? (Salimo 16:11)

⁴ Atamose kuti Yehofa ali “Mlungu jwakusangalala,” jwalakwe akusamanyilila chenene yakusawusya yayili pachilambopa. (1 Tim. 1:11) Nambope jwalakwe jwangakunda yakusawusyayi kumtendekasya kuŵa jwangasangalala. Jwalakwe akusamanyilila kuti yakusawusyayi yili ya kandaŵi kamnono. Mwamti alinganyisye lisiku lyachachimasya yakusawusya yosopeyi. Jwalakwe akutenda yindu mwakuwusimana mtima pakwembecheya ndaŵi jeleji. Apano Yehofa akusapikanichisya yakusawusya yatukusimana nayo soni akusasaka kutukamuchisya. Ana jwalakwe akusatukamuchisya chamti uli? Litala limo lyakusatendela yeleyi lili kutukamuchisya kuŵa ŵakusangalala. (Aŵalanje Salimo 16:11.) Kwende sambano tulole yayamkamuchisye Yesu kuŵa jwakusangalala.

5-6. Ligongo chichi Yesu ali jwakusangalala?

⁵ Yesu ali jwakusangalala mnope kupunda yindu yosope yiŵapanganyisye Mlungu. Ligongo chichi yili myoyo? Aganichisye yindu yiŵili ayi. (1) “Jwalakwe ali chiwanichisyo cha Mlungu jwangawonekajo” soni akusalosya chenene ndamo syakwete Atati ŵakwe. (Akolo. 1:15; 1 Tim. 6:15) (2) Kwandaŵi jelewu Yesu aŵele ali mkutama ni Atati ŵakwe ŵakusiŵatendekasya ŵandu kuŵa ŵakusangalala.

⁶ Ndaŵi syosope Yesu akusaŵaga jwakusangalala ligongo lyakuti akusatenda yiliyose yamsalile Atati ŵakwe. (Mis. 8:​30, 31; Yoh. 8:29) Ligongo lyakuti ndaŵi syosope akusaŵaga jwakulupichika, Yehofa akusasangalalaga najo.—Mat. 3:17.

7. Ana mpaka tutende chichi kuti tusangalaleje yisyesyene?

⁷ M’wejisoni mpaka tuŵe ŵakusangalala yisyesyene naga tukuŵa paunasi wambone ni Yehofa. Mwamti patukumalila ndaŵi jejinji tuli mkulijiganya yakwamba Yehofa soni kumsyasya jwalakwe, ni patukusaŵagasoni ŵakusangalala mnope. Tuchiŵasoni ŵakusangalala patukutenda yakusasaka Mlungu soni patukumanyilila kuti jwalakwe akusangalala ni m’weji.a (Sal. 33:12) Nambi uli naga ndaŵi sine kapena ndaŵi syosope ngatukusaŵaga ŵakusangalala? Ana yeleyi yikusagopolela kuti Yehofa ngakusangalala ni m’weji? Ngaŵa myoyo. Ligongo lyakuti tuli ŵangali umlama soni tukutama m’chilambo chakusakalachi, Yehofa akusamanyililaga kuti mpaka tupikaneje kupweteka, kudandawula, soni kulagasika nganisyo. (Sal. 103:14) Kwende sambano tukambilane yindu yampaka yitutendekasye kuti tukasangalalaga soni kulola yampaka tutende kuti tutandilesoni kusangalala.

AKAKUNDAGA CHILICHOSE KWATENDEKASYA KUŴA ŴANGASANGALALA

8. Ana yakusawusya yatukusasimana nayo mpaka yitukwaye chamti uli?

⁸ Patukusimana ni yakusawusya. Ana wawojo akulagasidwa, asimene ni ngosi syachilengedwe, akulwala, kapena akulaga ligongo lya uchekulu? Yakusawusya mpela yeleyi mpaka yitutendekasye kuŵa ŵangasangalala mnopemnope patukuyiwona kuti pangali champaka tutende. Mwamti atamose Baibulo jasasile kuti “mtima wekasiche ukusamtendekasya mundu kuwupikana umi kupweteka.” (Mis. 15:13) Jwamkulungwa jwa mumpingo jwine lina lyakwe Babis, jwele mchimwenegwe soni achinangolo ŵakwe wosope ŵajasiche m’yaka mcheche yakulundana, jwatite, “Natendaga lipowo soni nayiwonaga kuti pangali jwampaka angamuchisye. Mwamti ndaŵi sine nalijimbaga magambo kuti nalepele kwakamuchisya chenene achinangolo ŵanguwo soni achimwenewo ligongo lyakuti nakolaga yakutenda yejinji.” Kusala yisyene, yakusawusya yatukusasimana nayo mpaka yitumalile machili soni kututengusya.

9. Ana chichi champaka chitukamuchisye kutandilasoni kusangalala? (Yelemiya 29:​4-7, 10)

⁹ Champaka chitukamuchisye kutandilasoni kusangalala. Mpaka tutandilesoni kusangalala naga tukwitichisya mwayiŵelele yindu ni kuŵaga ŵakuyamichila. Kuchilamboku ŵandu akusasala kuti mundu mpaka aŵe jwakusangalala naga yindu pa umi wakwe yikutendekwa mwakusachila jwalakwejo. Nambotu yeleyi nganiyiŵa yisyene. Mwachisyasyo, Yehofa jwasalile Ayisalayeli ŵaŵaliji ku ukapolo ku Babulo kwitichisya ndamo jawo jasambanojo soni kutenda yampaka akombole kuti asangalaleje. (Aŵalanje Yelemiya 29:​4-7, 10.) Ana tukulijiganya chichi pelepa? Ajitichisyeje mwayiŵelele yindu paumi wawo, soni ayamichileje yindu yambone yayikwatendechela. Akumbuchilejesoni kuti Yehofa nganaŵa alesile kwakamuchisya wawojo. (Sal. 63:7; 146:5) Mlongo jwine lina lyakwe Efe, juŵalemele ligongo lyakutenda ngosi jwatite, “Napochelaga chikamuchisyo kutyochela kwa Yehofa, kwa ŵandu ŵa m’liŵasa mwangu, soni kwa abale ni alongo. Myoyo, namanyilile kuti mpaka kuŵe kungayamika naga ngupitilisyape kudandawula. Mwamti ngusasaka kulosya kuyamichila kwangu kwa Yehofa soni achimjangu mwakupitilisyape kuŵa jwakusangalala.”

10. Ligongo chichi yili yakomboleka kuŵa ŵakusangalala atamose patukusimana ni yakusawusya?

¹⁰ Yili yakomboleka kusangalalagape atamose pandaŵi jele ŵa mwiŵasa mwetu kapena m’weji tukusimana ni yakusawusya.b (Sal. 126:5) Yili myoyo ligongo lyakuti kusangalala kusyesyene kwangadalilaga mwayiŵelele yindu paumi wetu. Mpayiniya jwine lina lyakwe Maria jwatite, “Patukusimana ni yakusawusya nambo ni kuŵagape ŵakusangalala yangagopolelaga kuti ngatulosyaga mwatukupikanila mumtima. Mmalomwakwe, yikusagamba kulosya kuti tukukumbuchilape yindu yaŵasasile Yehofa kuti chachitutendela. Mwamti Yehofa chachitukamuchisya kuti tukaleka kusangalala.” Myoyo akusosekwa kukumbuchila kuti yakusawusya yiliyose yakusimana nayo apano yili yakandaŵi kamnono basi. Mwamti pachangakaŵa yakusawusya yosopeyeneyi chiyimale.

11. Ana chisyasyo cha ndumetume Paulo chalimbikasisye chamti uli wawojo?

¹¹ Nambi uli naga tutandite kuganisya kuti tukusimana ni yakusawusya ligongo lyakuti Yehofa alesile kutukamuchisya? Kuganichisya yisyasyo ya ŵakutumichila ŵa Yehofa ŵakulupichika ŵaŵasimene ni yakusawusya yekulungwa mpaka kutukamuchisye. Aganichisye chisyasyo cha ndumetume Paulo. Yesu ŵamsagwile jwalakwe kuti akalalichile ngani syambone “ku mitundu jine nambosoni kwa mamwenye ni kwa ŵanache ŵa Yisalayeli.” (Mase. 9:15) Kusala yisyene, welewutu waliji upile wekulungwa. Atamose yaliji myoyo, Paulo jwasimanaga ni yakusawusya yejinji. (2 Akoli. 11:​23-27) Ana yakusawusya yajwasimanaga nayo Pauloyi yalosyaga kuti Yehofa alesile kumkamuchisya? Iyayi. Mwamti kupilila kwakwe kwagambaga kulosya kuti Yehofa akumpa upile. (Alo. 5:​3-5) Sambano aganichisye yakusawusya yakusimana nayo wawojo. Atamose kuti akusimana ni yakusawusya yejinji, nambope akukombola kuyipilila mwakulupichika. Mwamti welewusoni uli umboni wakulosya kuti Yehofa nganaleka kwakamuchisya wawojo.

12. Ana kulepelechekwa kwa yindu yatwayijembecheyaga mpaka kututendekasye chamti uli kuleka kusangalala?

¹² Kulepelechekwa kwa yindu yatwayijembecheyaga. (Mis. 13:12) Kumnonyela Yehofa soni kuyamichila yindu yakusatutendelaga kukusatutendekasya kusaka kutenda yejinji pakumtumichila jwalakwe. Nambope, mpaka tutenguche naga tukuliŵichila yakulinga yanganituŵa tukombwele kuyikwanilisya. (Mis. 17:22) Mpayiniya jwine lina lyakwe Holly jwatite, “Nasakaga kwinjila Sukulu ja Ŵakulalichila ya Uchimwene kuti ngatumichileje m’chilambo chine kapena kuja kukamuchisya nawo pa masengo ga yakutaŵataŵa ku Ramapo. Nambo yindu yachenjile paumi wangu, mwamti ngamkaningombola kukwanilisya yakulinga yanguyi. Kusala yisyene natengwiche mnope. Mwamti yikusaŵa yakutengusya mnope pawukulepela kukwanilisya yakulinga yawukwete.” Yeleyitu yikusiyatendechela ŵajinji.

13. Ana mpaka tuliŵichile yakulinga yamti uli naga ndamo ngajikutukunda kutenda yineyakwe?

¹³ Champaka chitukamuchisye kutandilasoni kusangalala. Tukumbuchileje kuti Yehofa jwangatulamulaga kutenda yindu yanganituŵa tukombwele. Nambosoni jwalakwe jwangatuwonaga kuti tuli ŵakusosekwa mnope ligongo lyakuti tukutenda yejinji pakumtumichila. Yakusasaka Yehofa yili yakuti tuŵeje ŵakulinandiya soni ŵakulupichika. (Mik. 6:8; 1 Akoli. 4:2) Yakusalola mnope jwalakwe yili mwatuŵelele m’weji ngaŵaga yatukukombola kutenda. Sano ana mpaka yiŵe yakupikanika kuti m’weji tusachilileje kutenda yejinji kupunda yakusajembecheya Yehofa kwa m’wejo? Iyayi. Myoyo naga ngakukombola kutenda yejinji pakumtumichila Yehofa, mpaka atende chenene kutendaga yampaka akombole. Ana wawojo mpaka alinganye yakuti ŵakamuchisyeje lunda ŵachinyamata kapena kwalimbikasya ŵachikulile? Mwine mpaka alinganye yakumjendela mundu jwine, kapena kumjimbila foni, mwinesoni kumlembela utenga kuti amlimbikasye. Mwamti pakulingalinga kuliŵichila yakulinga yampaka ayikwanilisye, Yehofa chachakamuchisya kuŵa ŵakusangalala. Nambosoni akumbuchileje kuti pachangakaŵapa m’chilambo chasambano, jwalijose chachikola upile wakumtumichila Yehofa mwakusachila. Mwamti yeleyi ni yayamlimbikasisye Mlongo Holly jwatumkolasile jula. Jwalakwe jwatite, “Pandengwiche ngusajima kaje ni kuganichisya yakuti chinjitama ni umi mpaka kalakala. Mwamti ngusayiwona kuti chinjikola upile wakukwanilisya yakulinga yangu m’chilambo chasambano.”

14. Ana ni chindu chine chapi champaka chitutendekasye kuŵa ŵangasangalala?

¹⁴ Kutamila kutenda yindu yakulisangalasya. Ŵandu ŵane akusakamulichisya masengo malo gakunguluchila ga pa intaneti pakulimbikasya nganisyo syakuti kusangalala kusyesyene kukusayika ligongo lyakutenda yindu yakulisangalasya. Mwamti mpaka tutande kuyiwona kuti naga tukutenda yakusangalasya, kusuma yindu yatukusaka, soni kwawula kumalo gakulekanganalekangana mpaka yitutendekasyeje kuŵa ŵakusangalala mnope. Yisyene kuti nganikuŵa kulemwa kusangalala ni yindu yeleyi. Mwamti Yehofa jwatupanganyisye kuti tusangalaleje ni yindu yakusangalasya. Nambope, ŵajinji ayikopochele kuti yindu yaŵaganisyaga kuti mpaka yatendekasye kusangalala mnope ni yayikusiyatendekasya kuŵa ŵangasangalala. Mlongo Eva jwelesoni ali mpayiniya jwatite, “Naga ukusatamila kuganichisya yakutenda yindu yakulisangalasya ukusaŵa kapolo jwa yeleyo.” Mwamti naga tukutamila kutenda yindu yakulisangalasya tuchiŵa ŵangasangalala soni ŵakutenguka.

15. Ana mpaka tulijiganye chichi kutyochela kwa Mwenye Solomoni?

¹⁵ Yayamtendechele Mwenye Solomoni mpaka yitujiganye kusakala kwakutamila kutenda yindu yakulisangalasya. Jwalakwe jwayiwonaga kuti mpaka aŵe jwakusangalala naga akutenda chilichose chakusaka mpela kulya yakulya yakunong’a, kupikanila nyimbo syakusangalasya, soni kusuma chilichose chiŵachisakaga. Nambo pambesi pakwe, jwaŵele jwangasangalala. Mwamti jwalakwe jwatite, “Liso lyangajikutila ni kulola. Atamose mawiwi gangajikutila ni kupikana.” (Jwak. 1:8; 2:​1-11) Ŵane akusaganisya kuti mpaka aŵe ŵakusangalala naga akwete mbiya soni kutendaga yiliyose yakusaka. Nambotu nganisyo syelesi sili syaunami, ligongo yindu yeleyi nganiyiŵa yimtendekasisye mundu kuŵa jwakusangalala yisyesyene.

16. Ana kupeleka mpaka kutukamuchisye chamti uli kutandilasoni kusangalala? (Alolesoni yiwulili.)

¹⁶ Champaka chitukamuchisye kutandilasoni kusangalala. Yesu jwasasile kuti, “Kupeleka kukusamtendekasya mundu kuŵa jwakusangalala mnope kulekangana ni kupochela.” (Mase. 20:35) Jwamkulungwa jwa mumpingo jwine lina lyakwe Alekos jwatite, “Ngusanonyela kutenda yindu yamwanamwana pakusaka kwakamuchisya ŵane. Mwamti pangulingalinga kutenda yeleyi ngusaleka kuliganichisya jikape soni ngusaŵaga jwakusangalala.” Ana wawojo mpaka ŵakamuchisye chamti uli ŵane? Naga am’weni mundu jwine ali mkulaga mpaka amlimbikasye. Komboleka kuti mwine nganaŵa akombwele kumasya yakusawusya yakwe. Nambope mpaka amlimbikasye jwalakwejo mwakumpikanila pakuŵecheta, mwakumlosya chinonyelo, soni mwakumkumbusya kuti amsalileje Yehofa yakusawusya yakwe. (Sal. 55:22; 68:19) Mpaka amkumbusyesoni kuti Yehofa nganamleka jwalakwejo. (Sal. 37:28; Yes. 59:1) Mpaka amkamuchisye jwalakwe mwakumtendela yindu yine mpela kumtelechela yakulya kapena kwawula yimpepe kumalo ganegakwe. Mwinesoni mpaka amŵende jwalakwejo kuti ajende najo mu utumiki, yampaka yimtendekasye kuŵa jwakusangalala. Amkundeje Yehofa kuti ŵakamulichisyeje masengo wawojo pakwalimbikasya ŵane. Mwamti patukumalila ndaŵi jetu pakwakamuchisya ŵane tuchiŵa ŵakusangalala yisyesyene.—Mis. 11:25.

17. Ana tukusosekwa kutenda chichi kuti tusangalaleje yisyesyene? (Salimo 43:4)

¹⁷ Mpaka tuŵe ŵakusangalala yisyesyene naga tukuŵa paunasi wambone mnope ni Atati ŵetu ŵakwinani. Mwamti Baibulo jikusatusimichisya kuti Yehofa ni ‘jwakusatutendekasya kuŵa ŵakusangalala mnope.’ (Aŵalanje Salimo 43:4.) Myoyo chinga tukusimana ni yakusawusya yamti uli, ngatukusosekwa kutendaga woga. Kusala yisyene, naga tukulingalinga kuŵa paunasi wambone ni Yehofa, jwalakwe chachitukamuchisya kuŵa ŵakusangalala mpaka kalakala.—Sal. 144:15.