“Mmwejo Mli Mundu Jwakusosekwa Mnope”

1-2. Ana ni chichi champaka chitukamuchisye kusimichisya kuti tuli ŵakusosekwa mnope kwa Yehofa?

PASIKATI pa ŵakutumichila ŵa Yehofa pana ŵane ŵakusaliwona kuti nganaŵa ŵakusosekwa mnope. Komboleka jemanjaji akusalipikana myoyo ligongo lyakuti ŵane ŵatendele yangali chilungamo. Ana wawojosoni ndaŵi sine akusalipikana myoyo? Naga yili myoyo, ana ni chichi champaka chakamuchisye kusimichisya kuti Yehofa akusiŵawona kuŵa ŵakusosekwa mnope?

² Chindu chimo champaka chakamuchisye chili kuŵalanga ngani sya m’Baibulo syasikusalosya yakusasaka Yehofa kuti ŵandu atendeledweje. Yesu jwanonyelaga soni kwachimbichisya ŵandu. Mwakutenda yeleyi, jwalakwe pampepe ni Atati ŵakwe ŵakwinani ŵalosisye kuti ŵandu ŵakulinandiya ŵakusaliwona kuti ali ŵangasosekwa mnope, ali ŵakusosekwa mnope kwa jemanjaji. (Yoh. 5:19; Aheb. 1:3) Munganiji, chitukambilane (1) yaŵatite Yesu pakwakamuchisya ŵandu kuti aliwoneje kuŵa ŵakusosekwa soni (2) yampaka tutende kuti tusimichisye kuti Mlungu akusatuwona kuŵa ŵakusosekwa mnope.—Hag. 2:7.

YAŴATITE YESU PAKWAKAMUCHISYA ŴANDU KUTI ALIWONEJE KUŴA ŴAKUSOSEKWA

3. Ana Yesu ŵakamuchisye wuli ŵandu ŵa ku Galileya ŵaŵasosekwaga chikamuchisyo?

³ Yesu paŵalalichilaga ku Galileya, ŵandu ŵakutyochela ku madela gakulekanganalekangana ŵayikaga kwa jwalakwe kuti apikanile utenga wakwe soni jwalakwe ŵaposyaga maulwele gawo. Yesu jwayikopochele kuti “ŵanduwo ŵaliji ŵagwaguchegwaguche soni ŵakwasika mpela ngondolo syangali m’busa.” (Mat. 9:36) Achimlongola ŵa dini ŵawonaga ŵanduŵa kuŵa ŵangasosekwa mnope mwamti ŵakolangaga kuti “ali ŵalweseche.” (Yoh. 7:​47-49) Nambo Yesu jwatendaga yindu mwachinonyelo ni jemanjaji mwakwajiganya soni kwaposya maulwele gawo gakulekanganalekangana. (Mat. 9:35) Konjechesya pelepa, pakusaka kwakamuchisya ŵandu ŵajinji, jwalakwe ŵajiganyisye ŵakulijiganya ŵakwe kuti alalichileje soni ŵapele machili kuti akomboleje kwaposya ŵakulwala.—Mat. 10:​5-8.

4. Ana muŵatendelaga Yesu ni ŵandu ŵaŵaliwonaga kuŵa ŵangasosekwa yikutujiganya chichi?

⁴ Muŵatendelaga Yesu pakwachimbichisya soni kwanonyela ŵandu, yalosyaga kuti jwalakwe pampepe ni Atati ŵakwe akusiŵawona ŵandu kuŵa ŵakusosekwa mnope atamose kuti ŵane ŵawoneje kuŵa ŵangasosekwa. Naga akusakayichila yakuti Yehofa akusiŵawona kuŵa ŵakusosekwa mnope, mpaka atende chenene kuganichisya yaŵatite Yesu pakwakamuchisya ŵandu ŵaŵaliwonaga kuŵa ŵangasosekwa. Kutenda yeleyi mpaka kwakamuchisye kuti aliwoneje kuŵa ŵakusosekwa kwa Yehofa.

5. Alondesye yaŵasimene nayo jwamkongwe jwine jwa ku Galileya juŵasimene ni Yesu.

⁵ Kupwatika pakulijiganya likuga lya ŵandu, Yesu jwamjiganyagasoni jwalijose pajika. Mwachisyasyo, pajwalalichilaga ku Galileya, jwalakwe jwasimene ni jwamkongwe jwine juŵalwalaga ulwele wakwasa myasi kwa yaka 12. (Maliko 5:25) Mwakamulana ni yachasalaga Chilamusi, jwamkongweju jwaliji jwangaswejela, soni jwalijose jwakamkamwile jwalakwe jukaliji jwangaswejela. Myoyo ndaŵi syejinji jwatamaga kwajika mwamti nganakungulukaga ni ŵandu. Konjechesya pelepa, yaŵaga yakusawusyasoni kwa jwalakwe kuti amtumichileje Yehofa ni ŵandu ŵane soni kusimanikwa pa yisangalalo yayatendekwaga ku sunagoge. (Lef. 15:​19, 25) Mwangakayichila, yeleyi yamtendekasyaga jwamkongweju kulagasika nganisyo soni kuliwona kuŵa jwangasosekwa.—Maliko 5:26.

6. Ana jwamkongwe juŵakwete ulwele wakwasa myasi ŵatesile yamti uli kuti apole?

⁶ Jwamkongwe jwakulwalaju jwasakaga kuti Yesu amposye. Nambo jwalakwe nganamŵenda Yesu kuti amposye. Ligongo chichi nganatenda yeleyi? Ligongo lyakuti jwatendaga sooni ni ulwele wakwewu. Komboleka kuti jwalakwe jwaganisyaga kuti Yesu chamtopole pagulu ja ŵanduwo ligongo lyakuti jwaliji jwangaswejela. Myoyo jwamkongweju jwaganisisye yakwamba kukamula chakuwala chakusa cha Yesu ali akwete chikulupi chakuti naga akutenda myoyo ulwele wakwewo chiwumale. (Maliko 5:​27, 28) Chikulupi chakwechi chamkamuchisye ligongo lyakuti ulwele wakwewu wamasile. Kaneko Yesu ali awusisye ya mundu juŵamkamwile, jwamkongweju jwasasile kuti jwalakwejo ni juŵatesile yeleyi. Ana Yesu jwatesile uli ni jwamkongweju?

7. Ana Yesu ŵamkamuchisye chamti uli jwamkongwe juŵalagaga mnopeju? (Maliko 5:34)

⁷ Yesu ŵamkamuchisye jwamkongweju mwachinonyelo soni mwakumchimbichisya. Jwalakwe jwamanyilile kuti jwamkongweju jwatendaga ‘woga soni kutetemela.’ (Maliko 5:33) Ligongo lyakuti jwampikanichisye jwamkongweju, Yesu jwamlimbikasisye jwalakwejo. Mwamti jwayikene pakumkolanga kuti “mwanangu” pakusaka kulosya kuti ŵamganichisyaga soni kumchimbichisya jwamkongweju. (Aŵalanje Maliko 5:34.) M’Baibulo, gelega gali malo gamo pego gele Yesu ŵamkolasile jwamkongwe kuti ‘mwanangu.’ Jwalakwe jwatesile yeleyi ligongo jwayiweni kuti jwamkongweju akutenda woga. Agambe ganichisya muŵasangalalile jwamkongweju. Yikaŵe kuti Yesu nganaŵecheta mwakumlimbikasya, jwalakwe akapite kumangwakwe ali aposile nambo ali mkulijimba magambo. Pelepatu Yesu ŵamkamuchisye jwamkongwejo kumanyilila kuti Atati ŵakwinani akusamwona kuŵa jwakusosekwa mnope.

8. Ana ni yakusawusya yapi yaŵasimene nayo mlongo jwa ku Brazil?

⁸ Masiku aganosoni ŵakutumichila ŵa Yehofa akulaga ni maulwele gejinji yayikusiyatendekasya kuti alagasicheje nganisyo. Maria,a jwali mpayiniya jwakutamilichika jwakusatama ku Brazil, jwapali juli jwamlemale mwamti nganakola ngongolo ni mkono wakumchiji. Mlongoju jwatite, “Ndaŵi syejinji achimjangu ŵa ku sukulu ŵalagasyaga ligongo lya kawoneche kangu. Jemanjaji ŵambaga mena gachipongwe. Nambosoni ŵandu ŵa m’liŵasa lyangu ŵambonaga kuŵa jwangasosekwa.”

9. Ana ni chichi chichamkamuchisye mlongo Maria kuti aliwoneje kuŵa jwakusosekwa mnope kwa Yehofa?

⁹ Ana ni chichi chichamkamuchisye Maria? Pajwaŵele jwa Mboni sya Yehofa, Aklistu achimjakwe ŵamkamuchisye soni kumlimbikasya mlongoju kuti aliwoneje mpela mwakusamwonela Yehofa. Jwalakwe jwatite, “Abale ni alongo ŵajinji ŵangamuchisye mwamti nganimba ngombwele kwasala wosope pandaŵi jimo. Mwamti ngumyamichila mnope Yehofa pakumba liŵasa lyambone lyausimu.” Yaŵatendaga abale ni alongo yamkamuchisye mlongoju kuliwona kuti ali jwakusosekwa mnope pameso pa Mlungu.

10. Ana ni chichi chachamlagasyaga Maliya jwa ku Magadala? (Alolesoni yiwulili.)

¹⁰ Kwende tukambilanesoni yaŵatite Yesu pakumkamuchisya jwamkongwe jwine lina lyakwe Maliya jwa ku Magadala. Jwalakwe jwakwete yiŵanda 7. (Luk. 8:2) Ligongo lya yiŵandayi, jwalakwe jwatendaga yindu yayatendekasyaga ŵandu kuti akamŵandichilaga. Ligongo lyakuti jwamkongweju jwalagaga mnope, jwalakwe jwalagasikaga nganisyo soni jwadandawulaga. Yesu jwamkopwesye yiŵanda jwamkongweju, mwamti kaneko jwaŵele jwakulijiganya jwakwe. Ana Yesu jwatesilesoni chichi pakumkamuchisya Maliya jwa ku Magadala kupikanichisya kuti jwaliji jwakusosekwa mnope kwa Mlungu?

11. Ana Yesu jwalosisye chamti uli kuti Maliya jwa ku Magadala jwaliji jwakusosekwa mnope kwa Mlungu? (Alolesoni yiwulili.)

¹¹ Yesu ŵamŵendile Maliya jwa ku Magadala kuti ajendeje yimpepe kukulalichila.b Paŵayiwonaga yaŵatendaga Yesu pakwajiganya ŵandu ŵane yamkamuchisyaga mnope. Yesu pajwajimwiche ku chiwa, lisiku lilyolyo jwawonechelesoni kwa jwamkongweju. Mwamti jwalakwe jwaliji jumo mwa ŵakulijiganya ŵa Yesu ŵiŵaŵechetene nawo lisiku lyeleli. Konjechesya pelepa, Yesu jwayikene pakumtuma jwamkongweju kuti akasalile ŵandumetume ŵakwe kuti jwalakwejo ajimwiche ku chiwa. Yeleyitu yikwamba kulosya kuti jwamkongweju jwaliji jwakusosekwa mnope kwa Yehofa.—Yoh. 20:​11-18.

12. Ana chichi chichamtendekasisye Lidia kulipikana kuti ali jwangasosekwa?

¹² Mpela mwayaŵelele ni Maliya jwa ku Magadala, ŵandu ŵajinji masiku agano akusaliwona kuti ali ŵangasosekwa. Mlongo jwine jwakusatama ku Spain lina lyakwe Lidia, jwasasile kuti mamagwe ŵasakaga kuti atyosye chitumbo jwalakwe mkanapagwe. Jwalakwe akusakumbuchila kuti atamose pandaŵi jiŵaliji jwachinandipile, mamagweŵa ŵamŵechetelaga maloŵe gachipongwe soni nganamganichisyaga. Jwalakwe jwatite, “Yanasakaga paumi wangu yaliji yakuti ŵandu anonyeleje. Nambope najogopaga kuti ŵandu ŵane nganaŵa anonyele ligongo mama ŵangu ŵaŵechetaga kuti naliji jwakusakala.”

13. Ana chichi chachamkamuchisye Lidia kuti aliwoneje kuŵa jwakusosekwa mnope kwa Yehofa?

¹³ Panyuma pakulijiganya yisyesyene, Lidia jwatandite kuliwona kuti ali jwakusosekwa pameso pa Yehofa ligongo jwapopelaga pajika, kulijiganya Baibulo soni Aklistu achimjakwe ŵamlimbikasyaga jwalakwe. Jwalakwe jwatite, “Ŵamkwangu akusasalilaga kuti akusanonyela mnope. Mwamti ndaŵi syosope akusangumbusyaga kuti ngwete ndamo syambone. Yeleyisoni ni yakusasalilaga achimjangu ŵapamtima.” Ana pana mundu jwakumganichisya kuti akusosekwa kumkamuchisya kupikanichisya kuti ali jwakusosekwa mnope pameso pa Yehofa?

YAMPAKA TUTENDE KUTI TULIWONEJE MPELA MWAKUSATUWONELA YEHOFA

14. Ana lilemba lya 1 Samuyele 16:​7, likusatukamuchisya chamti uli kumanyilila mwakusiŵawonela Yehofa ŵandu? (Alolesoni libokosi lyakuti “Ligongo Chichi Yehofa Akusiŵawona Ŵandu Ŵakwe Kuŵa Ŵakusosekwa?”)

¹⁴ Akumbuchileje kuti Yehofa akusiŵawona wawojo mwakulekangana ni mwakusiŵawonela ŵandu kuchilamboku. (Aŵalanje 1 Samuyele 16:7.) Jwalakwe ngakusiŵawona kuŵa ŵakusosekwa ligongo lya mtundu wawo, kawoneche kawo soni majiganyo gawo. (Yes. 55:​8, 9) Myoyo m’malo mwakuliwona mpela mwakusiŵawonela ŵandu ku chilamboku, aliwoneje mpela mwakusiŵawonela Yehofa. Aŵalanjeje ngani sya m’Baibulo syasikusasala mwaŵawonelaga Yehofa ŵandu ŵele ndaŵi sine ŵalikayichilaga naga ali ŵakusosekwa mpela Eliya, Naomi soni Hana. Mpaka alembesoni yindu yayatendechele yayikusiyasimichisya kuti Yehofa akusiŵanonyela soni akusiŵawona wawojo kuŵa ŵakusosekwa mnope. Konjechesya pelepa mpaka aŵalanjesoni ngani syasikusasala yakwamba kuliwona kuŵa ŵakusosekwa m’mabuku getu.c

15. Ligongo chichi Yehofa jwamwonaga Daniyele kuti ali “mundu jwakusosekwa mnope”? (Daniyele 9:23)

¹⁵ Amanyilileje kuti chikulupi chawo ni chachikusichatendekasya kuŵa ŵakusosekwa mnope kwa Yehofa. Jwakulochesya Daniyele paŵaliji ni yaka ya mma 90 jwaliji juli ‘jwangali machili’ soni jwatengwiche. (Dan. 9:​20, 21) Ana Yehofa ŵamlimbisye chamti uli jwalakwe? Mlungu ŵalitumisye lilayika lyakolanjidwa Gabuliyele kuti likamsalile Daniyele kuti ali “mundu jwakusosekwa mnope” soni kuti Mlungu agapikene mapopelo gakwe. (Aŵalanje Daniyele 9:23.) Ana ni chichi chachamtendekasisye Daniyele kuŵa jwakusosekwa kwa Mlungu? Chimo mwa yindu yeleyi, chaliji kulupichika kwakwe soni kunonyela chilungamo. (Esek. 14:14) Yehofa jwakundile kuti ngani jakweji jilembedwe m’Baibulo pakusaka kutulimbikasya m’weji. (Alo. 15:4) Yehofa akusapikana soni kwanga mapopelo gawo mwamti akusiŵawona kuŵa ŵakusosekwa ligongo akusayinonyela yambone soni akusatenda yindu mwakulupichika pakumtumichila jwalakwe.—Mik. 6:​8, Aheb. 6:10.

16. Ana chichi champaka chakamuchisye kuti amwoneje Yehofa mpela Mtati jwachinonyelo?

¹⁶ Amwoneje Yehofa mpela Mtati jwakusiŵanonyela. Jwalakwe jwangagamba kwapatila magongo, nambo akusasaka kwakamuchisya wawojo. (Sal. 130:3; Mat. 7:11; Luk. 12:​6, 7) Kuganichisya mnope yeleyi kwakamuchisye ŵandu ŵajinji ŵakusaliwona kuti ali ŵangasosekwa. Mwachisyasyo, aganichisye ya mlongo jwine jwa ku Spain lina lyakwe Michelle. Jwalakwe jwaliwonaga kuti ali jwangali mate soni kuti ali jwangasosekwa ligongo lyakuti kwa yaka yejinji ŵamkwakwe ŵaŵele ali mkumŵechetela maloŵe gachipongwe. Jwalakwe jwatite, “Pangulipikana kuti ndili jwangasosekwa, ngusaganichisya Yehofa ali anyakwile mmyala mwakwe ni kulosyaga chinonyelo soni kundeteya.” (Sal. 28:9) Mlongo Lauren jwa ku South Africa jwatite, “Naga Yehofa jwawutile kwa jwalakwejo ligongo lya chinonyelo chakwe, aŵele ali mkungamuchisya kwa yaka yosopeyi kuti mbe najo paunasi soni aŵele mkungamulichisya masengo une pakwajiganya ŵane, nikuti jwalakwe akusambona kuŵa jwakusosekwa mnope.”—Hos. 11:4.

17. Ana chichi champaka chasimichisye kuti Yehofa akusangalala ni wawojo? (Salimo 5:12) (Alolesoni chiwulili.)

¹⁷ Akulupilileje kuti Yehofa akusasangalala ni wawojo. (Aŵalanje Salimo 5:12.) Daudi jwalandenye “chakuchijila chekulungwa” chachikusichachenjela ŵandu ŵakulungama ni yakusatenda Yehofa pasangalele ni mundu. Kumanyilila kuti Yehofa akusasangalala ni wawojo soni akusiŵakamuchisyaga mpaka kwakamuchisye kuti akalikayichilaga. Ana mpaka amanyilile chamti uli kuti Yehofa akusasangalala ni wawojo? Mpela mwatuyiwonele kala, kupitila m’Maloŵe gakwe Yehofa akusiŵasimichisya wawojo kuti ali ŵakusosekwa mnope. Kupwatika pelepa, Yehofa akusakamulichisya masengo achakulungwa ŵa mumpingo, achimjetu soni ŵandu ŵane pakusaka kutusimichisya kuti tuli ŵakusosekwa mnope kwa jwalakwe. Ana akusosekwa kutenda chichi ŵandu ŵeleŵa paŵalimbikasisye?

18. Ligongo chichi akusosekwa kwitichisya ŵane pakwayamichila?

¹⁸ Ŵandu ŵakusiŵanonyela soni kwamanyilila wawojo paŵasalile maloŵe gambone gakwayamichila asangalaleje. Akumbuchileje kuti Yehofa mpaka ŵakamulichisye masengo jemanjaji pakusaka kwasimichisya kuti jwalakwe akusasangalala ni wawojo. Mlongo Michelle, jwatumkolasile jula jwatite, “Mwapanandipanandi nalijiganyisye kuti njitichisyeje ŵandu ŵane pakumbechetela maloŵe gambone. Kusala yisyene yikusasawusyaga kutenda yeleyi. Nambo ngumanyilila kuti Yehofa ni jwakusasaka kuti ndendeje yeleyi.” Achakulungwa ŵa mumpingo nombenawo ŵamkamuchisye Mlongoju kumanyilila kuti Yehofa akusamnonyela jwalakwe. Apano mlongoju ali mpayiniya jwakutamilichika soni akusakamuchisya masengo ga pa Beteli ali kumangwakwe.

19. Ligongo chichi ali ŵakusimichisya kuti Mlungu akusiŵawona wawojo kuŵa ŵakusosekwa?

¹⁹ Yesu akusatukumbusya mwachinonyelo kuti tuli ŵakusosekwa mnope pameso pa Atati ŵetu ŵakwinani. (Luk. 12:24) Myoyo, mpaka tuŵe ŵakusimichisya kuti Yehofa akusatuwona kuŵa ŵakusosekwa. Ngatukusosekwa kuliŵalilaga mfundo jeleji soni tulinjelinjeje kwakamuchisya ŵandu ŵane kuti aliwoneje kuŵa ŵakusosekwa mnope kwa Mlungu.