YAKUSALIWUSYAGA ŴACHINYAMATA
Ana Baibulo Mpaka Jingamuchisye Chamtuli?—Mbali 1: Kulijiganya Baibulo
“Ngusalingalinga kuti mbalanjeje Baibulo, nambo yikusalema ligongo ngusaganisya kuti jili buku jekulungwa mnope.”—Briana.
Ana wawojo akusalipikanasoni mwakulandanamo? Nganiji chijakamuchisye.
Ligongo chichi ngusosekwa kuŵalanga Baibulo?
Ana ngakusasangalala pakuŵalanga Baibulo? Naga yili myoyo yili yakupikanika. Mwine mpaka aganisyeje kuti Baibulo jikwete mapeji gejinji soni mwangali yiwulili mwamti mpaka aganisye kuti bola kulolela TV kapena mafidiyo.
Nambo aganichisye kaje ayi: Tuwanichisye kuti aliweni libokosi lyekulungwa lyakusunjila mbiya, ana nganaŵa atesile chidwi kusaka kumanyilila yayili mkatimo?
Baibulo jili mpela libokosili. Mwelemu mwana ngani syejinji sya lunda syampaka syakamuchisye wawojo kuti
Asaguleje yindu mwalunda
Atameje mwakamulana ni achinangolo ŵawo
Asaguleje achimjawo ŵambone
Akalagasikaga nganisyo
Ana buku jakalaji, jili jakamuchisya masiku agano? Elo ligongo lyakuti “Malemba gosope galembedwe ni Mlungu mwakupujila lipuje.” (2 Timoteo 3:16) Yeleyi yikulosya kuti malangiso gakusimanikwa m’Baibulo gakusatyochele kwa Mlungu.
M’Baibulo jili mpela libokosi lyakusunjila yipanje. Soni jikwete mfundo syakamuchisya
Ana mpaka mbalanjeje chamtuli Baibulo?
Litala lyandanda lili kujiŵalanga kutyochela kundanda mpaka kumbesi. Yeleyi yichakamuchisya kuti amanyilile utenga wawuli m’Baibulo. Pana matala gejinji gakuŵalanjila Baibulo. Kwende tulole yisyasyo yiŵili ayi:
Mpaka aŵalanje mabuku gosope gagali m’Baibulo gakwana 66 kutandila Genesesi mpaka Chiwunukuko.
Mpaka aŵalanje Baibulo pakuya ndaŵi ja yatendekwaga yindu yakuyisalayo.
Yampaka yakamuchisye: Aŵalanje ngani ja mtwe wakuti Yayatendekwe Paumi wa Yesu ali Pachilambo Chapasi mu Kabuku Kakamuchisya Pakulijiganya Maloŵe ga Mlungu, mwakamulana ni ndaŵi jayatendekwaga yinduyo.
Litala lyaŵili lili kusagula ngani sya m’Baibulo syakamulana ni yakusawusya yakusimana nayo. Mwachisyasyo:
Ana akusasaka kupata achimjawo ŵakudalilichika? Aŵalanje ngani ja Yonatani ni Daudi. (1 Samuele chaputala 18-20) Alole ndamo syaŵakwete Daudi syasyamtendekasisye Yonatani kuti aŵe mjakwe jwa Daudi.
Ana akusaka kuti akomboleje kuyiŵambala yindu yampaka yatendekasye kutenda yakusakala? Aŵalanje ngani ja Yosefe. Alole yayamkamuchisye kuti akatenda yakusakala. (Genesesi chaputala 39)
Ana akusaka kumanyilila mwampaka lipopelo lyakamuchisye wawojo? Aŵalanje yaŵasimene nayo Nehemiya. (Nehemiya chaputala 2) Alole umboni wakulosya kuti lipopelo lya Nehemiya lyakamwile masengo.
Yampaka yakamuchisye: Pakuŵalanga Baibulo, pakusaka kuti nganisyo syawo siŵeje pa yakuŵalangayo, alolechesyeje kuti malo gali pangali chakusokonasya chilichose.
Litala lyatatu lyakuŵalanjila Baibulo, lili kusagula ngani jakusaka kuŵalanga, kaneko aganichisye mwajikwakwayila nganijo. Paŵalasile akusosekwa kuliwusya yiwusyo ayi:
Ligongo chichi Yehofa ŵasachile kuti nganiji jilembedwe m’Baibulo?
Ana nganiji jikusala yamtuli pakwamba ya ndamo sya Yehofa soni mwakusatendela yindu?
Ana mpaka ngamulichisye masengo chamtuli yambalasileyi paumi wangu?
Yampaka yakamuchisye: Akoleje chakulinga. Akusosekwa kusagula lisiku lyakuliwona kuti mpaka liŵe lyambone lyakuti aŵalanjeje Baibulo.