Kamulicisya Masengo Yiwusyo

Mateyu 16:13-16

YACITULIJIGANYE: Awusyeje yiwusyo mwaucimbicimbi yakwatendekasya lung’wanu ŵakupikanila ŵawo, kuganicisya, soni yakamucisya kugombelecesya songa syakusosekwa.

MWAMPAKA ATENDELE:

• Ŵatendekasyeje ŵakupikanila kola lung’wanu. Awusyeje yiwusyo yampaka yakamucisye ŵakupikanila kulijanjila jika mumtima kapena yampaka yatendekasye kola lung’wanu.

• Ŵakamucisyeje kuganicisya ya ngani jawo. Ŵakamucisyeje ŵakupikanila ŵawo kupikanicisya ngani jawo mwakuwusya yiwusyo yampaka yalongolele ku songa syakusosekwa sya munganijo.

• Agombelecesye songa syakusosekwa. Mpaka atande ni ciwusyo cakutesya lung’wanu pakusala songa jekulungwa ja ngani jawo. Pambesi pakambilana songa jakusosekwa kapena ngani jawo mpaka awusye yiwusyo yakuwilisya.