Ŵakusonda ŵa Ayisalayeli ali apite ku msinda wa Yeliko, ŵatemi m’nyumba ja jwamkongwe jwine lina lyakwe Lahabu. Mwenye jwa ku Yeliko ali ayimanyi, ŵatumisye asilikali kunyumba ja Lahabu. Lahabu jwasisile ŵakusonda ŵaŵiliwo kumsakasa ni ŵasalile asilikali ŵala kuti akalolesye mbali jine. Jwalakwe ŵasalile ŵakusondawo kuti, ‘Cinakamucisye ligongo ngumanyilila kuti Yehofa ali mbali jawo soni cacisumula cilamboci. Conde atende cilanga ni une kuti cacikulupusya liŵasa lyangu.’

Ŵakusondawo ŵamsalile Lahabu kuti, ‘Tukutenda cilanga cakuti pangali jwalijose jucaciwa m’nyumba mwenu.’ Ŵasalilesoni kuti, ‘Mtaŵe lukonji lwecejewu paliwindo lyenu, soni wosope ŵamwiŵasa mwenu cacikulupuka.’

Lahabu ŵakopocesye ŵakusondawo paliwindo pakamulicisya masengo lukonji. Jemanjajo ŵapite kwitumbi ni ŵajuŵile kweleko kwa masiku gatatu mkanawujile kwa Yoswa. Kaneko Ayisalayeli ŵajombwece Lusulo lwa Yolodani soni ŵakosecele kusumula cilamboco. Yeliko waliji msinda wandanda waŵawugomece jemanjajo. Yehofa ŵasalile jemanjaji kuti awusyungulileje msindawo kampepe palisiku kwa masiku 6. Palisiku lya 7, awusyungulile msindawo maulendo 7. Ŵambopesi ŵajimbile yitolilo kaneko asilikali ŵagumisile mwakwesya maloŵe. Mapupa ga msindawo gagwile. Nambo nyumba ja Lahabu, jajalumbikene ni lipupa lyalutenje nganijigwa. Lahabu yalumo ni ŵamwiŵasa mwakwe ŵakulupwice ligongo ŵakulupililaga Yehofa.

Ngani jajatendece ku Yeliko japikanice ku mitundu jine ja ku Kanani. Mayimwene ga mitunduji gakamulene yakuputa ngondo ni Ayisalayeli. Nambo Agibiyoni ŵakwete nganisyo sine. Ŵawete yiwisa ni kwawula kwa Yoswa ni ŵatite, ‘Tukutyocela ku cilambo ca kwakutalika. Twapikene yakwamba Yehofa soni yosope yiŵatesile kwa jemanja ku Iguputo soni ku Mowabu. Atusimicisye kuti ngasatujonanga, ni m’weji tuciŵa acikapolo ŵawo.’

Yoswa ŵakulupilile jemanjajo ni ŵajiticisye kuti ngasiŵajonanga. Panyuma pamasiku gatatu, ŵamanyilile kuti nganatyocela kucilambo ca kwakutalika. Ŵatyocelaga m’cilambo ca Kanani. Yoswa ŵawusisye Agibiyoniwo kuti, ‘Ligongo cici atulambwisye?’ Jemanjajo ŵajanjile kuti, ‘Watukamwile woga. Tukumanyilila kuti Yehofa Mlungu jwawo akwaputila ngondo. Conde akatuwulaga.’ Yoswa ŵasunjile cilanga cakuti ngasiŵawulaga.

Mkanipapite ndaŵi, mayimwene msano ga ku Kanani ni asilikali ŵawo ŵatandite kwajogoya Agibiyoni. Yoswa ni asilikali ŵakwe ŵajesile cilo cosope kuti ŵakulupusye jemanjajo. Ngondojo jatandite kundaŵi kwa lisiku lyakuyicisya. Akanani ŵatandite kutilila mbali syosope. Kulikose kuŵatililaga, Yehofa ŵagwicisyaga matalila gekulungwakulungwa. Kaneko Yoswa ŵam’ŵendile Yehofa kuti ajimice lyuŵa. Ana ligongo cici Yoswa ŵam’ŵendile Yehofa kuti ajimice lyuŵa atamose kuti lyuŵa nganilijimeje citandilile? Ŵatesile yeleyi ligongo lyakuti Yoswa ŵamkulupililaga Yehofa. Kwa lisiku lyosope lyuŵa nganilitiŵila mpaka Ayisalayeli piŵagomece mayimwene ga ku Kanani ni asilikali ŵawo.