Ana Majiganyo Soni Mbiya Mpaka Yakamuchisye Kola Sogolo Jambone?
Ŵajinji akusaganisya kuti ŵandu ŵaŵalijiganyisye mnope soni ŵakusichila ni ŵakwete sogolo jambone. Jemanjaji akusaganisya kuti mundu juŵajawile ku yunifesite akusaŵa jwakamuchisya pa masengo, mu liŵasa soni ku dela jakusatama. Akusaganisyasoni kuti majiganyo gambone ni gampaka gamkamuchisye mundu kupata masengo ga mbiya syejinji. Soni kuti mbiya syejinji ni syasikusamkamuchisya mundu kuŵa jwakusangalala.
YAKUSASAGULA ŴANDU ŴAJINJI
Aganichisye yaŵaŵechete Zhang Chen jwa ku China. Jwalakwe jwatite, “Naganisyaga kuti kwawula ku yunifesite ni kwampaka kungamuchisye kumalana ni usawuchi. Naganisyaga kuti kola mbiya syejinji ni kwampaka kungamuchisye kuti ngasoŵaga kandu soni kuti mbeje jwakusangalala.”
Kuti akole sogolo jambone ŵandu ŵajinji akusajawula ku mayunifesite gakumanyikwa mnope ga kusa. Yeleyi yiŵele yili mkutendekwa mpaka pandaŵi jele yilambo yine ŵalekasisye ŵandu kwinjila mchilambo chawo ligongo lya COVID-19. Yaka 10 yipiteyo ka gulu kane kawungunyisye ni kapatile kuti, “Ŵajinji ŵakusajawula ku mayunifesite ga kusa ali ŵakutyochela ku Asia.”
Achinangolo akusatenda yampaka akombole kuti ŵanache ŵawo ajawule ku mayunifesite ga kusa. Jwamlume jwine jwa ku Taiwan jwatite, “Achinangolo ŵangu ŵaliji ŵakulaga, nambo ŵatutumisye ŵanache wosope mcheche ku koleji ja ku United States.” Achinangoloŵa kuti akombole kutenda yeleyi ŵakwete ngongole syejinji. Yeleyi ni yayikusiyatendechelasoni ŵandu ŵane.
YASIMENE NAYO ŴANDU ŴANE
Ŵandu ŵane ŵaŵasosagasosaga yipanje soni majiganyo yalesile m’malele.
Majiganyo mpaka gamkamuchisye mundu nambo ndaŵi syejinji ŵandu palijiganyisye ŵangapataga yaŵasakaga. Mwachisyasyo, panyuma pakulijiganya kwa yaka yejinji soni kulaga ni ngongole, ŵajinji ŵangapataga masengo gaŵasakaga. Rachel Mui jwa ku Singapore, mu lipoti lyakwe lya bisinesi jwatite, “Ŵajinji pamalisisye majiganyo gawo ga ku yunifesite ŵangapataga masengo.” Jwamlijiganye mnope jwine jwa ku Taiwan jwatite, “Ŵalijiganye ŵajinji ŵangapataga masengo gakamulana ni majiganyo gawo. Myoyo akusagamba kamula masengo gagapatikene.”
Atamose mundu apate masengo gakamulana ni majiganyo gakwe, nambope umi wakwe ngawukusaŵa mpela muŵasachilaga. Jwamlume jwine jwa ku Thailand ali amalisisye majiganyo gakwe ga ku yunifesite ku United Kingdom jwapatile masengo gaŵasakaga. Jwalakwe jwatite, “Majiganyo gangu gangamuchisye kupata masengo ga mbiya syejinji. Nambo kuti mbochele mbiyasi nasosekwaga kukamula masengo gejinji soni kwandaŵi jelewu. Mkupita kwa ndaŵi ŵakampaniji ŵatyosisye ŵandu ŵajinji masengo, unesoni ŵandyosisye. Apa ni panamanyilile kuti masengo gali gangadalilichika.”
Atamose ŵandu ŵakusichila ŵakusawoneka kuti yindu yikwajendela chenene akusasimanape ni yakusawusya. Yakusawusyayi yili mpela yilwele, yakusawusya ya mu ulombela soni akusadandawulape ya mbiya. Katsutoshi jwa ku Japan jwatite, “Nakwete mbiya syejinji nambope nganisangalalaga ligongo lyakuti ŵandu ŵane ŵandendelaga jelasi soni ŵandendelaga yachipongwe.” Lam jwamkongwe jwakusatama ku Vietnam jwatite, “Ŵajinji akusasaka masengo gambiya syejinji ni chakulinga chakuti yindu yajendeleje chenene. Nambo yakuyichisya yakwe yindu yangajendelaga chenene. Akusalwala soni akusalaga ni nganisyo.”
Mpela mwayaŵelele ni Frank, ŵajinji ayiweni kuti pana yindu yine yakusosekwa mnope yampaka atende paumi kulekangana ni gambaga kusosa majiganyo soni chipanje. Ŵane mwajemanjaji akusaganisya kuti kuŵa ŵandu ŵambone soni kwakamuchisya ŵane ni kwampaka kwakamuchisye kola sogolo jambone. Nambo ana yeleyi yili yisyene? Ngani jakuyichisya tijijanje chiwusyo chelechi.