Ana Mlungu Akusiŵapikanichisya Wawojo?

YATUKULIJIGANYA KUTYOCHELA KU YAKUPANGANYIKWA

Yakusati Yehofa pakutupikanichisya yikusawonechela chenene pasikati pa ŵanache ŵamaŵila.a Ŵanacheŵa akusaŵa ŵakamulana mnope. Nancy Segal juŵapali maŵila soni jwali jwakulolela ya majiganyo gakwamba ŵanache ŵamaŵila jwatite, “Ŵandu ŵane ŵamaŵila mpaka aŵechetane ni kupikanganana chenenepe.” Jwamkongwe jwine pakusala yamkamulano wawapali pasikati pa jwalakwe ni m’chemwaligwe juŵapali najo maŵila jwatite, “Twamanyiganaga pa chilichose.”

Ana chichi chachikusatendekasya ŵanache ŵamaŵila kuti amanyinganeje chenene? Kuwungunya kwine kwalosisye kuti yeleyi yikusatendekwa mnopemnope ligongo lyakulandana kwa yindu yine ya m’chilu (genes) yayikusakamuchisya mundu kuti akule chenene, ngaŵape ligongo lya malo soni mwaŵele ali mkwalelela.

AGANICHISYE AYI: Mlungu juŵapanganyisye yindu yakusimonjesyayi, mwangakayichila akusatumanyilila chenene kupunda jwalijose. Ni ligongo lyakwe jwamasalimo Daudi, jwasasile kuti, “Ŵalakwe ŵasisile m’matumbo mwa mama ŵangu. Mawupa gangu nganigaŵa gakusisika kwa wawojo paŵaliji mkumbanganya m’malo gakusisika. . . . Meso gawo gambweni ndili m’matumbo, yiŵalo yangu yosope yalembedwe m’buku jawo.” (Salimo 139:13, 15, 16) Mlungupe ni jwakusamanyilila chenene muŵatupanganyichisye soni ndamo syatukwete mwakamulana ni mwatwakulile. Yeleyi yikusatusimichisya kuti jwalakwe akusatupikanichisya chenene ŵanduwe.

YAJIKUSAJINGANYA BAIBULO PAKWAMBA YA LUNDA LWA MLUNGU

Daudi jwapopesile kuti, “Wawo Yehofa awungunyisye une soni akumanyilila chenene. Akusamanyilila pandemi pasi soni pangwimuka. Akusamanyilila nganisyo syangu ali kwakutalika. Mkanimbechete chilichose, wawo Yehofa akusaŵa ayimanyi kala.” (Salimo 139:1, 2, 4) Konjechesya pelepa Yehofa akusamanyilila mwatukupikanila mumtima mwetu nambosoni “akusamanyilila nganisyo sya jwalijose.” (1 Mbili 28:9; 1 Samuele 16: 6, 7) Ana Malembaga gakutusalila chichi pakwamba ya Mlungu?

Atamose kuti patukupopela nganituŵa tusasile nganisyo syetu syosope soni mwatukupikanila mumtima, nambope Mkupanganya jwetu akusamanyilila yeleyi soni kutupikanichisya ligongo lyakwe tukutenda yindu m’litala lyelelyo. Konjechesya pelepa, jwalakwe akusapikanichisya ligongo lyakwe tulepele kutenda chenene yindu yineyakwe atamose kuti twasachililaga ni mtima wosope kuti tuyikombole. Ligongo lyakuti Mlungu ŵatupanganyisye m’litala lyakuti twanonyeleje ŵane, jwalakwe akusajembecheyasoni kuti twapikanichisyeje ŵane soni kutenda nawo yindu mwachinonyelo.—1 Yohane 4:7-10.

Malemba gakusatusimichisya kuti:

• “Meso ga Yehofa gali pa ŵandu ŵakulungama, soni jwalakwe akusapikana mapopelo gawo.”​—1 PETULO 3:12.

• Mlungu ŵasasile kuti, “Chinjimpa lunda soni chinjimkamuchisya kwenda m’litala limkusosekwa kwendamo. Chinjimsalila yamkusosekwa kutenda soni kumlolela.”​—SALIMO 32:8.

MLUNGU ALI JWACHANASA MNOPE

Kumanyilila kuti Mlungu akusapikanichisya mwayiŵelele yindu paumi wetu soni mwatukupikanila mumtima kukusatukamuchisya kupilila yakusawusya. Aganichisye yayamtendechele Anna jwakusatama ku Nigeria. Jwalakwe jwatite, “Naliwusyaga naga umi wangu wakwete chakulinga ligongo lya yakusawusya yanasimanaga nayo. Naliji jwamasije ligongo lyakuti ŵamkwangu ŵajasiche. Ndaŵi jine ndili mkumsamalila mwanache jwangu jwamkongwe juŵagonechedwe kuchipatala ligongo lya ulwele wa mu ututu, (hydrocephalus) ŵasimene ni ulwele wa kansa ja m’maŵele. Myoyo ŵandesile opaleshoni ni kumba mtela. Payandendechelaga yeleyi, ulwele wa mwanache jwangu waliji mkukulilakulilape. Yaliji yakusawusya kwa une kuti namsamalilejesoni mwanache jwangu.”

Ana chichi chachamkamuchisye Anna kupilila yakusawusyayi? Jwalakwe jwatite, “Naganichisyaga mnope yagakusati Malemba, mpela lilemba lya Afilipi 4:6, 7, lyalikusati, ‘Mtendele wa Mlungu wawukusapunda kuganisya mwakusokoka kulikose, uchichenjela mitima jawo soni nganisyo syawo.’ Ndaŵi jilijose panakumbuchilaga lilembali, nalipikanaga kuti naliji pamkamulano wakulimba ni Yehofa ligongo lyakumanyilila kuti jwalakwe jwambikanichisyaga chenene kupunda mwanalipikanilaga namsyene. Nambosoni ŵandu ŵamumpingo wetu ŵalimbikasisye mnope.

“Atamose kuti nganimbe kupola yisyesyene, nambope bola apano kulekangana ni mwayaŵelele pandanda, soni mwanangu sambano yikuchenga. Ligongo lyakuti Yehofa mpaka atukamuchisye, nalijiganyisye kuti tukaganisyaga mwakulemwecheka patukusimana ni yakusawusya. Lilemba lya Yakobo 5:11 likusatusimichisya kuti, ‘Tukusitwakolanga ŵandu ŵaŵapilile kuti ali ŵajaliwe. Ŵapikene ya kupilila kwa Yobu soni ayiweni yele Yehofa yaŵampele, kuti Yehofa ali jwachinonyelo mnope soni jwachanasa.’” Yehofa ŵampikanichisye chenene Yobu pa yakusawusya yaŵasimanaga nayo, mwamti jwalakwe mpaka atupikanichisyesoni m’weji patukusimana ni yakusawusya yiliyose.