Report Ko Piin Ni Ma Weliy Morngaagen Gil’ilungun Got
‘Ba Mab e Kanawo’ Nrayog ni Ngan Ngongliy e Maruwel Riy’ u Cuba
APOSTAL Paul e ba lingagil ni ir e tamachib ko fare thin nib fel’ ko Gil’ilungun Got. Gubin ngiyal’ ma ke weliy ngak e girdi’ ni ke micheg e Ani Tasunumiy e yafas ni manemus ko girdi’ ni ma fol rok. Nap’an ni immoy Paul u Efesus ma ke poy ni ke buch ban’en ni ra pag ni nge ayuweg e yug girdi’ ni boor. I gaar: “Kug finey ni nggu par u roy u Efesus . . . , ya ba mab e kanawo’ ngog u roy nrayog ni gu ngongliy e maruwel riy ni baga’ ma ra yib fan.”—1 Korinth 16:8, 9.
Ku aram rogon e Pi Mich Rok Jehovah u Cuba. Yugu aram rogon ni darworni registernagrad ko re binaw nem, machane chiney e rayog ni ngar weliyed e athap rorad ko Bible ngak e yugu girdi’. Ka fini fel’ u wan’ fare am nu Cuba ni ngar paged e pi yuraba’ i teliw ngar pared u rom. Castro ni ir e President e ke yog ni Pi Mich Rok Jehovah e aram reb e teliw ni ke fel’ u wan’ e am nu Cuba.
Ere ke mab e “kanawo’ nrayog ni ngan ngongliy e maruwel riy” ko Pi Mich Rok Jehovah. Ma chiney e bay e ofis ko Pi Mich Rok Jehovah u Cuba, ni be ayuwegrad ngar yarmiyed e maruwel ko machib ko re nam nem. Ke pag 65,000 e Pi Mich ni yad be ayuweg e girdi’ ngar filed mar nanged fan e Bible. Yad ma fanay boch e babyor ni be tamilangnag e Bible riy, ni bod fare magazine ni Watchtower nge Awake! Boor e girdi’ nu Cuba ni yad ba mat’aw e be yib angin ngorad ya yad be fil e Pi Mich Rok Jehovah e Bible.
Maku bay e nochi muulung ko Pi Mich ni ma muulung ko re donguch nem. Yu ngiyal’ ma yad ma tay boch e muulung ni baga’ ni assembly ni sogonapan 150 e girdi’ e ma un ngay. Ri yad ma pining e magar ko pi tayugang nu Cuba ya kar paged yad ngar muulunggad e pi walag ni pumoon nge ppin u taabang, mi yad yin’ e tang ni be n’uf Got ma yad meybil u taabang.
De n’uw nap’an faram ma kan tay fare District Convention ni “Madgun Got” ni 1,000 yay u nap’an dalip e Sabado nge Madenom. Reb e report e be yog ni ba “yaram, mab llowan’, mab gapas” e girdi’ u ra reb e pi convention nem. Ma pi tayugang e ur rogned e sorok ko Pi Mich ko re n’em.
U gangin e fayleng ma tin riyul’ e Kristiano e be athamgil ni ngar folgad ko n’en ni ke tay Got chilen ni aram e ngar wereged fare thin nib fel’ ko Gil’ilungun Got. Maku yad ma athamgil ni nge par nib gapas thilrad e pi tayugang ko am. (Titus 3:1) Pi Mich Rok Jehovah e ma fol ko n’en ni yog apostal Paul ni gaar: “Ere bin som’on e gu be wenignag ngak girdien e galesiya ni nguur meybilgad ngak Got ni fan ngak urngin e girdi’, ma yad be wenig ngak ni nge runguyrad, mi yad pining e magar ngak ni fan e tin ni bayi rin’ ni fan ngorad, ara’ rogon ni ngar meybilgad ni fan ngak e pi pilung nge urngin e girdi’ ni yad be tay morngaagen e girdi’, ni bochan e nge yog nda pired u fithik’ e mocha’ nge gapas, ni gadad be liyor ngak Got ma ba fel’ pangidad.”—1 Timothy 2:1, 2.