Ngan Fek e Mat’ u Nap’an ni Kab Fel’ Yangarey

NAP’AN e ngiyal’ ney nib “mo’maw e par” ma bay boor ban’en ni ma diliiy laniyan’ e piin fel’ yangaren. (2 Timothy 3:1) Gubin e rran ma yad ma guy boch ban’en ni be wawliyrad ngar uned ko ngongol ndarngal, nge tamaggow, nge yugu boch ban’en nib kireb. Yima moningnag e piin ni ma fol ko Bible ya dar uned ko pi n’en ni ma rin’ e yugu girdi’, ma boch e Kristiano e ra lemnag ni sana kab mom ni ngar uned ngay.

U tungun e bin medlip e chibog B.C.E., me yoloy Jeremiah ni gaar: “Ffel’ be’ nib moon nib gel gelngin ni nge fek e mat’ u nap’an ni kab fel’ yangaren.” (Lamentations 3:27) Mang fan e re thin nem? Ra nge fil be’ rogon ni nge pithig e magawon u nap’an nib fel’ yangaren ma ra ayuweg ni nge gel ko boch e magawon u nap’an ni ke ilal. Dabiyog ko pi Kristiano ni yad ba ilal nge tin nib fel’ yangaren ni ngar siyeged e magawon. (2 Timothy 3:12) Machane angin nra yib ko par nib yul’yul’ e kab fel’ ko bin ni nge war be’ me baud laniyan’ boch.

Faanra gur be’ nib fel’ yangarem ma ga par nib mudugil ko pi n’en nra skengnag e yul’yul’ rom. Nap’an ni kan wawliyem ni ngam un ko ngongol nib kireb ma dab mu war. Yugu aram rogon nra m’ug riy ni rib mo’maw e re n’em machane ga ra lemnag nga m’on ma ra buch uw e pi n’en ni ma magawonnag lanin’um. I micheg Jesus ni gaar: “Mfeked e mat’ rog . . . , mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.”​—Matthew 11:29, 30.

Nge mudugilan’um ni ngam par ni ga be fol ko pi motochiyel ko Bible. Ya aram e ga ra un ko bin th’abi fel’ e par ko ngiyal’ ney ma ra mudugil e athap rom ko gabul nge langleth. Be yog e Bible ni “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”​—1 John 2:17.