‘Gu Ra Taga’ Nga Daken Got’

U NAP’AN e ngiyal’ ney ni “rib mo’maw e par,” ma be yoor iyan e pi n’en ni ma wawliydad nge pi n’en ni ma dilliy lanin’dad. Susun, sana yibe skengnag e yul’yul’ rodad u tabon e maruwel rodad. Ma sana piin ni gad ma skul e ra skengnagdad ko gad ra par ndabda uned ko ngongol ndarngal fa gad ra un ngay. Ma boor yay ma re fayleng ney nib kireb e yalen riy e ma skengnag e yul’yul’ rodad.​—2 Timothy 3:1-5.

Asaph ni be’ ni ke yoloy e thin ko Bible e ki par u ba ngiyal’ nib gel e kireb riy. Ma boch e girdi’ ko ngiyal’ nem e ur ufgad ko ngongol rorad nib kireb. I yoloy Asaph ni gaar: “Kar nunuwgad ko ufanthin ni bod ba kiy i churuwo’, ma tin ni yad be ngongliy u fithik’ e yargel e ke mang mad rorad. Yad be moningnag boch e girdi’ ma yad be weliy morngaagen e tin nib kireb; yad ba uf ma yad be puruy’nag rogon ni ngar gafgowniged boch e girdi’.” (Psalm 73:6, 8) Aram rogon e girdi’ ni ga manang fa?

Piin ni ba adag ni ngar rin’ed e n’en nib mat’aw e ri ma kankan’rad ma ma mulan’rad ko ngongol ni aram rogon. Yog Asaph ni gaar: “Gu be gafgow ni kakadbul nge mada’ ko nep’. Aram ban’en nib be magawonnag lanin’ug.” (Psalm 73:14, 16, New World Translation of the Holy Scriptures) Sana aram rogom, machane dabi mulan’um! Ya ke yog ku Asaph ni nge k’adan’ ko kireb ni yibe rin’ ko ngiyal’ nem ma ku arrogon nrayog rom. Ma uw rogon?

I tamilang u wan’ Asaph ni dabiyog ni ngari mat’aw urngin ban’en u tan e gagiyeg ko girdi’ ndar flontgad. (Psalm 146:3, 4; Proverbs 17:23) Ere de adbey e tayim rok, nge athamgil ni be tay, nge tirok ban’en ni nge guy rogon ni nge chuweg urngin e kireb u tooben, ya ke tiyan’ ko rogon thilrow Got. Yog Asaph ni gaar: “Machane gag e kari felan’ug ya gu be par u tooben Got! U fithik’ Somol Jehovah e kug par riy ndabi buch ban’en rog.”​—Psalm 73:28, NW.

Ngiyal’ ney ma ke fel’ rogon e piin ni ma shiyobay u fithik’ e sasaliyeb. Ma boor i yad e yad ma uf ni bochan ndariy fan u wan’rad e motochiyel rok Got. Machane dabra pared nib fel’ rogorad ndariy n’umngin nap’an. Begaar Asaph: “Rib mudugil ni kam ta’rad ko yungi n’en nib tamasirig, ma bay mu gagiyegnagrad ngar mulgad nga fithik’ e riya’!”​—Psalm 73:18.

Arrogon, ngiyal’ ni ke turguy Got ma yira chuweg urngin e ngongol nsusun ni nge siyeg e tin riyul’ e Kristiano nib muun ngay e ngongol nib sasalap, nge cham, nge kireb, nge yugu boch ban’en ndariy rogon ku Got. Be micheg e Bible ni gaar: “Piin nib pagan’rad ngak Jehovah e bay ur pired u daken e nam u fithik’ e gapas, machane piin ni yad ba kireb e bay ni tulufrad ngar chuwgad u daken e nam.” (Psalm 37:9, NW) Ma chiney ma nga dogned fapi thin ko Psalm ni begaar: “Jehovah e ir e war rog, me ir e yoror rog ma ir e ma ayuwegeg. Got rog e ir e war rog. Me ir e gu ma naf nga fon.”​—Psalm 18:2, NW.