Tin Mo’maw e Rran ko Piin Pillibthir

MAMA ONIYAN, e be’ ni 68 e duw rok ma ma par u lan reb e mach nib baga’ u bang u Ngal u Africa. Nap’an ni kab rugod ma ke lemnag u morngaagen e ngiyal’ nra pillibthir ma ra retire ko maruwel, ma ra falan’ ya go’ bay e pi bitir rok nge bitir rorad u charen. Machane gathi aram rogon ya ka be maruwel ni be pi’ nchuw’ay e ran nib garbeb u taraen e yal’. Ke mus ni buch uw e salpiy e ma yog ngak ni ma ayuweg e par rok. Bay l’agruw e pagal ni fak ni yow ma par u yugu reb e nam nib palog. Ke n’uw nap’an ndakura piew e salpiy ngak.

Kafram ma yibe tay fan e piin pillibthir u Africa. Kan tay farad ya boor ban’en ni kar uned ngay ma boor ban’en ni yad manang, maku yad ba gonop mab puluw e lem rorad. Ma kar ayuweged i chuguliy e bitir ko pi fakrad. Ma piin fel’ yangaren e ur ninged e ayuw rorad mar guyed rogon ni ngar fel’gad u wan’rad. I par e girdi’ ni yad be fol ko re thin ko Bible ney ni be gaar: “Mu sak’iygad u p’eowchen e girdi’ ni ke manna’ piyan lolugrad, mi gimed tay fan be’ ni ke pillibthir ni pumoon [ara, ppin].”​—Levitikus 19:32, New World Translation.

Ke thil e par e ngiyal’ ney. Boor e pillibthir e thingara pared ni goo yad ya bochan e gafgow nge chugum ni ke tolang puluwon nge dariy e maruwel ma kar chuwgad ko tabinaw rorad ni ngar pared u lan e mach. Be’ ni ir e ga’ ko HelpAge u Kenya ni Camillus Were e ke gaar: “Be war iyan e yalen ni ngan ayuweg e piin pillibthir.

Machane gathi ke mus u lan e pi binaw nu Africa ni be war iyan e yalen ko tabinaw. Fare simbung ni Guardian Weekly e ke weliy u morngaagen piyu Sapan ni gaar: “Kafram ma t’ufeg u fithik’ e pi walag e aram e def ko yalen nu Sapan ni ur filed rok Confucious, machane de par e re yalen nem nib gel ko ngiyal’ ney ni yibe par u lan e mach ma be war iyan e yalen ko tabinaw: ngiyal’ ney ma 85 per cent ko piyu Sapan e yad ma yim’ u lan e aspital fa yu gin ni tafen e pillibthir.”

Demtrug ko mang ma piin ni ri yad ba adag ni ngar felan’naged Got e yad ra guy rogon ni ngar ted fan e gallabthir rorad. Yad ma fol ko re thin ko Bible ney ni be gaar: “Mu liyor ko chitamam nge chitinam . . . ni fan e nguum par nib fel’ rogom me n’uw nap’an ni mu par u daken e binaw.” (Efesus 6:2, 3) Yugu aram rogon ni gathi rib mom ni ngan tay fan e piin gallabthir ni kar pillibthirgad min ayuwegrad, machane bay e flaab ni ra yib riy.