Fa Ragag i Motochiyel

KE pat e bishof nu Gloucester England ngay ni dabiyog ni nge yog balay ko urngin e tamachib ko diocese fa ragag i motochiyel, ma 10 percent ni dar nanged ko taman yang u Bible e bay riy. Machane 450 e duw faram ni ke buch e re n’ey. Ke mon’og e pi tamachib ko ngiyal’ ney fa? Ke tamilangnag e report ko Sunday Times ni kan yaliy e pi tamachib ni Anglican ma dawori mon’og.

Kan interviewnag 200 e tamachib, ma ke mus 34 percent nrayog ni nge yog Fa Ragag i Motochiyel. Ke yog reb e tamachib ko tin ni ka bay ni ke lemnag ni kaygi yoor e motochiyel riy, me yog yugu reb nde puluw ko pi magawon ko ngiyal’ ney.

Ga manang Fa Ragag i Motochiyel ara ga manang ko taman yang e bay riy u Bible? Kan yoloy nga but’ u lan e bin l’agruw e babyor u Bible u Exodus ko guruy ni 20 ko verse taareb nge mada’ ko 17. Mang ndab mu bieg? Reb e kanawo’ ni ngam ulunguy u lanin’um e baaray. Fa bin som’on nge mada’ ko bin aningeg e bpuluw ko liyor ni ngan tay ku Got, fa bin lal e bpuluw ko tabinaw, ma bin nel nge mada’ ko bin mereb e bpuluw ko par u thilin e girdi’, ma fa bin ragag e ba thil ya ra n’igindad ngad yaliyed gum’ercha’dad, ngad nanged e pi n’en ni ma k’aringdad ngad rin’ed ban’en. Baaray boch e kanawo’ nrayog ni nge fol e Kristiano ko kenggin e motochiyel riy.

Bin Som’on: Goo fa En ni Sunmiy gubin ban’en e ngad pigpiggad ngak. Bin L’agruw: Dabda fanayed e liyos ko liyor. Bin Dalip: Gubin ngiyal’ ma ngad ted fan fithingan Got. Bin Aningeg: Ngad dugliyed boch e tayim ni ngad tedan’dad ko tirok Got ban’en ndariy ban’en nra wageynag lanin’dad. Bin Lal: Piin ni bitir, mu ted fan e gallabthir romed. Bin Nel’: Dabda lied be’ ngem’. Bin Medlip: Dabda pired be’ ni gathi mabgol rodad. Bin Meruk: Dabda moro’ro’gad. Bin Mereb: Nga dogned e thin riyul’. Bin Ragag: Dabda chogowgad.

Fa Ragag i Motochiyel e ir bang ko fapi motochiyel ni kan pi’ ku Moses. Machane kenggin e dabki m’ay fan. (Roma 6:14; Kolose 2:13, 14) Arfan ni sul pi gachalpen Jesus nga daken fa Ragag i Motochiyel. (Roma 13:8-10) Ri ra gel e falfalan’​—nge pagan’​—ko par e ngiyal’ ney ni faanra fol gubin e girdi’ ko kenggin e pi motochiyel ney!