“Mini’ E Tay E Gonop U Fithik’ E Manileng”?

“FAAN gimed ra guy bangi lang ni be yib nga lang u lan e ngal, ma ka chingiyal’ nem me lungumed, ‘Bayi aw e n’uw, me yodorom.” Pi thin nem ni yog Jesus me yoloy Luke ni fa en ni yoloy e Gospel nga but’ e be tamilangnag u rogon ni kan nang e yafang ni bay yib u Palestine nkakrom. (Luke 12:54, 55) Yu ngiyal’ ma rayog rok e girdi’ nkakrom ni ngar guyed e pow mar weliyed rogon e yafang nra yib.

Ngiyal’ ney ma piin ni kan nog e meteorologist ngorad e yad ma fanay talin e maruwel nib biech, ni bod e pi satellite ni ma liyeg e fayleng, Doppler radar, nge pi computer nib gel, ni fan ni ngar nanged e yafang ni bay yib. Machane yu ngiyal’ ma de puluw e n’en ni yad ra yog. Mang fan?

Mmo’maw’ ni ngan nog ko uw rogon e yafang ni bay yib mi yodor u gubin ngiyal’ ya boor ban’en e ba l’ag ngay. Ya amu lemnag nrayog ni nge thil e yafang ni bochan e temperature, humidity, air pressure, nge wind-speed. Maku ka bay wenegen e yal’, manileng, nge day, ni pi scientist e ri dawori nang fan u wan’rad. Aram fan ni ngan nog ko uw rogon e yafang ni bay yib e aram e science ndawori mudugil.

Pi n’en ndawori mudugil u wan’ e girdi’ ko yafang e be puguran ngodad ko pi deer ni ke fith Job: “Gur ba’ e chitamangin e n’uw nge waangachal fa? Mini’ e chitingin e garbeb nge waangachal ni be ngal’ ni ayis? . . . ; Rayog ni ngam non ngak e manileng me mat’annigem ko n’uw? . . . Mini’ e tay e gonop u fithik’ e manileng, ara mini’ e pi’ e tamilang ko pi n’en ni buch u lan e lang? Mini’ e rib gonop nrayog rok ni nge theeg e manileng me ngololeg nge aw e n’uw?”​—Job 38:28-37.

Fulweg ko pi deer nem e gathi girdi’ machane Jehovah Got. Arrogon, demtrug ni be m’ug nrib gonop e girdi’, machane kab baga’ e gonop rok e An Tasunmiy. Ri aram e t’ufeg rok ni i pi’ e gonop rok ngodad u lan e Bible, ni fan ni nge yib angin ngodad.​—Proverbs 5:1, 2.