Ba Nangan’ nib Yul’yul’

NAP’AN ni be milekag Charles, ni nge yan nga tabinaw rok ni ke sul ko maruwel u ba university u Kenya, me n’ag ba cellular phone rok. Miti ney e chugum e rib tolang puluwon u Kenya.

I gaar Charles, “Ri da gu lemnag ni ku ra fulweg be’ e re n’ey.” Machane, in e rran nga tomuren, me gin’ ni ke yib e dengwa ngak ko branch office ko Pi Mich rok Jehovah u Kenya. Rib mo’maw’ ni nge mich u wan’ e n’en ni ke rungaag u nap’an ni yibe yog ngak ni nge yib ni nge fek e cell phone rok! Yan i buch ni ba’ reb e Pi Mich rok Jehovah ni ma machib nib polo’ e tayim rok ni ki un ko re karro ni baaram ni un Charles riy me pirieg e re phone nem. I guy rogon ni nge pirieg e ani phone rok, ma aram me fek ko fare branch office, ma piin ni yad ma maruwel u rom ni dariy puluwrad e ra pirieged Charles ni u ra leked ba namba ni be m’ug ko re phone nem.

“Ri gu be pining e magar nga gelngin e maruwel ni kan tay ni yibe gay rogon ni ngan non ngog ni dariyfan ni aram feni mo’maw’,” aray rogon ni yog Charles u lan bangi babyor ni yoloy nge pi’ ko fare branch office. “Riyul’ ni gu be pining e magar ngak e cha’ ni bay ko ulung romed ni pirieg fare cell phone, me gay nge pirieg ni gag e fanag, me fulweg. De mom ni ngan pirieg be’ nib yul’yul’ e ngiyal’ ney ni aram rogon, machane be pi’ e athamgil nga lanin’dad ni ka ba’ in e girdi’ ni be gagiyel ni riyul’ ni Pi Mich rok Jehovah Got.”

Pi Mich rok Jehovah u gubin yang e yimanangrad ko yul’yul’ rorad. Yad be folwok rok apostal Paul, ni gaar: “Ya gamad e mmudugilan’mad ngomad ndariy ban’en ni be yog lanin’mad ngomad ni kug rin’ed nib kireb, ya gamad baadag ni nguug rin’ed e tin nib mat’aw ni gubin ngiyal’.” (Hebrews 13:18; 1 Korinth 11:1) Yad manang ni ngongol ni aram rogon e ra yog e sorok ngak Jehovah Got, ni bod ni yog Jesus ni gaar: “Ere ku arrogomed ni nge gal raamed u p’eowchen e girdi’, ya ngar guyed e tin nib fel’ ni gimed be rin’ ni yad yog e sorok ngak e Chitamangimed ni bay u tharmiy.”​—Matthew 5:16.