Ngam Dag ni Ga Be Lemnag e Girdi’—Ni Ngam Tiyan’um Nga Rogon ni Yibe Sap Ngom
1 Faan gad ra un ko machib u mit e tabinaw, ma baga’ ni gad ra sap nga lan mit e girdi’ u m’on ni ngad dogned e thin ngorad. Ngiyal’ nem ma rayog ni ngad guyed rogon owcherad nge tamilang u wan’dad ko uw rogodad u wan’rad ma faanra ffel’ fa kireb lanin’rad. Ku arrogorad ni ngar nanged boch u murung’agdad ko sap rodad. Yog reb e ppin u murung’agen be’ ni Mich ni gaar: “Ban’en ni ke mit nga lanin’ug u murung’agen owchen ni be siminmin e aram e gapas riy. Re n’em e ke pug e tafinay rog.” Aram rogon ni ke bing e kanawo’ ni nge motoyil fare ppin ko thin nib fel’.
2 Ngan guy nga lan mit e girdi’ e ra ayuwegey i tababnag e machib u kanawo’ ara yu gin ni ma par e girdi’ riy. Reb e walag e ma sap nga lan mit e girdi’ ni be yib u but’. Nap’an nra mada’ owcherow, ma ra siminmin me dag e magazine ngak. Aram rogon ni ma yib angin ngak me wereg boor e babyor.
3 Ngan Tiyan’uy ko Uw Rogon Laniyan’ e Girdi’: Faan gad ra sap nga lan mit e girdi’ ma ra ayuwegdad ngad nanged ko uw rogon laniyan’ rorad. Ya amu lemnag, faanra mo’maw’ ko be’ ni nge nang fan e thin rodad ara de puluw ban’en ni kad dogned u laniyan’, ma baga’ nra m’ug u owchen. Faanra boor pa’ u puluwon ara de gum’an’ ngodad, ma ra tamilang u lanin’dad ko sap owchen. Ma aram ma rayog ni ngad thiliyeged ara talgad ko machib u rogon nib puluw. Faan gad ra tiyan’dad ko uw rogon laniyan’ e girdi’ ma aram rogon ni ngad daged ni gad be lemnaged yad.
4 Rogon nib Yul’yul’ mab Mudugil: Faanra sap be’ nga lan mit e girdi’ ma aram yalen u boor e binaw ni ir be’ nib yul’yul’. Amu lemnag rogon ni pi’ Jesus e fulweg ko ngiyal’ ni fith pi gachalpen ngak ni yad gaar: “Mini’ e rayog ni nge thap ngak Got?” Me weliy e Bible: “Me changar Jesus ngorad me fulweg ngorad ni gaar, ‘Girdi’ e dabiyog rorad, machane Got e urngin ban’en ma rayog rok.’” (Matt. 19:25, 26) Dariy e marwar riy ni lan mit Jesus e ke tay nib mudugil e pi thin rok. Ku arrogodad, faan gad ra sap nga lan mit e girdi’ ma ra ayuwegdad ngad wereged fare thin nib fel’ u murung’agen Gil’ilungun Got u rogon nib yul’yul’ mab mudugil.—2 Kor. 2:17; 1 Thess. 1:5.