“Mu Lekeg I Yan”
1 Boor e girdi’ ni goo yad ma lemnagrad, machane dar falfalan’gad. Ma ke yog Jesus ba kanawo’ nib math keru’ ko re n’em ya ke yog ni dabmu siin ma ngam par ni ga ma pi’ ban’en ma aram e ga ra par nib falfalan’. (Acts 20:35) Ke gaar: “Faanra ba adag be’ ni nge un ngog, ma thingari pag talin ir . . . nge lekeg.” (Mark 8:34) Ma gathi ke mus ni yu ngiyal’ ma ngam pag fam. Ya ngad pared u gubin e rran ni ngad felan’aged Jehovah ma gathi gadad.—Rom. 14:8; 15:3.
2 Mu lemnag e kanawo’ ni tay apostal Paul. I n’ag urngin ban’en me mon’eg Gil’ilungun Got ni bochan e “bin ni ka ba ga’ fan e nge nang Kristus Jesus.” (Fil. 3:7, 8) I gaar: “Gub adag ni nggu pi’ urngin e tin ni ba’ rog nge gag ni fan e nge yog ni gu ayuwegmed.” (2 Kor. 12:15) Ra bagadad ma fel’ ni ngad fithed gadad ni: ‘Uw rogon ni gu be fanay e tayim rog, nge gelngig, nge tin ni ba’ rog? Gu be mon’ognag e tirog ban’en, fa gu be guy rogon ni nggu felan’nag Jehovah?’
3 Rogon ni Ngan Pi’ Ban’en: Gubin e duw ma girdi’ rok Got e ma tay boor ko reb e bilyon e awa ko machib ko Gil’ilungun Got ni ngar ayuweged e girdi’. U lan e ulung ma piin nib ilal nge piin ni fel’ yangaren e yad ma rin’ boch ban’en ni nge yib angin ko girdi’. Maku boor e maruwel ni yibe tay ni fan ko pi assembly nge convention nge pi naun ni yibe toy ni fan ko bin riyul’ e liyor. Ma ngam lemnag e ayuw ni ma pi’ e pi walag ni ma pigpig u fithik’ e t’ufeg ko Hospital Liaison Committee nge Patient Visitation Group. Urngin e athamgil ni ma tay e piin ni kar paged farad e aram e flaab ko pi walag ko Kristiano!—Ps. 110:3.
4 Rayog ni ngad pied gadad u nap’an ni ke yib e magawon ni disaster ara emergency. Ma baga’ ni rayog ni ngad lemnaged e pi Kristiano u nap’an nib t’uf e ayuw rorad ara ba t’uf rorad ni ngan fl’eg laniyan’rad. (Prov. 17:17) Nap’an ni gad ma athamgil ni ngad pigpiggad ko girdi’ ma ngad mon’eged Gil’ilungun Got, ma gad be lek kanawoen Jesus. (Fil. 2:5-8) Ngad athamgilgad ni nguud rin’ed.