Ngad Folwokgad Rok Jehovah, ni “Got ni Ba Falfalan’” Rodad
1 Baadag Jehovah ni nge falfalan’ gubin e girdi’. Thin Rok Got e ma k’aringdad ngad sapgad nga m’on ko flaab ni bayi yib ko girdi’ u fayleng. (Isa. 65:21-25) Susun ni ba tamilang u wan’ yugu girdi’ ni gad ba falalan’ ni ngad wereged “fare Thin Nib Fel’ ni yib rok Got ngorad ma aram e bin th’abi falfalan’.” (1 Tim. 1:11) Rogon ni gad be machibnag fare thin u murung’agen e Gagiyeg Rok Got e susun ni nge dag ni ba t’uf e tin riyul’ rodad ma ri gad baadag ni ngad ayuweged e girdi’ ni gad be machibnag.—Roma 1:14-16.0
2 Ba riyul’ ni yu ngiyal’ ma ba mo’maw’ ni ngad pired ni gad ba falfalan’. U boch e territory ma gad ra pirieg boch e girdi’ ni yad baadag e thin u murung’agen e Gagiyeg Rok Got. Ma bay yugu ba ngiyal’ ni bay mit e magawon rodad. Ra ngad pired ni gad ba falfalan’ ma ba t’uf ni ngad lemnaged nri ba t’uf rok e girdi’ u lan e territory ni ngar rung’aged e thin nib fel’ u murung’agen e Gagiyeg Rok Got mar nanged fan. (Roma 10:13, 14, 17) Faan gad ra fl’eg i lemnag ma ra ayuwegdad nguuda falfalan’gad ngad tamilangnaged e runguy rok Jehovah nge thap e girdi’ ngak.
3 Ngan Machibnag u Murung’agen e Tin nib Fel’ ni Bayi Yib: Maku ba t’uf ni ngad tedan’dad ko thin ni gad be weliy. Yugu aram rogon ni gad ra tababnag e machib ni ngad weliyed u murung’agen ba magawon ara news ni bay u wan’ e girdi’, machane susun ni ngad siyeged ni nguuda weliyed u murung’agen e tin ni ba kireb ni be buch u gubin ngiyal’. Ya mmil fan ngodad ni ngad “feked e thin nib fel’ i yib” ni murung’agen e tin ni kab fel’ riy. (Isa. 52:7; Roma 10:15) Re thin nib fel’ ney e ba m’ag ko n’en ni ke micheg Got ni bayi yib e par nib kab fel’ nga m’on. (2 Pet. 3:13) Ere, nguuda feked e Thin ko Bible i yan ngak e “piin ni ke kireban’rad.” (Isa. 61:1, 2) Ya ra ayuwegdad nguuda pired ni ba puluw lanin’dad ma gad ba falalan’.
4 Dabi siy nra guy e girdi’ e falfalan’ rodad ko ngiyal’ ni ngad uned ko maruwel ni machib. Me ere, nguuda folwokgad rok Jehovah, ni “Got ni ba falfalan’” rodad ko ngiyal’ ni ngad wereged fare thin nib fel’ u murung’agen e Gagiyeg Rok Got ngak e girdi’ u lan e territory rodad.