Deer
◼ Ke fel’ u wan’ “fare tapigpig nib yul’yul’ mab gonop” ni nge muulung boch e Pi Mich Rok u taabang ni fan e ngar fl’eged i gayiy boch e thin nu Bible nge maluag thin fa?—Matt. 24:45, 47.
Danga’, de fel’ u wan’. Machane u yuyang u fayleng, e be muulung boch e girdi’ ko ulung rodad ni ngar fl’eged i gayiy boch ban’en rorad ni bay u Bible. Boch i yad e kar fl’eged e ulung ni fan e ngar filed e Bible nthin nu Hebrew nge Greek ya yad be yaliy ni faanra ba mat’aw mab puluw e thin ko New World Translation. Yugu boch i yad e yad be fil u murung’agen e tin ko science ni bay u Bible. Kar ngongliyed boch e Web site nge chat room ni fan e ngar wereged e lem rorad mar tugthingad. Maku kar ted boch e muulung mar fl’eged boch e babyor ni be tamilangnag e tin ni kar pirieged mar uneged ko pi babyor rodad mar fanayed ko pi muulung ko Kristiano.
Ma pi’ e ulung rok Jehovah boor e thin ko tirok Got ban’en ngak e girdi’ rok ko muulung, assembly, nge convention, nge pi babyor ni yima ngongliy ni fan e nge skulnagrad me pi’ e athamgil nga lanin’rad. Ma pi’ Jehovah e tin nib t’uf rok gubin e girdi’ u daken e kan ni thothup nge Thin rok ni fan e “nge taareban’med ni gimed gubin ko tin ni gimed be weliy” mi “i gel i yan e mich u wun’med ngak.” (1 Kor. 1:10; Kol. 2:6, 7) Dabi siy ni gad be pining e magar ngak Jehovah ko tirok ban’en ni be pi’ ngodad u nap’an e tin tomren e rran. Ere, “fare tapigpig nib yul’yul’ mab gonop” e dabi tay tanggin e pi babyor, nge muulung, ara Web site ni de ngongliy ara yarmiy.—Matt. 24:45-47.
Ffel’ ni ba adag e girdi’ ni ngar fanayed lanin’rad ni ngar ted tanggin fare thin nib fel’. Machane, susun ndab da paged e tirodad ban’en nge m’on ko tin ni be rin’ Jesus Kristus u daken e ulung rok u fayleng e ngiyal’ ney. Nap’an e bin som’on e chibog, i ginang apostal Paul ni dab ni tay boor e tayim ni ngan fil e tin ni yugu dariy fan, ni bod “fithingan pi chitamangiy ni kakrom ni ma yoor, ya ereray e pi n’en ni be k’aring e tugthin.” (1 Tim. 1:3-7) Gubin e Kristiano e susun ni ngar athamgilgad ni ngar tayed yad u “urel ko maluag thin ndariy fan, nge ngachal ni pire’ ni kan yoloy nga babyor ni ngachalen pi chitamangiy ni kakrom, nge tugthin, nge maluag thin ni murung’agen e Motochiyel. Ya dariy fan ma dariy gam’engin.”—Titus 3:9.
Gamad be pi’ e athamgil nga laniyan’ e girdi’ ni yad ba adag ni ngar yoornaged e fol Bible rorad mar fl’eged i gayiy boch ban’en e ngar yaliyed e Insight on the Scriptures, “All Scripture Is Inspired of God and Beneficial,” nge yugu babyor ni ma weliy u murung’agen e thin ko profet ni bay u Bible ni bod Daniel, Isaiah, nge Revelation. Pi babyor ney e bay boor e thin nib fel’ riy ni ngan fl’eg i lemnag min tay ko fol Bible, maku rayog ni “ngam nanged e tin nib m’agan’ ngay ni ir e ngam rin’ed, nib chag urngin e gonop nge tamilangan’ ngay ni ma pi’ e Kan ni Thothup rok. Ma aram me yog ni um ngongolgad nrogon ni ba adag Somol, mu um rin’ed e tin nib m’agan’ ngay ni gubin ngiyal’. Me yib wom’engin i pangimed u fithik’ urngin mit e maruwel nib fel’, ma gimed be nang rogon Got i yan nge tin ni ba adag.”—Kol. 1:9, 10.