Ra Nog Ban’en nib Fel’ ni Ke Rin’ Be’ Ma Ra Yibnag e Felfelan’
1 I yor bochi tir u nap’an ni be n’en ni nge mol ni be gaar: “Gathi kug llowan’ e daba’?” Kari gin e chitiningin ko deer rok. Yugu aram rogon ni ke llowan’ fare tir e rorran nem machane de yog e chitiningin ban’en nib fel’ ni ke rin’. Meyor ni ke tay fare tir e be dag ngodad ni gadad gubin–ndemtrug yangardad—mab t’uf ni nga u nog e tin nib fel’ ni kad rin’ed. Gad ma dag nib fel’ u wan’dad e tin nib fel’ ni ke rin’ be’ u daken e thin nib fel’ ni gad ma yog u murung’agen, fa?—Prov. 25:11.
2 Dab Mu Magagawon ni Nga Mog Ban’en nib Fel’ ni Ke Rin’ Be’: Bochan boch e yalen u Micronesia, ma boor e girdi’ ni yad ma lemnag nfaanra ra rogned ban’en nib fel’ ni ke rin’ pi fakrad ma ra k’aring e ufanthin nge tolangan’ ngorad mar darifannaged e tin ka bay e girdi’ u lan e tabinaw. Bfel’ ni ngad fithed gadad ni nge lungudad, “Gu be fol ko ‘ngongol ni yibe rin’ u roy u fayleng,’ ma da gur yog ban’en nib fel’ ni ke rin’ pi fakag nge boch e girdi’ fa?”—Roma 12:2.
3 Kab fel’ ni ngada folwokgad rok e Chitamangidad nu tharmiy nima t’ufegey ko bin ni ngada folgad u yalen e girdi’ ndarur pigpiggad ku Jehovah. (Mu beeg e Exodus 23:2 nge Efesus. 5:1) Mus ku Jesus miki yog e tin nib fel’ ni i rin’ boch e girdi’. I weliy murung’agen Nathaniel u m’on ndawori mang reb i gachalpen ni gaar: “Cha’ney e riyul’ ni ir be’ u Israel, ni be’ nrib yul’yul’!” Rayog ni ngad folwokgad rok Jesus nge Jehovah ni chitamangin nga u dogned e tin nib fel’ ni be rin’ pi fakdad nge pi walagdad.
4 Ri boor fan ni nga dogned e tin nib fel’ ni ke rin’ e pi walagdad ni Kristiano. Ba gel e maruwel nima tay e piin ni piilal nge ministerial servant nge pioneer ni fan e ngar lebuguyed e tin nib milfan ngorad. Gallabthir ni Kristiano e yad ma athamgil ni ngar chuguliyed pi fakrad nrogon nib puluw ko pi kanawo’ rok Jehovah. (Efe. 6:4) Ma piin fel’ yangaren e ba gel e athamgil ni yad ma tay ni ngar togopluwgad nga nifingin e re fayleng ney. Ma boch e girdi’ e yad ma pigpig ku Jehovah u fithik’ e yul’yul’ ni yugu aram rogon ni kar pilibthirgad ara kar m’argad, ara keb yugu boch e magawon ngorad. (2 Kor. 12:7) Ba t’uf ni ngan pining e magar ko pi girdi’ ney. Gur, gad ma yog e tin nib fel’ ni kar rin’ed nge athamgil ni kar ted fa?
5 Ngeb e Thin Rom u Gumir’chaem: Faanra nge felfelan’ e girdi’ ko thin ni gad ra yog ngorad ma thingari yib u gum’irchadad. Thin ni aram rogon e ma micheg ngak pi walagdad ni yad ba t’uf rodad maku ma fal’eg e thin u thildad. Ka immoy ba ngiyal’ ndawori n’uw nap’an ni kam pining e magar ngak be’ ni bochan e tin nib fel’ ni ke rin’ fa? (Efe. 4:29) Gad ra fil ngodad rogon ni ngaud guyed e tin nib fel’ rok boch e girdi’, ma ra k’aringdad ni nga u dogned e tin nib fel’ ni yad ma rin’. Manga yugu da golgad nga u dogned e tin nib fel’ ni ke rin’ boch e girdi’, ma gad nang ni “rib fel’ bbugithin nnog ko ngiyal’ ni nga nog riy.”—Prov. 15:23.