Ngan Ayuweg e Tin Kab Beech e Girdi’ Ngar Gelgad ko Togopluw
1 Nap’an nra tabab e girdi’ ko fol Bible mar ‘adaged ni ngar pired u reb e pangin nib m’agan’ Got ngay,’ ma aram e ra yibnag Satan e togopluw ngorad. (2 Tim. 3:12) Rayog ni ngeb e togopluw ngorad u tabon e maruwel ara skul ara piin buguli yoror rorad. Ma rib gel e mo’maw’ riy ni faanra togopluw girdien e tabinaw ngak e tin kab beech e girdi’ u lan e ulung.—Matt. 10:21; Mark 3:21.
2 Kan Yiiynag Nra Yib e Togopluw: Thingari nang e tin kab beech e girdi’ nra yib e togopluw ngorad ya aram e pow nriyul’ ni yad boch i gachalpen Kristus. (John 15:20) Yu ngiyal’ ma ra togopluw e girdi’ ya dar nanged e tin nriyul’ u murung’agen e Pi Mich Rok Jehovah. Dab mu pagtalin nib felfelan’ e piin ni yibe darifannagrad ni bochan e yad be lek Jesus ma yad be fol rok Got. (Acts 5:27-29, 40, 41) Ngan micheg ngak e tin ni kab beech e girdi’ nra ayuwegrad Jehovah. (Ps. 27:10; Mark 10:29, 30) Yad ra par nib yul’yul’ ma aram e yad be micheg nriyul’ ni yad ba muun nga ba’ rok Jehovah maku yad be micheg ni Jehovah e bay mat’awun ni nge gagiyegnag e palpalth’ib.—Prov. 27:11.
3 Ba Ga’ Fan ni Nguun Fil e Thin Nriyul’: Mu tamilangnag ko piin ni ga be fil e Bible ngorad nib ga’ fan ni nguur filed e thin nriyul’ u Bible ni yugu aram rogon ni be yib e magawon ngorad. Ra togopluw Satan ngorad ya ba adag ndabi taw e thin riyul’ ni yad be fil nga gum’ircharad. (Prov. 4:23; Luke 8:13) Thingar nguur filed e thin nriyul’ ni bay ko Thin Rok Got nge yog ni gel e michan’ rorad.—Ps. 1:2, 3; Kol. 2:6, 7.
4 Ba T’uf e K’adan’: Faanra ni k’adan’uy ko gafgow ni ma yib ma ra yib angin nib fel’. (Luke 21:16-19) Faanra k’adan’ e tin kab beech e girdi’ u fithik’ e togopluw ma ra yib angin ngorad nge tin ka bay e girdi’. Yad ra guy rogon ni ma flaabnag Jehovah e piin ni ma k’adan’ u fithik’ e yul’yul’.—Jas. 1:12.
5 I felfelan’ apostal Paul ni bochan e mon’og ni i tay e pi walag u Thessalonika ko tirok Got ban’en. I pining e magar ngak Got ni bochrad, ya ir e ayuweg boor i yad ngar uned ko tin nriyul’. (2 Thess. 1:3-5) Ku rayog ni ngad felfelan’gad ni aram rogon ni faan gad ra ayuweg e piin gad be fil Bible ngorad ngaur k’adedan’rad u fithik’ e togopluw.