Ngan Gay e Piin ni Baadag ni Nge Motoyil
1. Uw rogon ni ngada ted fan fare tow’ath ni kan pi’ ngodad ni ngada machibgad?
1 Nap’an ni i machib Jesus ma kari athamgil ni nge machibnag fare thin nib fel’ ya nge fal’eg laniyan’ e piin nib sobut’an’. (Isaiah 61:1, 2) Gadad mit e thin rok Got ni gad be machib ni pa’ Kristus. Ere gadad ba tow’ath ya gad be folwok rok Jesus ma gad be athamgil ni ngada gayed e piin ni baadag ni nge motoyil.—Matthew 10:11; 2 Korinth 5:20.
2. Uw rogon ni i machib Paul ko gin ni bay e girdi’ riy, ma mang angin e machib ni tay?
2 Ngan Gay e Girdi’: Ke mecham apostal Paul ngay ni nga i yan nga tafen e muulung rok piyu Jew nge machibnagrad u rom. (Acts 14:1) U Filippi e i gay Paul nge Silas e girdi’ ko gin ni kar “fineyew ni ra moy bayang riy ni ma muulung piyu Israel ngay nguur meybilgad.” Ur machibnagew boch e ppin u rom ma bagayad e Lydia fithingan e mich e thin riyul’ u wan’.—Acts 16:12-15.
3. Mang yugu boch e kanawo’ ni ku rayog ni ngad machibgad riy?
3 Kemus ni ga ma machibnag e girdi’ u mit e tabinaw, fa ku rayog ni ngam machibnag e girdi’ u lan e ofis rorad, ara u kanawo’, ara kantin ara market? Sana rayog ni ngam machibnag e girdi’ u telefon fa ngam yoloy e babyor ngam pi’ ngorad ni bochan e yad ma par ko naun fa binaw ni dabiyog ni ngan yan ngay. Faan ga ra tayan’um ko gin ni bay e girdi’ riy nge pi n’en nib t’uf rorad ma rayog ni nge yoor e “maruwel romed ni fan ngak Somol.”—1 Korinth 15:58.
4. Mang e ku rayog ni ngan rin’ ni faanra buchuuw e binaw ko gin gad ma machib riy?
4 Boch e girdi’ ko ulung rodad e ka ranod nga reb e ulung u reb e binaw ara yugu reb e nam ya nge yoor e machib ni ngar ted. Yugu boch e girdi’ rodad e kar filed boch e thin u boch e nam ya nge yog ni ngar machibnaged e girdi’ ko pi nam nem ni bay u lan e binaw rorad.
5. Mang e thingar da lemnaged e ngiyal’ ney, ma mang e thingar da rin’ed?
5 Dab da paged talin ni “fare gi milay’ e eram e fayleng.” (Matthew 9:37; 13:38) Ke chugur nga tomuren e re m’ag nib kireb ney, ere nge bagadad ma thingari fal’eg i lemnag rarogon, nge pi salap rok, nge pi n’en nrayog ni nge rin’ ni fan e nge yoor e machib ni nge tay. Ke micheg Jehovah ngodad ni faan gad ra m’oneg Gil’ilungun ma ra flaabnagdad ko athamgil ni gad be tay ko machib rodad.—Matthew 6:33.