Rogon ni Ngad Ayuweged e Piin ni Gad Be Fil e Bible Ngorad ni Nge Taw e Thin rok Got Nga Gum’ircha’rad
1. Mang angin e machib ni tay Jesus ngak e piin ni ur motoyilgad ngak?
1 Nap’an ni machib Jesus Kristus ma i ayuweg e girdi’ ni nge taw e thin rok Got nga gum’ircha’rad. Bay ba ngiyal’ ni gowa be “yik’” ngorongoren pi gachalpen u tomuren ni weliy Jesus e thin ko Bible ngorad. (Luke 24:32) Faanra ngan fol ko thin rok Got ma aram ban’en ni thingari sum u gum’irchaey, ere mang e ngad rin’ed ni nge yag ni ngad ayuweged e piin ni gad ma fil e Bible ngorad ni ngar thilyeged boch ban’en ko yafos rorad?—Rom. 6:17.
2. Ra ngam gonopiy e n’en ni nga mog, ma uw rogon nra ayuweg e re n’ey faen ni ga be fil e Bible ngak ni nge taw e thin rok Got nga gum’irchaen?
2 Ngam Gonopiy e N’en ni Nga Mog: Bay boch e girdi’ ni faanra kemus ni nga nog ngorad ko mang e ba mat’aw ara de mat’aw ni ngar rin’ed e dabi ayuwegrad ni ngar thilyeged boch ban’en u rarogon e yafos rorad. Bin riyul’ riy e, faan yira weliy boch e thin nu Bible ngorad nib togopuluw ko pi n’en nib michan’rad ngay ma sana ra k’aringrad ni nge dabkur motoyilgad. Faanra ngad ayuweged be’ ni nge mon’og ma som’on e ngad nanged ko mang fan nib mich u wan’ boch ban’en nge fan ni ma rin’ boch ban’en. Yira fal’eg i lemnag e pi deer ni ir e ngan fith ngak ma ra ayuweg ni nge yag ni nge weliy e pi n’en ni bay u laniyan’. (Prov. 20:5) Kemus e ngiyal’ nrayog ni ngad nanged ko tin ngan e thin nu Bible e ba puluw ni ngad weliyed ngak. Ere, ba t’uf ni ngad daged ni gad be lemnag rarogon ma ngkud gum’an’gad. (Prov. 25:15) Dab da paged talin nra be’ ma rogon ni ma mon’og ko tirok Got ban’en. Ba ga’ fan ni ngad paged gelngin Jehovah nib thothup nge gagiyegnag e lem nge ngongol rorad.—Mark 4:26-29.
3. Uw rogon ni ngad ayuweged e piin ni gad ma fil e Bible ngorad ni nge yag boch pi fel’ngin Got ngorad?
3 Ngam Ayuwegrad ni Nge Yag Boch Pi Fel’ngin Got Ngorad: Pi thin nu Bible ni be weliy murung’agen feni rib manigil Jehovah nge rogon e t’ufeg rok e rayog ni nge ayuweg e piin ni gad be fil e Bible ngorad ni nge yag boch pi fel’ngin Got ngorad. Rayog ni ngad guyed boch e thin nu Bible ni bod e Psalm 139:1-4 ara Luke 12:6, 7 ni nge yag ni ngad guyed e t’ufeg rok Got ngak be’ nge be’. Nap’an nra dag e piin ni gad be fil e Bible ngorad feni rib ga’ fan u wan’rad e t’ufeg ni be dag Jehovah ngorad, ma aram e ra gel i yan e t’ufeg nge yul’yul’ rorad ngak. (Rom. 5:6-8; 1 John 4:19) Maku yad ra nang nib ga’ fan u wan’ e pi n’en ni yad ma rin’, ma re n’ey e rayog ni nge k’aringrad ni ngar ngongolgad u rogon nib m’agan’ ngay maku be m’ug riy ni yad be tayfan.—Ps. 78:40, 41; Prov. 23:15.
4. Nap’an ni gad be fil e Bible ngak be’, ma uw rogon ni ngad daged ni gad be tayfan e n’en ni ke dugliy ni nge rin’?
4 Der ma towasariy Jehovah be’ ni nge fol ko pi motochiyel rok. Ya bin riyul’ riy e ma tamilangnag ko girdi’ ni yad ba gonop ni faan ni yad ra fol ko pi motochiyel rok. (Isa. 48:17, 18) Gad ma folwok rok Jehovah ni faan gad ra fil boch ban’en ngak e piin ni gad be fil e Bible ngorad u reb e kanawo’ ni nge ayuwegrad ni ngar lemnaged e pi n’en nib fel’ ni ir e ngar rin’ed. Ma nap’an ni yad ra nang feni rib ga’ fan ni ngar thilyeged boch ban’en u rarogon e yafos rorad ma angin nra yib riy e ra par nib n’uw nap’an. (Rom. 12:2) Ma re n’ey e ku ra chugurnag e tha’ u thilrad Jehovah ni ir e ma fal’eg i yaliy “gum’irchaen” e girdi’.—Prov. 17:3, BT.