Thin ni Yib ko Fare Ulung ni Ma Pow’iyey

Pi Walagmad ni Pi Mich Rok Jehovah:

Ri gamad ba felfelan’ ni nggu yolgad ngomed pi walagmad ni gimed ba t’uf romad! Taareb an’mad apostel John ni i yog ni “ri ba t’uf” pi walagen rok ma ke felfelan’ ni ka “yad ba yul’yul’ ko tin nib riyul’.” (2 John 1, 4) Ri gadad ba tow’ath ni bochan e kad nanged e machib ni riyul’! Fare thin riyul’ e ke chuwegdad ko Babylon nib Gilbuguwan nge pi machib rok ni de riyul’, nge pi yalen rok ni ma dariy fannag Got. Bochan e kada folgad ko thin riyul’ ma aram e kad manged e girdi’ ni ma t’ufegey, mab gol, ma tarunguy e girdi’. Ma ku bochan e thin riyul’ ma ke yog ni ngada pared ni gad beech u mit Got miki mab e kanawo’ ni nge yog e yafos ni manemus ngodad.

Maku gadad ma pining e magar ku Jehovah ni bochan gelngin ni ma pi’ ni nge pow’iydad me gelnagdad u gubin e rran! Gamad manang ni kam felfelan’gad ko fapi thin ni kam filed u nap’an fare assembly ni l’agruw e rran ni “Gelngin Got e Ma Pow’iydad” ni ke weliy murung’agen gelngin Got ni ma pi’ ni tow’ath. Thingar da pagedan’dad ku Jehovah ni nge pow’iydad u daken gelngin ya be gel e kireb u fayleng.

Gamad manang ni kam felfelan’gad ni kam beeged fapi thin u lan e Yearbook u murung’agen e pi walagdad ni kar k’adedan’rad u fithik’ e gafgow ni bochan e michan’ rorad. Boor e pi girdi’ nem ni yad ba yul’yul’ e ka fin ra uned ko taufe ara dawor ra uned ko taufe u nap’an ni yib e togopluw ngorad. Ri yad ba t’uf rodad ni bochan e yul’yul’ rorad ni fan ko tin nib mat’aw ban’en! Ngongol rorad nib fel’ e ma gelnag e athamgil nga lanin’dad ni ngada folwokgad rorad ni ngad yul’yul’gad ko Gil’ilungun Got ni yugu de mutrug e gafgow ni ra yib ngodad.​—1 Thessalonika 1:6-8.

Pi walagmad, gamad manang ni boor e magawon romed ni magawon ko salpiy nge yugu boch e magawon ma gimed be athamgil ni ngam ayuweged e tabinaw romed ngam taarebgad u fithik’ e t’ufeg. Gamad manang nib mo’maw’ rok boch i gimed ni ngam machibgad ma ngam uned ko gubin e muulung. Ere kug meybilgad ni boor yay ma kug puruy’naged nib fel’ ni nggu thilyeged rogon e muulung ni ra tabab ko January 1, 2009. Ra yog e tayim ni boor ngomed ni bochan e ke thil rogon e muulung rodad. Ra pagan’mad ngay ni gimed ra fanay e pi tayim nem ni fan ko tabinaw romed mi gimed fol babyor u taabang ara ngam fol babyor ni goo gur.

Kugu felfelan’gad ni boor e girdi’ e kar uned ko taufe u nap’an e pi assembly rodad ko re duw ney. Boor i yad e kab fel’ yangarrad. Gamad be pining e magar ngomed e gallabthir ya kam chuguliyed pi fakmed ni ngar ted fan e thin riyul’ ma kam pied e athamgil nga lanin’rad ni ngar ognaged yad ku Jehovah u nap’an ni kab fel’ yangarrad. Demutrug gelngin e togopluw ni ma yib ngorad u skul machane ke yog ni ngar uned ko taufe. Re n’en ney e ma micheg ni kan chuguliyrad nib fel’rogon ma kan fil e thin riyul’ ngorad u tabinaw.​—Psalms 128:1-6.

Ku gamad be pining e magar ngomed ni bochan e ke yoor e Bible study. Ma ba ga’ ni ke yoor e Bible study ni bochan e maruwel rok e pi missionary nge pi pioneer. Gamad girdien e Fare Ulung ni Ma Pow’iyey e gamad be pining e magar ngomed e pi walagmad u fayleng i yan ni gimed be pining e girdi’ nib yul’yul’ ni be lungumed: “Moy gur e en ni ke yib e belel ngom; ngam fek fare ran ko yafas nib tow’ath ni yira pi’ ngak e en ni ba adag ni nge yog ngak.” (Revelation 22:17) Gamad ba felfelan’ ni fare 289,678 e girdi’ ni kar uned ko taufe u lan fare duw ni ke yan e kar manged pi walagdad.

Dab da paged talin e thin rok apostal John ni gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17) Ri gad be par ko ngiyal’ ni kari chugur ni “bayi m’ay” e re m’ag ney! Ere nge m’on e maruwel rok Jehovah u wan’dad ma “ngada fal’eged rogodad ngada pired.” (Matthew 24:42) Dabi kalngan’dad ni faan gad ra fol ko re thin ney ya ra yog e flaab ngodad ni bochan e runguy rok Jehovah.​—Isaiah 63:7.

Gamad be athapeg ni ra yib e athamgil nga lanin’med ni ngam m’oneged Gil’ilungun Got ni bochan e kam beeged e thin u lan e Yearbook. Dab mpaged talin ni gubin ngiyal’ ma gamad ma lemnagmed ma gamad ma yibilaymed ma ri gimed ba t’uf romad. Nga i flaabnagmed Jehovah.

Gamad e pi walagmed,

Fare Ulung ni Ma Pow’iyey ko Pi Mich Rok Jehovah