Ga Manang Murung’agen E Re N’ey, Fa?

Uw rogon ni yima fek e nifiy u bang nga bang kakrom?

BE YOG fare thin nu Bible ni bay ko Genesis 22:6 ni “yog Abraham ngak Isak ni nge fek e l’ud ni fan ko maligach ni nga ni urfiy, me mang ir e fek fapi kol ni fan ko nifiy, me fek e yar. Mi yow yan.” I rin’ e re n’ey ni fan e nge yag nra ngongliyew rogon e maligach ni ngar ognagew u bangi ban’en ni nga ranow ngay nib palog.

Dariy bang u Bible ni be yog e n’en ni un fanay ni ngaun abuweg e nifiy ngay kakrom. Baaray e n’en ni yog be’ ni ma weliy murung’agen boch ban’en u murung’agen e re thin nu Bible ney. I yog nib mich u wan’ ndabiyog ni “nge par e nifiy [rok Abraham nge Isak] nib maab u n’umngin nap’an ni yow be milekag nib n’uw yang e gin ni yow be yan riy.” Ere, rayog ni n’en ni yibe weliy murung’agen e aram e n’en nra fanayew ni ngar abuwegew e nifiy ngay.

Machane, ku bay boch e girdi’ ni ka rogned nde mom ni ngan abuweg e nifiy kakrom. Ba ga’ nib mom ko girdi’ ni nga ranod ra feked achifin e nifiy ko buguli yoror rorad ni ngar abuweged e nifiy rorad ngay ko bin ni nga fin ra abuweged reb e nifiy. Ku boor e girdi’ nib llowan’ nib mich u wan’rad ni bay barba’ i ban’en ni fek Abraham. Yad ma lemnag nsana fek barba’ i ban’en ni bay togfan nib chen ni bay achifin e nifiy riy ni ka un fanay u reb e nep’ riy. (Isa. 30:14) Ere, faan yira af achifin e nifiy nga lan barba’ i ban’en ngan fek ni aray rogon ma aram e ba mom ni ngan tay taban e l’ud ngay ni ngan abuweg e nifiy u nap’an ni yibe milekag.