Tin Ni Buch Kafram E Be Ginangey

Dabi pag Jehovah e girdi’ ni kireb ni ngar gatheyed e Paradis. Ke mus ni go’ pi fager rok e yad ra par u rom. Mang e bayi buch ko girdi’ ni kireb? Ra ngan nang e fulweg riy ma ngan lemnag nriyul’ chepin Noah. Immoy Noah ni bokum biyu’ e duw kakrom. Ir reb e pumoon nib fel’ ni gubin ngiyal’ ma ri ma guy rogon ni nge rin’ e tin ba m’agan’ Jehovah ngay. Machane yugu boch e girdi’ u fayleng e go’ kireb e pi n’en ni ur rin’ed. Ere yog Jehovah ngak Noah ni bayi pi’ e ran ni nge thang mit urngin e girdi’ ni kireb. Miki yog ku Noah ni nge toy reb e arke ya nge yib e Ran ma dabra m’ad chon e tabinaw rok.​—Genesis 6:9-18.

Noah nge Tabinaw Rok Nra Toyed e Arke. I ginang Noah e girdi’ ni be yog ni bay yib e Ran, ma da ur motoyilgad ngak. Ka yad be ulul i rin’ e pi n’en nib kireb. Tomren ni ke m’ay fare arke, me fek Noah fapi gamanman nga lan fare arke, Me ere pi’ Jehovah bangi nifeng nib gel. Me aw e n’uw ni 40 e rran nge 40 e nep’. Me sugnag e ran ga’ngin yang e fayleng.​—Genesis 7:7-12.

Fapi girdi’ ni kireb e thay e yafos rorad, machane Noah nge tabinaw rok e bfel’ rogorad. Fekrad Jehovah i yib nib fel’ rogon u fithik’ fare Ran nga reb e fayleng nib biech ndariy e girdi’ ni kireb riy. (Genesis 7:22, 23) Be gaar e Bible ra yib ba ngiyal’ biyay ni kura thang Jehovah e piin ni ma siyeg ni nge rin’ e tin ba mat’aw. Ma girdi’ ni mmanigil e dab ni thangrad. Bay ra pired ni manemus u paradis.​—2 Peter 2:5, 6, 9.

Ngiyal’ ney e rib yoor e girdi’ ni ma rin’ e pi n’en nib kireb. Ma fayleng e ke sug ko magawon. Ke l’og Jehovah e Pi Mich Rok nib pire’ yay ni ngan ginang e girdi’. Ma baga’ ni darur motoyilgad ko thin rok Jehovah. Daworra adaged ni ngar thiliyeged e pi kanawo’ rorad. Daworra adaged ni ngar folgad ko tin ke yog Got ni murung’agen e tin ba mat’aw nge tin ba kireb. Mang e bayi buch ko pi cha’ ney? Gur rayog ni ra thilgad reb e rran? Boor i yad e ri ba kireb madab kur fasgad bayay.​—Psalm 92:7.

Fare fayleng e dabi kireb ma ran fl’eg rogon nge mang paradis. Piin yad ra mang fager rok Got e yad ra par u paradis u fayleng ndariy numngin nap’an.​—Psalm 37:29.