Mang e Ga Ma M’oneg?

¹ Mang e fulweg rom ko re deer nem? Dabi siy ni gad gubin ma gad ba adag ni ngad m’oneged Gil’ilungun Got. (Matt. 6:33) Machane ngad fithed, ‘Gu be dag ni aram rogon u daken e pi n’en ni gu be turguy ni nggu rin’?’ Be yog e Bible ngodad ni gaar: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Kor. 13:5) Uw rogon nrayog ni ngad micheged ngodad ni gad be m’oneg Gil’ilungun Got?

² Tayim Rodad: Ngad yaliyed ko mang e gad ma rin’ ko tayim rodad. (Efe. 5:15, 16) Uw urngin e tayim ni yibe tay u gubin e wik ni fan ko fafel, ara mayal tv, ara Internet, ara hobby? Faan gad ra yoloy nga but’ ko uw urngin e tayim ni gad ma tay ko pi n’en nem ma gad ra taarebnag ko tayim ni gad ma tay ko tirok Got ban’en, ma sana gad ra gin ngay. Boor e tayim ni gad ma tay ko maruwel ni rayog ni ngad pared nib fel’ rogon? Boor yay ni kad paged e muulung ara machib ni fan ni ngad uned ko vacation ko fafel?

³ Ngan Dugliy e N’en ni Ngan M’oneg: Baga’ ni de gaman e tayim rodad ni ngad rin’ed urngin ban’en ni gad ba adag. Ere rogon ni ngan m’oneg Gil’ilungun Got ma ba t’uf ni ngad yaliyed e pi n’en nib ga’ fan ma ngad fl’eged e schedule ko “tin ni ir e ba th’abi fel’.” (Fil. 1:10) Pi n’en ney e ba muun ngay ni ngan fil e Thin Rok Got, ma ngan un ko machib, ma ngan ayuweg e tabinaw, ma ngan un ko pi muulung ko Kristiano. (Ps. 1:1, 2; Rom. 10:13, 14; 1 Tim. 5:8; Heb. 10:24, 25) Maku bay angin riy ni ngan un ko exercise, nge yugu mit e fafel. (Mark 6:31; 1 Tim. 4:8) Machane pi n’en nem e gathi ba th’abi ga’ fan, me ere thingar dabni m’oneg.

⁴ Bay reb e walag ni pumoon ni kab pagel ma ke guy rogon ni nge m’oneg Gil’ilungun Got ma ke un ko pioneer ma de lek e skul nib tolang ni nge yog e maruwel nib fel’ ngak. Ke fil e thin ko yugu reb e nam ma ke yan i par u bang nib t’uf e ayuw. Ke gaar: “Kari gu falfalan’ u roy. Rib fel’ ni ngan un ko machib! Gu ba adag ni urngin e piin ni fel’ yangaren e ra rin’ e re n’ey ma yad ra falfalan’ ni bod gag. Dariy ban’en ni kab fel’ ko pigpig ku Jehovah u polo’ i gelngidad.” Arrogon, ma yib e flaab ngodad ni ngad m’oneged Gil’ilungun Got, machane n’en nth’abi ga’ fan e aram e ma felan’nag Jehovah ni Chitamangidad nu tharmiy.​—Heb. 6:10.