Ngan Pirieg e Gapas ni Yugu Aram Rogon ni Yibe Mahl ma Yibe Cham
Gary ni i un ko salthaw kafram e yog ni gaar: “U m’on ni nggu fil e Bible ma dag nang ko mang fan ni ke garer e ngongol nib kireb, nge ngongol nde mat’aw, nge magawon u fayleng. Machane chiney e ke gapas lanin’ug. Gu manang nra fal’eg Jehovah Got e re fayleng ney ni nge par e girdi’ riy ndakuriy ban’en nra buch rorad.”
Gathi yigoo Gary e be lem ni aray rogon. Am lemnag rogon ni ke ayuweg e Bible yugu boch e girdi’.
BE GAAR E BIBLE: “Gur e gab gol ngomad ma ga ma n’ag fan u wun’um e kireb.”—Psalm 86:5, BT.
ROGON NRA AYUWEGEY: “Be micheg e re thin ney ngog ni Jehovah e ma runguyey. Gu manang nib m’agan’ ngay ni nge n’ag fan urngin e kireb ni ug rin’ u nap’an ni ug un ko mahl.”—Wilmar, Colombia.
BE GAAR E BIBLE: “Bay gu sunumiy reb e fayleng nib beech nge reb e lan e lang nib beech. Ma tin kakrom e ri bay ni pag talin.”—Isaiah 65:17.
ROGON NRA AYUWEGEY: “Bochan e pi n’en ni i buch rog u nap’an ni ug un ko salthaw, ma aram mug m’ar ni ma yib e marus ngog nib gel maku ma kireban’ug nib pag rogon. Machane re thin nu Bible ney e be puguran ngog ndab ki n’uw nap’an ma ra chuweg Jehovah urngin ban’en nib kireb ni ke par u lanin’ug. Dakuriy ba ngiyal’ nra yib e pi n’em nga lanin’ug. Aram reb e tow’ath nrib manigil!”—Zafirah, Meriken.
BE GAAR E BIBLE: “Piin nib mat’aw e bay ur mon’oggad u n’umngin nap’an e yafos rorad, mi i par nib gapas gubin yang nge mada’ ko ngiyal’ ndakuriy e pul.”—Psalm 72:7, NW.
ROGON NRA AYUWEGEY: “Ba ga’ nug ma lemnag e pi thin ney. Dabki n’uw nap’an ma ra tal e mahl nge urngin ban’en nib kireb ni ma k’aring, ma dakuriy rogon ni nge magafan’dad nri buch ban’en ko piin nib t’uf rodad.”—Oleksandra, Ukraine.
BE GAAR E BIBLE: “Girdi’ rodad ni kar m’ad e yad ra fos bayay! . . . Urngin e piin yad ba mol u lan e low rorad e bay ra odgad mi yad tangnag e felfelan’.”—Isaiah 26:19, BT.
ROGON NRA AYUWEGEY: “Ba chugur i gubin e girdi’ u lan e tabinaw rog ni li’rad fapi girdi’ ni ka nog e Tutsi ngorad ngar m’ad. Machane re thin ney e be micheg ngog ni kug ra guyrad bayay. Gu be athapeg ni nggu rung’ag lamrad ni yad ba felfelan’ u nap’an ni kan fasegrad ko yam’!”—Marie, Rwanda.
BE GAAR E BIBLE: “Dab ki n’uw nap’an me yan e piin nib kireb nga bayang . . . Machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”—Psalm 37:10, 11.
ROGON NRA AYUWEGEY: “Yugu aram rogon ni ke tal e mahl ni yibe tay, machane ka yibe rin’ e ngongol nde mat’aw ma ka bay e girdi’ nib kireb. Kari ayuwegeg e pi thin ney. Ma guy Jehovah gubin ban’en ma manang e magawon rog. Ke micheg ndab ki n’uw nap’an me chuw gubin e gafgow min pagtalin.”—Daler, Tajikistan.
Fapi cha’ ni bay e thin rorad u lan e re ke babyor ney e yad ba muun nga bokum milyon e Pi Mich Rok Jehovah ni ke ayuwegrad e Bible ni ngar pirieged e gapas. Kar filed rogon ni nge dab kur fanenikayed e girdi’ ni bochan e n’en kan rin’ ngorad, nge bochan nib thil ramaen dowrad, nge nam rorad, nge ganong rorad. (Efesus 4:31, 32) Pi Mich Rok Jehovah e yad ma par u mathilin ngongolen e am ma darur uned ko cham.—John 18:36.
Ku yad ma ayuweged yad ni bod reb e tabinaw. (John 13:35) Bod ni Oleksandra ni faan kan weliy murung’agen e t’uf ni ngar milgow walagen nib pin nga yugu reb e nam ni bochan e mahl. I yog ni gaar: “Nap’an nug th’abew e mathil nga barba’, ma gamow guy e Pi Mich ko re nam nem ni yad bay u rom ni kar bad ni ngar guyed gamad. Bochan e ayuw nra pied ngomow, ma aram me yag ni nggu mechamgow ko par u reb e nam nib beech ni gamow l’agruw ni’ ni kug milgow ko nam romow.”
Gamad be piningem ni ngam un ngomad ko muulung ni gamad ma tay ni aram e gin gamad ma fil riy e n’en be yog e Bible u murung’agen e gapas nge rogon ni ngan fol riy. Mman ko jw.org/yap ni ngam pirieg bang ni yima tay e muulung riy nib chugur ngom, ara mog ni nge yib reb e Pi Mich Rok Jehovah i fil e Bible ngom ni be fanay fare ke babyor ni Mu Par Ndariy N’umngin Nap’an ni Gab Felfelan’!