Dariy e tayugang’ ko ulung romad ni yima pi’ puluwon. Piin ni kan dugliyrad e yad ma ayuweg e “galesiya rok Got” ni bod rogon ni un rin’ u nap’an ni tabab e ulung ni Kristiano. (Acts 20:28) Pi piilal ney e yad boch e pumoon ni kar ilalgad ko tirok Got ban’en ni yad ma yog e thin u lan e ulung, maku yad ma ayuweg e saf rok Got ni fan e ‘ri yad ba adag ni ngar pigpiggad ngak Got.’ (1 Peter 5:1-3) Mang maruwel e yad ma rin’ ni fan ngomad?

Gamad ba t’uf rorad, ma yad ma ayuwegmad. Piin piilal e yad ma pow’iy ma yad ma ayuweg e ulung ko tirok Got ban’en. Bochan ni manang e piin piilal e maruwel ni ke pag Got fan ngorad, ma darur lemnaged ni ngar suweyed e girdi’ rok, ya yad ma pi’ e athamgil nga lanin’rad, ma yad ma ayuwegrad ni ngaur pared ni yad ba felfelan’. (2 Korinth 1:24) Piin piilal e yad ma athamgil ni ngar nanged rarogon e girdi’ u lan e ulung ni be’ nge be’ ni bod rogon be’ ni ma gafaliy e saf ni ma gay rogon ni nge ayuweg e saf rok.​—Proverbs 27:23.

Yad ma fil ngomad rogon ni nggu rin’ed e n’en nib m’agan’ Got ngay. Gubin e wik ni ma yarmiy e piin piilal e muulung ya nge gel e michan’ ko pi walag. (Acts 15:32) Ku yad ma yarmiy rogon e machib ni yima tay, maku yad ma un ngomad ko re maruwel ney, ma yad be fil ngomad rogon ni nggu rin’ed.

Yad ma pi’ e athamgil nga lanin’mad. Yu ngiyal’ e ma yib e piin piilal nga tabinaw romad, ara gu mada’gad nga Kingdom Hall ni ngar beeged boch e thin nu Bible ngomad, ma yad be pi’ e ayuw nge athamgil nga lanin’mad ni fan ko tirok Got ban’en.​—James 5:14, 15.

Boor e piilal ni yad ma maruwel ya nge yag e tin nib t’uf ko tabinaw rorad, maku ba t’uf ni ngar ted e tayim ni fan ngorad. Ma bochan ni yad ma maruwel nib gel ma bay fan ni ngan tay farad.​—1 Thessalonika 5:12, 13.

• Mang e maruwel ko piin piilal u lan e ulung?

• Uw rogon ni ma dag e piin piilal nib t’uf e girdi’ u lan e ulung rorad ni be’ nge be’?

Be weliy e Bible murung’agen l’agruw ulung e pumoon ni Kristiano ni yad ma ayuweg e ulung ni aram e “piin ni yad be tay murung’agen girdien e galesiya nge piin ni yad be ayuweg girdien e galesiya.” (Filippi 1:1) Ba ga’ ni boor e walag ni pumoon ni yad ma pigpig u reb e ulung nge reb. Mang maruwel e ma rin’ e pi ministerial servant ni fan ko ulung?

Yad ma ayuweg e piin piilal. Pi ministerial servant e yad boch e pumoon nib thilthil yangarrad ni kar ilalgad ko tirok Got ban’en, ma rayog ni nge pagan’uy ngorad, ma yad ma tiyan’ ko pi maruwel nib milfan ngorad. Yad ma rin’ e maruwel nib ga’ fan ko ulung ya nge yag ni yan e muulung nib yaram mab fel’ rogon. Bochan ni yad ma rin’ e pi maruwel ney, ma rayog ko piin piilal ni ngar ngongliyed e tin ka bay e maruwel ni aram e ngar filed boch ban’en ko pi walag u lan e ulung mi yad pi’ e athamgil nga lanin’rad.

Yad ma pi’ e ayuw nga boch e maruwel nib ga’ fan. Boch e ministerial servant e yima pi’ e maruwel ngorad ni ngar pininged e magar ko piin ni kar bad ko muulung mar yarmiyed e gin ni ngar pared ngay. Boch i yad e kan pi’ e maruwel ngorad ni ngar fal’eged rogon e n’en ni yima fanay ni fan ko musik, nge tang, nge microphone, ma yad ma pi’ e pi babyor ni yima wereg, ma yad ma fal’eg babyoren e salpiy ni fan ko ulung, ma yad ma yarmiy e gin ni ngan yan ngay ko machib. Ku yad ma rin’ boch e maruwel ni ngar ayuweged e Kingdom Hall ni nge par nib beech mab fel’ rogon. Ku ma yog e piin piilal ngorad ni ngar ayuweged e piin ni kar pilibthirgad. Ere, yugu demtrug e maruwel ni kan pi’ ko pi ministerial servant, ma faanra ba m’agan’rad ngay ni ngar rin’ed, ma bay rogon ni ngan tay farad.​—1 Timothy 3:13.

Yad e pi pumoon ni Kristiano ni yad ma rin’ boch ban’en nib fel’ ni ngan folwok riy. Pi ministerial servant e yima mel’egrad ni bochan e bay pi fel’ngin Got rorad. Nap’an ni yad ra pi’ boch e welthin u nap’an e muulung, ma yad ma gelnag e michan’ romad. Yad ma dag e bin nib mat’aw e kanawo’ u rogon ni ngan machib, ma yad ma ayuwegmad ni nggu pasiggad. Bochan nib m’agan’rad ngay ni ngar maruwelgad e piin piilal u taabang, ma re n’ey e ma yibnag e taareban’ nge felfelan’ nga lan e ulung. (Efesus 4:16) Ma ra munmun ma ku ra bung rogorad ni ngar manged boch e piilal.

• Uw rogon e pi pumoon ni yad e ministerial servant?

• Uw rogon ni ma ayuweg e pi ministerial servant e ulung ni nge maruwel nib fel’ rogon?

Pi babyor ko Bible Nni Yoloy Som’on ni Thin ni Greek e boor yay ni un weliy riy murung’agen Barnabas nge apostal Paul. Gal pumoon ney e ur lekagew e ulung ni yow be yan u reb e ulung nga reb. Mang fan? Ya yow be lemnag rarogon e pi walag ni taareb e michan’ rorad. I yog Paul ni baadag ni ‘ngar sulow ngar guyew pi walagrow ni girdien Kristus’ ya ngar nangew rarogorad. Ba m’agan’ ngay ni nge milekag ni bokum e mayel ni nge pi’ e athamgil nga lanin’rad. (Acts 15:36) Ku aram e n’en ni ma nameg e piin ni yad ma lekag e ulung e ngiyal’ ney.

Yad ma yib ni ngar pied e athamgil nga lanin’mad. L’agruw yay u reb e duw ni ma yan e circuit overseer ni nge lekag gonap’an 20 e ulung, ma ma par rorad ni taareb e wik. Rayog ni nge yib angin ngodad e pi n’en ni ke buch rok e pi walag ney nge ppin rorad ni faanra yad ba mabgol. Piin ni yad ma lekag e ulung nge ppin rorad e yad ma athamgil ni ngar nanged gamad, ma yad ba felfelan’ ni ngar uned ngomad u nap’an e machib ngu nap’an ni nggu warod ni ngguyed e piin ni gamad ma fil e Bible ngorad. Pi walag ni yad ma lekag e ulung e yad ma un ko piin piilal ni ngar pied e athamgil nga laniyan’ e pi walag u lan e ulung, ma yad ma pi’ e welthin u nap’an e pi muulung nge assembly ni nge gelnag e michan’ ko pi walag.​—Acts 15:35.

Yad ma dag nib ga’ fan gubin e girdi’ u wan’rad. Pi circuit overseer e rib ga’ fan u wan’rad rarogon e ulung ko tirok Got ban’en. Yad ma mada’ e piin piilal nge pi ministerial servant u taabang ni ngar weliyed rogon ni be mon’og e ulung, mar pied e fonow nib puluw u rogon ni ngar rin’ed e maruwel rorad. Yad ma ayuweg e piin ni yad ma machib u polo’ e tayim rorad ni ngar mon’oggad u rogon ni yad be machib, ma yad ma felfelan’ ni ngar chaggad ko girdi’ ni kafin ra uned ko muulung, mar nanged rogon ni yad be mon’og ko tirok Got ban’en. Ra reb e pi walag ney ma ‘be maruwel ni nge ayuwegdad.’ (2 Korinth 8:23) Susun ni nggu folwokgad ko michan’ nge yul’yul’ rorad ngak Got.​—Hebrews 13:7.

• Mang fan ni ma yan e pi circuit overseer u reb e ulung nga reb?

• Uw rogon nrayog ni nge yib angin ngom e milekag ni yad be tay?

Nap’an nra yib reb e gafgow ngak boch e pi walagdad ma gadad e Pi Mich Rok Jehovah e gad ma gur ni ngad yarmiyed rogon ni ngan ayuwegrad. Re n’ey e be micheg feni rib t’uf e pi walagdad rodad. (John 13:34, 35; 1 John 3:17, 18) Uw rogon ni gad ma pi’ e ayuw?

Gad ma pi’ e salpiy ni ayuw. Nap’an ni yib reb e uyungol u Judea, ma pi Kristiano kakrom e kar kunuyed e salpiy ni ayuw ni ngar pied ngak e pi walagrad ni taareb e michan’ rorad. (Acts 11:27-30) Ku arrogodad e ngiyal’ ney ni gad ma pi’ e salpiy ni ayuw ni kan kunuy u lan e ulung rodad ni nge ayuweg e pi walagdad u yu yang u fayleng ko pi n’en nib t’uf rorad u nap’an ni ke yib e gafgow ngorad.​—2 Korinth 8:13-15.

Gad ma pi’ e ayuw u boch ban’en nib t’uf rorad. Piin piilal ni yad bay ko gin ni ke buch ban’en riy ni ke k’aring e gafgow ko girdi’ e ba milfan ngorad ni ngar guyed rogon ni ngar nanged salpen gubin e girdi’ ko ulung rorad. Bay reb e ulung ni ma yarmiy e n’en nib t’uf ni ngan pi’ ni bod rogon e ggan, nge ran nib beech ni ngan unum, nge mad, nge gin ni ngan par riy, nge rogon e tafalay nib t’uf. Boor e Pi Mich ni bay e salap rorad ko dimow naun nge Kingdom Hall nge ku boch e maruwel nib t’uf e yad ma yan ko gin nib t’uf e ayuw riy nra be’ ma ir rok e ma pi’ puluwon ni nge yan ni nge pi’ e ayuw. Bochan e taareban’ ko ulung rodad nge pi n’en ni ke yag ni ngad filed u nap’an ni gad ma maruwel u taabang, ma pi n’ey e ke ayuwegdad ni ngad gurgad ngad pied e ayuw. Yugu aram rogon ni gad ma pi’ e ayuw ngak e “piin ni kad manged girdien e tabinaw rok Got,” maku gad ma pi’ e ayuw ngak yugu boch e girdi’ ni faanra rayog rodad, ndemtrug ko mang e teliw rok.​—Galatia 6:10.

Gad ma pi’ e ayuw ko tirok Got ban’en min fal’eg lanin’rad. Piin ni ke yib e gafgow ngorad e ba ga’ nib t’uf ni ngan pi’ e athamgil nga lanin’rad. Ireray e ngiyal’ nib t’uf ni ngad ninged e ayuw ngak Jehovah ni “ir e Chitamangiy nrib tarunguy e girdi’.” (2 Korinth 1:3, 4) Gad ba felfelan’ ni ngad weliyed e n’en ni ke micheg e Bible nra chuweg Gil’ilungun Got gubin e pi n’en ni ma gafgownagdad ngak e piin ni ke kireban’rad.​—Revelation 21:4.

• Mang fan nib mom ko Pi Mich Rok Jehovah ni ngar pied e ayuw nib gur u nap’an ni ke yib e gafgow?

• Miti mang ayuw ni fan ko tirok Got ban’en e rayog ni ngad pied ko piin ni ke yib e gafgow ngorad ni nge fal’eg lanin’rad?

De n’uw nap’an u m’on ni nge yim’ Jesus, me non ngak aningeg i gachalpen ni goo yad ni aram e Peter, nge James, nge John, nge Andrew. Nap’an ni be weliy Jesus murung’agen e pow ko tin tomuren e rran, me fith reb e deer nib ga’ fan ni gaar: “Ere mini’ e en ni ir fare tapigpig nib yul’yul’ ma ba gonop? I ir e en ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy.” (Matthew 24:3, 45; Mark 13:3, 4) Bochan ni ir e “masta” rorad ma be micheg ngak pi gachalpen nra dugliy boch e girdi’ ni ngar pied e tin nib t’uf ko tirok Got ban’en ngak e pi tapigpig rok u nap’an e tin tomuren e rran. Chon mini’ e yad bang ko fare tapigpig nib yul’yul’ ma ba gonop?

Yad bochi ulung nib achig ni yad pi gachalpen Jesus ni kan dugliyrad. Fare “tapigpig” e aram fare Ulung ni Ma Pow’iyey ko Pi Mich Rok Jehovah. Yad ma pi’ e tin nib t’uf ko tirok Got ban’en ko ngiyal’ nib t’uf ni ngan pi’ riy ngak e piin ni yad be liyor ngak Jehovah. Ma pagan’mad ngak fare tapigpig nib yul’yul’ ma ba gonop ni ngar pied e tiromad e “ggan ko ngiyal’ ni yima pi’ riy.”​—Luke 12:42.

Ma ayuweg girdien e tabinaw rok Got. (1 Timothy 3:15) Ke pi’ Jesus e maruwel nib ga’ fan ngak fare tapigpig ni aram e nge ayuweg e ulung rok Jehovah, me ayuweg e chugum nge salpiy ni fan ko ulung, me pow’iy rogon fare maruwel ko machib, me fonownigey u daken e pi muulung. Ere, rogon ni ma pi’ “fare tapigpig nib yul’yul’ ma ba gonop” e ayuw ngomad, e yad ma pi’ e tin nib t’uf ko tirok Got ban’en u daken e pi babyor ni gamad ma wereg u nap’an e machib, nge welthin ni yima pi’ u nap’an e pi muulung romad nge assembly.

Re tapigpig ney e ba yul’yul’ ko tin riyul’ u Bible nge fare maruwel ni ngan machibnag fare thin nib fel’, ma ba gonop u rogon ni ma ayuweg e tin nib milfan ngak Jesus u fayleng. (Acts 10:42) Be tow’athnag Jehovah e maruwel ko re tapigpig ney ni aram e be yoornag e pi n’en ni yad be fal’eg nra ayuwegey ko tirok Got ban’en.​—Isaiah 60:22; 65:13.

• Mini’ e ke dugliy Jesus ni nge pi’ e tin nib t’uf ko tirok Got ban’en ngak pi gachalpen?

• Uw rogon nib yul’yul’ fare tapigpig ma ba gonop?

Nap’an e bin som’on e chibog ma i pow’iy e “pi apostal nge piin piilal” u Jerusalem e ulung ya nge yag ni ngar dugliyed boch ban’en ni bay rogon ko fare ulung i Kristiano ni kan dugliyrad. (Acts 15:2) Ra bay ban’en ni ngan dugliy, mi yad weliy e thin nu Bible, mi yad fol u rogon ni be pow’iyrad gelngin Got nib thothup me yag ni ngar dugliyed ni ke taareban’rad ngay. (Acts 15:25) Ireray e re yaram ni gamad be folwok riy e ngiyal’ ney.

Yibe fanayrad ni ngar rin’ed e n’en nib m’agan’ Got ngay. Pi walag ni kan dugliyrad ni yad bang ko fare Ulung ni Ma Pow’iyey e ba ga’ fan e Thin rok Got u wan’rad, ma yad manang rogon ni ngar pow’iyed fare maruwel ni machib mar pied e fulweg u boch e deer ni bay rogon ko tirok Got ban’en. Yad ma mada’ ni gubin e wik ni ngar weliyed e pi n’en nib t’uf ni fan ngak e pi walag u ga’ngin yang e fayleng. Pi thin nu Bible ni ma fonownigey e yima pi’ u daken e babyor, ara piin ni ma lekag e ulung, ara yugu boch e girdi’ ni bod rogon ni un rin’ ko bin som’on e chibog. Ireray e n’en ni be ayuweg e girdi’ rok Got ni ngar pared nib taareb lanin’rad nge ngongol rorad. (Acts 16:4, 5) Fare Ulung ni Ma Pow’iyey e ba milfan ngorad ni ngar fal’eged rogon, mi yad pi’ e tin nib t’uf ko tirok Got ban’en, mi yad ayuweg fare maruwel ni machib ni nge mon’og i yan, mi yad fal’eg i yaliy e pi walag ni kan dugliyrad ni ngar rin’ed boch e maruwel u lan e ulung.

Yad be fol u rogon ni be pow’iyrad gelngin Got nib thothup. Ma sap fare Ulung ni Ma Pow’iyey ngak Jehovah ni ir e Th’abi Tolang u Palpalth’ib nge Jesus ni ir Lolugen e ulung ni ngar pow’iyew yad. (1 Korinth 11:3; Efesus 5:23) Girdien e re ulung nem e darur lemnaged ni yad ba tolang ko girdi’ rok Got. Yad nge piin ni kan dugliyrad e “demtrug e gin ni be yan fare Fak e Saf ngay ma yad be un ngak.” (Revelation 14:4) Ere, ba ga’ fan u wan’ fare Ulung ni Ma Pow’iyey e meybil ni yima tay ni fan ngorad.

• Chon mini’ e yad girdien fare ulung ni ma pow’iyey ko bin som’on e chibog?

• Uw rogon ni ma sap fare Ulung ni Ma Pow’iyey ngak Got ni nge pow’iyrad e ngiyal’ ney?

Bethel ni thin nu Hebrew e be yip’ fan e “naun rok Got.” (Genesis 28:17, 19) Ireray e re ngachal nib puluw ni fan ko pi naun ni ma fanay e Pi Mich Rok Jehovah u ga’ngin yang e fayleng ni ngan yarmiy min ayuweg fare maruwel ko machib riy. Fare Ulung ni Ma Pow’iyey e yad ma pigpig ko tochuch u New York State u Meriken, ma aram e gin ni yad ma yaliy gubin e maruwel riy ni yima rin’ ko pi branch ofis u ga’ngin yang e fayleng. Piin ni yad ma maruwel ko yungi n’ey e yima yog ni yad girdien e tabinaw nu Bethel. Yad bod reb e tabinaw ni yad ma par u taabang, ma yad ma maruwel, ma yad ma abich, ma yad ma fil e Bible u taabang.​—Psalm 133:1.

Bangi ban’en ni yugu ba thil ni girdi’ riy e yad ma rin’ boch e maruwel ni yad e kar ognaged yad ngay. Gubin e Bethel u ga’ngin yang e fayleng ni bay e pumoon nge ppin riy ni yad ba yul’yul’ ko n’en nib m’agan’ Got ngay, ma yad ma rin’ e pi n’en ni bay rogon nga Gil’ilungun u polo’ e tayim rorad. (Matthew 6:33) Dariy bagayad ni yima pi’ puluwon, machane bay e gin ni yad ma par riy. Bay buchuuw e salpiy ni yima pi’ ngorad ni ngar fanayed ko tin nib t’uf rorad. Gubin e girdi’ u Bethel ma bay e maruwel rorad. Boch i yad e ma maruwel u ofis, ma boch i yad e ma maruwel u taang. Maku boch i yad e ma maruwel ko gin ni yima fal’eg e babyor riy, ma boch i yad e ma klin, ma boch i yad e ma malukmad, ma boch i yad e ma fal’eg e yungi n’en ni ke kireb ko naun.

Bang ni boor e maruwel ni yibe rin’ riy ni bay rogon ko machib. N’en ni be nameg gubin e Bethel e nge taw e tin riyul’ u Bible ngak urngin mit e girdi’. Re ke babyor ney e bang ko re maruwel nem. Fare Ulung ni Ma Pow’iyey e ke yarmiy rogon ni ngan fal’eg e re ke babyor ney, min pi’ u computer nga boor ko raay e ulung ni yad ma piliyeg e babyor u ga’ngin yang e fayleng, min pi’ nga Bethel ni ngan printnag, me tomur riy min sulweg ko gubin e ulung u ga’ngin yang u fayleng ni ke pag 110,000 u gubin. Ere, girdi’ ni yad ma maruwel u Bethel e yad ma pi’ e ayuw ko re maruwel ney ni ngan machibnag fare thin nib fel’ nib t’uf ni nge nang gubin e girdi’.​—Mark 13:10.

• Chon mini’ e yad ma maruwel u Bethel, ma uw rogon ni yima ayuwegrad?

• Mang fare maruwel nib ga’ fan ni yibe pi’ e ayuw riy u Bethel?

Girdi’ ni yad ma par u Bethel e ra bagayad ma bay e maruwel rok ni ma rin’ ni nge ayuweg fare maruwel ko machib ni yibe rin’ u boch e nam. Boch i yad e ma un i piliyeg e babyor nga boch e thin, ma boch i yad e ma maruwel ko gin ni yima fal’eg e pi babyor riy, ara pi video ni yima yaliy nge pi audio ni yima motoyil ngay, ara yugu boch e maruwel nib t’uf ni ngan rin’.

Branch Commitee e ma pow’iy e pi maruwel ney. Fare Ulung ni Ma Pow’iyey e kar pied mat’awun e Branch Committee ni bay dalip e pumoon riy ni yad e piilal ni bay rogorad ni ngar yarmiyed e maruwel ni yima rin’ u reb e Branch Ofis. Faanra be mon’og ara bay e magawon u reb e ulung ni bay u tan pa’ fare Branch Ofis, ma yira pi’ e thin ni nge yan ko fare Branch Committee. Pi thin ney e ra ayuweg fare Ulung ni Ma Pow’iyey ni nge nang ko mang e yira tay ko pi babyor ni yibe ngongliy, ara yira weliy ko bin migid e muulung ara assembly. Ku yima pi’ reb e walag ni nge yan ko pi branch ofis ni owchen fare Ulung ni Ma Pow’iyey ni nge pi’ e fonow nib puluw ko pi Branch Committee u rogon ni ngar rin’ed e maruwel rorad nib fel’ rogon. (Proverbs 11:14) Ku yima tay e muulung ni bay e welthin riy nra pi’ e re walag nem ya nge yag ni pi’ e athamgil nga laniyan’ e piin ni yad be par u tan fare branch.

Yima pi’ e ayuw ni fan ngak gubin e ulung ni bay u tan pa’rad. Pi walag ni yad bay u branch ofis e yad ma yarmiy rogon ni nge tabab reb e ulung nib beech. Pi walag ney e ku yad ma yarmiy e maruwel ko piin ni yad ma machib u polo’ e tayim rorad, nge pi missionary, nge pi circuit overseer ni yad be maruwel u tan pa’ fare branch ofis. Ku yad ma yarmiy e pi assembly nge convention ni yima tay, nge rogon ni ngan toy reb e Kingdom Hall nib beech, nge rogon ni ngan pi’ e pi babyor nib t’uf ni ma yib ko ulung. Ere, gubin e maruwel ni yima rin’ u branch ofis e yibe rin’ ni nge ayuweg fare maruwel ni machib ni nge yan nib yaram.​—1 Korinth 14:33, 40.

• Uw rogon ni ma ayuweg e Branch Committee fare Ulung ni Ma Pow’iyey?

• Mang maruwel e yima rin’ u branch ofis?

Gamad ma ngongliy boch e babyor ni kan piliyeg nga boor ko 750 mit e thin ya nge yag ni gu machibnaged fare “Thin Nib Fel’” nga “urngin e pi nam nge ganong nge thin nge gubin mit e girdi’” nib fel’ rogon. (Revelation 14:6) Uw rogon ni gamad ma rin’ e re maruwel ney nib mo’maw’? Gamad ma rin’ u daken reb e ulung ni yad ma yoloy boch e babyor nge boch e girdi’ ni ma piliyeg e thin u ga’ngin yang e fayleng. Gubin e piin ni yad ma rin’ e re maruwel ney e goo yad e Pi Mich Rok Jehovah.

Tin som’on e babyor e yima yoloy ni thin nu Meriken. Fare Ulung ni Ma Pow’iyey e yad ma ayuweg e maruwel ko Writing Department ara gin ni yima yoloy e babyor riy ko tochuch romad. Yad ma yarmiy e maruwel ni ngan pi’ ngak e piin ni yad ma yoloy e pi babyor ni yad ma maruwel u boch e branch ofis i yan. Piin ni yad ma yoloy e pi babyor ney e ba thilthil e nam ni kar bad riy, ere aram fan nrayog ni ngar yoloyed boch e article nib puluw ko n’en nib t’uf ko girdi’.

Pi n’en ni kan yoloy e yima wereg ngak e piin ma piliyeg e thin. U tomuren ni kan yaliy min yal’uweg e pi n’en ni kan yoloy, ma yima pi’ u computer ngak e piin ma piliyeg e thin u ga’ngin yang e fayleng. Tomur riy, ma rayog ni nge rin’ e piin ma piliyeg e thin e maruwel rorad. Yad ma athamgil ni ngar mel’eged e ‘pi thin ni yoloy nib riyul’’ mab puluw ni nge tamilang fan u wan’ e girdi’ e pi thin ko babyor ni kan yoloy ko thin nu Meriken.​—Eklesiastes 12:10.

Yad ma fanay e computer nge yag ni nge papey e maruwel. Dabiyog ni nge rin’ e computer e n’en ni ma rin’ e piin ma yoloy e babyor nge piin ma piliyeg e thin. Machane ma ayuwegrad e computer nge yag ni ngar rin’ed e maruwel rorad nib papey ya bay e dictionary riy nge boch ban’en ni be momnag boch e maruwel rorad. Ma ke fal’eg e Pi Mich Rok Jehovah e Multilanguage Electronic Publishing System (MEPS). Rayog ni ngar ted ngay e thin ko pi babyor ni kan yoloy ni bokum miriay mit e thin nib muun ngay boch e sasing, min fal’eg boch ban’en ya nge yag ni ngan printnag.

Gur, mang fan ni gad be athamgil ni ngad piliyegned e thin ko pi babyor ni mus ko pi nam ni in biyu’ e girdi’ ni bay riy? Ya ba m’agan’ Jehovah ngay ni “urngin e girdi’ ni ngar thapgad ngak ma ngar nanged e tin nib riyul’.”​—1 Timothy 2:3, 4.

• Mang boch ban’en nib t’uf ni ngan rin’ u nap’an ni yibe fal’eg e pi babyor rodad?

• Mang fan ni gad ma piliyeg e pi babyor rodad nga boor mit e thin?

Ma ngongliy e ulung romad bokum milyon e Bible nge ku boch e babyor u gubin e duw ndariy puluwon. Ku gamad ma toy, ma gamad ma ayuweg e pi Kingdom Hall nge pi branch ofis romad. Gamad ma ayuweg e piin ni yad ma maruwel u Bethel nge pi missionary, maku gamad ma pi’ e ayuw ngak e piin ni kar gafgowgad ni bochan e ke yib e yoko’, ara durru’, ara ku boch ban’en ni yima gafgow riy ko binaw rorad. Ere dabisiy ni ga ra lemnag ko, ‘Uw e ma yib e salpiy riy ni fan ko pi n’ey?’

Da gur feked ragag e pasent ko tin ni bay rok be’, ara puluwon be’ ya nge yag ni un ko ulung romad, ma dariy e mokun salpiy. Yugu aram rogon ni boor e salpiy nib t’uf ya nge yag ni gu ululgad ko fare maruwel ni machib, machane da gur ninged e salpiy ko girdi’. Rogon ni bay ko ken l’agruw ko fare babyor ni Wulyang ko Damit, e be yog nib mich u wan’mad ni Jehovah e ir e ma ayuwegmad ni nge “dab gu ninged e salpiy ara boch e ayuw ngak e girdi’,” ma ke pag reb e chibog ni aram e n’en ni gamad be fol riy!​—Matthew 10:8.

Ma pi’ e girdi’ e salpiy ni yad e kar dugliyed urngin ni fan ko re maruwel ney. Boor e girdi’ ni yad ba felfelan’ ko fol Bible ni gamad ma tay ngorad, ere yad baadag ni ngar pied e ayuw ko re maruwel ney. Mus ngak e Pi Mich Rok Jehovah ma yad ba felfelan’ ni ngar fanayed e tayim rorad, nge gelngirad, nge ku boch ban’en ni bay rorad ni fan e ngar rin’ed e tin nib m’agan’ Got ngay u ga’ngin yang e fayleng. (1 Kronicles 29:9) Ma faanra baadag be’ ni nge pi’ e ayuw ma bay reb e kahol u Kingdom Hall nge yungi n’en ni yima tay e pi assembly nge convention riy nrayog ni nge tay e girdi’ boch e salpiy ngay. Ku rayog ni ngan pi’ e salpiy ni ayuw ni yibe fanay fare website romad ni jw.org. Ba ga’ ni girdi’ ni ma pi’ e ayuw e de yoor e salpiy rorad, ni bod fare pin nib gafgow ni ke yim’ figirngin ni ke yog Jesus nrib fel’ e n’en ni ke rin’ ya ke yon’ l’agruw chi kobre’ nrow nga lan tafen e salpiy. (Luke 21:1-4) Ere, urngin e girdi’ ma rayog ni ngar ‘feked boch u puluwrad ngar ted nga bayang’ nrogon ni ‘kar dugliyed u lanin’rad.’​—1 Korinth 16:2; 2 Korinth 9:7.

Ba mich u wan’mad nra gagiyegnag Jehovah gum’irchaen e piin ni yad baadag ni ngar pininged e sorok ngak u daken e “tin th’abi fel’” rorad, ya nge yag nra pied e ayuw ko fare maruwel ni machib me lebug e n’en nib m’agan’ ngay.​—Proverbs 3:9.

• Mang e n’en nib thil u thilin e ulung romad nge pi yurba’ i teliw?

• Uw rogon ni yibe fanay e salpiy ni kan pi’ ni ayuw?

Fan ni yima yog e Kingdom Hall ko gin ni yima muulung riy e bochan ni n’en ni yima weliy u rom e murung’agen Gil’ilungun Got ni ireram kenggin e machib u Bible, maku aram e n’en ni i machibnag Jesus.​—Luke 8:1.

Aram tagil’ e bin riyul’ e liyor. Aram e gin ni yima yarmiy rogon ni ngan machibnag murung’agen Gil’ilungun Got riy. (Matthew 24:14) Ba thilthil ga’ngin e pi Kingdom Hall nge rogon ni yibe toy, ma de pag rogon ni kan fal’eg yaan, ma boor e girdi’ nrayog ni ngar muulunggad ngay. In e duw ni ke yan ma ba pag ragag e biyu’ e Kingdom Hall nib beech ni kan toy, nra reb e rran ma sogonap’an lal e kan toy ni bochan e be yoor e girdi’ ko ulung. Uw rogon ni be yag ni ngan rin’ e re n’ey?​—Matthew 19:26.

Yibe toy e pi naun ney u daken e ayuw ni ma pi’ e girdi’. Re salpiy ni ayuw ney e yima pi’ ko branch ofis ya nge yag nra pied ni dariy e win riy ko yungi n’en nib t’uf ni ngan toy e Kingdom Hall riy ara ba t’uf ni ngan fal’eg bayay.

Girdi’ ni kar ognaged yad ni ngar toyed e pi naun ney e kar bad u boch e nam nib thilthil. Boor e nam ni bay reb e ulung riy ni ka nog e Kingdom Hall Construction Group ngay. Yu ulung e tapigpig ni kar ognaged yad ni ngar pied e ayuw e yad ma yan u reb e ulung nga reb ni kub muun yungi n’en ni gathi ri ma yan e girdi’ ngay ni ngar ayuweged e pi ulung ko pi binaw nem ni ngar toyed e Kingdom Hall rorad. Boch e nam e kan mel’eg boch e walag riy ni ngar gagiyegniged e maruwel ni ngan toy e Kingdom Hall nge ngan fal’eg yu yang riy ni ke kireb. Yugu aram rogon ni boor e girdi’ ni yad ba salap ko dimow naun ni yad ma ognaged yad ni ngar pied e ayuw ko pi maruwel nem ni yima tay, machane ba ga’ ni girdien fare ulung e aram e piin ni yad ma rin’ yooren e maruwel nib t’uf ni ngan rin’. Ke yag ni ngan rin’ e re maruwel ney u daken gelngin Jehovah nib thothup nge ayuw ni be pi’ e girdi’ rok u polo’ i gelngirad.​—Psalm 127:1; Kolose 3:23.

• Mang fan ni yima yog e Kingdom Hall ko gin ni gamad ma liyor riy?

• Uw rogon ma ke yag ni ngan toy e pi Kingdom Hall u ga’ngin yang e fayleng?

Gubin e pi Kingdom Hall rok e Pi Mich Rok Jehovah ma be lingagilnag fithingan Jehovah. Aram fan nib ga’ fan u wan’dad ni ngad ayuweged tagil’ e muulung rodad ni nge par nib beech mab fel’ yaan ma gubin ban’en riy nde kireb ya bay rogon ko liyor rodad ngak Got. Gadad gubin nrayog ni ngad pied e ayuw.

Mu ognagem ni ngam un ko klin u tomuren e muulung. Tomuren gubin e muulung ma gubin e pi walag ni pumoon nge ppin a yad ba felfelan’ ni ngar uned ko klin ya nge beech e Kingdom Hall. Gubin ngiyal’ ma gad ma klinnag gubin ban’en u Kingdom Hall. Reb e piilal ara ministerial servant e ma yarmiy e pi maruwel ni ngan rin’ ni bay rogon ko pi n’en ni kan pirieg nib t’uf ni ngan rin’. Ra be’ ma rayog ni nge ognag ir ni nge rin’ e pi n’en nib t’uf ni bod rogon e wolguw, mop, vacuum, ayliy e chiya, klinnag e kolosis, falay e winda, n’ag e dow, min klin u wan. Maku rayog ni nge un e pi bitir rodad nga boch e maruwel ma aram e gad be fil ngorad rogon ni ngar ted fan tagil’ e liyor rodad.​—Eklesiastes 5:1.

Mu un i pi’ e ayuw ko pi n’en nib t’uf ni ngan fal’eg. Gubin e duw ma yima fal’eg i yaliy gubin ban’en u langgin nge wuru’ e Kingdom Hall ya nge yag ni ngan nang ko mang e ba t’uf ni ngan fal’eg. Ma pi n’en ni kan pirieg e yira fal’eg ni nge par tagil’ e liyor rodad nib fel’ ma aram e n’en nra ayuweg ni nge dab ni adbey e salpiy nga boch ban’en ni dariy fan. (2 Kronicles 24:13; 34:10) Reb e Kingdom Hall nib beech ni yima ayuweg nib fel’ rogon e bang ni bay rogon ni ngan liyor ngak Got riy. Nap’an ni gad ra un i pi’ e ayuw ko re maruwel ney, ma gad be dag nib t’uf Jehovah rodad ma ba ga’ fan tagil’ e liyor rodad u wan’dad. (Psalm 122:1) Ma re n’ey e ra tamilangnag ngak gubin e girdi’ fel’ngin e liyor ni gadad ma tay.​—2 Korinth 6:3.

• Mang nib ga’ fan ni ngad ayuweged tagil’ e liyor rodad?

• Uw rogon ni kan yarmiy e klin u Kingdom Hall?

Ga baadag ni ngam fal’eg i gay boch ban’en ya nge yoor e tamilangan’ rom u Bible, fa? Ga baadag ni ngam nang fan reb e thin nu Bible, ara ngam nang murung’agen be’, ara bang, ara ban’en ni be weliy e Bible murung’agen, fa? Kaam lemnag ko rayog ni nge ayuwegem e Thin rok Got ko magawon rom, fa? Faanra arrogon, ma rayog ni ngam fanay e pi babyor u lan e library u Kingdom Hall.

Boor ban’en riy nrayog ni nge ayuwegem ni ngam fal’eg i gay boch ban’en. Dabisiy ma boor e pi babyor nib puluw e thin riy ko thin nu Bible ni ke fal’eg e Pi Mich Rok Jehovah ndariy ko thin rom. Machane, fare library u Kingdom Hall e boor e pi babyor nib beech ni bay riy. Maku bay boor ken e Bible ni kan piliyeg u boor mit e thin riy, nge dictionary nrayog ni ngan fanay, nge ku boch ban’en. Rayog ni ngam fanay e library u m’on ngu tomuren e muulung. Faanra bay e computer u rom ma dabisiy ni bay fare Watchtower Library riy. Ireray reb e ban’en ni bay murung’agen e pi babyor riy ni ma fal’eg e ulung, ma ra ga baadag ni ngam gay murung’agen ban’en, ara ngam nang fan bbug e thin, ara thin nu Bible, ma rayog ni ngam fanay ban’en riy ni ka nog e search feature ngay ni bay ko computer.

Ra yib angin ngak e piin ni yad ma pi’ e welthin u nap’an fare muulung ni kenggin e Pi N’en ni Ma Rin’ e Piin Kristiano nge Machib ni Yad Ma Tay. Rayog ni ngam fanay e library u Kingdom Hall u nap’an ni ga be fal’eg e welthin rom. En ni ma yarmiy e re muulung ney e ir e ba milfan ngak ni nge ayuweg e library. Ir e ma yarmiy e pi babyor ni bay riy, ma ma guy rogon ni nge gubin e babyor nib beech ma bay riy. En nib milfan ngak ni nge ayuweg e library ara en ni gimew ma fil e Bible e rayog ni nge dag ngom rogon ni ngam pirieg e n’en ni ga be gay. Machane, pi babyor ni ma par u library e dabiyog ni ngan fek nga wuru’ e Kingdom Hall. Maku thingar ni ayuweg e pi babyor ney ndab ni yoloy langgin.

Be weliy e Bible ni faanra ngan pirieg e “tamilangan’ rok Got,” mab t’uf ni ngan gay ni bod e “machaf nib mith.” (Proverbs 2:1-5) Fare library u Kingdom Hall e rayog ni nge ayuwegem ni ngam tabab i gay murung’agen boch ban’en.

• Mang boch ban’en ni bay ko fare library u Kingdom Hall nrayog ni nge ayuwegem u nap’an ni ga be fal’eg i gay murung’agen ban’en?

• Mini’ e rayog ni nge ayuwegem u rogon ni ngam gay boch ban’en ko library u Kingdom Hall?

I yog Jesus ngak pi gachalpen ni gaar: “Nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.” (Matthew 5:16) Ere, ke mada’ ko ngiyal’ ney ma gamad be fanay boch ban’en ni bod rogon e internet ni nge ayuweg e ulung romad ni nge mon’og i yan. Fare website ko Pi Mich Rok Jehovah ni jw.org e aram e gin nrayog ni ngam pirieg riy murung’agen e pi n’en nib mich u wan’mad nge pi n’en ni gamad ma rin’. Mang boch ban’en ni bay riy?

Fulweg ko Bible u boch e deer nib ga’ ni yima fith. Rayog ni ngam pirieg riy e fulweg ko pi deer nib ga’ fan ni yima fith. Bod nrayog ni ngam pirieg fa gal tract ni Bay Ba Ngiyalʼ Nra Mʼay e Gafgow, Fa? nge Rayog ni Ngki Fas e Piin ni Kar Mʼad Bayay? u online ni kan piliyeg nga boor ko 600 mit e thin. Ku rayog ni ngam beeg riy fare Bible ni New World Translation ni kan piliyeg nga boor ko 130 mit e thin, nge yugu boch e babyor ni yima fanay ko fol Bible ni bod fare babyor ni kenggin e Mang e Ri Be Fil e Bible?, nge Fare Wulyang ko Damit, nge Awake! Yooren e pi babyor ney e kan ngongliy rogon nrayog ni ngan motoyil ngay, ara ngan beeg, ara ngan downloadnag ni kan tay nga boch ban’en ni ka nog e MP3, ara PDF, ara EPUB format ngay. Ku rayog ni ngam printnag boch e page riy ni ngam pi’ ku be’ ni baadag ni nge beeg ko thin rok! Pi babyor ni yima dag yaan ko video e bay ni kan piliyeg ko thin ni ma yog e piin biling. Ku rayog ni ngam downloadnag boch e thin nu Bible ni kan recordnag ni ngan motoyil ngay, nge Bible drama, nge boch e musik nib fel’ ni ngan motoyil ngay.

Thin nib riyul’ u murung’agen e Pi Mich Rok Jehovah. Rayog ni ngan pirieg murung’agen boch ban’en nib beech riy, nge boch e vid­eo u murung’agen e maruwel ni machib ni yibe tay u ga’ngin yang e fayleng, nge boch ban’en ni be buch rok e Pi Mich Rok Jehovah, nge murung’agen e ayuw ni yima pi’ ko piin nib t’uf e ayuw rorad u ga’ngin yang e fayleng. Ku rayog ni ngam pirieg riy murung’agen e convention ni yira tay, nge rogon ni rayog ni ngam yol ko branch ofis.

Aram rogon ni be gal ramaen e tin riyul’ nge yan i taw nga tungun e fayleng. Re n’ey e ke yib angin ngak boor e girdi’ u gubin e nam nib muun yu Antartica ngay. Gamad be yibilay ni “nge yog ni i wer e re thin rok Somol ney nib machreg, me gilbuguwan” u ga’ngin yang e fayleng min pining e sorok ngak Got.​—2 Thessalonika 3:1.

• Uw rogon ni be ayuweg fare website ni jw.org e girdi’ ni ngar filed e tin riyul’ u murung’agen e Bible?

• Mang e ga baadag ni ngam nang boch murung’agen ko website romad?