De Rus fare Pagel ni Fak Be’ nib Pin ni Walagen Paul

Ngad filed murung’agen reb e pagel ni ayuweg e uncle rok. Re uncle rok nem e aram apostal Paul. Dad nanged fithingan e re pagel ney, machane gad manang ni bay ban’en ni ke rin’ ni be m’ug riy nder rus. Ga baadag ni ngam nang ko mang e rin’?​—

Immoy Paul u Jerusalem nib kalbus. Kan kalbusnag ni bochan ni be machibnag murung’agen Jesus. Bay boch e pumoon ni yad ba kireb. Ere kar lemnaged ni ngar rin’ed ban’en nib kireb ngak Paul. I lungurad: ‘Nga dogned ko en nib ga’ ko salthaw ni nge yog ko pi salthaw rok ni ngar feked Paul nga tafen e puf oloboch. Ngemu’, ma gad mith u tooben e kanawo’, ya nge yib i yan Paul, ma gad chel ngad lied!’

I rung’ag fare pagel ni fak be’ nib pin ni walagen Paul e n’en ni ka nog ni ngan rin’. Ere, mang e rin’? I yan nga kalbus nge yog ngak Paul e n’en ni ke rung’ag. Ma aram me yog Paul ngak ni nge yan i guy faen nib ga’ ko salthaw nge weliy ngak murung’agen e re n’em. Ga be lemnag nib mom rok e re pagel ney ni nge non ngak faen nib ga’ ko salthaw?​— Danga’, ya faen nib ga’ ko salthaw e be’ nib ga’ fan. Machane, de rus e re pagel nem, ma aram me yan i non ngak faen nib ga’ ko salthaw.

Manang e re tolang nem e n’en ni nge rin’. Ke fal’eg rogon gonap’an 500 e salthaw ni nga ranod ni ngar ayuweged Paul, ya nge dab ni li’ nge yim’. I yog ngorad ni ngar feked Paul i yan nga Cesarea e re nep’ nem. Gur, kan ayuweg e yafas rok Paul?​— Arrogon, ya dabkiyog rok fapi pumoon nib kireb ni ngar lied nge yim’. De yag ni ngar rin’ed e n’en nra lemnaged ni ngar rin’ed ngak Paul.

Mang e rayog ni ngam fil ko re n’ey?​— Ku arrogon gur nrayog ni ngam bod fare pagel ni fak be’ nib pin ni walagen Paul nda i rus. Ba t’uf ni nge dab da rusgad u nap’an ni gad ra weliy murung’agen Jehovah ko girdi’. Me gur, ga ra ulul ni ngam weliy murung’agen Jehovah ndab mu rus?​— Faan ga ra rin’ e re n’ey, ma rayog ni ngam ayuweg e yafas rok be’.