LIBRARY U ONLINE ni fan ko Wulyang ko Damit
Wulyang ko Damit
LIBRARY U ONLINE
Waab
  • BIBLE
  • PI BABYOR
  • PI MUULUNG
  • Mang Gil’ilungun Got?
    Mu Par Ndariy N’umngin Nap’an ni Gab Felfelan’!—Ngan Fol Bible u Taabang
    • Guruy ni 31. Yaan Jesus Kristus ni bay u tharmiy nib Pilung ni be gal ramaen Jehovah nga daken.

      GURUY NI 31

      Mang Gil’ilungun Got?

      Gil’ilungun Got e aram e n’en th’abi ga’ fan ni be weliy e Bible murung’agen. Aram e n’en nra fanay Jehovah ni nge lebguy e n’en nib m’agan’ ngay ni fan ko fayleng. Mang Gil’ilungun Got? Uw rogon ni kad nanged ni be gagiyeg e chiney? Mang boch ban’en ni ke yag ni nge rin’? Ma mang e ra rin’ boch nga m’on? Yira pi’ e fulweg ko pi deer ney ko re guruy ney nge gal ni migid.

      1. Mang Gil’ilungun Got, ma mini’ e Pilung riy?

      Gil’ilungun Got e aram reb e am ni ke sunmiy Jehovah Got. Jesus Kristus e Pilung riy ma be gagiyeg u tharmiy. (Matthew 4:17; John 18:36) Be weliy e Bible murung’agen Jesus ni be gaar: “Bayi mang pilung . . . ndariy n’umngin nap’an.” (Luke 1:32, 33) Ra gagiyegnag Jesus urngin e girdi’ u fayleng ni ir e Pilung u Gil’ilungun Got.

      2. Mini’ e piin yad ra un ngak Jesus ko gagiyeg?

      Gathi kemus ni yigoo Jesus nra gagiyeg, ya be yog e Bible ni bay boch e girdi’ ni kar bad u gubin e nam ni yad ‘ra un ngak ko gagiyeg.’ (Revelation 20:6) Uw urngin e piin yad ra un ngak Kristus ko gagiyeg? Ka nap’an ni yib Jesus nga fayleng, ma bokum milyon e Kristiano ni kar manged pi gachalpen. Machane kemus ni yigoo 144,000 riy e yad ra yan nga tharmiy ni ngar uned ngak Jesus ko gagiyeg. (Mu beeg e Revelation 14:1-4.) Tin ka bay e Kristiano u fayleng e yad ra par u tan Gil’ilungun Got.​—Psalm 37:29.

      3. Uw rogon ni kab fel’ Gil’ilungun Got ko am ko girdi’?

      Mus ni faanra guy e girdi’ ni be gagiyeg rogon ni ngar rin’ed boch ban’en nib fel’, ma dariy gelngirad ni ngar rin’ed urngin ban’en ni yad baadag. Ma piin yad ra yib nga lorad e rayog ni yigoo yad e yad ma lemnaged yad, ma dubrad ni ngar ayuweged e girdi’. Machane Jesus ni ir e Pilung u Gil’ilungun Got e dariy be’ nra yan nga lon. Ke “sunumeg Got . . . reb e gagiyeg ndariy e rofen nra mus.” (Daniel 2:44) Ra gagiyegnag Jesus e fayleng ni ga’ngin, ma urngin e girdi’ nra i ngongol ngorad ni taareb rogon. Ir be’ ni ma t’ufegey, mab gol, mab mat’aw, maku ra fil ko girdi’ rogon ni ngaur daged e pi fel’ngin ney ngorad.​—Mu beeg e Isaiah 11:9.

      KUM FIL BOCH BAN’EN U MURUNG’AGEN

      Mu fil fan ni kab fel’ Gil’ilungun Got ko am ko girdi’.

      Yaan Jesus Kristus ni bay u tagil’ u tharmiy ni be gagiyegnag e fayleng. Bay e piin yad be un ngak ko gagiyeg u fiti keru’ ni kar pared nga tagil’rad, ma be gal ramaen Jehovah u fiti keru’rad.

      4. Ra gagiyegnag ba am nib gel gelngin e fayleng ni ga’ngin

      Kab kakrom i yib keb i mada’ ko chiney ndariy reb e girdi’ ni be gagiyeg ni kab gel gelngin ngak Jesus Kristus. Mu beegew e Matthew 28:18, mi gimew weliy e fulweg ko re deer ni baaray:

      • Uw rogon ni kab tolang e gagiyeg rok Jesus ko gagiyeg ni be tay e girdi’?

      Am ko girdi’ e yugu ma thil, ma ra reb ma boch yang u fayleng e be gagiyegnag. Machane uw rogon Gil’ilungun Got? Mu beegew e Daniel 7:14, mi gimew weliy e fulweg ko gal deer ni baaray:

      • Mang fan nib fel’ ‘ndabi mus’ e gagiyeg nra tay Gil’ilungun Got?

      • Mang fan nib fel’ nra gagiyegnag e fayleng ni ga’ngin?

      5. Am ko girdi’ e dabiyog ni ngar pithiged e pi magawon rodad

      Mang fan nib t’uf ni nge yan Gil’ilungun Got nga lon e am ko girdi’? Mu yaliyew e re VIDEO ney, mi gimew weliy e fulweg ko re deer ni baaray.

      VIDEO: Mang Gil’ilungun Got?​—Bang Riy (1:41)

      • Mang wenegan e gagiyeg ni be tay e girdi’?

      Mu beegew e Eklesiastes 8:9, mi gimew weliy e fulweg ko gal deer ni baaray:

      • Ga be lemnag nib t’uf ni nge yan Gil’ilungun Got nga lon e am ko girdi’, fa? Mang fan?

      6. Piin yad ra gagiyegnag Gil’ilungun Got e yad manang rarogodad

      Bochan ni Jesus ni Pilung rodad e immoy nib girdi’, ma aram fan nrayog ni nge “kireban’ ngodad nga fadad meewar.” (Hebrews 4:15) Fare 144,000 i pumoon nge ppin ni yad ba yul’yul’ ni yad ra gagiyeg Jesus u taabang e ke mel’egrad Jehovah “u urngin e ganong, nge thin, nge gubin mit e girdi’, nge nam.”​—Revelation 5:9.

      • Ga be felfelan’ ngay ni kam nang ni manang Jesus nge piin yad ra un ngak ko gagiyeg rarogodad e girdi’, fa? Mang fan?

      Boch e pumoon nge ppin ni kan dugliyrad nib thilthil e ngiyal’ ni ur moyed riy nge rarogon e gin kar bad riy.

      Ke mel’eg Jehovah e pumoon nge ppin nib thilthil rarogon e gin kar bad riy ni ngar uned ngak Jesus ko gagiyeg

      7. Kab fel’ e pi motochiyel ko Am rok Got

      Ma ngongliy e pi am e motochiyel rorad ni yad be lemnag ni nge yib angin ko piin yad be gagiyegnagrad me ayuwegrad. Ku arrogon Gil’ilungun Got ni bay e motochiyel ni ke ngongliy nthingari fol e girdi’ riy nra par u tan e re am nem. Mu beegew e 1 Korinth 6:9-11, mi gimew weliy e fulweg ko pi deer ni baaray:

      • Ga be lemnag nra uw rogon e par u fayleng ni faanra gubin e girdi’ ni yad be fol ko pi motochiyel rok Got?a

      • Ga be lemnag ni bay mat’awun Jehovah ni nge lemnag ni nge fol e piin yad ra par u tan Gil’ilungun ko pi motochiyel ney, fa? Mang fan?

      • Mang e be dag ni piin ndarur folgad ko pi motochiyel ney e rayog ni ngar thilgad?​—Mu guy e verse 11.

      Reb e polis ni be taleg e karrow u bangi ban’en ni boor e karrow nge girdi’ riy. Bay e girdi’ nib thilthil yangarrad ni yad be th’ab e kanawo’ nga barba’.

      Ma ngongliy e pi am e motochiyel ni nge ayuweg e piin yad be gagiyegnagrad me yib angin ngorad. Bay boch e motochiyel ni ke ngongliy Gil’ilungun Got ni kab fel’ ko pi motochiyel ney nra ayuweg e piin be gagiyegnagrad me yib angin ngorad

      RAYOG NI NGE GAAR BE’: “Mang Gil’ilungun Got?”

      • Uw rogon ni ga ra fulweg?

      N’EN KAN FIL

      Gil’ilungun Got e reb e am nib riyul’ ni bay u tharmiy ma ra gagiyegnag e fayleng ni ga’ngin.

      Ngan Sul u Daken

      • Mini’ e piin yad ra gagiyeg u Gil’ilungun Got?

      • Uw rogon ni kab fel’ Gil’ilungun Got ko am ko girdi’?

      • Mang boch ban’en ni baadag Jehovah ni nge rin’ e piin yad ra par u tan Gil’ilungun?

      N’en Ngam Nameg

      MU GAY MURUNG’AGEN

      Mu beeg e n’en ni yog Jesus u murung’agen e gin bay Gil’ilungun Got riy.

      “Is the Kingdom of God in Your Heart?” (Article ni bay ko website)

      Mang fan ni ma lemnag e Pi Mich Rok Jehovah ni kab ga’ fan ni ngar yul’yul’gad nga Gil’ilungun Got ko bin ngar yul’yul’gad ko am ko girdi’?

      Devoted to God’s Kingdom (1:43)

      Mu guy e n’en be yog e Bible u murung’agen fare 144,000 i girdi’ ni ke mel’egrad Jehovah ni ngar uned ngak Jesus ko gagiyeg.

      “Who Go to Heaven?” (Article ni bay ko website)

      Mang e micheg nga laniyan’ be’ nib pin ni immoy u kalbus ni kemus ni yigoo Got e rayog ni nge chuweg e tin nde mat’aw u fayleng?

      “How I Found the Answer to Injustice” (Awake!, November 2011)

      a Yira weliy murung’agen boch e pi motochiyel ney ko Bin 3. 

  • Be Gagiyeg Gil’ilungun Got e Chiney!
    Mu Par Ndariy N’umngin Nap’an ni Gab Felfelan’!—Ngan Fol Bible u Taabang
    • Guruy ni 32. Yaan Jesus Kristus ni ke Pilung u tharmiy ni be kol e sog ko pilung ma be gagiyegnag e fayleng.

      GURUY NI 32

      Be Gagiyeg Gil’ilungun Got e Chiney!

      I tabab Gil’ilungun Got ko gagiyeg u tharmiy ko duw ni 1914. Ku aram e ngiyal’ ni tabab e tin tomuren e rran ko gagiyeg ko girdi’. Uw rogon ni kad nanged e re n’ey? Am guy e n’en ke yiiynag e Bible, nge n’en be buch u fayleng, nge rogon e ngongol ko girdi’ ni ka nap’an e duw ni 1914.

      1. Mang e ke yiiynag e Bible?

      I yog fare babyor rok Daniel nra tabab Gil’ilungun Got ko gagiyeg u tungun ba ngiyal’ ni ka nog “medlip e duw” ngay. (Daniel 4:16, 17) Boch e chibog nga tomuren, me weliy Jesus murung’agen e re ngiyal’ i n’em me yog ni aram e “ngiyal’” ni be gagiyeg e pi nam riy. Machane ki yog ndawori mus nap’an e re ngiyal’ i n’em. (Luke 21:24) Gad ra guy ko re guruy ney ni mus nap’an e re ngiyal’ i n’em ko duw ni 1914.

      2. Uw rogon e n’en be buch u fayleng nge rogon e ngongol ko girdi’ ni ka nap’an e duw ni 1914?

      I gaar pi gachalpen Jesus ngak: “Mog ngomad . . . ko mang e ra yib i m’ug ni pow riy ni aram e ke taw nga nap’an urngin e pi n’ir ni nge yib i m’ug.” (Mark 13:3, 4) Rogon e fulweg ni pi’ Jesus ngorad e aram e yiiynag boor ban’en nra buch u tomuren nra tabab ko gagiyeg u tharmiy ni ke mang Pilung u Gil’ilungun Got. Boch ko pi n’ey e aram e mahl, nge uyungol, nge durru’. (Mu beeg e Matthew 24:7.) Ki yiiynag e Bible nra “mo’maw’” rogon e par ko “tin tomren e rran” ni bochan rogon e ngongol ko girdi’. (2 Timothy 3:1-5) Ka nap’an e duw ni 1914, ma kari gagiyel e pi n’ey ni be buch u fayleng nge rogon e kireb ko ngongol ko girdi’.

      3. Mang fan ni kari gel e kireb u fayleng ni ka nap’an ni tabab Gil’ilungun Got ko gagiyeg?

      De n’uw nap’an nga tomuren ni Pilung Jesus u Gil’ilungun Got, me mahl ngak Satan nge pi moonyan’ rok u tharmiy, me war Satan. Be yog e Bible ni ka “nin’ u lang nga daken e fayleng, nib muun urngin e pi engel rok ngak.” (Revelation 12:9, 10, 12) Kari damumuw Satan ya manang ni yira thang. Ere be k’aring e amith nge gafgow u ga’ngin yang e fayleng. Aram fan ni kari gel e kireb u fayleng! Machane ra pithig Gil’ilungun Got urngin e pi magawon ney.

      KUM FIL BOCH BAN’EN U MURUNG’AGEN

      Mu guy rogon ni kad nanged ni tabab Gil’ilungun Got ko gagiyeg ko duw ni 1914 nge n’en nsusun e ra k’aringdad e re n’ey ni ngad rin’ed.

      4. Yiiy u Bible e be yog nre duw nem e 1914

      Mu yaliyew e re VIDEO ney.

      VIDEO: God’s Kingdom Began Ruling in 1914 (5:02)

      I k’aring Got Nebukadnezzar ni Pilung nu Babylon kakrom ni nge guy u malik’ay e n’en nra buch boch nga m’on. Re lik’ay nem nge rogon ni weliy Daniel fan e be tamilangnag ni n’en ni guy Nebukadnezzar u malik’ay e be weliy murung’agen e gagiyeg rok nge Gil’ilungun Got.​—Mu beegew e Daniel 4:17.a

      Mu beegew e Daniel 4:20-26, mi gimew fanay e n’en bay ko chart ni ngam weliyew e fulweg ko pi deer ni baaray:

      • (A) Mang e guy Nebukadnezzar u malik’ay?​—Mu guy e verse 20 nge 21.

      • (B) Mang e ra buch ko re ke gek’iy nem?​—Mu guy e verse 23.

      • (C) Mang e ra buch u tungun fare ‘medlip i duw’?​—Mu guy e verse 26.

      Rogon Fare Ke Gek’iy nni Guy u Malik’ay Nga Gil’ilungun Got

      YIIY (Daniel 4:20-36)

      Gagiyeg

      (A) Ba ke gek’iy nrib ga’ ken

      Ba ke gek’iy nib ga’ ken.

      Ke magawon e gagiyeg rok

      (B) “Ngan th’ab e re ke gek’iy nir” min pag u lan “medlip e duw”

      Muchun ba ke gek’iy ni kan longobiy nga bangi wasey ni kan ngongliy ko wasey nge wasey ni bronze.

      Ke sul e gagiyeg rok nga rogon

      (C) “Bay kum mang pilung bayay”

      Ba ke gek’iy nib ga’ ken.

      Yay nsom’on ni lebug e re yiiy ney . . .

      • (D) Mini’ e be yip’ fan fare ke gek’iy?​—Mu guy e verse 22.

      • (E) Uw rogon ni magawon e gagiyeg rok?​—Mu beegew e Daniel 4:29-33.

      • (F) Mang e buch rok Nebukadnezzar u tungun fare ‘medlip i duw’?​—Mu beegew e Daniel 4:34-36.

      YAY NSOM’ON NI LEBUG

      Gagiyeg

      (D) Nebukadnezzar ni Pilung nu Babylon

      Yaan Nebukadnezzar ni Pilung nib sak’iy ni be m’ug riy ni ir be’ nib tolangan’.

      Ke magawon e gagiyeg rok

      (E) Tomuren e duw ni 606 B.C.E., me kireb lolugen Nebukadnezzar ma daki yag ni nge gagiyeg u lan medlip e duw

      Yaan Nebukadnezzar ni bay u fithik’ e pan ni be kay e pan ni bod reb e gamanman.

      Ke sul e gagiyeg rok nga rogon

      (F) Ke sul Nebukadnezzar nga rogon ma aram miki tabab ko gagiyeg bayay

      Yaan Nebukadnezzar ni Pilung ni ke fal pa’ ma be sap nga lan e lang.

      Yay ni l’agruw ngay ni lebug e re yiiy ney . . .

      • (G) Mini’ e be yip’ fan fare ke gek’iy? ​—Mu beegew e 1 Kronicles 29:23.

      • (H) Uw rogon ni magawon e gagiyeg rorad? Uw rogon ni kad nanged nnap’an ni immoy Jesus u fayleng ma dakurur gagiyeggad?​—Mu beegew e Luke 21:24.

      • (I) Wuin e nni sulweg e re gagiyeg ney nga rogon, ma uw e buch riy?

      YAY NI L’AGRUW NGAY NI LEBUG

      Gagiyeg

      (G) Pi pilung nu Israel ni ur gagiyeggad ni owchen Got

      Pi pilung nu Israel ni kar pared nga daken e chiya ko pilung nra chuw bagayad me yib bagayad nga lon. Be gal ramaen e tamilang nga dakenrad.

      Ke magawon e gagiyeg rok

      (H) Kan gothey yu Jerusalem ma dakuriy reb e pilung nu Israel ni gagiyeg u lan 2,520 e duw

      Yaan yu Jerusalem kakrom ni be yik’ ko duw ni 607 B.C.E. Ma bay 2,520 e duw ni yib nga tomuren.

      Ke sul e gagiyeg rok nga rogon

      (I) Ke tabab Jesus ko gagiyeg u tharmiy ni ir e Pilung u Gil’ilungun Got

      Yaan Jesus ni ke par nga tagil’ u tharmiy be gagiyegnag e fayleng ni ka nap’an e duw ni 1914 C.E. Ma be yib ramaen e tamilang rok.

      Uw n’umngin nap’an fare medlip i duw?

      Bay yu yang u Bible ni ma ayuwegdad ni ngad nanged fan e n’en be yog yu yang riy. Bod ni be yog fare babyor ni Revelation nra dalip nge baley e duw ma 1,260 e rran. (Revelation 12:6, 14) Re n’ey e be yip’ fan nreb e duw nrogon ni yima yog ko yiiy u Bible e aram 360 e rran. Ere fare ‘medlip i duw’ e aram 2,520 e rran. Yu ngiyal’ e ma fanay e Bible fare bugithin ni rran ni nge yip’ fan reb e duw.​—Ezekiel 4:6.

      5. Ke thil rarogon e fayleng ni ka nap’an e duw ni 1914

      Mu yaliyew e re VIDEO ney.

      VIDEO: The World Has Changed Since 1914 (1:10)

      I yiiynag Jesus e n’en nra buch u fayleng u tomuren nra mang Pilung. Mu beegew e Luke 21:9-11, mi gimew weliy e fulweg ko re deer ni baaray:

      • Tin ngan ko pi n’ey e kam guy ni be buch ara kam rung’ag murung’agen?

      I weliy apostal Paul murung’agen rarogon e ngongol ko girdi’ u nap’an e tin tomuren e rran ko gagiyeg ko girdi’. Mu beegew e 2 Timothy 3:1-5, mi gimew weliy e fulweg ko re deer ni baaray:

      • Tin ngan ko pi ngongol ney e ga be guy rok e girdi’ e ngiyal’ ney?

      Bogi sasing ni bay u taabang: Yaan e pi n’en be buch u fayleng nge ngongol ko girdi’ u nap’an e tin tomuren e rran. 1. Reb e tolang ko salthaw ni be tolul ni bay pa’ u lan e lang. 2. Boch e naun ni ke puth u tomuren reb e durru’. 3. Sikoki ko salthaw. 4. Bogi girdi’ ni yad be yan u daken e kanawo’ ni yad be fanay e mask. 5. Yaan fa gal naun u New York ni ka nog e Twin Towers ngay ni be yik’ u tomuren reb cham ni tay e terrorist. 6. Be’ nib pumoon ni be fanay boch e falay ni kireb. 7. Be’ nib pumoon ni ke unguy pa’ ma be tolul ko ppin rok. 8. Boch e falay ni kireb nge alkul. 9. L’agruw i ppin ni yow be fek yaarow ni kar chuwgow ko mad nib fel’ yaan ma yow ba nunuw ko churuwo’. 10. Reb i girdien e musik ni be pow’iy ba ulung i girdi’ u nap’an reb e concert. 11. Be’ ni be un ko wagey ni be yon’ ba melor ni bay boch ban’en riy.

      6. Mu dag nib mich u wan’um ni be gagiyeg Gil’ilungun Got e chiney

      Mu beegew e Mark 13:3, 4, 10, mi gimew weliy e fulweg ko gal deer ni baaray:

      • Mang reb e maruwel nib ga’ fan ni yibe rin’ ni be dag ni be gagiyeg Gil’ilungun Got e chiney?

      • Uw rogon nrayog ni ngam un i rin’ e re maruwel ney?

      Be gagiyeg Gil’ilungun Got e chiney, ma dabki n’uw nap’an ma bayi gagiyegnag e fayleng. Mu beegew e Hebrews 10:24, 25, mi gimew weliy e fulweg ko re deer ni baaray:

      • Chiney ni gad be “guy ni Chirofen ni bay yib Somol riy e be chugur” e ra bagadad ma mang e susun ni nge rin’?

      Bogi sasing ni bay u taabang: 1. Be’ ni be fil e Bible ni ke un ko muulung ko Pi Mich Rok Jehovah. 2. Be machibnag be’ ni yow manangew yow.

      Faanra kam fil murung’agen ban’en nrayog ni nge yib angin ko girdi’ me ayuweg e yafos rorad, ma mang e ga ra rin’?

      RAYOG NI NGE GAAR BE’: “Mang fan ni yugu ra i par e Pi Mich Rok Jehovah ma yad be weliy murung’agen e duw ni 1914?”

      • Mang e ga ra yog?

      N’EN KAN FIL

      Yiiy u Bible nge pi n’en be buch u fayleng e be micheg ni be gagiyeg Gil’ilungun Got e chiney. Gad ra machibnag murung’agen Gil’ilungun Got ma gad be un ko muulung, ma aram e gad be dag nib mich u wan’dad e re n’ey.

      Ngan Sul u Daken

      • Mang e buch u tungun fare medlip i duw ni kan yiiynag murung’agen u lan fare babyor rok Daniel?

      • Mang e be micheg ngom ni ke tabab Gil’ilungun Got ko gagiyeg ko duw ni 1914?

      • Uw rogon nrayog ni ngam dag nib mich u wan’um ni be gagiyeg Gil’ilungun Got e chiney?

      N’en Ngam Nameg

      MU GAY MURUNG’AGEN

      Mu beeg e n’en ke yog e piin yad ma yoloy chepin boch ban’en nge yugu boch e girdi’ u murung’agen e pi n’en ke thil u fayleng ni ka nap’an e duw ni 1914.

      “When Morals Declined Dramatically” (Awake!, April 2007)

      Mu beeg rogon ni thilyeg fare yiiy ko Matthew 24:14 e yafos rok be’ nib pumoon.

      “I Loved Baseball More Than Anything!” (The Watchtower No. 3 2017)

      Uw rogon ni kad nanged ni fare yiiy ni bay ko Daniel ko guruy ni 4 e bay rogon nga Gil’ilungun Got?

      “Wuin e Tabab Gil’ilungun Got ko Gagiyeg? (Guruy Ni 1)” (Machib Ko Gil’ilungun, October 2014)

      Mang e be dag ni mus fare ‘medlip i duw’ ni kan weliy murung’agen ko Daniel ko guruy ni 4 ko duw ni 1914?

      “Wuin e Tabab Gil’ilungun Got ko Gagiyeg? (Guruy Ni 2)” (Machib Ko Gil’ilungun, October 2014)

      a Mu guy e gal ni tomur e article u tan fare thin ni Mu Gay Murung’agen ni bay ko re guruy ney.

  • N’en Nra Rin’ Gil’ilungun Got
    Mu Par Ndariy N’umngin Nap’an ni Gab Felfelan’!—Ngan Fol Bible u Taabang
    • Guruy ni 33. Be par e girdi’ u paradis u fayleng.

      GURUY NI 33

      N’en Nra Rin’ Gil’ilungun Got

      Ke tabab Gil’ilungun Got ko gagiyeg. Dabki n’uw nap’an ma ra thilyeg boor ban’en u fayleng. Ere chiney e ngad weliyed boch ban’en nib manigil nrayog ni ngam athapeg ni nge buch u tan Gil’ilungun Got.

      1. Uw rogon nra yibnag Gil’ilungun Got e gapas nge tin nib mat’aw nga fayleng?

      Ra thang Jesus ni ir e Pilung u Gil’ilungun Got e girdi’ nib kireb nge pi am u nap’an fare mahl ni Armageddon. (Revelation 16:14, 16) Aram e ngiyal’ nra lebug fapi thin ni ke micheg e Bible ni be gaar: “Dab ki n’uw nap’an me yan e piin nib kireb nga bayang.” (Psalm 37:10) Ireray e re Am nra fanay Jesus ni nge fek e gapas i yib nga ga’ngin yang e fayleng, me guy rogon ni nge urngin e girdi’ mar rin’ed e tin nib mat’aw.​—Mu beeg e Isaiah 11:4.

      2. Ra uw rogon e par u nap’an nra lebug e n’en nib m’agan’ Got ngay u roy u fayleng?

      Nap’an nra gagiyeg Gil’ilungun Got ma “piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Am susunnag rogon e par u reb e fayleng ni gubin e girdi’ riy ni yad ba mat’aw, mab t’uf Jehovah rorad, maku yad ma t’ufeged yad! Dariy be’ nra m’ar, ma gubin e girdi’ ni yad ra par ndariy n’umngin nap’an.

      3. Mang e ra rin’ Gil’ilungun Got u tomuren ni yira thang e piin nib kireb?

      Tomuren ni kan thang e piin nib kireb, ma aram e ra gagiyeg Jesus ni ir e Pilung u lan 1,000 e duw. Nap’an e ngiyal’ nem ma ra un fare 144,000 ngak ngar ayuweged e girdi’ u fayleng ni ngar flontgad. Ra taw nga tungun fare 1,000 i duw ma ke paradis e fayleng ni ga’ngin, ma gubin e girdi’ ni yad ra felfelan’ ni bochan e yad be fol ko pi motochiyel rok Jehovah. Aram e ngiyal’ nra sulweg Jesus Gil’ilungun ngak Jehovah ni Chitamangin. Ku aram e ngiyal’ ni yira tayfan fithingan Jehovah nib thothup ndariy n’umngin nap’an. (Matthew 6:9, 10) Ra taw ko ngiyal’ nem ma ke tamilang ni Jehovah e ir reb e Pilung nib manigil ni ma lemnag e girdi’ ni yad bay u tan e gagiyeg rok. Tomuren ma ra thang Jehovah Satan, nge pi moonyan’ rok, nge piin yad ra mel’eg ni ngar togopuluwgad ko gagiyeg rok. (Revelation 20:7-10) Angin e pi n’en ke rin’ Gil’ilungun Got e ra par ndariy n’umngin nap’an.

      KUM FIL BOCH BAN’EN U MURUNG’AGEN

      Mu fil fan nrayog ni nge pagan’dad nra fanay Got Gil’ilungun ni nge lebguy urngin ban’en ni ke micheg e Bible ni fan ngodad boch nga m’on.

      4. Ra chuweg Gil’ilungun Got e am ko girdi’

      ‘Bay boch e girdi’ nib gel gelngirad ma boch e be gafgow u tan pa’rad.’ (Eklesiastes 8:9) Ra fanay Jehovah Gil’ilungun ni nge chuweg e biney e ngongol ni yibe rin’ nde mat’aw.

      Mu beegew e Daniel 2:44 nge 2 Thessalonika 1:6-8, mi gimew weliy e fulweg ko gal deer ni baaray:

      • Mang e ra rin’ Jehovah nge Jesus ni Fak ko am ko girdi’ nge piin be tay tanggin e gagiyeg rorad?

      • Bochan e n’en kam fil u murung’agen Jehovah nge Jesus, ma uw rogon ni be micheg ngom nib mat’aw gubin ban’en ni yow ra rin’?

      Yaan Jesus ni bay u tharmiy ni ke Pilung ni be gagiyegnag e fayleng ni ke paradis.

      5. Jesus e aram e bin th’abi fel’ e Pilung

      Boor e kanawo’ nra ayuweg Jesus e girdi’ riy u fayleng ni ir e Pilung u Gil’ilungun Got. Mu yaliyew e re VIDEO ney ni ngam guyew rogon ni ke dag Jesus ni baadag ni nge ayuweg e girdi’, maku bay gelngin ni ke pi’ Got ni nge rin’ e re n’ey.

      VIDEO: I Dag Jesus e N’en Nra Rin’ Gil’ilungun Got (1:13)

      Pi n’en ni i rin’ Jesus u nap’an ni immoy u fayleng e be dag e n’en nra rin’ Gil’ilungun Got. Bin ngan ko pi tow’ath ni baaray e ga be athapeg ni ngam guy ni ke buch? Mu beegew fapi thin nu Bible ni bay u tooben e pi tow’ath ney.

      NAP’AN NI IMMOY JESUS U FAYLENG . . .

      RA PAR JESUS U THARMIY . . .

      • ma i gagiyegnag e yafang.​—Mark 4:36-41.

      • nge sulweg urngin ban’en nga rogon ni kan kirebnag ko re fayleng ney.​—Isaiah 35:1, 2.

      • ma i ngongliy e maang’ang nge duruw’iy bokum biyu’ e girdi’.​—Matthew 14:17-21.

      • me gagiyegnag ni nge yoor e ggan u fayleng ya nge dabki yim’ e girdi’ ko bilig.​—Psalm 72:16.

      • ma boor e girdi’ ni i golnag e m’ar rorad.​—Luke 18:35-43.

      • me guy rogon ni nge fel’ fithik’ i dow urngin e girdi’.​—Isaiah 33:24.

      • ma i faseg e yam’.​—Luke 8:49-55.

      • me faseg e piin kar m’ad me chuweg e yam’.​—Revelation 21:3, 4. 

      6. Rib manigil e n’en nra rin’ Gil’ilungun Got ni fan ko girdi’ boch nga m’on

      Ra lebguy Gil’ilungun Got e n’en nib m’agan’ Jehovah ngay ni fan ko girdi’ aram ko som’on. Ra par e girdi’ u paradis u fayleng ndariy n’umngin nap’an. Mu yaliyew e re VIDEO ney ni be dag rogon ni be lebguy Jehovah e n’en nib m’agan’ ngay u daken Jesus ni Fak.

      VIDEO: A Glimpse Into a Wonderful Future (4:38)

      Mu beegew e Psalm 145:15, 16, mi gimew weliy e fulweg ko re deer ni baaray:

      • Uw rogon u wan’um ni kam nang ni “urngin e tin nib fos ban’en” nra pi’ Jehovah e ‘tin nge yog ngorad’?

      MA GAAR BOCH E GIRDI’: “Gad ra maruwel u taabang, ma rayog ni ngad pithiged e pi magawon u fayleng.”

      • Mang boch e magawon nra chuweg Gil’ilungun Got ndabiyog ko am ko girdi’ ni ngar chuweged?

      N’EN KAN FIL

      Ra lebguy Gil’ilungun Got e n’en nib m’agan’ Got ngay. Ra paradisnag e re fayleng ney ni ga’ngin me par e girdi’ riy nib manigil ni yad be liyor ngak Jehovah ndariy n’umngin nap’an.

      Ngan Sul u Daken

      • Uw rogon nra tay Gil’ilungun Got fan fithingan Jehovah nib thothup?

      • Mang fan nrayog ni nge mich u wan’dad nra lebguy Gil’ilungun Got e pi n’en ke micheg e Bible?

      • Mang boch ban’en nra rin’ Gil’ilungun Got nri ga be athapeg ni ngam guy ni ke buch?

      N’en Ngam Nameg

      MU GAY MURUNG’AGEN

      Mu fil ko mang e Armageddon.

      “What Is the Battle of Armageddon?” (Article ni bay ko website)

      Mu beeg murung’agen e pi n’en nra buch u nap’an fare “gafgow” nib ga’ ni weliy Jesus murung’agen.—Matthew 24:21.

      “What Is the Great Tribulation?” (Article ni bay ko website)

      Mu guy rogon nrayog ni nga i fal’eg i lemnag chon e tabinaw e pi tow’ath nra yibnag Gil’ilungun Got.

      See Yourself in Paradise (1:50)

      Mu beeg rogon ni pirieg be’ ni i togopuluw ko am e n’en ni i athapeg.

      “The Bible Changes Lives” (The Watchtower, January 1, 2012)

Yapese Publications (1984-2025)
Mu Log Out
Mu Log In
  • Waab
  • Mu Sharenag
  • Pi N'en Nrayog ni Ngam Mel'eg
  • Copyright © 2025 Watch Tower Bible and Tract Society of Pennsylvania
  • Rogon ni Ngan Fanay
  • Privacy Policy
  • Privacy Settings
  • JW.ORG
  • Mu Log In
Mu Sharenag