Rogon ni Ngan Pi’ e Fonow

1. Mini’ e ba t’uf ni nge pi’ e fonow? Mu tamilangnag.

GA BAADAG ni ga ma pi’ e fonow ngak yugu boch e girdi’, fa? Bay boch e girdi’ ni yad baadag ni ngar rin’ed e re n’ey. Ma boch e girdi’ e yad be rus ara de mom ngorad ni ngar pied e fonow ko girdi’. Demtrug rogon ma gad gubin ni bay ba ngiyal’ nra taw ngay mab t’uf ni ngad pied e fonow. Mang fan? Ya yog Jesus ni tin riyul’ i gachalpen e ra bagayad ma ma t’ufeg bagayad. (John 13:35) Ma reb e kanawo’ ni gad ma dag nib t’uf pi walagdad rodad e aram e ngad pied e fonow ngorad ko ngiyal’ ni ke t’uf. Be yog e Thin rok Got ni faanra ud pied e “fonow u fithik’ e yul’yul’,” ma ra chugur e tha’ u thildad e “pi fager” rodad.​—Prov. 27:​9, NW.

2. Mang e thingari yag ko piin piilal ni ngar rin’ed, ma mang fan? (Kum guy fare kahol ni kenggin e “Fonow ni Yima Pi’ ko Muulung u Lan e Wik.”)

² Ba ga’ ni piin piilal e ba t’uf ni ngar pied e fonow nra yib angin. Ke tay Jehovah e pi pumoon ney ni ngar ayuweged e ulung u daken Jesus. (1 Pet. 5:​2, 3) Reb e kanawo’ ni yad ma rin’ e re n’ey riy e aram e yad ma pi’ e fonow nib puluw ko Bible u daken e pi welthin ni yad ma pi’ ni fan ko ulung. Kub t’uf ni ngar pied e fonow ko pi walag ni be’ nge be’, ni kub muun ngay e piin kar maloggad ko ulung. Uw rogon nrayog ni nge pi’ e piin piilal e fonow nib manigil ni ku gad ba muun ngay?

3. (a) Uw rogon nrayog ni ngad filed rogon ni ngaud pied e fonow nib manigil? (Isaiah 9:6; kum guy fare kahol ni kenggin e “Mu Folwok rok Jesus u Nap’an ni Ga Be Pi’ e Fonow.”) (b) Mang e gad ra weliy ko re article ney?

³ Faan gad ra fil murung’agen boch e girdi’ u Bible, ma boor ban’en nrayog ni ngad nanged riy u rogon ni ngaud pied e fonow nib manigil. Jesus e gubin ngiyal’ ni ma pi’ e tin th’abi fel’ e fonow. Reb e liw rok e aram e ir e “Tafonow nrib Manigil ma ba Gonop.” (Mu beeg e Isaiah 9:6.) Gad ra weliy ko re article ney e n’en nrayog ni ngad rin’ed u nap’an ni ke ning be’ e fonow ngodad, nge n’en nrayog ni ngad rin’ed u nap’an nra t’uf ni ngad fonownaged be’ ndawori ning e ayuw ngodad. Ku gad ra weliy feni ga’ fan ni ngad pied e fonow ko ngiyal’ nge rogon nib puluw ni ngad rin’ed riy.

NAP’AN NI YIRA FITH LANIN’DAD U BAN’EN

4-5. Mang e som’on nsusun e ngad fithed gadad riy u nap’an nra fith be’ lanin’dad u ban’en? Mu weliy ban’en nrayog ni nge buch.

⁴ Nap’an nra fith be’ lanin’dad u ban’en, ma mang e som’on nsusun e ngad rin’ed? Sana rayog ni gad baadag ni kan fith lanin’dad, ma gad baadag ni ngad pied e ayuw ni ka chingiyal’ nem. Machane som’on e susun ni ngad fithed gadad ni nge lungudad, ‘Ba gaman e tamilangan’ rog nrayog ni nggu pi’ e fonow u murung’agen e re n’ey, fa?’ Yu ngiyal’ e bin th’abi fel’ e kanawo’ ni ngad pied e ayuw riy e aram e dab da pied e fonow ngak facha’, ya nga dogned ngak ni nge yan i guy be’ nib tamilangan’ u murung’agen fare n’em.

⁵ Am lemnag e re n’ey. Susun e bay be’ nrib pach e thin romew ni ke m’ar nib ubchiya’. Ere yog ngom ni ke gay murung’agen e re miti tafalay nrayog ni nge un ngay, ngemu’ me yog ngom ni nga mog e bin ga be lemnag nib fel’ ni nge un ngay. Sana rayog ni bay ba mit e tafalay ni ga be lemnag nib fel’, machane gathi gur reb e togta maku dawor mu fil rogon i tafalaynag e mit nem e m’ar. Faanra aram rogon, ma bin th’abi fel’ e kanawo’ nrayog ni ngam ayuweg e fager rom riy e aram e ngam ayuweg ni nge pirieg be’ nrayog ni nge pi’ e ayuw ngak.

6. Mang fan nrayog ni ngad dugliyed ni ngad songad buchuuw u m’on ni ngad pied e fonow?

⁶ Mus ni faanra gad be lemnag nib gaman e tamilangan’ rodad nrayog ni ngad pied e fonow u murung’agen ban’en, machane rayog ni ngad dugliyed ni ngad songad buchuuw u m’on ni ngad pied e fulweg ngak be’ ni ke fith lanin’dad u ban’en. Mang fan? Ya be yog e Proverbs 15:28 (BT) ni “piin manigil e yad ma lem u m’on mfin ra pied e fulweg u ban’en.” Ere uw rogon ni faanra gad be lemnag ni gad manang e fulweg riy? Rayog ni ngkud ted ba ngiyal’ ni ngad gayed murung’agen fare n’em, ma gad meybil, mad fal’eged i lemnag boch ban’en. Gad ra rin’ e re n’ey, ma aram e rayog ni nge pagan’dad nra puluw e fulweg rodad nga rogon laniyan’ Jehovah ko fare n’em. Mu tay fanam i yan ko n’en ni buch rok Nathan ni profet.

7. Mang e ga be fil ko n’en ni buch rok Nathan ni profet?

⁷ Nap’an ni be non David ni Pilung ngak Nathan ni profet me yog ni baadag ni nge toy reb e tempel ni fan ngak Jehovah. Ka chingiyal’ nem me yog Nathan ngak ni nge rin’ e n’en ke lemnag. Machane som’on e susun ni nge fith laniyan’ Jehovah. Mang fan? Ya gathi David e baadag Jehovah ni nge toy e re tempel nem. (1 Kron. 17:​1-4) Ere be m’ug ko re n’ey ni buch nnap’an ni yira fith lanin’dad u ban’en ma gad ba gonop ni faanra ‘dab da gurgad ngad welthingad.’​—Jas. 1:19.

8. Ku mang reb i fan nsusun e ngad lemgad u m’on ni ngad pied e fonow ngak be’?

⁸ Kum lemnag reb i fan nsusun e ngad lemgad u m’on ni ngad pied e fonow ngak be’: Faanra dugliy be’ ban’en me yib wenegan ngak ni bochan e fonow nda pied ngak, maku rayog ni nge yan i aw ni kub kireb e rodad. Ere rib ga’ fan ni ngad lemgad nib fel’ rogon u m’on ni ngad pied e fonow ngak be’.

NGAN PI’ E FONOW NGAK BE’ NDAWORI NING E AYUW

9. Mang e thingari mich u wan’ e piin piilal u m’on ni ngar fonownaged be’? (Galatia 6:1)

⁹ Bay yu ngiyal’ nib t’uf ni nge fonownag e piin piilal reb e walag ni be yan ni nge rin’ “ban’en nib kireb.” (Mu beeg e Galatia 6:1.) Facha’ e rayog ni be mel’eg boch ban’en nde fel’ nra boch nga tomuren ma rayog ni nge k’aring ni nge rin’ reb e denen nib ubchiya’. Ere baadag e piin piilal ni ngar ayuweged facha’ ni nge par u daken fare pa’ i kanawo’ ni be sor i yan ko yafos ni manemus. (Jas. 5:​19, 20) Machane faanra nge yib angin e fonow rorad, ma som’on e ba t’uf ni ngari mich u wan’rad nriyul’ ni facha’ e be yan ni nge rin’ ban’en nib kireb. Gad gubin ni ma pagdad Jehovah ni ngad dugliyed boch ban’en nrogon nib puluw ko nangan’ rodad. (Rom. 14:​1-4) Machane uw rogon ni faanra be yan reb e walag ni nge rin’ ban’en nib kireb ma ke dugliy e piin piilal nib t’uf ni ngan fonownag?

10-12. Mang e susun ni nge rin’ e piin piilal u nap’an nra t’uf ni ngar pied e fonow ndawor nning e ayuw ngorad? Mu susunnag. (Kum guy e sasing.)

¹⁰ Ku bay reb e magawon ni ma mada’nag e piin piilal u nap’an nra t’uf ni ngar pied e fonow ndawor nning e ayuw ngorad. Ni uw rogon? I yog apostal Paul nrayog ni be yan be’ ni nge rin’ ban’en nib kireb nde nang. Ere som’on e susun ni ngar rin’ed boch ban’en ya nge mom ngak facha’ ni nge m’agan’ ko fonow ni yira pi’ ngak.

¹¹ Re n’ey ni nge pi’ e piin piilal e fonow ndawor nning e ayuw ngorad e bod ni yibe guy rogon ni ngan yung e woldug ko but’ nib elel. U m’on ni nge tabab reb e tamilay’ ni nge yung e awoch rok mab t’uf ni nge gi’ fare but’ me bilbilig nge munguy. Re n’ey e ra momnag ni ngan yung e awoch ngay. Tomuren ma aram mfini yung fapi awoch. Tomur riy me puog e ran ngay ya nge yag ni tugul. Ku arrogon ni bay boch ban’en nrayog ni nge rin’ reb e piilal ya nge momnag ngak reb e walag ni nge m’agan’ ko fonow ni ke pi’. Bod nrayog ni nge sonnag e ngiyal’ nib fel’ ni nge non ngak fare walag, ngemu’ me yog ngak nib t’uf rok ma bay ban’en ni baadag ni ngar weliyew. Faanra faen be pi’ e fonow e goo yimanang ni ir be’ ni ma dag e t’ufeg mab sumunguy, ma aram e ra mom ngak yugu boch e girdi’ ni nge m’agan’rad ko fonow ni ke pi’.

¹² Nap’an ni yow be non, ma rayog ni nge folwok fare piilal rok fare tamilay’ ni be ulul ni nge bilbilig fare but’ ni nge munguy ni aram e nge yog ngak ni gubin e girdi’ ni yad ma oloboch ma bay yu ngiyal’ nib t’uf ni ngan fonownagrad. (Rom. 3:23) Ra fanay fare piilal e Bible ni nge tamilangnag ngak u fithik’ e sumunguy nge tayfan rogon ni be yan ni nge rin’ ban’en nib kireb. Nap’an nra nang fare walag ni ke oloboch, ma aram e ra weliy fare piilal ngak e n’en nib t’uf ni nge rin’ ya nge yag ni yal’uweg e oloboch rok ni bod ni be “yung e awoch nga fithik’ fare but’.” Tomur riy me yog fare piilal boch ban’en nib fel’ ni ke rin’ fare walag mar meybilgow u taabang ni bod ni be “rannag” fare awoch.​—Jas. 5:15.

13. Uw rogon nrayog ni nge nang e piin piilal nriyul’ ni ke tamilang u wan’ facha’ e fonow ni kan pi’ ngak?

¹³ Bay yu ngiyal’ nib thil e n’en be yog faen be pi’ e fonow ko n’en be rung’ag faen yibe fonownag. Mang e rayog ni nge rin’ e piin piilal ya nge dabi buch e re n’ey? Rayog ni ngar fithed boch e deer u fithik’ e tayfan ya nge yag ni nang facha’ fan e n’en yibe yog ngak. (Ekl. 12:11) Fulweg nra pi’ e ra ayuweg e en be pi’ fare fonow ni nge nang nriyul’ ni ke tamilang u wan’ facha’ e fonow ni kan pi’ ngak.

NGAN PI’ E FONOW KO NGIYAL’ NGE ROGON NIB PULUW NI NGAN RIN’ RIY

14. Mang fan nsusun e dab da pied e fonow u nap’an ni kad damumuwgad?

¹⁴ Gad gubin ndawor da flontgad, ere rayog ni ngad rin’ed ara dogned boch ban’en nra kirebnag laniyan’ yugu boch e girdi’. (Kol. 3:13) Be yog e Thin rok Got ni bay yu ngiyal’ ni ku rayog ni ngad k’aringed e damumuw ngak be’. (Efe. 4:26) Machane thingar dab da pied e fonow u nap’an ni kad damumuwgad. Mang fan? Ya “damumuw rok e girdi’ e dar ma ayuweg e girdi’ nge yog nra ngongliyed e tin nib mat’aw ni ir e be finey Got.” (Jas. 1:20) Faan gad ra pi’ e fonow u nap’an ni gad ba damumuw, ma rayog ni ngad gelnaged e ubchiya’ ko fare magawon. Re n’ey e gathi be yip’ fan nsusun e dab da weliyed lanin’dad ngak e en ke k’aring e damumuw ngodad. Machane faan gad ra son nge m’ay e damumuw rodad, ma aram e rayog ni ngad weliyed lanin’dad nib fel’ rogon. Mu tay fanam i yan ko n’en nib manigil ni rin’ Elihu ni pi’ e fonow nib manigil ngak Job.

15. Mang e gad be fil ko n’en ni rin’ Elihu? (Kum guy e sasing.)

¹⁵ Boor e rran ni i motoyil Elihu ngak Job ni be guy rogon ni nge yal’uweg e pi n’en nde puluw ni i yog fapi cha’ ni ur dake yad e fager rok u murung’agen. I kireban’ ngak Job. Machane ki damumuw ngak ya i yog boch ban’en nde puluw u murung’agen Jehovah ma yigoo ir e be lemnag ir. Yugu aram rogon, me son nge taw ko ngiyal’ ni nge non ma aram me non u fithik’ e sumunguy nge tayfan u nap’an ni be fonownag Job. (Job 32:2; 33:​1-7) N’en ni rin’ Elihu e be fil ban’en nib ga’ fan ngodad: Rib fel’ ni ngan pi’ e fonow ko ngiyal’ nib puluw ni ngan rin’ riy, mu kun pi’ u fithik’ e tayfan nge t’ufeg.​—Ekl. 3:​1, 7.

MU ULUL NI NGAUM PI’ E FONOW MAKU BE M’AGAN’UM KO FONOW NI YIBE PI’ NGOM

16. Mang e kam fil ko Psalm 32:8?

¹⁶ Fare thin nu Bible ni fan ko re article ney e be tamilangnag nra i yaliydad Jehovah u nap’an ni be ‘yog ngodad e tin ni ngad rin’ed ma bayi fonownagdad.’ (Mu beeg e Psalm 32:8.) Re n’ey e be tamilangnag nra ulul ni nge ayuwegdad. Ere gathi kemus ni ma pi’ e fonow ngodad ya ku ma ayuwegdad ni ngad folgad riy. Ba manigil e kanawo’ ni ke dag nrayog ni ngad folwokgad riy! Nap’an nra t’uf ni ngad pied e fonow ngak yugu boch e girdi’, ma manga yugu da folwokgad rok Jehovah ni aram e ngad ululgad ni ngad pied e athamgil nga lanin’rad ma gad ayuwegrad ni ngar dugliyed boch ban’en nib fel’ rogon.

17. Nap’an nra pi’ e piin piilal e fonow nib puluw ko Bible, ma mang e rayog ni ngan taareb rogonnagrad ngay? Mu tamilangnag. (Isaiah 32:​1, 2)

¹⁷ Ireray e ngiyal’ nrib t’uf ni ngaud pied e fonow ma yibe pi’ e fonow nib manigil ngodad. (2 Tim. 3:1) Piin piilal ni yad ma pi’ e fonow nib puluw ko Bible e yad “bod e yu pa’ i lul’ ni bay u daken bangi ted nder tugul ban’en riy.” (Mu beeg e Isaiah 32:​1, 2.) Pi fager ni yad manang e n’en gad baadag ni ngad rung’aged, machane ma rogned e n’en nib t’uf ni ngad rung’aged e yad ma pi’ reb e tow’ath ngodad ni bod feni manigil e “gol ni kan ngongliy nib fel’ yaan kan ayliy nga daken e silber.” (Prov. 25:​11, BT) Manga yugu da ululgad i fil rogon ni ngad pied e fonow nib manigil mu kud motoyilgad ko fonow nib manigil ni kan pi’ ngodad.