I Ayuwegmow Jehovah ni Nggu Thilyegew Rarogomow ma Gamow Par ni Gamow Ba Felfelan’

I un Brother nge Sister Kassholm ko fare Skul u Gilead ko duw ni 1979, mu lan e pi duw ni ke yan ma kan pi’row ni ngar pigpiggow u Iran, ngu Mauritius, ngu Myanmar, ngu Tanzania, ngu Uganda, nge Zaire. Aram e gin nrung’agew ba fonow riy ni pi’ Jack Redford nreb e walag ni i un i pi’ e re skul nem ni ayuwegrow u nap’an ni yira pi’ reb e maruwel nib beech ngorow ni ban’en ni boor yay ni i buch. Mmotoyil ngar weliyew salperow.

Mu weliyew ngomad rogon nim piriegew e tin riyul’.

Mats: Nap’an e Bin L’agruw e Mahl ko Fayleng mi i par e chitamag u Poland, mi i guy e ngongol ni i rin’ e Teliw ni Katolik u fithik’ e sasalap. Yugu aram rogon, mab ga’ ni ma gaar, “Ba mudugil ni bay bang nrayog ni ngan pirieg e tin riyul’ riy!” Munmun mug nang nib puluw e n’en ni yog. Boor ken e babyor ni ug chuw’iy. Bay ba ken ni fithingan e Thin Nriyul’ Ni Ma Pow’iy I Yan Ko Yafas Ni Manemus. Ri mitan’ug nga fithingan e re ke babyor nem, mug beeg nge m’ay ko rofen nug chuw’iy. Faani bin migid e rran nga tomuren, mug nang ni kug pirieg e tin riyul’!

Ka nap’an e April ko duw ni 1972 nge yib i mada’ ko pi duw nga tomuren, ma boor ken e babyor ko Pi Mich Rok Jehovah ni ug beeg ma i pi’ e fulweg ko pi deer rog ni bay rogon ko pi n’en bay u Bible. Gu ra lemnag ma gu bod fare ta fol chuway’ ko fanathin rok Jesus nu tomuren ni pirieg ba churuwo’ nu l’ugun e yar nrib fel’, me yan i pi’ ni chuway’ urngin ban’en ni bay rok ya nge yag ni chuw’iy fare churuwo’. Gu tal nda kug nameg ni nggu un ko skul nib tolang ni nggu mang reb e togta ya nge yag ni nggu chuw’iy fare “churuwo’ nu l’ugun e yar” ni aram e tin riyul’ ni kug pirieg. (Matt. 13:​45, 46) Ere nap’an e December 10, 1972 mug un ko taufe.

De gaman reb e duw nga tomuren, me m’agan’ e gallabthir rog nge ba pagel ni walageg nib bitir ngog ko tin riyul’ mar uned ko taufe. Ma nap’an e July ko duw ni 1973 mug tabab ko pigpig u polo’ e tayim rog. Bay reb e walag nib pin ko ulung rog ni ir reb e pioneer nib pasig ma kki ilal ko tirok Got ban’en ni ka nog Ann-Catrin ngak. Rug adagew gamow ma gamow mabgol ko duw ni 1975, ma aningeg e duw nug parew u Strömsund nreb e binaw u Sweden nib fel’ yaan ma boor e girdi’ riy ni baadag e machib.

Ann-Catrin: Nap’an ni be un e chitamag nga reb e skul nib tolang u Stockholm, ma aram me fil e tin riyul’. Ngiyal’ nem e ka fini gaman dalip e pul yangareg, machane ma fekeg ko muulung nge machib. Dabun e chitinag e re n’ey, ma i guy rogon ni nge micheg nde riyul’ e n’en be machibnag e Pi Mich. Machane de yag rok miki munmun me un ko taufe. Nap’an ni gaman 13 e duw rog mug un ko taufe, ma nap’an ni gaman 16 e duw rog mug un ko pioneer. Tomuren nug pigpig u Umeå ko gin nib t’uf e ayuw ko pi tamachib riy, mug mang reb e special pioneer.

Tomuren nug mabgolgow Mats, ma bay in e girdi’ nug ayuwegew ni nge fil e tin riyul’. Bagayad e Maivor ni bochi pin ni kab fel’ yangaren ni tal ndaki un nga boch e gosgos mu ur pioneergow e bin baaram e ppin ni walageg nib bitir ngog u taabang. Nap’an e duw ni 1984 mar unew ko fare skul u Gilead, ma chiney e yow be pigpig u Ecuador ni yow l’agruw e missionary.

Mang e ayuwegmew ni ngam thilyegew boch ban’en u rarogomew mi gimew par ni gimew ba felfelan’ u nap’an ni kan pi’ boch e maruwel ni ngam rin’ew?

Mats: Boor yay ni u nog ngomow ni nggu chuwgow u bang nggu warow nga bang. Machane reb e ban’en ni ayuwegmow ni nggu mechamgow ko pi n’en ke thil u rarogon e par romow e aram e gubin ngiyal’ ni gamow ma guy rogon ni nggu folwokgow rok Jesus, nib ga’ nrogon ni i dag e sobut’an’. (Kol. 2:​6, 7) Reb riy e gamow ma guy rogon ni nggu nangew fan ni ma rin’ e pi walag boch ban’en u reb e kanawo’ ko bin nggu lemnagew ni ngar thilyeged rogon ni yad be rin’ boch ban’en ni nge m’ag ngomow. Gamow baadag ni nggu nangew rogon ni yad ma lem nge yalen rorad. Nap’an nug folwokgow rok Jesus, ma aram me mom ngomow ni nggu thilyegew boch ban’en u rarogomow ma gamow par ni gamow ba felfelan’ ko gin kan pi’mow ngay.​—Ps. 1:​2, 3.

Ann-Catrin: Nap’an nug warow gu parew nga bang nib beech, ma gamow bod ba ke gek’iy ni ka fin ni yung nib t’uf ni nga i mat e yal’ ngay ya nge ga’ ken. Gubin ngiyal’ ni i par Jehovah ni bod e “yal’” ngomow. (Ps. 84:​11, NW) Boor e walag ni pi’ ngomow ni gamow ba t’uf rorad. Bod ni pi walag ko ulung ni ug unew ngay u Tehran ni bay u Iran e ur golgad ngomow ni bod e n’en ni i rin’ e pi walag ni bay murung’agrad u Bible. Ri gamow baadag ni nggu parew u Iran, machane nap’an e July ko duw ni 1980 min taleg e maruwel ko Pi Mich Rok Jehovah u rom mi nog ngomow ni nggu chuwgow u rom u lan 48 e awa. Ere ni pi’mow nga Zaire (chiney e yima yog yu Congo ngay) ni bay u Africa.

Som’on nug nang ni ngan pi’mow nga Africa, ma aram mug yor. Rug rus ni bochan e pi n’en nug ma rung’ag u murung’agen e pi porchoyog nge m’ar ni bay u Africa. Machane bay l’agruw e fager romow nrib fel’ e thin romad ni ke n’uw nap’an ni kar pigpiggow u rom nra gaargow ngomow: “Dab mu rusgow. Ya dawor mu unew nga Africa, machane gamow manang ni gimew ra adag u rom.” Mab puluw e n’en nrognew! Pi walag u rom e yad ma dag e t’ufeg ma yad ba gol. Bin riyul’ riy e nap’an ni t’uf ni nggu chuwgow u Zaire nel’ e duw nga tomuren ni bochan e kan taleg e maruwel rodad u rom, mug siminmin ni bochan e kari thil e lem rog ma ngiyal’ nem e gu be meybil ngak Jehovah ni be lungug, “Wenig ngom, mu pagmow nggu parew u Africa.”

Mang boch ban’en ni ke yibnag e felfelan’ ngomew u lan e pi duw ni ke yan?

Mats: Bochan e maruwel ni ug rin’ew ma boor e fager ni ke yag ngomow ni yad boch e missionary ni kar bad u boor e nam nib thilthil. Ku bay yu yang ni un pi’mow ngay nib gel e felfelan’ ni ug tew riy ni bochan e boor e girdi’ ni ug filew e Bible ngorad, ma yu ngiyal’ e ra bagamow ma sogonap’an 20 e girdi’ ni be fil e Bible ngak! Ku da gur pagtalin e t’ufeg nge gol ni i dag e pi walag u Africa ngomow. Gamow ma mol u lan e karrow romow u nap’an ni gamow be lekag e pi ulung, ma ma pi’ e pi walag e tin nib t’uf romow ni yugu aram rogon nri yad ba gafgow. (2 Kor. 8:3) Reb e ban’en ni gamow ma rin’ nib ga’ fan u wan’mow e aram e ra blayal’ ma gamow ma weliy e n’en ke buch romow e rofen nem ma gamow pining e magar ngak Jehovah ni ke ayuwegmow.

Ann-Catrin: Reb e ban’en ni kari yibnag e felfelan’ ngog e aram e kug nang boch e walag u ga’ngin yang e fayleng. Kug filew boch e thin nib beech nib muun ngay e thin ni Farsi, nge French, nge Luganda, nge Swahili, ma kug filew boor e yalen nib thilthil. Kug ayuwegew boch e walag ni ka yad bbeech, ma kki yag boch e fager ngomow nib manigil, mu kug felfelan’gow ko pigpig ni ug ted ngak Jehovah u taabang.​—Zef. 3:9.

Ku boor ban’en nib thilthil ni ug guyew ni yira ngat ngay ko pi n’en nib fel’ yaan ni ke sunmiy Jehovah. Gubin yay nra m’agan’mow nga reb e maruwel nib beech, ma gowa bod ni gamow be milekag nga bang ni Jehovah e Be Pow’iymow. Ke fil boch ban’en ngomow ndabiyog ni nggu filew romow ni yigoo gamow.

Mang boch e magawon ni kam mada’nagew, ma uw rogon ni kam athamgilgow u fithik’?

Mats: Boor e m’ar ni ke yib ngomow u lan e pi duw ni ke yan nib muun ngay e malaria. Ku bay in yay nib t’uf ni ngan sey Ann-Catrin. Ki magafan’mow ko gallabthir romow ni kar pilibthirgow, machane gamow be pining e magar ko pi walagmow ni ur ayuweged yad. Ra ayuweged e gallabthir romad u fithik’ e gum’an’, nge felfelan’, nge t’ufeg. (1 Tim. 5:4) Yugu aram rogon maku ma kireban’mow ni bochan e gamow baadag ni nge yoor boch e ayuw ni nggu piew ngorad.

Ann-Catrin: Nap’an ni gamow be pigpig u Zaire ko duw ni 1983, me yib e m’ar ni cholera ngog. I gaar e togta ngak Mats, “Mu chuweg e cha’ney ko re nam ney ni ka daba’!” Faani bin migid e rran nga tomuren, ma gamow un u reb e skoki ni yima fek e chugum riy nggu warow nga Sweden.

Mats: Gu yorgow ni bochan e gu lemnagew ndabkiyog ni nggu ululgow ko pigpig ni gamow e missionary. Machane me gol Ann-Catrin ko m’ar rok ni yugu aram rogon ni ke yog e togta ndab ki gol. Ma reb e duw nga tomuren me yag ni nggu sulow nga Zaire ni nggu pigpiggow u reb e ulung nib achig u Lubumbashi ni yima non riy ni thin ni Swahili.

Ann-Catrin: Nap’an ni ug moyew u Lubumbashi, mug maraggil. Yugu aram rogon ndag lemnagew ni nggu fakayew e bitir, machane ri kireban’ug u nap’an ni yim’ fakmow. Yugu aram rogon me pi’ Jehovah reb e tow’ath ngomow ndag lemnagew. I yoor e piin nug filew e Bible ngorad ndariy ba ngiyal’ ni kug filew e Bible ko girdi’ ni aray urngin. De gaman reb e duw nga tomuren me yoor e publisher ko re ulung nem ya immoy ni 35 me gaman 70, miki yoor e girdi’ ni yad ma un ko muulung ya immoy ni 40 me gaman 220. Boor e tayim ni ug tew ni fan ko machib, mi ri fel’ lanin’ug ni bochan e tow’ath ni pi’ Jehovah ngomow. Yugu aram rogon mab ga’ ni gamow ma lemnag maku gamow ma weliy murung’agen e chi tir ni fakmow nem. Ri gamow be athapeg e ngiyal’ ni gamow ra guy rogon ni ke golnag Jehovah lanin’mow.

Mats: Bay ba ngiyal’ nri meewar Ann-Catrin. Me gag e cancer bang ko gil’iggan rog mab t’uf ni ngan seyeg. Machane chiney e ke fel’ rogog me Ann-Catrin e be rin’ urngin e tin nrayog rok.

Kug nangew ni gathi yigoo gamow e gamow be mada’nag e magawon. Tomuren fare cham nni tay u Rwanda ni boor e girdi’ ni yim’ riy ko duw ni 1994, mug warow guyew boor e walag ni yad ma par ko pi refugee camp. Gu nangew ni bay gelngin Jehovah ni nge ayuweg e girdi’ rok ni yugu demtrug e re miti magawon ni yad be mada’nag u nap’an nug guyew gelngin e michan’ ko pi walag nem, nge rogon e athamgil ni ur ted, nge gol ni ur daged ni yugu aram rogon nrib mo’maw’ e par rorad.​—Ps. 55:22.

Ann-Catrin: Ku bay reb e magawon nug mada’nagew u nap’an nug unew nga reb e muulung ni fan ko branch u Uganda ni ka fini m’ay i toy ko duw ni 2007. Tomuren e re muulung nem ma gamad milekag sogonap’an 25 e missionary nge walag ni yad ma pigpig u Bethel nga Nairobi ni bay u Kenya. U m’on ni nggu tawgad ko mathil u Kenya, me yib ba karrow nib ga’ i aw ko karrow ni gamad be yan riy. Ka chingiyal’ nem me yim’ e en be kol e yap’ ko karrow romad, nge lal e fager romow. Ku bay reb e walag nib pin ni yim’ u tomuren nni fek nga aspital. Ri gamow be athapeg ni ngguyew e pi fager romow nem bayay!​—Job 14:​13-15.

Munmun mug gol ko maad’ad nug tay. Machane gamow Mats nge in e girdi’ ni ug moyed ko fare karrow ni chafin e ma yib e magafan’ ngomad ni kaygi pag rogon u tomuren ni buch e re n’ey. Gag e ra nep’ ma gu ma yan gu od ni gowa bod ni nge yib e heart attack ngog. Rug ma rus ko re n’ey. Machane meybil ni gamow ma tay ngak Jehovah nge boch e thin nu Bible ni gamow baadag ni gamow ma beeg mug lemnagew murung’agen e ayuwegmow ni nge gapas lanin’mow. Kug warow gguyew e togta ni nge ayuwegmow ma re n’ey e yib angin. Chiney e ke war boch e re m’ar ney romow, ma gamow ma wenig ngak Jehovah ni nge ayuwegmow ni nggu fal’egew laniyan’ e piin ku bay e biney e m’ar rorad.

Nap’an ni gimew be weliy rogon nim athamgilgow u fithik’ e magawon nib mo’maw’ ni um mada’nagew, mi gimew yog ni be fekmew Jehovah ni “bod pi fak e nimen ni kab k’akling.” Mang e be yip’ fan e re n’ey?

Mats: Re thin ney e yib u ba thin ni Swahili ni be gaar, “Yibe fekmow ni bod pi fak e nimen ni kab k’akling.” Gubin e maruwel nni pi’ ngomow ni i ayuwegmow Jehovah riy u fithik’ e t’ufeg ni bod be’ ni be fek pi fak e nimen ni kab k’akling ni be kol ayuw ngay ndabi pil. Gubin ngiyal’ ni bay e tin nib t’uf romow ni yu ngiyal’ e ka boor ko tin nib t’uf romow. Reb e kanawo’ ni kug guyew riy rogon ni gamow ba t’uf rok Jehovah ma be ayuwegmow e rogon ni i dag fare Ulung ni Ma Pow’iyey ngomow ni yad manang rogon lanin’mow.

Ann-Catrin: Gu baadag ni nggu weliy reb e kanawo’ ni ayuwegmow Jehovah riy u fithik’ e t’ufeg. Immoy reb e rran nni callnageg nga nog ngog ni bay e chitamag u aspital u Sweden ni ke m’ar nib ubchiya’. Ka fini gol Mats ko m’ar ni malaria ni ke yib ngak ma dariy e salpiy romow ni nggu piew puluwmow u skoki ni nggu warow nga tafemow. Ere gu dugliyew ni nggu piew e karrow romow ni chuway’. Tomuren ma l’agruw yay nni callnagmow. Bayay e ba wu’ i mabgol ni yow be yog ni kar rung’agew e n’en ke buch romow ma yow baadag ni ngar piew puluwon taa bagamow. Ma bayay e ba walag nib pin ni ke pilibthir ni ke tay boch e salpiy nga lan ba kahol ni ke yoloy ba thin nga daken ni “Fan ngak be’ ni ke t’uf e ayuw rok.” I ayuwegmow Jehovah u lan in e minit!​—Heb. 13:6.

Gimew ra lemnag rogon e pigpig ni kam tew u polo’ e tayim romew ni ke gaman 50 e duw ni ke yan, ma mang e kam filew riy?

Ann-Catrin: Kug nang ni ma yib gelngidad ni faanra da ‘pagedan’dad ma gad par ndakir wagageyan’dad.’ Nap’an nra pagan’dad ngak Jehovah, ma aram e ra cham ni fan ngodad. (Isa. 30:15; 2 Kron. 20:​15, 17) Bochan ni ug rin’ew urngin e maruwel nni pi’ ngomow u rogon nrayog romow ni fan ko pigpig romow ngak Jehovah, ma boor e tow’ath ni ke yag ngomow ko tow’ath nra yag ngomow ni faanra gamow be rin’ yugu ban’en.

Mats: Reb e ban’en nib ga’ fan ni kug fil e aram e nggu taga’ ngak Jehovah u gubin ban’en ni be buch rog mug guy rogon nra ayuwegeg. (Ps. 37:5) Ma gubin ngiyal’ ni ke ayuwegeg ni bod rogon ni ke micheg. Ka gamow be guy rogon ni be ayuwegmow Jehovah e ngiyal’ ney ni gamow be pigpig u Bethel u Myanmar.

Gamow be athapeg ni piin fel’ yangaren ni yad baadag ni ngar yoornaged e tin yad be rin’ ni fan ko pigpig rorad ngak Jehovah e ku ra t’ufegrad u fithik’ e yul’yul’ ni bod rogon ni ke rin’ ngomow. Ba pagan’mow ngay ndemtrug e gin yira pi’rad ngay ni ngar pigpiggad riy, ma ra ayuwegrad Jehovah ni ngar thilyeged rarogorad mi yad par ni yad ba felfelan’.