HÁGÁÌ

1 Ní ọdún kejì tí Ọba Dáríúsì ń ṣàkóso, ní oṣù kẹfà, ní ọjọ́ kìíní oṣù náà, Jèhófà rán wòlíì Hágáì*+ pé kó sọ fún Serubábélì+ ọmọ Ṣéálítíẹ́lì, gómìnà Júdà àti Jóṣúà ọmọ Jèhósádákì, àlùfáà àgbà pé:

2 “Ohun tí Jèhófà Ọlọ́run àwọn ọmọ ogun sọ nìyí, ‘Àwọn èèyàn yìí sọ pé: “Kò tíì tó àkókò láti kọ́ ilé* Jèhófà.”’”*+

3 Jèhófà tún rán wòlíì Hágáì+ pé: 4 “Ṣé àsìkò yìí ló yẹ kí ẹ máa gbé inú àwọn ilé yín tí ẹ fi pákó ṣe lọ́ṣọ̀ọ́, nígbà tí ilé yìí ti di àwókù?+ 5 Ní báyìí, ohun tí Jèhófà Ọlọ́run àwọn ọmọ ogun sọ nìyí, ‘Ẹ kíyè sí* àwọn ohun tí ẹ̀ ń ṣe. 6 Ẹ ti fún irúgbìn tó pọ̀, àmọ́ irè oko díẹ̀ ni ẹ kó.+ Ẹ̀ ń jẹun, àmọ́ ẹ ò yó. Ẹ̀ ń mu, àmọ́ kò tẹ́ yín lọ́rùn. Ẹ̀ ń wọṣọ, àmọ́ ara ẹnì kankan yín ò móoru. Inú ajádìí àpò ni ẹni tí wọ́n gbà síṣẹ́ ń kó owó iṣẹ́ rẹ̀ sí.’”

7 “Ohun tí Jèhófà Ọlọ́run àwọn ọmọ ogun sọ nìyí, ‘Ẹ kíyè sí* àwọn ohun tí ẹ̀ ń ṣe.’

8 “‘Ẹ gun orí òkè lọ, kí ẹ sì gbé igi gẹdú wá.+ Kí ẹ sì kọ́ ilé náà,+ kí inú mi lè dùn sí i, kí a sì lè yìn mí lógo,’+ ni Jèhófà wí.”

9 “‘Ohun tó pọ̀ ni ẹ̀ ń retí, àmọ́ díẹ̀ ni ẹ̀ ń rí gbà; nígbà tí ẹ sì mú un wá sínú ilé, mo fẹ́ ẹ dà nù.+ Kí nìdí?’ ni Jèhófà Ọlọ́run àwọn ọmọ ogun wí. ‘Torí ilé mi ti di àwókù, kálukú yín sì ń sá kiri kó lè bójú tó ilé tirẹ̀.+ 10 Torí náà, ọ̀run ò sẹ ìrì, ilẹ̀ ò sì mú èso jáde. 11 Mo sì mú kí ọ̀dá wà lórí ayé, lórí àwọn òkè, lórí ọkà, lórí wáìnì tuntun, lórí òróró, lórí ohun tó ń hù lórí ilẹ̀, lórí èèyàn àti ẹran ọ̀sìn àti gbogbo iṣẹ́ ọwọ́ yín.’”

12 Serubábélì+ ọmọ Ṣéálítíẹ́lì+ àti Jóṣúà ọmọ Jèhósádákì,+ àlùfáà àgbà àti gbogbo àwọn tó ṣẹ́ kù nínú àwọn èèyàn náà fetí sí ohùn Jèhófà Ọlọ́run wọn àti sí ọ̀rọ̀ wòlíì Hágáì, torí Jèhófà Ọlọ́run wọn ló rán an; àwọn èèyàn náà sì bẹ̀rẹ̀ sí í bẹ̀rù Jèhófà.

13 Hágáì ìránṣẹ́ Jèhófà wá jíṣẹ́ fún àwọn èèyàn bí Jèhófà ṣe rán an pé: “‘Mo wà pẹ̀lú yín,’+ ni Jèhófà wí.”

14 Torí náà, Jèhófà ru ẹ̀mí+ Serubábélì ọmọ Ṣéálítíẹ́lì, gómìnà Júdà+ sókè, ó tún ru ẹ̀mí Jóṣúà+ ọmọ Jèhósádákì, àlùfáà àgbà sókè àti ẹ̀mí gbogbo àwọn tó ṣẹ́ kù nínú àwọn èèyàn náà; wọ́n wá, wọ́n sì bẹ̀rẹ̀ sí í ṣe àtúnkọ́ ilé Jèhófà Ọlọ́run àwọn ọmọ ogun tó jẹ́ Ọlọ́run wọn.+ 15 Èyí jẹ́ ní ọjọ́ kẹrìnlélógún oṣù kẹfà ní ọdún kejì tí Ọba Dáríúsì ń ṣàkóso.+

2 Ní ọjọ́ kọkànlélógún, oṣù keje, Jèhófà rán wòlíì Hágáì+ níṣẹ́ pé: 2 “Jọ̀ọ́, bi Serubábélì+ ọmọ Ṣéálítíẹ́lì, gómìnà Júdà+ àti Jóṣúà+ ọmọ Jèhósádákì,+ àlùfáà àgbà àti àwọn tó ṣẹ́ kù nínú àwọn èèyàn náà pé: 3 ‘Ta ló ṣẹ́ kù nínú yín tó rí ilé* yìí nígbà tó ṣì rẹwà?+ Báwo ló ṣe rí lójú yín báyìí? Tí ẹ bá fi wé ti tẹ́lẹ̀, ǹjẹ́ ó ṣì já mọ́ nǹkan kan?’+

4 “‘Àmọ́ ní báyìí, ìwọ Serubábélì, jẹ́ onígboyà. Kí ìwọ Jóṣúà ọmọ Jèhósádákì, àlùfáà àgbà pẹ̀lú sì jẹ́ onígboyà,’ ni Jèhófà wí.

“‘Kí gbogbo ẹ̀yin èèyàn ilẹ̀ náà pẹ̀lú jẹ́ onígboyà,+ kí ẹ sì ṣiṣẹ́’ ni Jèhófà wí.

“‘Torí mo wà pẹ̀lú yín,’+ ni Jèhófà Ọlọ́run àwọn ọmọ ogun wí. 5 ‘Ẹ rántí ìlérí tí mo ṣe fún yín nígbà tí ẹ kúrò ní Íjíbítì,+ tí ẹ̀mí mi wà láàárín yín.*+ Ẹ má bẹ̀rù.’”+

6 “Torí ohun tí Jèhófà Ọlọ́run àwọn ọmọ ogun sọ nìyí, ‘Lẹ́ẹ̀kan sí i, màá mi ọ̀run, ayé, òkun àti ilẹ̀ gbígbẹ jìgìjìgì;+ kò ní pẹ́ mọ́.’

7 “‘Èmi yóò mi gbogbo orílẹ̀-èdè jìgìjìgì, àwọn ohun iyebíye* nínú gbogbo orílẹ̀-èdè yóò sì wọlé wá;+ èmi yóò sì fi ògo kún ilé yìí,’+ ni Jèhófà Ọlọ́run àwọn ọmọ ogun wí.

8 “‘Tèmi ni fàdákà, tèmi sì ni wúrà,’ ni Jèhófà Ọlọ́run àwọn ọmọ ogun wí.

9 “‘Ògo tí ilé yìí máa ní yóò ju ti tẹ́lẹ̀ lọ,’+ ni Jèhófà Ọlọ́run àwọn ọmọ ogun wí.

“‘Èmi yóò sì fún yín ní àlàáfíà ní ibí yìí,’+ ni Jèhófà Ọlọ́run àwọn ọmọ ogun wí.”

10 Ní ọjọ́ kẹrìnlélógún, oṣù kẹsàn-án, ọdún kejì ìjọba Dáríúsì, Jèhófà sọ fún wòlíì Hágáì+ pé: 11 “Ohun tí Jèhófà Ọlọ́run àwọn ọmọ ogun sọ nìyí, ‘Jọ̀ọ́, bi àwọn àlùfáà nípa òfin,+ pé: 12 “Tí èèyàn bá gbé ẹran mímọ́ sí etí aṣọ rẹ̀, tí aṣọ rẹ̀ sì kan búrẹ́dì tàbí ọbẹ̀ tàbí wáìnì tàbí òróró tàbí oúnjẹ èyíkéyìí, ṣé ó máa di mímọ́?”’”

Àwọn àlùfáà fèsì pé: “Rárá!”

13 Hágáì wá béèrè pé: “Tí ẹnì kan tó ti di aláìmọ́ torí pé ó fara kan òkú* bá fọwọ́ kan èyíkéyìí nínú nǹkan wọ̀nyí, ṣé ó máa di aláìmọ́?”+

Àwọn àlùfáà fèsì pé: “Ó máa di aláìmọ́.”

14 Hágáì wá sọ pé: “‘Bí àwọn èèyàn yìí ṣe rí nìyẹn, bí orílẹ̀-èdè yìí sì ṣe rí níwájú mi nìyẹn,’ ni Jèhófà wí, ‘bẹ́ẹ̀ náà ni gbogbo iṣẹ́ ọwọ́ wọn rí; ohunkóhun tí wọ́n bá mú wá síbẹ̀ jẹ́ aláìmọ́.’

15 “‘Àmọ́ ní báyìí, ẹ jọ̀ọ́, ẹ kíyè sí* èyí láti òní lọ: Kí wọ́n tó gbé òkúta kan lé òmíràn ní tẹ́ńpìlì Jèhófà,+ 16 báwo ni nǹkan ṣe rí nígbà yẹn? Tí ẹnì kan bá wá síbi tí wọ́n ń kó ọkà jọ sí, tó ń retí ogún (20) òṣùwọ̀n, mẹ́wàá péré ló máa rí; tí ẹnì kan bá sì wá láti bu àádọ́ta (50) òṣùwọ̀n nínú ọpọ́n wáìnì, ogún (20) péré ló máa rí;+ 17 mo fi ooru tó ń jó nǹkan gbẹ àti èbíbu+ àti yìnyín kọ lù yín, àní gbogbo iṣẹ́ ọwọ́ yín, àmọ́ ẹnì kankan lára yín ò pa dà sọ́dọ̀ mi,’ ni Jèhófà wí.

18 “‘Ẹ jọ̀ọ́, ẹ kíyè sí* èyí láti òní lọ, láti ọjọ́ kẹrìnlélógún oṣù kẹsàn-án, láti ọjọ́ tí wọ́n ti fi ìpìlẹ̀ tẹ́ńpìlì Jèhófà lélẹ̀;+ ẹ kíyè sí ọ̀rọ̀ yìí: 19 Ṣé irúgbìn ṣì wà nínú ilé ìkẹ́rùsí?*+ Àjàrà, igi ọ̀pọ̀tọ́, pómégíránétì àti ólífì kò tíì so, àbí wọ́n ti so? Láti òní lọ, èmi yóò bù kún yín.’”+

20 Jèhófà tún bá Hágáì sọ̀rọ̀ lẹ́ẹ̀kejì ní ọjọ́ kẹrìnlélógún oṣù náà,+ ó ní: 21 “Sọ fún Serubábélì, gómìnà Júdà pé, ‘Èmi yóò mi ọ̀run àti ayé jìgìjìgì.+ 22 Èmi yóò bi ìtẹ́ àwọn ìjọba ṣubú, èmi yóò sì gba agbára lọ́wọ́ ìjọba àwọn orílẹ̀-èdè;+ èmi yóò bi kẹ̀kẹ́ ẹṣin àti àwọn tó gùn ún ṣubú, àwọn ẹṣin àti àwọn tó gùn wọ́n yóò sì ṣubú, kálukú wọn yóò sì fi idà pa arákùnrin rẹ̀.’”+

23 “‘Ní ọjọ́ yẹn,’ ni Jèhófà Ọlọ́run àwọn ọmọ ogun wí, ‘èmi yóò mú ìwọ ìránṣẹ́ mi, Serubábélì+ ọmọ Ṣéálítíẹ́lì,’+ ni Jèhófà wí, ‘èmi yóò sì ṣe ọ́ bí òrùka èdìdì, torí ìwọ ni ẹni tí mo yàn,’ ni Jèhófà Ọlọ́run àwọn ọmọ ogun wí.”