ÌWÉ KÌÍNÍ SÍ ÀWỌN ARÁ TẸSALÓNÍKÀ

1 Pọ́ọ̀lù, Sílífánù*+ àti Tímótì,+ sí ìjọ àwọn ará Tẹsalóníkà tó wà ní ìṣọ̀kan pẹ̀lú Ọlọ́run tó jẹ́ Baba àti Jésù Kristi Olúwa:

Kí inú rere àìlẹ́tọ̀ọ́sí àti àlàáfíà wà pẹ̀lú yín.

2 Ìgbà gbogbo là ń dúpẹ́ lọ́wọ́ Ọlọ́run tí a bá ń rántí gbogbo yín nínú àdúrà wa,+ 3 torí a ò lè ṣe ká má rántí iṣẹ́ tí ìgbàgbọ́ mú kí ẹ ṣe àti ìsapá onífẹ̀ẹ́ yín pẹ̀lú ìfaradà yín nítorí ìrètí tí ẹ ní+ nínú Olúwa wa Jésù Kristi níwájú Ọlọ́run àti Baba wa. 4 Ẹ̀yin ará tí Ọlọ́run nífẹ̀ẹ́, a mọ̀ pé òun ló yàn yín, 5 nítorí kì í ṣe nípasẹ̀ ọ̀rọ̀ nìkan ni ìhìn rere tí à ń wàásù fi dé ọ̀dọ̀ yín, ó tún wá nípasẹ̀ agbára, nípasẹ̀ ẹ̀mí mímọ́ àti nípasẹ̀ ìdánilójú tó lágbára, bí ẹ ṣe mọ irú ẹni tí a dà láàárín yín àti nítorí yín. 6 Ẹ sì ń fara wé àwa+ àti Olúwa,+ bí ẹ ṣe tẹ́wọ́ gba ọ̀rọ̀ náà lójú ọ̀pọ̀lọpọ̀ ìpọ́njú+ pẹ̀lú ayọ̀ ẹ̀mí mímọ́, 7 débi pé ẹ di àpẹẹrẹ fún gbogbo àwọn onígbàgbọ́ ní Makedóníà àti ní Ákáyà.

8 Òótọ́ ibẹ̀ ni pé, kì í ṣe pé ọ̀rọ̀ Jèhófà* ti dún jáde látọ̀dọ̀ yín ní Makedóníà àti Ákáyà nìkan ni, àmọ́ ìgbàgbọ́ yín nínú Ọlọ́run ti tàn káàkiri níbi gbogbo,+ débi pé a kò nílò láti sọ ohunkóhun. 9 Nítorí àwọn fúnra wọn ń ròyìn nípa bí a ṣe kọ́kọ́ dé ọ̀dọ̀ yín àti bí ẹ ṣe fi àwọn òrìṣà yín sílẹ̀,+ tí ẹ sì yíjú sọ́dọ̀ Ọlọ́run kí ẹ lè jẹ́ ẹrú Ọlọ́run tòótọ́ àti alààyè, 10 kí ẹ sì lè dúró de Ọmọ rẹ̀ láti ọ̀run,+ ẹni tó gbé dìde kúrò nínú ikú, ìyẹn Jésù tó gbà wá sílẹ̀ kúrò lọ́wọ́ ìrunú tó ń bọ̀.+

2 Ẹ̀yin ará, ẹ̀yin fúnra yín mọ̀ dájú pé ìbẹ̀wò tí a ṣe sọ́dọ̀ yín kò já sí asán.+ 2 Nítorí bó tilẹ̀ jẹ́ pé a ti kọ́kọ́ jìyà, tí wọ́n sì hùwà àfojúdi sí wa ní ìlú Fílípì,+ bí ẹ̀yin náà ṣe mọ̀, Ọlọ́run wa mú kí a mọ́kàn le* kí a lè sọ ìhìn rere Ọlọ́run+ fún yín lójú ọ̀pọ̀ àtakò.* 3 Nítorí ọ̀rọ̀ ìyànjú wa kò wá látinú ìṣìnà tàbí látinú ìwà àìmọ́ tàbí pẹ̀lú ẹ̀tàn, 4 àmọ́ gẹ́gẹ́ bí Ọlọ́run ṣe tẹ́wọ́ gbà wá pé kí ìhìn rere wà ní ìkáwọ́ wa, bẹ́ẹ̀ ni à ń sọ̀rọ̀, kì í ṣe torí ká lè wu èèyàn, àmọ́ torí ká lè wu Ọlọ́run, ẹni tó ń yẹ ọkàn wa wò.+

5 Kódà, ẹ mọ̀ pé kò sí ìgbà kankan tí a sọ ọ̀rọ̀ ìpọ́nni tàbí tí a ṣe ojú ayé nítorí ohun tí a fẹ́ rí gbà;*+ Ọlọ́run ni ẹlẹ́rìí! 6 Bẹ́ẹ̀ ni a kò máa wá ògo lọ́dọ̀ èèyàn, ì báà jẹ́ lọ́dọ̀ yín tàbí lọ́dọ̀ àwọn ẹlòmíì, bó tiẹ̀ jẹ́ pé gẹ́gẹ́ bí àpọ́sítélì Kristi, àwa fúnra wa lè sọ ara wa di ẹrù tó wúwo sí yín lọ́rùn.+ 7 Kàkà bẹ́ẹ̀, a di ẹni jẹ́jẹ́ láàárín yín, bí ìgbà tí abiyamọ ń tọ́jú* àwọn ọmọ rẹ̀. 8 Torí náà, bí a ṣe ní ìfẹ́ oníjẹ̀lẹ́ńkẹ́ sí yín, a ti pinnu* pé kì í ṣe ìhìn rere Ọlọ́run nìkan la máa fún yín, a tún máa fún yín ní ara* wa,+ torí ẹ ti di ẹni ọ̀wọ́n sí wa.+

9 Ẹ̀yin ará, ó dájú pé ẹ rántí òpò* àti làálàá wa. A ṣiṣẹ́ tọ̀sántòru ká má bàa di ẹrù wọ ìkankan nínú yín lọ́rùn,+ nígbà tí a wàásù ìhìn rere Ọlọ́run fún yín. 10 Ẹ̀yin ni ẹlẹ́rìí, Ọlọ́run náà sì jẹ́ ẹlẹ́rìí, bí a ṣe jẹ́ adúróṣinṣin àti olódodo àti aláìlẹ́bi sí ẹ̀yin onígbàgbọ́. 11 Ẹ mọ̀ dáadáa pé ṣe là ń gbà yín níyànjú, tí à ń tù yín nínú, tí a sì ń jẹ́rìí fún ẹnì kọ̀ọ̀kan yín,+ bí bàbá+ ṣe máa ń ṣe fún àwọn ọmọ rẹ̀, 12 kí ẹ lè máa rìn lọ́nà tó yẹ Ọlọ́run,+ ẹni tó ń pè yín sí Ìjọba+ àti ògo rẹ̀.+

13 Ní tòótọ́, ìdí nìyẹn tí àwa náà fi ń dúpẹ́ lọ́wọ́ Ọlọ́run nígbà gbogbo,+ torí nígbà tí ẹ gba ọ̀rọ̀ Ọlọ́run, èyí tí ẹ gbọ́ lọ́dọ̀ wa, ẹ tẹ́wọ́ gbà á, kì í ṣe bí ọ̀rọ̀ èèyàn, àmọ́ gẹ́gẹ́ bó ṣe jẹ́ lóòótọ́, bí ọ̀rọ̀ Ọlọ́run, èyí tó tún wà lẹ́nu iṣẹ́ nínú ẹ̀yin onígbàgbọ́. 14 Ẹ̀yin ará ń fara wé àwọn ìjọ Ọlọ́run tó wà ní ìṣọ̀kan pẹ̀lú Kristi Jésù ní Jùdíà, nítorí àwọn ará ìlú yín ń fìyà jẹ yín  + bí àwọn Júù ṣe ń fìyà jẹ àwọn náà, 15 kódà wọ́n pa Jésù Olúwa+ àti àwọn wòlíì, wọ́n sì ṣe inúnibíni sí wa.+ Bákan náà, wọn ò ṣe ohun tó wu Ọlọ́run, wọn ò sì ní ire àwọn èèyàn lọ́kàn, 16 bí wọ́n ṣe ń gbìyànjú láti dí wa lọ́wọ́ ká má lè bá àwọn èèyàn orílẹ̀-èdè sọ̀rọ̀, kí wọ́n sì rí ìgbàlà.+ Ọ̀nà yìí ni wọ́n gbà ń mú kí ẹ̀ṣẹ̀ wọn pọ̀ sí i. Àmọ́ ìrunú Ọlọ́run ti dé tán sórí wọn.+

17 Ẹ̀yin ará, nígbà tí wọ́n yà wá kúrò lọ́dọ̀ yín* fún àkókò kúkúrú (nínú ara, tí kì í ṣe nínú ọkàn wa), àárò yín tó ń sọ wá gan-an mú ká sa gbogbo ipá wa láti rí yín lójúkojú.* 18 Torí náà, a fẹ́ wá sọ́dọ̀ yín, bẹ́ẹ̀ ni, èmi Pọ́ọ̀lù, gbìyànjú láti wá, kódà kì í ṣe ẹ̀ẹ̀kan, ẹ̀ẹ̀mejì ni; àmọ́ Sátánì dí wa lọ́nà. 19 Nítorí kí ni ìrètí tàbí ìdùnnú tàbí adé ayọ̀ wa níwájú Jésù Olúwa wa nígbà tó bá wà níhìn-ín? Ní tòótọ́, ṣé kì í ṣe ẹ̀yin ni?+ 20 Dájúdájú, ẹ̀yin ni ògo àti ìdùnnú wa.

3 Torí náà, nígbà tí a ò lè mú un mọ́ra mọ́, a rí i pé á dára kí àwa nìkan dúró sí Áténì;+ 2 a sì rán Tímótì,+ arákùnrin wa àti òjíṣẹ́* Ọlọ́run nínú ìhìn rere nípa Kristi, kí ó lè mú kí ẹ fìdí múlẹ̀,* kí ó sì tù yín nínú nítorí ìgbàgbọ́ yín, 3 kí àwọn ìpọ́njú yìí má bàa mú ẹnì kankan yẹsẹ̀.* Nítorí ẹ̀yin fúnra yín mọ̀ pé kò sí bí a ò ṣe ní jìyà irú àwọn nǹkan yìí.*+ 4 Nígbà tí a wà lọ́dọ̀ yín, a máa ń sọ fún yín pé a máa ní ìpọ́njú, ohun tó sì ṣẹlẹ̀ nìyẹn, bí ẹ̀yin náà ṣe mọ̀.+ 5 Ìdí nìyẹn tó fi jẹ́ pé nígbà tí mi ò lè mú un mọ́ra mọ́, mo ránṣẹ́ kí n lè mọ̀ nípa ìdúróṣinṣin yín,+ pé bóyá lọ́nà kan, Adánniwò+ lè ti dán yín wò, kí làálàá wa sì ti já sí asán.

6 Àmọ́ Tímótì ṣẹ̀ṣẹ̀ dé ọ̀dọ̀ wa látọ̀dọ̀ yín ni,+ ó sì ti fún wa ní ìròyìn ayọ̀ nípa ìdúróṣinṣin yín àti ìfẹ́ yín, pé ìgbà gbogbo ni inú yín máa ń dùn tí ẹ bá rántí wa, àárò wa sì ń sọ yín bí tiyín ṣe ń sọ àwa náà. 7 Ẹ̀yin ará, ìdí nìyẹn tó fi jẹ́ pé nínú gbogbo wàhálà* wa àti ìpọ́njú wa, a ti rí ìtùnú gbà nítorí yín àti nítorí ìdúróṣinṣin tí ẹ ní.+ 8 Torí pé à ń mú wa sọ jí,* tí ẹ bá dúró ṣinṣin nínú Olúwa. 9 Báwo ni ká ṣe dúpẹ́ lọ́wọ́ Ọlọ́run nítorí yín lórí ayọ̀ púpọ̀ tí ẹ̀ ń mú ká ní níwájú Ọlọ́run wa? 10 Tọ̀sántòru là ń rawọ́ ẹ̀bẹ̀ taratara ká lè fojú kàn yín,* ká sì fún yín ní àwọn ohun tí á mú kí ìgbàgbọ́ yín lágbára.+

11 Tóò, kí Ọlọ́run àti Baba wa fúnra rẹ̀ àti Jésù Olúwa wa ṣí ọ̀nà sílẹ̀ fún wa láti wá sọ́dọ̀ yín. 12 Yàtọ̀ síyẹn, kí Olúwa mú kí ẹ pọ̀ sí i, bẹ́ẹ̀ ni, kí ó mú kí ẹ pọ̀ gidigidi nínú ìfẹ́ sí ara yín lẹ́nì kọ̀ọ̀kan+ àti sí gbogbo èèyàn, bí àwa náà ṣe nífẹ̀ẹ́ yín, 13 kí ó lè mú kí ọkàn yín fìdí múlẹ̀, kí ó jẹ́ aláìlẹ́bi nínú jíjẹ́ mímọ́ níwájú Ọlọ́run+ àti Baba wa nígbà tí Jésù Olúwa wa+ bá wà níhìn-ín pẹ̀lú gbogbo àwọn ẹni mímọ́ rẹ̀.

4 Lákòótán, ẹ̀yin ará, bí ẹ ṣe gba ìtọ́ni lọ́dọ̀ wa nípa bó ṣe yẹ kí ẹ máa rìn kí ẹ lè ṣe ohun tí Ọlọ́run fẹ́,+ tí ẹ sì ń ṣe bẹ́ẹ̀ lóòótọ́, a fi Jésù Olúwa bẹ̀ yín, a sì tún fi rọ̀ yín pé kí ẹ túbọ̀ máa ṣe bẹ́ẹ̀ ní ẹ̀kúnrẹ́rẹ́. 2 Nítorí ẹ mọ àwọn ìtọ́ni* tí a fún yín nípasẹ̀ Jésù Olúwa.

3 Ohun tí ìfẹ́ Ọlọ́run jẹ́ nìyí, pé kí ẹ jẹ́ mímọ́,+ kí ẹ sì ta kété sí ìṣekúṣe.*+ 4 Kí ẹnì kọ̀ọ̀kan yín mọ bó ṣe máa kó ara* rẹ̀ níjàánu+ nínú jíjẹ́ mímọ́  + àti nínú iyì, 5 kì í ṣe nínú ojúkòkòrò ìbálòpọ̀ tí kò níjàánu+ bíi ti àwọn orílẹ̀-èdè tí kò mọ Ọlọ́run.+ 6 Kí ẹnikẹ́ni má kọjá ààlà tó yẹ, kó má sì yan arákùnrin rẹ̀ jẹ nínú ọ̀ràn yìí, torí Jèhófà* ń fìyà jẹni nítorí gbogbo àwọn nǹkan yìí, bí a ṣe sọ fún yín ṣáájú, tí a sì tún kìlọ̀ fún yín gidigidi. 7 Nítorí Ọlọ́run pè wá fún jíjẹ́ mímọ́, kì í ṣe fún ìwà àìmọ́.+ 8 Torí náà, ẹni tí kò bá ka èyí sí, kì í ṣe èèyàn ni kò kà sí, Ọlọ́run+ tó ń fún yín ní ẹ̀mí mímọ́ rẹ̀+ ni kò kà sí.

9 Àmọ́, ní ti ìfẹ́ ará,+ ẹ kò nílò ká kọ̀wé sí yín, nítorí Ọlọ́run ti kọ́ yín láti máa nífẹ̀ẹ́ ara yín.+ 10 Kódà, ẹ̀ ń ṣe bẹ́ẹ̀ sí gbogbo àwọn ará ní gbogbo Makedóníà. Àmọ́, ẹ̀yin ará, a rọ̀ yín pé kí ẹ máa ṣe jù bẹ́ẹ̀ lọ. 11 Ẹ fi ṣe àfojúsùn yín láti máa ṣe jẹ́ẹ́jẹ́ẹ́,+ ẹ má yọjú sí ọ̀rọ̀ ọlọ́rọ̀,+ kí ẹ máa fi ọwọ́ yín ṣiṣẹ́,+ bí a ṣe sọ fún yín, 12 kí ẹ lè máa rìn lọ́nà tó bójú mu lójú àwọn tó wà níta,+ kí ẹ má sì ṣe aláìní ohunkóhun.

13 Yàtọ̀ síyẹn, ẹ̀yin ará, a fẹ́ kí ẹ mọ̀* nípa àwọn tó ń sùn nínú ikú,+ kí ẹ má bàa banú jẹ́ bí àwọn tí kò ní ìrètí ṣe máa ń ṣe.+ 14 Nítorí tí a bá nígbàgbọ́ pé Jésù kú, ó sì jí dìde,+ lọ́nà kan náà, Ọlọ́run yóò mú àwọn tó ti sùn nínú ikú nítorí Jésù wá sí ìyè pẹ̀lú rẹ̀.+ 15 Nítorí ohun tí a sọ fún yín nípasẹ̀ ọ̀rọ̀ Jèhófà* nìyí, pé àwa alààyè tí a bá kù nílẹ̀ di ìgbà tí Olúwa bá wà níhìn-ín kò ní ṣáájú àwọn tó ti sùn nínú ikú lọ́nàkọnà; 16 nítorí Olúwa fúnra rẹ̀ yóò sọ̀ kalẹ̀ láti ọ̀run pẹ̀lú ìpè àṣẹ, pẹ̀lú ohùn olú áńgẹ́lì+ àti pẹ̀lú kàkàkí Ọlọ́run, àwọn tó ti kú nínú Kristi ló sì máa kọ́kọ́ dìde.+ 17 Lẹ́yìn náà, àwa alààyè tí a kù nílẹ̀ ni a ó gbà lọ pẹ̀lú wọn nínú àwọsánmà+ láti pàdé Olúwa+ nínú afẹ́fẹ́; a ó sì tipa báyìí máa wà pẹ̀lú Olúwa nígbà gbogbo.+ 18 Nítorí náà, ẹ máa fi àwọn ọ̀rọ̀ yìí tu ara yín nínú.

5 Ẹ̀yin ará, ní ti àwọn ìgbà àti àwọn àsìkò, ẹ ò nílò kí a kọ nǹkan kan ránṣẹ́ sí yín. 2 Nítorí ẹ̀yin fúnra yín mọ̀ dáadáa pé ọjọ́ Jèhófà*+ ń bọ̀ bí olè ní òru.+ 3 Nígbàkigbà tí wọ́n bá ń sọ pé, “Àlàáfíà àti ààbò!” ìgbà náà ni ìparun òjijì yóò dé lọ́gán sórí wọn,+ bí ìgbà tí obìnrin tó lóyún bá bẹ̀rẹ̀ sí í rọbí, wọn ò sì ní yè bọ́ lọ́nàkọnà. 4 Àmọ́, ẹ̀yin ará, ẹ ò sí nínú òkùnkùn, tí ọjọ́ yẹn á fi dé bá yín lójijì bí ìgbà tí ilẹ̀ mọ́ bá olè, 5 nítorí gbogbo yín jẹ́ ọmọ ìmọ́lẹ̀ àti ọmọ ọ̀sán.+ Àwa kì í ṣe ti òru tàbí ti òkùnkùn.+

6 Torí náà, ẹ má ṣe jẹ́ kí a máa sùn bí àwọn yòókù ti ń ṣe,+ àmọ́ ẹ jẹ́ kí a wà lójúfò,+ kí a sì máa ronú bó ṣe tọ́.+ 7 Nítorí àwọn tó ń sùn máa ń sùn ní òru, àwọn tó sì ń mutí yó máa ń mutí yó ní òru.+ 8 Àmọ́ ní ti àwa tí a jẹ́ ti ọ̀sán, ẹ jẹ́ kí a máa ronú bó ṣe tọ́, kí a gbé àwo ìgbàyà ìgbàgbọ́ àti ìfẹ́ wọ̀, kí a sì dé ìrètí ìgbàlà bí akoto*+ 9 nítorí Ọlọ́run kò yàn wá fún ìrunú, bí kò ṣe láti rí ìgbàlà+ nípasẹ̀ Jésù Kristi Olúwa wa. 10 Ó kú fún wa,+ kó lè jẹ́ pé, bóyá a sùn* tàbí a ò sùn, a máa lè wà láàyè pẹ̀lú rẹ̀.+ 11 Nítorí náà, ẹ máa fún ara yín níṣìírí,* kí ẹ sì máa gbé ara yín ró,+ bí ẹ ti ń ṣe ní tòótọ́.

12 Ní báyìí, ẹ̀yin ará, a fẹ́ kí ẹ máa bọ̀wọ̀ fún àwọn tó ń ṣiṣẹ́ kára láàárín yín, tí wọ́n ń ṣe àbójútó yín nínú Olúwa, tí wọ́n sì ń gbà yín níyànjú; 13 ẹ máa kà wọ́n sí lọ́nà àrà ọ̀tọ̀ nínú ìfẹ́ nítorí iṣẹ́ wọn.+ Ẹ wà ní àlàáfíà pẹ̀lú ara yín.+ 14 Lẹ́sẹ̀ kan náà, ẹ̀yin ará, à ń rọ̀ yín pé kí ẹ máa kìlọ̀ fún àwọn tó ń ṣe ségesège,*+ ẹ máa sọ̀rọ̀ ìtùnú fún àwọn tó sorí kọ́,* ẹ máa ran àwọn aláìlera lọ́wọ́, ẹ máa mú sùúrù fún gbogbo èèyàn.+ 15 Ẹ rí i pé ẹnikẹ́ni ò fi búburú san búburú fún ẹnì kankan,+ kí ẹ sì máa fìgbà gbogbo wá ohun rere fún ara yín àti fún gbogbo àwọn míì.+

16 Ẹ máa yọ̀ nígbà gbogbo.+ 17 Ẹ máa gbàdúrà nígbà gbogbo.+ 18 Ẹ máa dúpẹ́ ohun gbogbo.+ Ohun tí Ọlọ́run fẹ́ fún yín nìyí nínú Kristi Jésù. 19 Ẹ má ṣe pa iná ẹ̀mí.+ 20 Ẹ má ṣe kó àwọn ọ̀rọ̀ àsọtẹ́lẹ̀ dà nù.+ 21 Ẹ máa wádìí ohun gbogbo dájú;+ ẹ di èyí tó dára mú ṣinṣin. 22 Ẹ yẹra fún gbogbo ìwà burúkú.+

23 Kí Ọlọ́run àlàáfíà fúnra rẹ̀ sọ yín di mímọ́ pátápátá. Kí ẹ̀mí àti ọkàn* àti ara ẹ̀yin ará, tó dára ní gbogbo ọ̀nà, jẹ́ aláìlẹ́bi nígbà tí Olúwa wa Jésù Kristi bá wà níhìn-ín.+ 24 Ẹni tó ń pè yín jẹ́ olóòótọ́, ó sì dájú pé ó máa ṣe bẹ́ẹ̀.

25 Ẹ̀yin ará, ẹ máa gbàdúrà fún wa.+

26 Ẹ fi ìfẹnukonu mímọ́ kí gbogbo àwọn ará.

27 Mò ń fi dandan lé e fún yín ní orúkọ Olúwa pé kí ẹ ka lẹ́tà yìí fún gbogbo àwọn ará.+

28 Kí inú rere àìlẹ́tọ̀ọ́sí Olúwa wa Jésù Kristi wà pẹ̀lú yín.