Buku Yimmuadi yi Samueli
1 Bo Sauli kafua, ayi bo Davidi kafumina mu mvita wo kaye nuana na basi Amaleki, nandi wuviokisa bilumbu biodi ku Ziklague. 2 Mu kilumbu kintatu, vayiza dibakala dimueka difumina ku kibuangu Sauli baba nuanina mvita, nandi wuba bikhutu bibakuka na ntoto ku ntu. Bo kavitila vaba Davidi, nandi wufukama ayi wuyinika kizizi va tsi.
3 Davidi wunyuvula: “Kuidi ngie mafumina?” Nandi wumvutudila: “Minu yibe vuka mu mvita wo basi Isaeli babe nuana.” 4 Davidi wubue nyuvula: “Mambu mbi mabe monika? Lemvuka, khamba.” Nandi wunkamba: “Masodi ma Isaeli babe tina zimbeni ziawu, ayi bawombo mu bawu babe vangana phasi, bankaka babe fua. Sauli ayi muanꞌandi Yonatan mvandi babe fua.” 5 Davidi wuyuvula dibakala beni: “Buidi mazabila ti Sauli ayi muanꞌandi Yonatan mvandi babe fua?” 6 Dibakala beni wumvutudila: “Bo minu yibe vitila ku mongo wu Gilboa, yibe mona Sauli wuyekama va didionga diandi, ayi makalu ma mimvita ma zimbeni ayi masodi bandiatilanga mu mimvalu bafina fikama vo kabe ba. 7 Bo Sauli kabe kiebuka ayi kabe mbona, nandi bethela ayi minu yibe nkamba: ‘Minu kawu.’ 8 Nandi bekhuvula: ‘Ngie widi musi nani?’ Minu yibe mvutudila: ‘Yidi musi Amaleki.’ 9 Bosi nandi bekhamba: ‘Yiza mbanisa kuphonda, kibila yidi mu kutovuka beni.’ 10 Diawu yibe kuendila vo kabe ba ayi yibe mvonda, kibila yibe zaba ti kasinkuiza tatamana ko kuzinga, kibila bevangana beni phasi. Bosi yibe bonga kolowaꞌandi ayi nlunga wubedi mu koko kuandi, muingi kutuala biawu kuidi ngiewu mfumuꞌama.”
11 Bo Davidi kayuwa mambu amomo, nandi wukhakuna bikhutu biandi ayi babakala boso baba yandi, mvandi bakhakuna bikhutu biawu. 12 Bawu banyonga, badila ayi bavanga jejum nate va builu, mu kibila ki lufua lu Sauli, lu muanꞌandi Yonatan, mu kibila ki dikabu di Yave ayi mu kibila ki dikabu di Isaeli. Kibila bawombo mu bawu bafua mu mvita.
13 Bosi Davidi wubue yuvula ditoko beni: “Tatꞌaku widi nani?”Nandi wumvutudila: “Minu yidi muana wu musi Amaleki, vayi yidi nzenza ku kizunga akiki.” 14 Davidi wunkamba: “Kibila mbi ngie bekhambu muena boma kuvonda mutu Yave kasola?” 15 Bosi Davidi wutela disodi diandi dimueka ayi wunkamba: “Vonda dibakala adiodio.” Bosi disodi beni wuvonda dibakala beni. 16 Ayi Davidi wutuba: “Ngie veka widi fotu mu lufua luaku, kibila ngie betuba: ‘Minu yibe vonda mutu Yave kasola.’” Mambu amomo, mawu mabe tuadisa lufua luaku.
17 Bosi Davidi wuyola nkunga wu kiunda mu kibila ki lufua lu Sauli ayi lu muanꞌandi Yonatan, 18 ayi wutuba ti bafueti longa nkunga beni kuidi dikabu di Yuda. Ntu diambu wu nkunga beni widi “Ḿbasa” ayi wawu widi wusonama mu buku yi Jazar. Wawu wuntuba:
19 “Batu baku ba nzitusu ah Isaeli, bama bua mu miongo.
Masodi malutidi kupisuka babe bua.
20 Bikanu kuzabikisa mawu kuidi basi Gati.
Bikanu kutubila mawu mu zinzila zi Askalom,
Muingi bakietu ba basi Filistea babika kukuangalala,
Ayi muingi bakietu ba batu bakhambu buongiminanga Nzambi yikiedika, babika kukuangalala.
21 Bika mu miongo mi Gilboa,
Mubika kubue nokanga zimvula,
Ayi mubika kubue ba zitsola, zimbutanga mimbutu bamvaninanga minkhailu minlongo,
Kibila kuawu babe fuisila tsoni mata ma masodi mapisuka,
Ayi mata ma Sauli, masiedi ko manlongo.
22 Ḿbasa wu Yonatan,
Waba dodisanga menga ma masodi mapisuka,
Ayi mbedi yi Sauli, yaba tuadisanga beni ndandu mu mimvita.
23 Sauli ayi Yonatan, baba kuba zolanga beni kuidi bankaka bo babeli bamonyo,
Bawu babe fuila va kimueka.
Bawu baluta ba zithinu kena zimbemba,
Ayi baluta ba mangolo kena zikhosi.
24 A bakietu ba Isaeli, dilanu mu kibila ki lufua lu Sauli,
No wabe luvuikanga bikhutu bithalu bibenga ayi minsanga,
No wabe buongisanga bikhutu binu, mu kutula muna biuma bi wola.
25 Masodi malutidi mapisuka babe bua mu mvita.
Yonatan befua ku mbata mongo.
26 Yidi beni mu kiunda mu kibila ki lufua luaku, ngiewu khombꞌama Yonatan.
Ngie wuba nkundi wu luzolo.
Mu minu, luzolo luaku lulutidi kena luzolo lu bakietu.
27 Masodi malutidi mapisuka, babe bua,
Ayi mata mawu, masiedi ko tsadulu mu mimvita.”