Buku Yimmuadi yi Samueli
15 Bosi Absaloni wutuma bavanga dikalu ayi wukubika mvandi mimvalu, ayi wusola 50 di batu babe kue dumanga vantualꞌandi. 2 Absaloni waba kotukanga meni meni muingi kukuenda mu nzila yinkuenda va muelu wu divula. Bo vaba monikanga mutu wabe kuendanga muingi kuzabikisa mambu mandi kuidi ntinu, Absaloni waba tumisanga mutu beni ayi waba kunkuvulanga: “Ngie widi musi divula mbi?” mutu beni waba kumvutudilanga: “Minu kisadi kiaku yidi musi mvila awuwu wu Isaeli.” 3 Absaloni waba kambanga mutu beni: “Mambu wuntomba kue zabikisa ntinu, madi masulama ayi madi mamboti, vayi vasi ko ne mutu mu luyalu lu ntinu, wunkuiza kuyuwa muingi kudedikisa mambu maku.” 4 Absaloni waba tubanga: “Boti bambieka mfundisi, khanu batu boso bankuiza yizanga kuidi minu ayi minu khanu yinkuiza dedikisanga mambu mawu mu busonga.”
5 Ayi bo mutu kaba fikamanga vaba Absaloni muingi kafukama vantualꞌandi, Absaloni waba simbanga mutu beni ayi waba kumvananga besu. 6 Amomo mawu Absaloni kaba vangilanga batu boso baba kuendanga kuidi ntinu, muingi kue dedikisa mambu. Mu phila ayoyo, Absaloni waba vukumunanga basi Isaeli muingi baba ku khonzoꞌandi.
7 Bo vavioka mimvu minna, Absaloni wukamba ntinu Davidi: “Lemvuka, phana nsua muingi yenda ku Hebrom kue dukisa tsila yivanga kuidi Yave. 8 Kibila bo yaba kalanga ku Gezur yidi ku Silia, minu yivanga tsila ayiyi: “Yave na kutsadisa kuvutuka ku Yelusalemi, buna yala vana kuidi Yave nkhailu.’” 9 Ntinu Davidi wukamba Absaloni: “Yenda mu ndembama.” Mu phila ayoyo, Absaloni wuyenda ku Hebrom.
10 Bosi Absaloni wufila mimvuala mu mimvila mioso mi Isaeli ayi wuba kamba: “Benu kukuwa biyoko bi ziphungi lufueti tuba: ‘Absaloni weka ntinu ku Hebrom.’” 11 Absaloni wutumisa 200 di babakala ayi bawu bananguka ku Yelusalemi ayi bayenda na Absaloni. Vayi babakala beni basa zaba ko mambu Absaloni kaba tomba kuvanga. 12 Mvandi bo bamana kuvana nkhailu, Absaloni wutumisa Aitofel musi Gilo no waba vananga malongi kuidi Davidi. Thalu yi batu baba buela mioko Absaloni muingi kubalukila ntinu Davidi yaba buelama.
13 Bosi vamonika mutu wuyenda kue kamba Davidi mambu amama: “Basi Isaeli bawombo beka ku khonzu Absaloni.” 14 Muna thangu beni, Davidi wukamba bisadi biandi ayi batu boso baba yandi ku Yelusalemi: “Ndokuꞌanu tutina kibila khanu ne mutu kasinkuiza vuka ko mu mioko mi Absaloni. Vanganu nsualu, kibila nandi khanu wunkuiza tununga ayi kuvonda batu boso ku divula.” 15 Bisadi biandi bankamba: “A ntinu befu tuidi bakubama muingi kuvanga mambu moso wuntomba.” 16 Mu phila ayoyo, ntinu wunanguka ayi wuyenda na baboso baba kalanga ku nzoꞌandi. Vayi wubika 10 di bimasi biandi muingi bakieba nzo yi ntinu. 17 Ntinu Davidi na batu boso baba yandi, bananguka ku divula ayi bayevundila ku Bete-Meraki.
18 Zimfumu zioso zi masodi ma ntinu mayenda yandi, zikeretita zipeletita, zigeteu kubunda mvandi 600 di masodi balandakana Davidi kutonina ku Gati, basabuka muila ayi Davidi waba kuba fiongunina boti baba baduka. 19 Ntinu Davidi wukamba Itai musi Geteu: “Kibila mbi ngie mvaku wuntomba kukuenda yitu? Vutuka ayi yenda ku khonzu ntinu wumona kibila ngie widi nzenza banata va buvika. 20 Ngiewu vangi kuandi wuyizizi. Buabu kibila mbi fueti diatilanga yitu koso kua kuma tunkuenda? Vutuka, nata zikhomba ziaku ayi bika Yave ka kumonisa luzolo luandi lukuikama.” 21 Vayi Itai wukamba ntinu: “Yinleva phesi mu dizina di Yave ayi mu dizina diaku ngie ntinu ti, koso kua kuma ngie wunkuenda, kuawu minu kisadi kiaku mvandi yala kuenda, kheti mawu mansundula kufua voti kutatamana kuzinga.” 22 Bo Davidi kayuwa mawu nandi wukamba Itai: “Vasi diambu ko sabuka.” Mu phila ayoyo, Itai musi Geteu wusabuka ḿbuinga, va kimueka na batu boso baba yandi kubunda mvandi bana balezi.
23 Batu boso baba kalanga va kizunga beni, baba dila bo batu bayenda na Davidi baba sabuka ḿbuinga muingi kuviokila mu nzila yinkuenda ku thandu. Bo bawu baba sabuka, Davidi wuba wutelama va ḿbuinga wu Cédron. 24 Zadoki na zilevita zioso mvandi baba vana ayi baba nata Kasu yi Luwawanu yi Nzambi yikiedika. Bawu batula yawu vatsi, batu boso baba na Davidi babasika ku divula ayi basabuka ḿbuinga. Abiatali mvandi wuba vana. 25 Vayi ntinu Davidi wukamba Zadoki: “Vutula Kasu yi Luwawanu yi Nzambi yikiedika ku Yelusalemi. Boti minu yidi lunungu va meso ma Yave, buna Nandi wala tsadisa yibe vutuka ku divula, muingi kumona Kasu yi Luwawanu ayi kibuangu bantulanga Kasu beni. 26 Vayi Nzambi na kutuba: ‘Ngie wusiedi ko lunungu va meso mama,’ buna bika nandi kavanga moso mambu katidi.” 27 Ntinu Davidi wukamba Zadoki nganga nzambi: “Ngie widi mutu wummonanga bimona meso, diawu vutuka ku divula ayi nata mvandi batu ababa: Muanꞌaku Aimaás ayi Yonatan muana Abiatali. 28 Minu yinkuiza vingila mu bibuangu bansabukilanga ḿbuinga bidi va ndeko thandu nate luela mfila zitsangu.” 29 Mu phila ayoyo, Zadoki ayi Abiatali bavutula Kasu yi Luwawanu yi Nzambi yikiedika ku Yelusalemi ayi batatamana kukala kuna.
30 Bo Davidi kaba tombuka mongo wu minti mi olive, nandi waba dila, kasa vuata ko zisandali ayi wufuka ntu. Batu boso baba na Davidi, mvandi bafuka ntu ayi baba dila bo babe tombuka mongo beni. 31 Bosi bakamba Davidi: “Aitofel weka ku khonzo Absaloni muingi kubalukila ntinu.” Bo Davidi kayuwa mawu, nandi wutuba: “Ah Yave lemvuka, vanga muingi malongi ma Aitofel mavunzikisa makani ma Absaloni.”
32 Bo Davidi kavitila va mbata mongo vo dikabu baba buongiminanga Nzambi, nandi wuye bata vana Huzai musi Arkita. Huzai wuba bikhutu bibakuka ayi wutula ntoto ku ntu. 33 Davidi wunkamba: “Ngie ku kuenda yama wisinkuiza baka ko bu kutsadisila. 34 Vayi ngie kuvutuka ku divula ayi ku kamba Absaloni: ‘Minu yibedi kisadi ki tatꞌaku buabu yeka kisadi kiaku,’ buna ngie wunkuiza vunzikisa malongi ma Aitofel. 35 Zadoki ayi Abiatali zinganga nzambi bankuiza ba yaku, ngie fueti kuba zabikisa mambu mamvioka ku nzo ntinu. 36 Zadoki ayi muanꞌandi Aimaás kubunda mvandi Abiatali na muanꞌandi Yonatan mvandi bala ba yaku ayi mu nzila Aimaás na Yonatan ngie fueti kumfila zitsangu matedi mambu moso mamvioka ku nzo ntinu. 37 Mu phila ayoyo, Huzai nkundi wu lufiatu wu Davidi, wuvutuka ku Yelusalemi ayi nandi wuvitila kuna bo Absaloni kaba kota ku divula.