Buku Yimmuadi yi Samueli
17 Aitofel wukamba Absaloni: “Lemvuka phana nsua muingi yikutikisa 12.000 di masodi, muingi tuenuanisa Davidi va builu abubu. 2 Minu yeke nnuanisa bo kadi wuvonga ayi yinkuiza mvanga kuba boma ayi bo batu boso badi yandi bankuiza tina, minu yinkuiza vonda to ntinu. 3 Bosi minu yinkuiza vanga muingi dikabu dioso bavutuka ku divula ayi ba kubuela mioko. Mutu widi mu kutomba na kufua, dikabu dioso bankuiza vutuka kuidi ngiewu ayi vankuiza ba ndembama.” 4 Absaloni ayi bakulutu boso ba Isaeli bazola beni mambu Aitofel katuba.
5 Vayi Absaloni wutuba: ‘Telanu mvandi Huzai musi Arkita muingi tuzaba mayindu mandi.” 6 Bo Huzai kavitila vaba Absaloni, Absaloni wunkamba: “Amama mawu malongi ma Aitofel. Buawu wummuena, tufueti sadila mambu kabe tuba? Boti ndamba wutu kamba mambu mbi tufueti vanga.” 7 Bosi Huzai wukamba Absaloni: “Khumbu ayiyi dilongi Aitofel kabe vana disi ko dimboti.”
8 Huzai wubue tuba: “Ngie zebi buboti ti tatꞌaku ayi batu boso badi yandi, badi beni mangolo ayi badi mu kukuazuka buka kibulu ki nganzi kintomba bana bandi babe zimbala. Mvandi tatꞌaku widi disodi dipisuka, diawu nandi kasinkuiza viokisa ko builu va kimueka na dikabu. 9 Mu thangu ayiyi tumbula mbembu, nandi widi wusuama kunsuku dimanya voti ku kibuangu kinkaka. Na kutuama ku kunuanisa, batu bankuiza zaba mawu bankuiza tuba: ‘Bama nunga baboso bambuelanga mioko Absaloni.’ 10 Ayi kheti batu badi kibakala buka khosi, bankuiza titubuka mu boma kibila basi Isaeli boso bazebi ti tatꞌaku, widi disodi dipisuka ayi batu boso badi yandi badi beni kibakala. 11 Diyindu diama diakadi: Kutikisa masodi moso ma Isaeli kutonina ku Dan nati ku Berseba. Bawu bafueti ba bawombo buka nsengisini wu ḿbu ayi ngie fueti batuadisa mu mvita. 12 Befu tunkuiza nuanisa Davidi na nkangu wunneni wu masodi, dedi bo mvula wunneni wunnokinanga va ntoto. Mu phila ayoyo, vasi ko mutu wunkuiza vuka. 13 Davidi na kusuamina ku divula dimueka dikabu dioso di Isaeli bala kuenda kuna muingi kutulula divula dioso ayi ne kheti dimanya dialasa sobila ko ku divula beni.”
14 Bosi Absaloni na babakala boso ba Isaeli baba yandi batuba: “Mambu Huzai musi Arkita kabe tuba malutidi kena malongi Aitofel kabe vana.” Batubila mawu, kibila Yave wubaka makani ma kuvunzikisa malongi Aitofel kavana. Yave kavangila mawu muingi kutuadisa ziphasi kuidi Absaloni.
15 Bosi Huzai wukamba Zadoki ayi Abiatali zinganga nzambi: “Amomo mawu malongi Aitofel kabe vana kuidi Absaloni ayi bakulutu boso ba Isaeli. Vayi minu yibe mvana malongi amama. 16 Buabu, yendanu mu thinu ayi zabikisanu mambu amama kuidi ntinu Davidi: ‘Bika kuviokisa builu mu bibuangu bansabukilanga muila wu Yolidani bidi va ndeku thandu. Vayi fueti sabuka muila wu Yolidani, kibila benu kumanga kuvanga mawu, ngie ntinu na batu boso badi yaku bankuiza muvonda.”’
17 Yonatan ayi Aimaás baba vingila ku En-Rogel. Nkietu wumueka wuyiza bazabikisa mambu beni. Kibila Yonatan ayi Aimaás basa tomba ko kutula luzingu luawu va kingela, mu kukota ku divula beni. Bo baba kamba tsangu beni, bawu bayenda kue kamba mawu kuidi ntinu Davidi. 18 Vayi ditoko dimueka wuba mona ayi nandi wuzabikisa mawu kuidi Absaloni. Bosi mu thinu Yonatan ayi Aimaás bayenda ku nzo dibakala dimueka ku Baurim ayi ku nzo beni, kuba ditanga bawu basuamina. 19 Nkazi wu dibakala beni, wufuka ditanga beni ayi wutula va mbata kiuma kafuka zitheti zinyiku. Ayi ne mutu kasa zaba ko ti batu basuamina muna. 20 Bisadi bi Absaloni bayenda ku nzo nkietu beni ayi banyuvula: “Kuawu Yonatan ayi Aimaás badi?” Nkietu beni wuba vutudila: “Bawu babe kuenda ku khonzo yi muila.” Bosi bisadi bi Absaloni bayenda kue babila, vayi basa ku bamona ko diawu bavutukila ku Yelusalemi.
21 Bo bisadi bi Absaloni bavutuka, Yonatan ayi Aimaás batapuka mu ditanga ayi bayenda kue zabikisa zitsangu kuidi ntinu. Bawu bakamba ntinu Davidi: “Yendanu, sabukanu muila mu thinu kibila amama mawu mambu Aitofel kabe tuba matedi benu.” 22 Muna thangu beni, Davidi na batu boso baba yandi batona kusabuka muila wu Yolidani. Bo buisi bukia, baboso bamana kusabuka muila wu Yolidani.
23 Bo Aitofel kamona ti basa kikinina ko malongi kavana, nandi wukubika phunda ayi wuyenda ku nzo ku divula diandi, bosi wuvana zithuadusulu kuidi basi dikanda diandi ayi wu yiledika. Mu phila ayoyo, nandi wufua ayi banzikila ku dibumbi di zikhaya ziandi.
24 Mu thangu ayoyo, Davidi wuyenda ku Maanaim ayi Absaloni na babakala boso ba Isaeli basabuka muila wu Yolidani. 25 Absaloni wusola Amasa muingi kaba mfumu masodi mandi va mvingi Joabe. Amasa wuba muana wu Itra musi Isaeli kabuta na Abigaili. Abigaili wuba muana wu Naás, ayi khomba Zeruia ayi Zeruia wuba ngudi wu Joabe. 26 Absaloni na batu boso baba yandi, bayenda kue vundila ku Ngileadi.
27 Bo Davidi kavitila ku Maanaim, Sobi muana wu Naás musi Rabá divula didi ku kizunga ki basi Amom ayi Makir muana Amiel musi Lo-debar kubunda mvandi Barzilai musi Ngileadi yidi ku Rogelim, 28 banata bika, mabola, zinzungu zivangulu mu tuphandu, trigu, cevada, falinya, zitheti zikangu, mintindu miodi mi madezu, 29 mvandi banata wika, mantega, mamemi ayi kejo. Banata biuma bioso abiobio muingi Davidi ayi batu boso baba yandi badia, kibila batuba: “Batu badi yaku badi mu nzala, mu phuila ayi badi bavonga.”