Buku Yimmuadi yi Samueli
22 Bo Yave kavukisa Davidi mu mioko mi Sauli ayi mu mioko mi zimbeni ziandi zioso, Davidi wutonda Yave mu kuyola nkunga awuwu: 2 “Yave widi dimanya diama dinneni,*
Mangolo mama ayi mvukisiꞌama.
3 Nzambi widi dimanya diama dinneni yinsuaminanga.
Nandi widi nkakuꞌama ayi mvukisiꞌama wulutidi, widi kisuamunu kiama kinsika kio yinsuaminanga.
Ngie widi mvukisiꞌama, ayi wu kuphukisanga mu mambu moso mambi.
4 Yindindanga lusalusu kuidi Yave, kibila nandi fueni tambula nzitusu.
Nandi wala kuphukisa mu mioko mi zimbeni ziama.
5 Lufua lunzungidila buka mayo ma ḿbu,
Nkangu wu batu badi mavanga mambi bathula boma.
6 Minsinga mi dibumbi minzungidila,
Lufua lubina kumbuila.
7 Bo yaba viokila mu ziphasi yidinda lusalusu kuidi Yave.
Yidinda lusalusu kuidi Nzambiꞌama.
Ku tempeluꞌandi nandi wuyuwa mbembuꞌama,
Ayi bo yaba kuana muingi katsadisa, nandi wundiuwila.
8 Ntoto wutona kudemba ayi kutitubuka.
Diyilu mvandi ditona kutitubuka,
Kibila nandi wuba mu nganzi.
9 Mu mayilu mandi mubasika muisi,
Ayi mu munuꞌandi mubasika mbazu.
Mu khatiꞌandi mubasika makala ma mbazu.
10 Nandi wuvumbika diyilu ayi wukuluka.
Vaba kitombi kingolo kutsi bitambi biandi.
11 Nandi wukuluka ku diyilu va mbata kerubim.
Wukulukila ku diyilu va mbata mavavi ma mbasi.
12 Nandi wuvanga muingi vama kaba vaba kitombi kingolo,
Mazi manomba ayi matuti manomba.
13 Vantualꞌandi vaba lezama ayi vaba lema mbazu.
14 Mbembu yi Yave yabe kuwakana kutona ku diyilu.
Mbembu yi mutu Lutidi Zangama yaba kuwakana buka bidumu bi mvula.
15 Nandi wukuba madionga mavanga zimbeni ziama kutina,
Mvandi wutuadisa zitsiemu zivanga zimbeni ziama ziba mu divunza.
16 Mu kibila ki nganzi yi Yave ayi phemu yibasika mu mayilu mandi, ntoto widi mu khati ḿbu wumonika.
Mvandi, lusersu lu ntoto lumonika.
17 Kuna diyilu, nandi wusimba koko kuama,
Nandi wuthapula mu minlangu mivinda.*
18 Nzambi wuphukisa mu mioko mi zimbeni ziama,
Nandi wuphukisa mu mioko mi batu baba ku ndendanga ayi bandutidi mangolo.
19 Bo yaba viokila mu ziphasi zimbeni ziama banduanisa,
Vayi Yave wuphukisa.
20 Nandi wundata va kibuangu kidi nsika,
Kibila wu kuphuanga nkinza.
21 Yave wuku tsakumunanga mu kibila ki lukuikumunu luama.
Nandi wu kutsakumunanga kibila yintatamananga wudiodila vantualꞌandi.
22 Yintatamananga kutumukina Yave,
Ayi yisa vanga ko nzimbala yi kubanda mbusa Nzambiꞌama.
23 Minu yala tatamana kutumukina zithumu ziandi zioso,
Ayi yalasa levula ko minsiku miandi.
24 Yala tatamana kuba mutu khambulu tsembolo vantuala Nzambi,
Ayi yala tatuka mambu mambi.
25 Bika Yave katsakumuna mu kutadila mambu masonga yivanga,
Ayi katsakumuna kibila yisi ko fotu mu ne diambu.
26 Ngie walasa kuekula ko mutu wummonisanga luzolo lukuikama.
Ngie wala vangila mambu masulama kuidi mutu wumvanganga mambu masulama.
27 Ngie wummonisanga mamboti kuidi mutu wusonga,
Vayi wunlendanga batu bamvanganga mambu mambi.
28 Ngie wumvukisanga batu ba kikululanga,
Vayi wunlendanga batu bakinangikanga.
29 A Yave ngie widi muindꞌama,
Yave ngiewu wunkiezulanga muindꞌaku muingi kubotula kitombi vo yidi.
30 Mu lusalusu luaku yilenda nunga zimbeni ziama,
Ayi mu mangolo maku a Nzambi, yilenda nunga moso kua mambu.*
31 Mambu moso Nzambi yikiedika kamvanganga madi masonga.
Zithuadusulu zi Yave zidi zisonga.
Ayi nandi widi kisuamunu kingolo kuidi baboso bantombanga lukiebu luandi.
32 Kibila Yave nandi to Nzambi yikiedika.
Vadi mutu wunkaka widi buka dimanya dinneni kubotula kuandi Nzambꞌitu?
33 Nzambi yikiedika nandi kisuamunu kiama ki lufiatu,
Ayi nandi wala diodisa zinzila ziama.
34 Nandi wunsadisanga muingi malu mama maba masikama buka ngulungu,
Ayi nandi wu kutsadisanga kuba wutelama mu bibuangu bidi beni bizangama.
35 Ava yenuana mvita, nandi wu kukhubikanga.
Minu yilenda nunga kufumbika ḿbasa wuvangulu mu cobre.
36 Ngie wu kuphananga nkakuꞌaku wu luvukusu,
Ayi kukikulula kuaku ku kundangikanga beni.
37 Ngie wuntodisanga zinzila yimviokila,
Muingi yibika bua.
38 Yala tatamana kukuka zimbeni ziama ayi yala kuba vonda,
Yalasa vutuka ko boti yimeniꞌabu ko kuba vonda.
39 Minu yala bavonda ayi yala bakesumuna. Mu phila ayoyo, bawu balasa bue telama ko.
Minu yala kuba diatila.
40 Ngie wala kuphana mangolo muingi kunuana mvita,
Ayi wala kutsadisa kununga zimbeni ziama.
41 Ngiewu wala vanga muingi zimbeni ziama batina vantualꞌama,
Minu yala vonda batu ba kundendanga.
42 Bawu bandindanga lusalusu, vayi vasi ko ne mutu muingi kuba sadisa,
Kheti bandindanga lusalusu kuidi Yave, vayi nandi kaba yuwilanga ko.
43 Minu yala ku bakesumuna ayi bawu bala ba buka mbumbungu.
Minu yala ku bakesumuna ayi yala kuba diatila ayi bawu bala ba buka matetchi.
44 Ngie wala kukhieba mu zikhuamusu zi dikabu diama.
Ngie wala kutsadisa muingi yiba ntinu wu mimvila,
Dikabu dio yikhambu zaba, bala ba bisadi biama.
45 Zinzenza bala kuiza kuidi minu ayi bala kumbona boma,
Mambu bala kuwa matedi minu, mala bavanga baba bisadi biama.
46 Zinzenza bala mana kibakala.
Ayi mu kibila ki boma, bala basika mu bibuangu basuamina.
47 Yave wunzinganga thangu zioso. Bika dimanya diama dinneni kazitusu.
Nzambiꞌama dimanya diama dinneni di luvukusu kazitusu.
48 Nzambi yikiedika wumvutudilanga mambi kuidi zimbeni ziama.
Nandi wumvanganga muingi batu bathumukina.
49 Nzambi wu kuphukisanga mu mioko mi zimbeni ziama.
Nandi wu kutsadisanga kununga batu ba kunduanisa,
Mvandi wu kuphukisanga mu mioko mi mutu widi buphunya.
50 A Yave, diawu minu yala kutondila va khati mimvila mioso,
Ayi yala kuimbila minkunga muingi kuzitisa dizina diaku.
51 Nandi wumvanganga mambu mawombo ma kukuitukila muingi kuvukisa ntinuꞌandi.
Wummonisanga luzolo lukuikama kuidi mutu kasola,
Kuidi Davidi ayi kuidi dikanda diandi mu zithangu zioso.”