Buku Yimmuadi yi Samueli
3 Batu baba buelanga mioko Sauli ayi bo babe buelanga mioko Davidi, batatamana kunuana mimvita mu thangu yiwombo. Batu baba buelanga mioko dikanda di Davidi baba buelama, vayi batu baba buelanga mioko dikanda di Sauli baba dekuka.
2 Mu thangu ayoyo, Davidi wubuta bana ku Hebrom. Amnom, nandi muana wutheti wu Davidi. Mamꞌandi wuba Ainoa musi Jezreeli. 3 Kileabe nandi muana wummuadi wu Davidi. Mamꞌandi wuba Abigaili musi Karmelu no wuba nkazi wu Nabal. Absaloni nandi muana wuntatu wu Davidi. Mamꞌandi wuba Maká ayi Maká wuba muana wu Talmai ntinu Gezur. 4 Adonia nandi muana wunna wu Davidi. Mamꞌandi wuba Hagite. Sefatia nandi muana wuntanu wu Davidi. Mamꞌandi wuba Abital. 5 Itreão nandi muana wunsambanu wu Davidi. Mamꞌandi wuba Eglá. Bana boso abobo ba Davidi, babutukila ku divula di Hebrom.
6 Bo batu baba buelanga mioko Sauli ayi batu baba buelanga mioko Davidi batatamana kunuana mimvita, Abner wutatamana kukindisa kimfumu kiandi mu dikanda di Sauli. 7 Sauli wuba kimasi baba tedilanga Rispa muana wu Aiá. Kilumbu kimueka Is-Bozeti wukamba Abner: “Kibila mbi ngie bebundinina nyitu na kimasi tatꞌami kabika?” 8 Abner wudasuka mu kibila ki mambu Is-Bozeti katuba, diawu kankambila: “Ngie wummuena ti minu yima kubalukila ayi yeka ku khonzu basi Yuda? Nate bubu minu yimmonisanga lukuikumunu kuidi dikanda di Sauli, kuidi zikhomba ziandi ayi kuidi bakundi bandi, ayi yintatamananga ku kukieba muingi Davidi kabika ku kuvonda. Buabu ngie mathumisa muingi kufhundisa mu kibila ki mua nzimbala yima vanga matedi nkietu awowo. 9 Bika Nzambi kathuadisa ziphasi minu kukhambu vanga mambu Yave kakanikisa Davidi, 10 voti kubotula luyalu mu dikanda di tatꞌaku ayi kuvana luawu kuidi Davidi muingi kayadila dikabu di Isaeli ayi mvila wu Yuda, kutonina ku Dan nate ku Berseba.” 11 Is-Bozeti kasa bue tuba ko ne diambu, kibila waba mona boma Abner.
12 Muna thangu beni, Abner wufila zimvuala muingi bekamba Davidi: “Nani widi nsua wu kuyala ntoto awuwu?” Ayi wubue tuba: “Vanga yama luwawanu, ayi minu yinkuiza vanga mamoso muingi dikabu dioso di Isaeli baba ku khonzoꞌaku.” 13 Davidi wumvutudila: “Vasi diambu ko, minu yemvanga yaku luwawanu. Vayi yi kudinda, bo wala kuiza, fueti tuala mvandi nkaziꞌama Mikal muana Sauli.” 14 Bosi Davidi wufila zimvuala muingi bekamba Is-Bozeti muana Sauli: “Fila nkaziꞌama Mikal no yikuela mu kuvonda 100 di masodi* ma basi Filistea.” 15 Mu phila ayoyo, Is-Bozeti wutuma muingi babotula Mikal ku nzo nnuniꞌandi Paltiel muana wu Laís. 16 Vayi Paltiel waba dila ayi waba kue landakananga nkaziꞌandi nate ku Baurim. Bosi Abner wunkamba: “Vutuka ku nzo.” Nandi wuvutuka.
17 Mu thangu ayoyo, Abner wufila zimvuala muingi bekamba mambu amama kuidi bakulutu ba Isaeli: “Vama vioka thangu yiwombo tona luntombanga muingi Davidi kaba ntinu. 18 Buabu thangu yima fuana muingi luvanga dioso diambu, kibila Yave wukamba Davidi: “Mu nzila kisadi kiama Davidi, minu yinkuiza vukisa dikabu di Isaeli mu mioko mi basi Filistea ayi mu mioko mi zimbeni ziawu zioso.’” 19 Bosi Abner wuyoluka na mvila wu Benyamini. Abner mvandi wuyenda ku Hebrom muingi kue zabikisa Davidi makani basi Isaeli ayi mvila wu Benyamini babaka.
20 Bo Abner na 20 di babakala bayenda ku Hebrom muingi kue yoluka na Davidi, baba vangila nkungi kuidi Davidi. 21 Bosi Abner wukamba Davidi: “Ah ntinu phana nsua yikutikisa dikabu muingi bawu bavanga yaku luwawanu ayi ngie wunkuiza yadila biabioso. Diawu Davidi kavanina Abner nsua ayi nandi wuyenda mu nsika.
22 Mu thangu beni, Joabe na masodi ma Davidi bafumina mu mvita ayi batuala biuma babaka mu mvita. Abner kasa ba ko na Davidi ku Hebrom, kibila Davidi wumvana nsua muingi kenda mu nsika. 23 Bo Joabe ayi masodi moso bavitila, batu bakamba Joabe: “Abner muana Ner bekuiza tala ntinu Davidi, ayi ntinu bembika muingi kenda mukhambu kumvangila ne diambu dimbi.” 24 Diawu Joabe kayendila kuidi ntinu Davidi ayi wunkamba: “Kibila mbi ngie ntinu bevangila mambu amomo? Abner bekuiza kuidi ngiewu ayi ngie bembika muingi kavuka mu mioko miaku? 25 Ngie mfumu zebi buboti mayindu ma Abner muana Ner. Nandi kabe kuizila akuku, muingi ku kuvuna ayi kuzaba mambu moso ngie ntinu widi mu kuvanga.”
26 Bosi Joabe wunanguka vaba Davidi ayi wufila zimvuala muingi belanda Abner. Ayi bawu bayenda kuenlanda va dikanga di Sirá, vayi Davidi kasa zaba ko mawu. 27 Bo Abner kavitila ku Hebrom, Joabe wunnata va muelu wu divula muingi baba buadi bayoluka. Vayi Joabe wubanda Abner mbedi mu kivumu ayi nandi wufua. Kavangila mawu kibila Abner wuvonda Azael khombꞌandi. 28 Bo Davidi kazaba mambu mamonika, nandi wutuba: “Minu ayi batu boso badi mu kintinu kiama, tuisi ko fotu va mesu ma Yave mu lufua lu Abner muana Ner. 29 Bika Joabe ayi dikanda di tat’andi baba fotu mu lufua lu Abner. Va dikanda diandi valasa kambuanga ko mutu widi mbela yi kubasikanga biuma ku pheni, widi buazi, wunnunganga to kuvanga bisalu bi bakietu, kualasa kambuanga ko mutu wumfuila mu mvita ayi kualasa kambuanga ko mutu wumfua nzala.” 30 Mu phila ayoyo, Joabe ayi khombꞌandi Abizai bavonda Abner kibila Abner wuvonda Azael khombꞌawu ku Gibeão.
31 Davidi wukamba Joabe ayi masodi moso baba yandi: “Khakunanu bikhutu binu, vuatanu zitsaku ayi dilanu mu kibila ki lufua lu Abner.” Ayi ntinu Davidi wuba vambusa kipoya baba natina mvumbi wu Abner. 32 Bazika Abner ku Hebrom ayi ntinu Davidi wudila beni va dibumbi bazikila Abner. Dikabu dioso mvandi baba dila. 33 Ayi ntinu Davidi wuyola nkunga awuwu wu kiunda mu kibila ki lufua lu Abner:
“Kibila mbi Abner kabe fuila buka mutu wuphamba?
34 Mioko miaku misa ba ko mikangama,
Ayi malu maku mvandi, masa ba ko makangama mu ziphanga.
Ngie befua dedi bo bumfuilanga bandidu.”
Bosi dikabu dioso babue dila mu kibila ki lufua lu Abner.
35 Bosi dikabu bayenda vaba Davidi muingi kumbomba. Bawu bannatina bidia muingi kadia, vayi nandi wuleva phesi mu kutuba: “Bika Nzambi kathuadisa ziphasi minu kudia kioso kiuma ava khotolo muinya.” 36 Bo dikabu bamona mawu, bawu bayangalala. Ayi bawu baba zolanga mambu moso ntinu kaba vanganga. 37 Mu phila ayoyo, masodi moso ma Davidi ayi dikabu di Isaeli bavisa muna kilumbu beni ti, ntinu Davidi kasa ba ko fotu mu lufua lu Abner muana Ner. 38 Bosi ntinu Davidi wukamba bisadi biandi: “Zabanu kuinu ti, bubu mfumu yinneni yibe fua ku Isaeli. 39 Kheti luma mbieka ntinu, vayi bubu yidi beni mu kiunda. Ayi babakala abobo, bana ba Zeruia badi beni buphunya. Bika Yave kavutudila mambi kuidi mutu widi mavanga mambi.”