Watheti wa Mintinu
22 Mu mimvu mitatu, basi Isaeli ayi basi Silia basa nuana ko mvita. 2 Mu mvu wuntatu Yozafati ntinu wu Yuda wuyenda kuidi Acabi ntinu wu Isaeli. 3 Acabi ntinu wu Isaeli wukamba kuidi bisadi biandi: “Benu lusa zaba ko ti Ramoti-Gileade didi divula ditu? Buabu kibila mbi tukhambu kue nuanisina basi Silia muingi kuvua divula ditu?” 4 Acabi wuyuvula ntinu Yozafati: “Ngie wunkuenda yama mu mvita ku Ramoti-Gileade?” Yozafati ntinu Yuda wuvutudila Acabi ntinu wu Isaeli: “Ngete minu yinkuenda yaku. Masodi mami bankuiza ba na masodi maku ayi mimvalu miama mvandi minkuiza ba na mimvalu miaku.”
5 Vayi Yozafati wukamba Acabi, ntinu wu Isaeli: “Lemvuka, tomba theti kuzaba mayindu ma Yave.” 6 Bosi Acabi ntinu wu Isaeli wukutikisa 400 di mimbikudi ayi wuba yuvula: “Yifueti kuenda voti ndamba kue nuana mvita ku Ramoti-Gileade?” Mimbikudi beni bamvutudila: “Yenda, Yave wunkuiza kusadisa kununga mvita beni.”
7 Yozafati wutuba: “Ku kibuangu akiki kuisi ko ḿbikudi wu Yave? Ntumisa muingi mu nzilꞌandi tutomba kuzaba mayindu ma Nzambi.” 8 Acabi ntinu wu Isaeli wukamba Yozafati: “Vakhidi ḿbikudi wumueka no tulenda tombila kuzaba mayindu ma Yave, vayi minu yinzolanga ko. Kibila nandi kabikulanga ko mambu mamboti matedi minu. Dizina diandi Mikaía, nandi widi muana wu Inlá. Ntinu Yozafati wukamba Acabi: “A ntinu bika kutuba mambu amomo.”
9 Mu phila ayoyo, Acabi ntinu wu Isaeli wutumisa mfumu masodi waba sadilanga ku nzo ntinu ayi wunkamba: “Yenda mu thinu muingi welanda Mikaía muana wu Inlá.” 10 Acabi ntinu wu Isaeli ayi Yozafati ntinu wu Yuda, baba bakala kadika mutu mu kikundu kiandi ki mfumu ayi bavuata bikhutu biawu bi mintinu. Bawu baba va kibuangu ki kusosila mbongo kiba va khotolo divula di Samalia ayi mimbikudi mioso baba bikula vantualꞌawu. 11 Bosi Zedekia muana Kenaná wuvanga ziphoka zi kisengu ayi wutuba: “Buakabu butubidi Yave: ‘Mu ziphoka azizi ngie ntinu wunkuiza vonda basi Silia boso.’” 12 Mimbikudi mioso baba bikula momawu mambu, bawu baba tuba: “A mfumu, maka ku Ramoti-Gileade, ngie wunkuiza nunga mvita awuwu. Yave wunkuiza kusadisa kuvua divula beni.”
13 Mvuala wuyenda kue landa ḿbikudi Mikaía wunkamba: “Zaba kuaku ti mimbikudi mioso badi mu kubikula mambu mamboti matedi ntinu. Diawu lemvuka, bika mambu wunkuiza bikula mvandi maba dedi mueka na ma mimbikudi amiomio ayi tuba mambu mamboti.” 14 Vayi ḿbikudi Mikaía wutuba: “Yinleva phesi mu dizina di Yave ti mamoso Yave kankuiza khamba mawu yinkuiza tuba.” 15 Ḿbikudi Mikaía wuyenda vantuala ntinu ayi ntinu wunyuvula: “Mikaía tufueti kuenda ku Ramoti-Gileade muingi kue nuana mvita voti ndamba. Mu thinu ḿbikudi Mikaía wumvutudila: “Yenda a mfumuꞌami ngie wunkuiza nunga, Yave wunkuiza kusadisa kuvua divula beni.” 16 Ntinu Acabi wunkamba: “khumbu zikua yifueti kuvanga kuleva phesi muingi kukhamba kiedika matedi mayindu* ma Yave?” 17 Ḿbikudi Mikaía wumvutudila: “Yidi mu kumona basi Isaeli batiamuka mu miongo buka mamemi makhambulu nsungi. Yave betuba: ‘Bawu basi ko mutu wuku batuadisa. Bika kadika mutu kavutuka mu ndembama ku nzoꞌandi.’”
18 Bosi Acabi ntinu wu Isaeli wukamba Yozafati: “Minu yisa kukamba ko ti nandi kasinkuiza bikula ko mambu mamboti matedi minu, vayi wunkuiza bikula to mambu mambi?”
19 Ḿbikudi Mikaía wubue tuba: “Yuwa diambu di Yave. Yibe mona Yave wukala va kikundu kiandi ki mfumu ayi nkanguꞌandi woso wu masodi* ku diyilu batelama ku khonzoꞌandi yi lubakala ayi yi lukietu. 20 Yave betuba: ‘Nani wunkuiza vuna Acabi muingi kumvanga kenda nuana mvita ku Ramoti-Gileade ayi kafuila kuna?’ Kadika mbasi betuba diyindu diandi. 21 Bosi mbasi yimueka wuyisa vantuala Yave ayi wutuba: ‘Minu yinkuiza mvuna.’ Yave benkuvula: ‘Buidi wunkuiza vangila mawu?’ 22 Mbasi beni bemvutudila: ‘Minu yinkuiza yenda ayi yinkuiza vanga muingi mimbikudi mioso mi Acabi batuba luvunu. Bosi Nzambi benkamba: ‘Ngie wunkuiza nunga kumvuna, ayi mamoso mankuiza yenda buboti. Diawu yenda, ayi vanga mawu.’ 23 Diawu Yave bevanga muingi mimbikudi miaku batuba luvunu ayi Yave betuba ti wunkuiza kutuadisa ziphasi.”
24 Zedekia muana Kenaná wufikama ḿbikudi Mikaía, wumviva mbata ayi wutuba: “Ngie widi mu kutuba ti Yave bebotula pheviꞌandi yinlongo kuidi minu ayi bevana yawu kuidi ngiewu?” 25 Ḿbikudi Mikaía wuntambudila: “Ngie wala kikinina mu mawu bo wala tomba kivinga ku khati nzo muingi wusuamina.” 26 Bosi Acabi ntinu wu Isaeli wutuba: “Natanu ḿbikudi Mikaía kuidi Amoni mfumu yi divula ayi kuidi Joás muana ntinu 27 ayi lufueti bakamba: ‘Buakabu butubidi ntinu: “Tulanu ḿbikudi Mikaía mu buloku ayi dekulanu mapha ayi nlangu lunkuiza mvana nate yinkuiza vutuka mu ndembama.”’” 28 Vayi ḿbikudi Mikaía wutuba: “Ngie kuvutuka mu ndembama a mfumu, buna mambu yibe tuba masa fumina ko kuidi Yave.” Mikaía wubue tuba: “Yuwanu benu boso.”
29 Bosi Acabi ntinu wu Isaeli ayi Yozafati ntinu wu Yuda, batombuka ku Ramoti-Gileade. 30 Acabi ntinu wu Isaeli wukamba Yozafati: “Minu yemvuata bikhutu binkaka bo tuenkuenda mu mvita, muingi babika kumbakula. Vayi ngiewu fueti vuata bikhutu biaku mi ntinu.” Mu phila ayoyo, Acabi ntinu wu Isaeli wuvuata bikhutu binkaka muingi kunuana mvita. 31 Ntinu Silia wukamba mambu amama kuidi 32 di zimfumu ziandi zi masodi baba diatisanga makalu ma mimvita: “Bikanu kunuanisa ni mutu wunkaka, vayi nuanisanu to ntinu wu Isaeli.” 32 Bo zimfumu zi masodi ma basi Silia baba diatisanga makalu ma mimvita bamona Yozafati, batuba: “Bukiedika awowo nandi ntinu wu Isaeli.” Bosi bayenda ko kaba muingi kunnuanisa. Mu kibila akiokio, Yozafati wutona kutenduka ayi wudinda lusalusu. 33 Bo zimfumu zi masodi ma makalu ma mimvita ma basi Silia bazaba ti nandi kasa ba ko ntinu wu Isaeli, babika kubue nkuka.
34 Vayi disodi dimueka musi Silia mu kinzimbukulu wukuba didionga, ditobula kikhutu ki kisengu ki ntinu Acabi ayi dinkota mu nyitu. Bosi ntinu wukamba disodi diaba diatisanga dikalu diandi di mvita: “Mbotula va kibuangu kidi mvita kibila yibe vangana beni phasi.” 35 Mu kilumbu beni mvita wuyiza ba beni wungolo ayi batelimisa Acabi ntinu wu Isaeli, mu dikalu diandi di mvita. Nandi waba tala ku khonzo kuba masodi ma basi Silia. Mbezꞌandi yaba kumba beni menga ayi wuyiza fua va masika. 36 Va khotolo muinya bavana ndubu ayiyi kuidi masodi ma basi Isaeli: “Vutukanu mu mavula minu, kadika mutu kavutuka ku kizunga kiandi.” 37 Bo ntinu Acabi kafua, bannata ku Samalia ayi banzikila kuna. 38 Bo balava dikalu di mvita ku ditanga diba ku Samalia, zimbua bavenda menga ma ntinu Acabi, dedi bo Yave kabikudila ayi zindumbaleta bayobidila vana.
39 Mambu mankaka matedi kinongo ki ntinu Acabi, mamoso kavanga, nzo katungisa mu kusadila ziphunzi zi nzau, mavula moso katungisa, madi masonama mu buku yi binongo bi mintinu mi Isaeli. 40 Bo Acabi kafua muanꞌandi Acazia wuyiza ba ntinu va mvingiꞌandi.
41 Yozafati muana Aza wuyiza ba ntinu wu Yuda, mu mvu wunna wu luyalu lu Acabi ntinu wu Isaeli. 42 Yozafati wuba 35 di mimvu, bo kayiza ba ntinu ayi wuyadila mu 25 di mimvu ku Yelusalemi. Dizina di mamꞌandi diba, Azuba ayi Azuba wuba muana wu Sili. 43 Yozafati wulandakana kifuani kimboti ki tatꞌandi Aza, nandi kasa vekuka ko ayi wuvanga mambu masulama va mesu ma Yave. Vayi kasa tulula ko bibuangu binlongo ayi dikabu ditatamana kuvana minkhailu ayi kubasisa muisi widi mfimbu wumboti mu bibuangu beni binlongo. 44 Yozafati wuba mu ndembama na ntinu wu Isaeli. 45 Mambu mankaka matedi kinongo ki ntinu Yozafati, mambu ma kukuitukila kavanga ayi mimvita kanuana, madi masonama mu buku yi binongo bi mintinu mi Yuda. 46 Nandi mvandi wukukisa batu basobila mu luyalu lu tatꞌandi Aza, baba vanganga kindumba ku tempelu.
47 Mu thangu beni ku Edom, kusa ba ko ntinu. Nyadi nandi waba tuadisanga buka ntinu.
48 Yozafati mvandi wuvanga makumbi ku Tarsi ayi wufila mawu ku Ofir muingi kuelanda wola. Vayi makumbi beni ma sinda ku Eziom-Geber. 49 Acazia muana wu Acabi wukamba Yozafati: “Bika bisadi biama benda mu makumbi na bisadi biaku,” vayi Yozafati wumanga.
50 Bosi Yozafati wuyiza fua ayi banzikila ku divula di khayꞌandi Davidi. Muanꞌandi Jeorão wuyiza ba ntinu va mvingiꞌandi.
51 Acazia muana wu Acabi, wuyiza ba ntinu wu Isaeli ku Samalia mu mvu 17 wu luyalu lu Yozafati ntinu wu Yuda ayi Acazia wuyadila Isaeli mu mimvu miodi. 52 Nandi wuvanga mambu mambi va mesu ma Yave, wulandakana kifuani kimbi ki tatꞌandi, mamꞌandi ayi wulandakana kifuani ki Yelobuami muana wu Nebati no wuvanga Isaeli kusumuka. 53 Acazia waba buongiminanga Baal. Mu phila ayoyo, wufinga Yave Nzambi yi Isaeli dedi buvangila tatꞌandi Acabi.