Deutelonomi
31 Bosi Mose wutelama vantuala dikabu dioso di Isaeli ayi wuba kamba mambu amama, 2 mu kutuba: “Bubu minu yeka 120 di mimvu, yilendi bue nunga ko ku lutuadisa, kibila Yave wukhamba: ‘Ngie walasa sabuka ko muila wu Yolidani.’ 3 Yave Nzamb′inu, nandi wunkuiza ba vantual’inu ayi nandi wala tulula zimbeni zinu zioso, ayi benu luala vua ntot′awu. Yosua nandi wala lutuadisa muingi kusabuka muila dedi bo Yave katubila. 4 Yave wala bavangila momawu mambu kavangila Siom ayi Ogue mintinu mi zi amoreu, ayi ntoto′awu bo kaba tulula. 5 Yave wala lusadisa kununga makabu beni, ayi benu lufueti vangila mawu mu kulandakana zithumu zio yiluvana. 6 Banu kibakala ayi mangolo. Bikanu ku bamona boma ayi bikanu kukuazuka, kibila Yave Nzamb′inu nandi wala ba vantual′inu. Nandi kalasa lubika ko ayi kalasa lukuekula ko.”
7 Bosi Mose wutumisa Yosua ayi wunkamba mambu amama vantuala dikabu dioso: “Ba kibakala ayi mangolo, kibila ngie wunkuiza tuadisa dikabu muingi bakota ku ntoto Yave Nzambi kakanikisa kuidi zikhaya zinu, ayi ngie wunkuiza bavana wawu muingi wuba kiuka kiawu. 8 Yave wunkuiza ba vantual′aku ayi nandi wala tatamana ku kusadisa. Nandi kalasa ku kuekula ko, diawu bika kumona boma ayi bika kukuazuka.”
9 Bosi Mose wusonika Minsiku amiomio ayi wuvana miawu kuidi zinganga nzambi, zilevita baba natanga Kasu yi Luwawanu yi Yave ayi kuidi bakulutu boso ba Isaeli. 10 Mose wuba kamba: “Kutsuka kadika sambuadi di mimvu, mu mvu wu kufuta zipholo, bo lumvanga Nkungi wu Zitenda, 11 bo basi Isaeli bala kuendanga vantuala Yave Nzamb′inu, va kibuangu nandi kankuiza sola muingi lumbuongiminanga, lufueti tanganga Minsiku amiomio muingi dikabu dioso bayuwa. 12 Kutikisa dikabu dioso, kuba kuandi babakala, bakietu, bana ba bilezi ayi zinzenza bankalanga mu mavula minu, muingi bayuwa ayi balonguka matedi Yave Nzamb′inu, ayi bankinzika muingi batumukina mambu moso madi mu Minsiku amiomio. 13 Bosi bana binu bakhambu zaba Minsiku amiomio, bala kuwa ayi bala longuka kukinzika Yave Nzamb′inu, bilumbu bioso luala zingila ku ntoto luala vua widi ku khonzo yinkaka yi muila wu Yolidani.”
14 Bosi Yave wukamba Mose: “Kilumbu kiaku ki kufua kima fikama. Tela Yosua ayi yendanu ku tenda yi lukutukunu, muingi minu yimbieka ntuadisi.” Diawu Mose ayi Yosua bayendila ku tenda yi lukutukunu. 15 Yave wumonika ku tenda mu dituti, ayi dituti beni disikama va khotolo tenda yi lukutukunu.
16 Bosi Yave wubue kamba Mose: “Kilumbu kiaku ki kufua kima fikama, ayi dikabu adidi bankuiza vanga kitsuza ki kiphevi, mu kubuongimina zinzambi zio makabu madi mafikama bambuongiminanga. Bawu bala kukhuekula ayi bala levula luwawanu yivanga yawu. 17 Mu thangu beni minu yala kuba dasukila, yala kuba kuekula ayi yala kuba banda mbusa nate bala mana kufua. Bosi bo bala viokila mu mambu mawombo maphasi, bawu bala tuba: ‘Ḿba Nzambi wutuyekula diawu mambu moso amama maphasi madi mu kutumonikina.’ 18 Vayi minu yala tatamana kuba banda mbusa mu thangu beni, mu kibila ki mambu moso mambi bavanga mu kubuongimina zinzambi zinkaka.
19 “Buabu sonika nkunga awowo ayi longa wawu kuidi basi Isaeli, muingi wawu wusadisa dikabu dioso di Isaeli kutebukanga monyo. 20 Bo minu yala kuba nata ku ntoto yikanikisa zikhaya ziawu, ntoto wuwedi leta ayi wika ayi bo bawu bala tona kubaka ndandu mu biuma bidi ku ntoto beni, bawu bala kumbalukila ayi bala tona kubuongimina zinzambi zinkaka. Mu phila ayoyo, bawu bala kundenza ayi bala levula luwawanu luama. 21 Bo bawu bala viokila mu ziphasi, nkunga awowo wala kuba tebula monyo (bana bawu balendi zimbakana ko wawu), kibila yizebi mayindu mambi badi ava bawu kukota ku ntoto yiba kanikisa.”
22 Diawu Mose kasonikina nkunga awowo muna thangu beni ayi wulonga wawu kuidi basi Isaeli.
23 Bosi Nzambi wubieka Yosua, muana wu Num ayi wunkamba: “Ba mangolo ayi kibakala, kibila ngiewu wunkuiza tuadisa basi Isaeli muingi bakota ku ntoto yiba kanikisa, ayi minu yala tatamana kuba yaku.”
24 Bo Mose kamana kusonika Minsiku mioso mu buku, 25 Mose wuvana nsiku awuwu kuidi basi Levi baba natanga kasu yi luwawanu yi Yave: 26 “Bonganu buku ayiyi yi Minsiku ayi tulanu yawu va khonzu kasu yi luwawanu yi Yave Nzamb′inu, muingi yiba mbangi kuidi benu. 27 Kibila minu yizabizi ti benu luidi ntu ngolo ayi lutianga ko kutumukina. Buabu, boti benu lutumukinanga ko Yave bo minu yikhidi wumonyo, yidi lufiatu ti mawu mala buelama bo minu yala fua. 28 Kutikisanu bakulutu ba mimvila minu ayi zimfumu zinu, muingi minu yiba kamba mambu moso amomo. Ayi bika diyilu ayi ntoto bita kimbangi mu mawu. 29 Kibila minu yizebi buboti ti bo yinkuiza fua, benu luala vanga mambu mawombo mambi ayi lualasa tumukina ko mambu minu yilukamba. Mu kibila akiokio, benu luala viokila mu mambu mawombo maphasi mu thangu beni, kibila benu luala vanga mambu mawombo mambi va meso ma Yave, ayi lualasa kummonisa ko lukinzu mu mambu luala vanganga.”
30 Bosi, Mose wubue vutukila mambu madi mu nkunga beni vantuala dikabu di Isaeli, kutonina va thonono nati kutsuka: