Yosua

20 Bosi Yave wukamba Yosua: 2 “Kamba basi Isaeli: ‘Lufueti sola mavula ma kutinina, dedi bo yilukambila mu nzila Mose, 3 muingi woso mutu wumvonda wadi yandi mukhambu lutia, katinina kuna. Ayi mavula beni mankuiza ba kibuangu ki kutinina, muingi musi dikanda di mutu befua kabika kuvonda mutu bevonda wadi yandi. 4 Mutu wumvonda wadi yandi mukhambu lutia, kafueti tinina mu mavula beni ayi bo kamvitila va muelu divula, nandi kafueti zabikisa kuidi bakulutu ba divula beni mambu ma bemonika. Bosi bakulutu bafueti kunyamba ayi kumvana kibuangu muingi kakala. 5 Boti musi dikanda di mutu befua wunkuka mutu bevonda musi dikanda diandi, bakulutu ba divula balendi kuekula ko mutu beni mu mioko miandi, kibila nandi bevondila wadi yandi mukhambu lutia ayi kabasa kunlendanga ko. 6 Mutu bevonda wadi yandi mukhambu lutia, kafueti kala ku divula beni di kutinina, nate kala kuenda vantuala mimfundisi mi dikabu ayi kafueti tatamana kukala kuna nate nkulutu wu zinganga nzambi kala fua. Vayi bo nkulutu wu zinganga nzambi kamfua, nandi kalenda vutuka ku nzoꞌandi ku divula kaba kalanga.’”

7 Diawu basodila divula di Kedes didi ku Ngalili ku kibuangu kidi miongo kidi ku kizunga ki mvila wu Nafitali, Sikem kibuangu kidi miongo kidi ku kizunga ki mvila wu Efraim ayi Kiriati-arba voti Hebrom, kibuangu kidi miongo kidi ku kizunga ki mvila wu Yuda. 8 Ku kizunga ki Yolidani ku khonzu leste yi divula di Yeliko, bawu basola mavula maba ku thandu, divula di Bezer didi ku kizunga ki mvila wu Rubem, Ramoti ku Ngileadi didi ku kizunga ki mvila wu Gadi ayi Golam ku Bazan didi ku kizunga ki mvila wu Manase.

9 Amomo mawu mavula basola muingi basi Isaeli voti zinzenza bankalanga yawu batininanga, bo mutu kamvonda wadi yandi mukhambu lutia, muingi musi dikanda di mutu kabe vonda kabika kumvonda, ava nandi kukuenda vantuala mimfundisi mi dikabu.