Mintuadisi
13 Basi Isaeli babue vutuka kuvanga mambu mambi va meso ma Yave. Mu kibila akiokio, Yave wubika muingi basi Filistea baba tuadisa ziphasi mu 40 di mimvu.
2 Mu thangu beni, ku divula di Zorá kuba dibakala dimueka baba tedilanga Manoá wubutukila mu mvila wu Dan. Nkazi′andi kasa buta ko ne muana, kibila wuba kisita. 3 Kilumbu kimueka mbasi yi Yave yimonikina nkazi wu Manoá ayi wunkamba: “Kheti ngie widi kisita, vayi wunkuiza buta muana. 4 Diawu ba keba keba muingi wubika dia bidia bikhambulu bivedila ayi kunua vinyu voti malavu mankaka mankolusuanga. 5 Kibila ngie wunkuiza ba buemba ayi wunkuiza buta muana dibakala. Muana beni wunkuiza ba nazireu tona mu kivumu, diawu wulendi kumvuka ko minlengi kibila nandi Nzambi kankuiza sadila muingi kuvukisa basi Isaeli mu mioko mi basi Filistea.”
6 Bosi nkazi wu Manoá wukamba nnuni′andi: “Kisadi ki Nzambi yikiedika bekuiza yoluka yama, nandi widi buka mbasi yi Nzambi, minu yisa nkuvula ko kuidi ka befumina ayi kasa khamba ko dizina diandi. 7 Vayi dibakala beni bekhamba mambu amama: ‘Ngie wunkuiza ba buemba ayi wunkuiza buta muana dibakala. Wulendi dia ko bidia bikhambulu bivedila ayi kunua vinyu voti malavu mankaka mankolusuanga. Kibila muana wunkuiza buta, wunkuiza ba nazireu yi Nzambi kutona mu mbutukulu′andi nate kala fua.’”
8 Vayi Manoá wusambila kuidi Yave mu kutuba: “A Yave lemvuka, bue fila kisadi kiaku muingi katuzabikisa mambu mbi tufueti vanga matedi muana wunkuiza butuka.” 9 Nzambi wuyuwa mambu Manoá kandinda, diawu kabue fidila mbasi′andi kuidi nkazi wu Manoá bo nandi kaba ku tsola. Vayi muna thangu beni, Manoá kasa ba ko va kimueka na nkazi′andi. 10 Nkazi wu Manoá wuduma kuba nnuni′andi ayi wunkamba: “Yiza mona, dibakala beni mabue kuiza.”
11 Bosi Manoá wuyenda na nkazi′andi. Ayi bo bavitila va kibuangu kiba dibakala beni, Manoá wunyuvula: “Ngie wuyolukidi na nkazi′ama?” Dibakala beni wumvutudila: “Ngete, minu.” 12 Manoá wuyuvula dibakala beni: “Bo mambu wutubidi mala salama, buidi tufueti konzudila muana beni ayi mambu mbi kala vanga?” 13 Mbasi yi Yave yikamba Manoá: “Nkazi′aku kafueti vanga mambu moso yinkembi. 14 Nkazi′aku kalendi dia ko bidia bikhambulu bivedila, ne kudia kiuma ki nti wu makundi ma vinyu, kunua vinyu voti malavu mankaka mankolusuanga.”
15 Manoá wukamba mbasi yi Yave: “Lemvuka, bika kufika kuenda, kibila befu tua kulambila khombo.” 16 Mbasi yi Yave yikamba Manoá: “Minu yentemina, vayi yisinkuiza dia ko bidia luenlamba. Vayi ngie wulenda vana khombo beni nkhailu wuviku kuidi Yave.” Manoá kasa zaba ko ti dibakala beni wuba mbasi yi Yave. 17 Bosi Manoá wuyuvula mbasi yi Yave: “Dizina diaku nani? Muingi tukuzitisa bo mambu wutubizi mala salama.” 18 Vayi mbasi yi Yave yikamba Manoá: “Dizina diama didi di kukuitukila, buabu kibila mbi wuntombila kuzaba dizina diama?”
19 Bosi Manoá wubonga khombo ayi nkhailu wu zitheti ayi wuvana biawu kuidi Yave va mbata dimanya. Ayi mbasi beni wuvanga mambu makukuitukila vantuala Manoá ayi nkazi′andi. 20 Bo mbazu yaba lema va kikumu, Manoá ayi nkazi′andi bamona mbasi yi Yave kutombuka ku diyilu va khati mbazu beni. Ayi bo bawu bamona mambu amomo, mu thinu bafukama ayi bayinika bizizi biawu vatsi. 21 Bosi Manoá ayi nkazi′andi basa bue mona ko mbasi yi Yave. Mu phila ayoyo, Manoá wuvisa ti yiba mbasi yi Yave. 22 Bosi Manoá wukamba nkazi′andi: “Befu tuemfua, kibila tuma mona Nzambi.” 23 Vayi nkazi′andi wunkamba: “Boti Yave bekana kutuvonda, khanu kasa kikinina ko nkhailu wuviku ayi wu zitheti tuma kumvana. Mvandi khanu kasa tuzabikisa ko mambu moso amomo tuma mona.”
24 Bo vavioka mua thangu, nkazi wu Manoá wubuta muana dibakala ayi wumvana dizina Sansão. Ayi bo muana beni kaba konzuka, Yave wutatamana kunsakumuna. 25 Buviokila thangu, bo Sansão kaba ku Maané-Dam kibuangu kidi va ndeku Zorá ayi Estaoli, phevi yinlongo yi Yave yitona kuntuadisa.