Buku Yitheti yi Samueli
1 Vaba dibakala dimueka baba tedilanga Elkana waba kalanga ku Zofim ku kizunga kidi miongo ki mvila wu Efraim. Nandi wuba muana wu Jeroão, Jeroão wuba muana wu Eliú, Eliú wuba muana wu Toú, Toú wuba muana wu Zufi, widi mu mvila wu Efraim. 2 Elkana wuba bakietu buadi: wumueka baba kuntedilanga Ana ayi wunkaka Penina. Penina wuba bana vayi Ana wuba kisita. 3 Kadika mvu Elkana waba botukanga ku divula diandi ayi waba tombukanga ku Silo muingi kue buongimina Nzambi ayi kuvana Yave minkhailu. Ku Silo kuawu Hofni ayi Fineia bana babuadi ba Eli baba vangilanga Yave kisalu ki nganga nzambi.
4 Kilumbu kimueka bo Elkana kaba vana nkhailu, nandi mvandi wuvana kuidi Penina ayi bana bandi biuma muingi bavana nkhailu. 5 Vayi wuvana Ana biuma bilutidi muingi kavana nkhailu, kibila nandi kaba luta zolanga. Vayi Yave kasa sadisa ko Ana kubuta bana. 6 Ayi mband′andi Penina waba kumvuezanga beni, kibila Yave kasa kunsadisa ko kubuta bana. 7 Mawu Penina kaba vanganga kadika mvu. Bo Ana kaba tombukanga ku nzo yinlongo yi Yave, Penina waba kumvuezanga beni. Mu kibila akiokio, Ana waba dilanga beni ayi kabasa dianga ko. 8 Vayi nnuni′andi Elkana wunyuvula: “Ana kibila mbi wididi mu kiunda? Kibila mbi widi mu kudidila ayi wukhambu dila? Bika kudila, minu yidi yaku. Mawu malutidi kena kubuta 10 di bana.”
9 Bo bamana kudia ayi kunua ku Silo, Ana wutelama. Eli wuba wukala va kikundu kiandi vandeku khotolo yi nzo yinlongo yi Yave. 10 Ana wuba beni kiunda ayi wutona kusambila kuidi Yave ayi waba dila. 11 Ayi nandi wuvanga tsila ayiyi: “A Yave Nzambi nkua minkangu, ngie kusadisa kisadi kiaku mu ziphasi azizi ayi ngie kutsadisa kubuta muana dibakala, minu yala kumvana kuidi ngie Yave muingi ka kusadila mu luzingu luandi loso, ayi balasa kunzenga ko minlengi.
12 Bo Ana kaba vanga nsambu awowo kuidi Yave, Eli waba sikika thalu′andi mu bididi bi Ana. 13 Ana waba vangila nsambu beni kutsi ntima ayi bididi biandi biawu to biaba nyikuka. Bo Eli kamona mawu, nandi kamuena ti Ana wuba wukolo. 14 Diawu Eli kakambila Ana: “Mbi bekuiza sala akuku ngie bemana kukolo bobo malavu? Lembu kubue nuanga vinyu.” 15 Vayi Ana wumvutudila: “A mfumu, minu yisa nua ko vinyu ne malavu mankaka mankolusuanga, vayi yidi beni mu kiunda ayi yidi mu kuyekudila Yave bizitu biama. 16 Minu yisi ko nkietu widi zikhadulu zimbi, vayi yidi mu kuvangila nsambu awuwu, kibila yidi beni kiunda.” 17 Bosi Eli wukamba Ana: “Yenda mu ndembama, ayi bika Nzambi yi Isaeli katambudila nsambu′aku.” 18 Ayi Ana wumvutudila: “Bika kisadi kiaku kabaka lunungu va mesu maku.” Bosi Ana wuyenda, wudia ayi kasa bue ba ko mu kiunda.
19 Mu kilumbu kilanda va meni, Elkana ayi dikanda diandi babuongimina Yave, bosi bavutuka ku nzo′awu ku Ramá. Elkana wubundana nyitu na nkazi′andi Ana, ayi Yave wuvutula thalu′andi kuidi Ana. 20 Bosi Ana wuba buemba ayi bo vavioka mua thangu, nandi wubuta muana dibakala ayi wumvana dizina Samueli.* Kamvanina dizina adiodio kibila wutuba: “Nandi minu yidinda kuidi Yave.”
21 Bo thangu yikuvana minkhailu yifuana, Elkana ayi dikanda diandi batombuka ku Silo muingi kue vana Yave nkhailu baba vananga kadika mvu. Nandi wuvana nkhailu beni muingi kudukisa tsila kavanga. 22 Vayi Ana kasa kuenda ko kibila wukamba nnuni′andi: “Bo yala lembusu muana mabeni, minu yala kunnata ku nzo yinlongo yi Yave ayi nandi wala kalanga kuna mu luzingu luandi loso.” 23 Bosi Elkana wukamba Ana: “Vasi diambu ko, kala ku nzo nate wala lembusu muana mabeni. Bika Yave kakusadisa kudukisa tsila wuvanga.” Mu phila ayoyo, Ana wusiala ku nzo ayi wutatamana kukieba muana nate kanlembusu mabeni.
24 Bo kalembusu muana mabeni, nandi wunnata ku Silo ku nzo yinlongo yi Yave. Wunata mvandi muana ngombi widi mimvu mitatu, efa yimueka yi falinya yilutidi yimboti ayi kibasa kinneni ki vinyu. 25 Bosi bavonda muana ngombi beni ayi banata Samueli kuidi Eli. 26 Bosi Ana wutuba: “A mfumu′ami lemvuka. Yinleva phesi mu monyo′ama ti minu nkietu wuba vava waba sambila vantuala Yave. 27 Anunu nandi muana minu yidinda mu nsambu ayi Yave wutambudila nsambu′ama. 28 Diawu yibe kuizila akuku muingi kumvana kuidi Yave. Nandi wunkuiza sadila Yave mu luzingu luandi loso.”
Bosi nandi wufukama vantuala Yave.