Deutelonomi
32 “Bubu, benu boso luidi ku diyilu
Ayi benu boso luidi va ntoto, yuwanu mambu yiku lukamba.
2 Zithuadusulu ziama zinkuiza ba buka mvula;
Mambu yinkuiza tuba mankuiza ba buka binoko;*
Mankuiza ba buka mvula wumbondika nlumba
Ayi buka mvula wumbondika bivatu.
3 Yala zabikisa matedi dizina di Yave.
Zabikisanu mambu ma kukuituka ma Nzambi.
4 Nzamb′itu widi buka Dimanya,* mamoso kamvanganga madi mavedila;
Kibila zinzila ziandi zioso zidi zisonga.
Nzambi widi wukuikama, ayi kavanganga ko mambu makhambulu masonga;
Nandi widi wusonga ayi wukuikama.
5 Baveka bavekuka.
Bawu basi ko bana bandi, ayi baveka badi fotu.
Bawu badi mbandu yidi ntu ngolo ayi bavekuka.
6 Bukiedika ti ayoyo yawu phila lufueti tadila Yave,
Benu dikabu didi ntu ngolo ayi dikhambulu nduenga?
Kasi ko nandi Tat′inu wuluvanga,
No wuluvanga ayi wulukitula dikabu?
7 Tebukanu monyo mambu yivanga mu mimvu kumbusa;
Tebukanu monyo mambu mamonika mu thangu yi zikhaya zinu.
Yuvulanu matata minu, ayi bawu bankuiza luzabikisa
Ayi yuvulanu mvandi bakulutu ba dikabu, bawu bankuiza luzabikisa.
8 Bo Nzambi Yilutidi Zangama kavana kadika dikabu kiuka,
Bo kavasa nkuna wu Adami,
Nandi wusikika zindilu zi makabu,
Mu kutadila thalu yi bana ba Isaeli.
9 Kibila Yave nandi vuidi dikabu di Isaeli;
Ayi Yakobi widi kiuka kiandi.
10 Nandi wumbakula ku thandu
Kibuangu kiwedi bibulu binganzi.
Nandi wunzungidila, muingi kabika monikina ni diambu dimbi,
Ayi wunkieba buka kizunga ki dieso diandi.
11 Dedi bo mbemba kanlongisilanga bana bandi kudumuka,
Yawu yinkualumunanga mavavi mandi,
Muingi kusadisa bana mu thangu bambua,
12 Yave to waba kuntuadisanga;
Vasa ba ko ni nzambi yinkaka muingi kunsadisa.
13 Nandi wundiatisa mu bibuangu bi zangama,
Wumvana bidia bi thandu.
Wumvana wika* yimbasikilanga mu mamanya
Ayi nzeta yimbasikilanga mu mamanya,
14 Mantenga ma zingombi ayi leta yi mamemi,
Va kimueka na mamemi malutidi mamboti,
Mamemi ma Bazan ayi zikhombo,
Va kimueka na trigu yilutidi yimboti;
Mvandi wukuvana vinyu muingi wunua.
15 Bo Jezurum katola, nandi wubalukila mfumu′andi.
Bukiedika, ngie wudila ngolo, wutola ayi wuyiza ba mangolo.
Mu phila ayoyo, nandi wubalukila Nzambi wumvanga,
Ayi wulenza Dimanya dio dimvukisa.
16 Benu lundasula mu kubuongimina zinzambi zinkaka;
Lumfinga mu kusadila biuma kanlendanga.
17 Benu luvana minkhailu kuidi ziphevi zimbi, kubika kuandi kuidi Nzambi,
Kuidi zinzambi zio benu lukhambu zaba,
Kuidi zinzambi zimona,
zinzambi zio zikhaya zinu bakhambu zaba.
18 Benu luzimbakana Nzambi yikiedika no widi buka Dimanya,
Nzambi no wuluvana monyo.
19 Bo Yave kamona mawu, nandi wuba banda mbusa
Kibila bana bandi ba babakala ayi ba bakietu, bamfinga.
20 Diawu nandi katubila: ‘Minu yisinkuiza bue basadisa ko;
Yinkuiza mona mambu mbi mankuiza bamonikina.
Kibila badi mbandu yidi ntu ngolo,
Badi bana bakhambulu bakuikama.
21 Bawu ba mandasula mu kibila ki zinzambi zi luvunu;
Ba mamfinga mu kubuongimina bitumba.
Diawu yinkuiza sodila dikabu dinkaka, muingi kuba vanga baba kiphala;
Minu yinkuiza bafinga, mu kusola dikabu dikhambulu beni nkinza.
22 Kibila nganzi′ama yinkuiza ba buka mbazu,
Mbazu yinkuiza lema nate ku Biziami,
Mbazu beni yinkuiza vika ntoto ayi bivatu
Mvandi yinkuiza vika miongo.
23 Yala buela ziphasi ziawu;
Yala sadila madionga mami moso, muingi kuba tovula.
24 Bawu bala ba bavonga mu kibila ki nzala,
Bala fuila mu zifebre ayi mu ziphasi.
Yala kuba fila bibulu binganzi,
Ayi zinyoka zinganzi muingi kuba tuadisa ziphasi.
25 Ku nganda nzo, bala vondila matoko mu mbedi;
Bana ba bilezi ayi bikhupa
Bala mona boma ku khati nzo,
Bana ba tsombi ayi biboba, mvandi bala mona boma.
26 Khanu minu yituba: “Yinkuiza batiamuna;
Yinkuiza bavanga bazimbala va ntoto.”
27 Vayi yisa vangila ko mawu, mu kibila ki mambu zimbeni zinu balenda tuba,
Kibila bawu balenda visila mu phila yimbi.
Bawu balenda tuba: “Befu tuma banunga;
Kasi ko Yave bevanga mambu moso amomo.”
28 Kibila dikabu di Isaeli, badi batu bakhambu kuwanga malongi,
Ayi bawu basi ko phisulu.
29 Boti bawu badi nduenga, khanu bayindula mu mambu amomo.
Khanu bayindula mu mambu mankuiza bamonikina.
30 Bukiedika ti mutu wumueka kalenda nunga 1.000 di batu,
Ayi batu buadi balenda nunga 10.000 di batu?
Malendi ba ko mukhambu lusadusu lu Nzambi widi buka Dimanya.
Malenda monikina to, Yave na kubika.
31 Kibila nzambi′awu, kasi ko buka Nzamb′itu widi buka Dimanya,
Ayi zimbeni zitu bazebi mawu buboti.
32 Kibila bawu badi mavanga mambi buka basi Sodoma,
Ayi badi buka basi Ngomola.
Makundi mawu ma vinyu madi biyimbu,
Ayi madi ndudi.
33 Vinyu′awu yidi buka yawu bavangila mu kiyimbu ki zinyoka,
Kiyimbu ki zinyoka zinganzi.
34 Nzambi wummonanga mambu moso mambi basi Isaeli bamvanganga,
Nandi wuma sueka buboti mu bilundulu biandi.
35 Mu thangu yifuana, minu yala kuluvutudila mambi moso lumvanganga,
Kibila kilumbu kinu ki ziphasi kima fikama,
Ayi ziphasi ziala kulumonikina,
Zidi mu kukuiza mu thinu.’
36 Yave wala fundisa dikabu diandi,
Vayi bo kala mona ti bawu bama dekuka,
Ayi ti bama siala to batu bakhambulu mangolo ayi bakhambulu lusadusu,
Nandi wala mona kiadi bisadi biandi.
37 Bosi nandi wala tuba: ‘zinzambi ziawu kuidi zidi,
Dimanya dio bawu bamfiatilanga,
38 zinzambi zio bawu bankabilanga mafuta ma bibulu,
Ayi zio bamvananga minkhailu mi malavu?
Bika bawu biza muingi kulusadisa.
Bika bawu baba kisuamunu kinu.
39 Buabu monanu, minu to yidi Nzambi yikiedika.
Vasi ko zinzambi zinkaka kubotula kuandi minu.
Minu yidi mangolo ma kuvonda ayi ma kuvana monyo.
Ma kulueka ayi ma kubelusa,
Ayi vasi ko ni mutu wulenda kulukula mu mioko miama.
40 Kibila yinnanguna koko ku yilu,
Ayi yinleva phesi mu kutuba: “Minu yinleva phesi mu luzingu luama lu mvu ka mvu.”
41 Bo yala lengula mbedi′ama yinlezama,
Ayi bo yinkuiza kubama muingi kufundisa,
Minu yinkuiza vutudila mambi kuidi zimbeni ziama,
Ayi kuidi batu ba kundendanga.
42 Madionga mami mankuiza tengula menga,
Ayi mbedi′ama yinkuiza vonda batu,
Madionga mami, mankuiza wala menga ma batu ayi ma mimvika,
Ayi mbedi′ama, yinkuiza zenga mintu mi mintuadisi badi zimbeni.’
43 Yangalalanu makabu moso, va kimueka na dikabu diandi,
Kibila nandi wala vutudila mambi mu kibila ki menga ma bisadi biandi,
Wala vutudila mambi kuidi zimbeni ziandi,
Ayi wala vedisa ntoto wu dikabu diandi.”
44 Mu phila ayoyo, Mose ayi Ozeia* muana Num, bavutukila mambu moso madi mu nkunga awowo vantuala dikabu. 45 Bo Mose kamana kutuba mambu moso amomo vantuala dikabu di Isaeli, 46 nandi wuba kamba: “Yindulanu mu mambu moso amomo yima lukamba bubu, ayi zabikisanu mawu kuidi bana binu, muingi bawu batumukina mambu moso madi mu Nsiku awuwu. 47 Kibila masi ko mambu maphamba, vayi madi tsundu muingi luzinga ayi mu nzila mambu amomo, benu mulenda zinga mimvu miwombo, ku ntoto wo lunkuiza vua widi ku khonzo yinkaka yi muila wu Yolidani.”
48 Muna kilumbu beni, Yave wukamba mambu amama kuidi Mose: 49 “Tombuka ku mongo widi ku kizunga ki Abarim, mongo wu Nebo widi ku ntoto wu Moabi, vantuala divula di Yeliko, ayi tala ntoto wu Kanani wo yinkuiza vana muingi wuba kiuka ki basi Isaeli. 50 Bosi ngie wunkuiza fuila kuna ayi bala kuzikila dedi bo bazikila zikhaya zinu, dedi bo khomb′aku Aloni kafuila ku mongo Hor, ayi banzikila dedi bo bazikila zikhaya ziandi, 51 kibila benu lusa ba ko bakuikama kuidi minu vantuala basi Isaeli, mu thangu lubasisa nlangu wu Meribá ku Kades, kibuangu kidi ku thandu yi Zim, mvandi lusa kunzitisa ko vantuala dikabu. 52 Ngie wunkuiza mona ntoto yinkuiza vana basi Isaeli ku kinanu, vayi wisinkota ko kuna.”