ESODU

1 Amama mawu mazina ma bana ba Isaeli bayenda na Yakobi ku Ngipiti, mu kutadila dikanda di kadika muana: 2 Rubem, Simioni, Levi, Yuda, 3 Isakali, Zebuloni, Benyamini, 4 Dan, Nafitali, Gadi ayi Azer. 5 Thalu yoso yi dikanda di Yakobi bayenda yandi ku Ngipiti, yiba 70 di batu. Mu thangu beni, Yozefi waba zingilanga ku Ngipiti. 6 Bosi Yozefi, zikomba ziandi ayi mbandu’awu yoso, bafua. 7 Basi Isaeli babuta bana ayi baba tatamana kubuelama. Bawu baba beni mangolo ayi bayiza wala ku Ngipiti.

8 Buviokila thangu, ku Ngipiti kuyiza ba ntinu wunkaka ayi nandi kasa zaba ko ni diambu matedi Yozefi. 9 Diawu ntinu beni kakambila basi Ngipiti: “Talanu, basi Isaeli bama tulutila mu thalu ayi mu mangolo. 10 Buabu tufueti sadila diela muingi tuba vanga babika kubuelama. Kibila kua kuba mvita bawu balenda ba ku khonzu zimbeni zitu, muingi kutunuanisa ayi kukuenda kuawu.”

11 Diawu Falawo kabiekila zimfumu muingi kukuika basi Isaeli bavanga bisalu bingolo. Mvandi baba kuika kutunga divula di Pitom ayi Ramese muingi kulundilanga biuma bi Falawo. 12 Vayi bo baba kuikanga basi Isaeli kuvanga bisalu bingolo, bawu baba luta buelamanga. Mu phila ayoyo, basi Ngipiti baba boma bu basi Isaeli. 13 Diawu babuedila bisalu bingolo kuidi basi Isaeli, ayi bawu bayiza ba mimvika mi basi Ngipiti. 14 Basi Ngipiti bavanga luzingu lu basi Isaeli luba nduli, baba kuba kuikanga kuvanga mateya ayi kuvanga masa ma kutungila zinzo. Mvandi baba kuika kuvanga bisalu ku nsitu ayi mintindu mioso mi bisalu bingolo.

15 Buviokila thangu, ntinu wutumisa Sifrá ayi Puá bakietu ba basi Ebeleo* baba butisanga bankaka. 16 Nandi wuba kamba: “Bo lunsadisa bakietu ba basi Ebeleo kubuta, benu kumona ti bawu bama buta bana ba babakala, lufueti vonda bana beni bo bambutuka. Vayi boti bana ba bakietu bambuta, lufueti bika bana beni bazinga.” 17 Vayi Sifrá ayi Puá baba kinzikanga Nzambi, diawu bakhambu tumukina mambu ntinu kaba kamba. Bawu babasa vondanga ko bana ba babakala. 18 Buviokila thangu, ntinu wubue tumisa Sifrá ayi Puá ayi wuba yuvula: “Kibila mbi benu lukhambu vondila bana ba babakala bo bambutuka?” 19 Bakietu beni bavutudila Falawo: “Bakietu ba basi Ebeleo basi ko buka bakietu ba basi Ngipiti. Kibila bakietu ba basi Ebeleo badi beni mvingu, ayi bannunganga kubuta baveka ava befu kuvitila kuna.”

20 Mu phila ayoyo, Nzambi wumonisa mamboti kuidi bakietu abobo baba butisanga basi Isaeli. Ayi dikabu diaba tatamana kubuelama mu thalu ayi baba beni mangolo. 21 Bosi Nzambi wusakumuna Sifrá ayi Puá, mu kuba sadisa babuta bana bawu veka, kibila bawu baba kinzikanga Nzambi yikiedika. 22 Bosi Falawo wuvana nsiku awuwu kuidi basi Ngipiti: “Benu kumona bakietu ba basi Ebeleo kubuta bana ba babakala, lufueti loza bana beni mu muila wu Nilu, vayi bikanu kuloza bana ba bakietu.”

2 Mu thangu beni, dibakala dimueka musi dikanda di Levi, wukuela muana wu Levi wunkietu. 2 Nkietu beni wuyiza ba buemba ayi wubuta muana wu dibakala. Bo kamona ti muana beni wuba kitoko, nandi wunsueka mu zingonda zitatu. 3 Bo kamona ti kabasa bue nunga ko kusueka muana beni, nandi wubonga kiphanya kivangulu mu mabubu, ayi wuvinda kiawu lukatrão ayi piche. Bosi wutula muana mu kipanyi beni, ayi wuntula va khati bititi bi muila wu Nilu. 4 Vayi khomba wunkietu w muana beni wuba wutelama ku kinanu muingi kumona mambu mankuiza monika.

5 Muana wu Falawo wunkietu, wuyenda ku muila wu Nilu muingi kue yobila ayi bisadi biandi bi bakietu baba mu ndeku muila. Bosi nandi wumona kiphanya kiba va khati bititi, diawu mu thinu katumina bisadi biandi belanda kiphanya beni. 6 Bo kazibula kiphanya beni, nandi wumona muna muana dibakala ayi muana beni waba dila. Muana wu Falawo wummona kiadi, ayi wutuba: “Muana awuwu widi wu basi Ebeleo.”* 7 Bosi khomba wunkietu wu muana beni wukamba muana wu Falawo: “Ngie wuntomba yelanda nkietu musi Ebeleo muingi kayemika muana beni ayi ka kukiebila nandi?” 8 Muana wu Falawo wunkamba: “Ngete.” Bosi mu thinu nandi wuyetela ngudi wu muana beni. 9 Muana wu Falawo wukamba ngudi yi muana beni: “Nata muana awuwu, nyemika ayi khiebila nandi, bosi minu yala kufuta.” Nkietu beni wunata muana ayi wunkieba. 10 Bo muana beni kayonzuka, nkietu beni wuyemfila kuidi muana wu Falawo. Ayi nandi wuyiza ba buka muana wu muana wu Falawo wunkietu, ayi nandi wumvana dizina Mose* ayi wutuba: “Yibe mvanina dizina adiodio, kibila mu nlangu yimbongila.”

11 Bo Mose kayiza ba nkulutu, nandi wuyenda kuba zikhomba ziandi basi Isaeli, ayi wumona ziphasi baba viokila. Mvandi wumona musi Ngipiti waba bula musi Ebeleo. 12 Bo Mose katala ku khonzu lubakala ayi ku khonzu lukietu ayi bo kakhambu mona ni mutu, nandi wuvonda musi Ngipiti bosi wunsueka kutsi nsengisini.

13 Bosi mu kilumbu kilanda, Mose wumona babakala buadi basi Ebeleo baba nuana. Diawu nandi kakambila kuidi no wuba fotu: “Kibila mbi widi mu kubudila khomb’aku?” 14 Dibakala beni wumvutudila: “Nani wukubiekizi mfundisi? Ngie wuntomba kuphonda dedi bo wuvondidi musi Ngipiti?” Mu phila ayoyo, Mose wuba boma ayi wutuba: “Bukiedika babakudi mambu yivengi!”

15 Bosi Falawo wuyiza zaba mambu Mose kavanga, diawu kaba tombila kumvonda. Vayi Mose wutina ayi wuyezingila ku ntoto wu Midian. Bo katuka kuna, nandi wukala va ndeku kisima. 16 Nganga nzambi yi Midian, wuba sambuadi di bana ba bakietu, bawu bayiza va kisima muingi kuwesa bibuangu bibulu bannuinanga nlangu, ayi kuvana mamemi ma tat’awu nlangu muingi banua. 17 Vayi minsungi mi mamemi bavitila vana, ayi dedi bo bubela kivu kiawu, bawu bakukisa bakietu, mu kibila akiokio, Mose wutelama muingi kusadisa bakietu beni, ayi wuvana mamemi nlangu muingi banua. 18 Bo bakietu beni bavutuka ku nzo tat’awu Jetru,* nandi wuba yuvula: “Kibila mbi benu luma fika vutukila ku nzo?” 19 Bawu bavutudila tat’awu: “Musi Ngipiti mueka nandi be tusadisa bo minsungi mi mamemi babe tukuka, nandi mvandi beteka nlangu muingi kuvana mamemi mitu.” 20 Jetru wukamba bana bandi: “Dibakala beni kuidi kadi? Kibila mbi lube khambu kuntuadila? Yentelanu muingi kadia yitu.” 21 Bosi Mose wukikinina kuzingila ku nzo Jetru, ayi wumvana muan’andi wunkietu Zípora muingi kaba nkazi’andi. 22 Buviokila thangu, Zípora wuba buemba ayi wubuta muana dibakala. Bosi Mose wumvana dizina Gerson* ayi wutuba: “Yima mvanina dizina adiodio, kibila minu yidi nzenza ku ntoto wu kinanu.”

23 Bo vavioka thangu yiwombo, ntinu wu Ngipiti wuyiza fua, vayi basi Isaeli batatamana kukuana mu kibila ki buvika ayi mu kibila ki ziphasi baba viokila. Ayi Nzambi yikiedika wuyuwa manyongi mawu mu kibila ki ziphasi baba viokila. 24 Bo Nzambi kayuwa manyongi mawu, nandi wutebuka monyo luwawanu kavanga na Abalahami, Izaki ayi Yakobi. 25 Mu phila ayoyo, Nzambi wuvutula thalu’andi kuidi basi Isaeli, bo kamona ziphasi baba viokila.

3 Mose wuyiza ba nsungi wu mamemi ma nkuekizi’andi Jetru nganga nzambi yi Midiqn. Bo kaba nata mamemi ku thandu ku khonzu oeste, nandi wuvitila ku Horebe mongo wu Nzambi yikiedika. 2 Bosi mbasi yi Yave yimonikina Mose va khati mbazu yaba lema mu mua nti wu zitsendi. Bo Mose katala mua nti beni, nandi wumona ti wawu wabasa via ko. 3 Diawu Mose katubila: “Yamfikama vana muingi kumona buboti mambu amomo ma kukuitukila, ayi kuzaba kibila mbi mua nti beni wu zitsendi wukhambu vila.” 4 Bo Yave kamona ti Mose waba fikama muingi kutala mua nti beni, vana khati mbazu nandi wuntela: “Mose! Mose!” Nandi wuntambudila: “Minu kawu.” 5 Bosi Nzambi wunkamba: “Bika bue fikama. Vula zisandali ziaku, kibila kibuangu widi wutelama kidi kinlongo.”

6 Nzambi wubue tuba: “Minu yidi Nzambi yi tat’aku, Nzambi yi Abalahami, yi Izaki ayi yi Yakobi.” Mu kibila akiokio, Mose wufuka kizizi kiandi kibila wuba boma bu kutala Nzambi yikiedika. 7 Yave wubue tuba: “Yizebi buboti ziphasi dikabu diama badi mu kuviokila ku Ngipiti, ayi yibe kuwa manyongi mawu mu kibila ki bisalu bingolo badi mu kuba kuika kuvanga, ayi yizebi buboti ti badi mu kutovuka. 8 Minu veka yenkuenda kuna muingi kuba kula mu mioko mi basi Ngipiti, ayi kuba botula kuna muingi kuba nata ku ntoto wumboti wuwedi wika* ayi leta, kizunga ki basi kanani, zi hitita, zi amorreu, zi perizeu, zi heveu ayi zi jebuzeu. 9 Buabu yima kuwa manyongi ma basi Isaeli, ayi yima mona phila basi Ngipiti badi mu kuba tuadisila ziphasi. 10 Minu yeku fila kuidi Falawo, ayi ngiewu wunkuiza basisa dikabu diama Isaeli ku Ngipiti.”

11 Bosi Mose wukamba Nzambi yi kiedika: “Minu yidi nani muingi kukuenda kuidi Falawo ayi kubotula dikabu di Isaeli ku Ngipiti?” 12 Nzambi wunkamba: “Minu yala ba yaku, ayi akiki kiawu kidimbu ya kuvana muingi wuba lufiatu ti minu yibe kufila: Bo wala botula dikabu di Isaeli ku Ngipiti, benu luala buongimina Nzambi yikiedika mu mongo awuwu.”

13 Vayi Mose wukamba Nzambi yikiedika: “Buabu minu kukuenda kuidi basi Isaeli ayi kuba kamba: ‘Nzambi yi zikhaya zinu nandi bemfila kuidi benu’, ayi ba kukhuvula: ‘Dizina diandi nani?’ Mbi yifueti kuba kamba?” 14 Bosi Nzambi wukamba Mose: “Minu Yinkuiza Kituka Kioso Kiuma Yitidi Kukituka.” Ayi wubue tuba: “Amama mawu mambu fueti kamba kuidi basi Isaeli: ‘Minu Yinkuiza Kituka, nandi bemfila kuidi benu.’” 15 Bosi Nzambi wubue kamba Mose:

“Amama mawu fueti kamba kuidi basi Isaeli: ‘Yave Nzambi yi zikhaya zinu, Nzambi yi Abalahami yi Izaki ayi yi Yakobi, nandi bemfila kuidi benu.’ Adiodio diawu dizina diama mu zithangu zioso ayi diawu bala thedilanga mu zimbandu zioso. 16 Buabu yenda kutikisa bakulutu ba basi Isaeli ayi wuba kamba: ‘Yave Nzambi yi zikhaya zinu, Nzambi yi Abalahami, yi Izaki ayi Nzambi yi Yakobi, wumbonikini ayi wukhambizi: “Minu yimmonanga mambu moso mambi basi Ngipiti ba luvangilanga. 17 Diawu yintubila: Minu yinkuiza lukula mu ziphasi basi Ngipiti baku lutuadisanga, ayi yala kulunata ku ntoto wu zi amorreu, wu ziperizeu, wu zi heveu ayi wu zi jebuzeu, ntoto wuwedi wika ayi leta.”’

18 “Bawu bala kikinina mambu wala tuba. Ngie wala kuenda vantuala ntinu wu Ngipiti va kimueka na bakulutu ba basi Isaeli. Benu lufueti kunkamba: ‘Yave Nzambi yi basi Ebeleo, bekoluka yitu. Diawu lemvuka, wutuvana nsua muingi tuvanga viage yi bilumbu bitatu ku thandu muingi tuevana minkhailu kuidi Yave Nzamb’itu.’ 19 Vayi yizebi buboti ti, ntinu wu Ngipiti kasinkuiza luvana ko nsua muingi luenda, boti vasimmonika ko diambu dinkuiza nkuika kuvanga mawu. 20 Diawu minu yinkuiza sadila mangolo mami muingi kunuanisa tsi yi Ngipiti mu kuvanga mangitukulu mawombo kuna, ayi mu phila ayoyo, Falawo wala ku luvana nsua muingi lubasika ku Ngipiti. 21 Minu yala vanga muingi dikabu diama diba lunungu va mesu ma basi Ngipiti. Ayi bo luala basika kuna, lualasa kuenda ko mioko yi mioko. 22 Kadika nkietu musi Isaeli kafueti dinda biuma bi wola ayi bi palata, mvandi kafueti dinda bikhutu kuidi musi Ngipiti wunkalanga yandi va nsengi ayi wunkalanga ku nzo’andi. Mvandi lufueti vana biuma beni kuidi bana binu ba babakala ayi ba bakietu. Mu phila ayoyo, luala nata busina bu basi Ngipiti.”

4 Vayi Mose wumvutudila: “Buabu ba kumanga kukikinina mu mambu yintuba, ayi ba kutuba: ‘Yave kasa kumonikina ko.’” 2 Bosi Yave wunyuvula: “Mbi bio bidi mu mioko miaku?” Mose wumvutudila: “Nkawu.” 3 Nzambi wunkamba: “Kuba wawu va tsi.” Mose wukuba nkawu beni va tsi, ayi wawu wukituka nyoka, ayi Mose wutina yawu. 4 Bosi Yave wukamba Mose: “Ḿbuila mu nkila.” Mose wumbuila mu nkila, ayi nyoka beni yibue kituka nkawu va koko kuandi. 5 Nzambi wubue kamba Mose: “Akiokio kidi kidimbu muingi bawu bakikinina ti Yave Nzambi yi zikhaya ziawu, Nzambi yi Abalahami, Nzambi yi Izaki ayi Nzambi yi Yakobi bekoluka yaku.”

6 Yave wubue kamba Mose: “Lemvuka, tula koko kuaku mu bolsu yi kikhutu kiaku. Mu phila ayoyo, Mose wutula koko mu bolsu yi kikhutu kiandi. Ayi bo kabotula, nandi wumona ti dikanda diandi dioso diba buazi bu phembi buka dibungi. 7 Bosi nandi wunkamba: “Bue tula koko kuaku mu bolsu yi kikhutu kiaku, bo Mose katula koko kuandi mu bolsu ayi kabasisa kuawu, nandi wumona ti buazi beni bubeluka. 8 Nzambi wutuba: “Boti bawu basinkikinina ko mu mambu wuntuba, ayi mu kidimbu kitheti, buna bankuiza kikinina mu kidimbu kimmuadi. 9 Vayi, ba kumanga kukikinina mu bidimbu bia bibiodi abiobio ayi mu mambu wuntuba, buna ngie fueti bonga mua nkadu nlangu mu muila wu Nilu ayi kudukula wawu va tsi, ayi nlangu beni wunkuiza kituka menga va tsi.”

10 Bosi Mose wukamba Yave: “A Yave lemvuka, minu yisa zaba ko kukoluka buboti, kuba kuandi mu mimvu kumbusa, ayi kheti bo makoluka yama, kibila yimmonanga phasi kukoluka.” 11 Yave wunkamba: “Nani wuvana mutu munu? Nani wu kumvanganga kaba dibaba voti kufua matu? Nani wu kumvanganga kaba mesu mamboti voti kuba phovo, yisi ko minu Yave? 12 Diawu yenda, minu yinkuiza ba yaku bo wunkoluka, ayi yala kulonga mambu fueti koluka.” 13 Vayi Mose wumvutudila: “A Yave lemvuka, fila kuaku mutu wunkaka.” 14 Bosi Yave wudasukila Mose ayi wunkamba: “Khomb’aku Aloni widi mu mvila wu Levi, wunkolukanga buboti. Nandi widi mu kuiza kudengana, ayi bo kankuiza kumona, nandi wunkuiza yangalala beni. 15 Diawu, nzabikisa mambu moso yima kukamba, ayi bo lunkuiza yoluka na Falawo, minu yinkuiza ba yinu ayi yinkuiza mulonga mambu mufueti tuba. 16 Nandi wunkuiza yoluka va mvingi’aku kuidi dikabu, ayi nandi wunkuiza ba mvual’aku, vayi ngiewu wunkuiza ba buka Nzambi kuidi nandi. 17 Ayi ngie wunkuiza vanga mangitukulu mu kusadila nkawu widi yaku va koko.”

18 Mu phila ayoyo, Mose wuvutuka ku nzo kikuekizi kiandi Jetru, ayi wunkamba: “Minu yintomba kuvutuka ku Ngipiti kuidi zikhomba ziama, muingi kuzaba buidi badidi.” Jetru wukamba Mose: “Yenda mu ndembama.” 19 Bosi Yave wukamba Mose bo kaba ku Midian: “Vutuka ku Ngipiti, kibila baboso baba tomba kukuvonda bafuidi.”

20 Bosi Mose wumakisa nkazi’andi ayi bana bandi mu phunda, ayi bananguka muingi kukuenda ku Ngipiti. Mose mvandi wunata nkawu wu Nzambi yikiedika. 21 Bosi Yave wukamba Mose: “Bo wumvutuka ku Ngipiti, fueti vanga mangitukulu moso mo yi kuvanini mangolo ma kuvanga vantuala Falawo. Vayi minu yinkuiza bika muingi Falawo katatamana kumonisa ntu ngolo, ayi nandi wala kulutula nkaku kubasika ku Ngipiti. 22 Ngie fueti kamba Falawo: “Buakabu butubidi Yave: “Isaeli widi muan’ama wutheti. 23 Yikutuma wubika muan’ama kenda, muingi kambuongimina. Ngie kukhambu vanga mawu, yinkuiza vonda muan’aku wutheti.”’”

24 Mu thangu Mose kaba vanga viage va kimueka na dikanda diandi, ayi bo bavitila va kibuangu ki kuvundila, Yave wumbakula ayi waba tomba kumvonda. 25 Bosi Zípora wubonga dimanya ayi wuzenga pheni yi muan’andi, ayi wubuisa nkanda wu pheni beni kazenga mu malu mandi,* bosi wutuba: “Ngie weka nnuni’ama wu menga.” 26 Mu phila ayoyo, Nzambi wumbika mu ndembama. Ayi mu kibila ki kunzenga pheni, Zípora wutuba: “Ngie weka nnuni’ama wu menga.”

27 Bosi Yave wukamba Aloni: “Yenda ku thandu muingi wedengana Mose.” Mu phila ayoyo, Aloni wuyenda ayi wuyembata va mongo wu Nzambi yikiedika, wumbumbakana ayi wumvana besu. 28 Ayi Mose wuzabikisa Aloni mambu moso Yave kankamba, ayi mvandi wunzabikisa mangitukulu Nzambi kantuma muingi kavanga. 29 Bosi Mose ayi Aloni bayenda ayi bakutakana na bakulutu boso ba Isaeli. 30 Aloni wuba zabikisa mambu moso Yave kakamba Mose, ayi Mose wuvanga mangitukulu vantuala dikabu. 31 Mu phila ayoyo, dikabu bakikinina ti Nzambi wuyoluka na Mose. Bo bayuwa ti Yave wuba tebukila monyo ayi ti wumona ziphasi baba viokila, bawu bafukama ayi bayinika bizizi biawu va tsi.

5 Bosi Mose ayi Aloni bayenda vantuala Falawo, ayi bankamba: “Buakabu butubidi Yave, Nzambi yi Isaeli: ‘Bika dikabu diama benda ku thandu muingi bambuongimina.’” 2 Vayi Falawo wutuba: “Yave widi nani muingi minu yintumukina ayi yibika basi Isaeli benda? Yisa zaba ko Yave, ayi mvandi yisimbika ko basi Isaeli benda.” 3 Vayi bawu bankamba: “Nzambi yi basi Ebeleo* wuyolukidi yitu. Diawu lemvuka, tuntomba kuvanga viage yi bilumbu bitatu ku thandu, muingi kuevana Yave Nzamb’itu minkhailu. Befu kukhambu vanga mawu, nandi wunkuiza tutuadisa bimbevu, voti kutuvonda mu mbedi.” 4 Ntinu wu Ngipiti wuba yuvula: “Mose ayi Aloni, kibila mbi benu muntombila kuvanga dikabu babika kubue sala? Vutukanu benu boso mu bisalu binu.” 5 Falawo wubue tuba: “Benu muntomba batu boso abobo babika kubue sala muingi benda yinu?”

6 Mu kiokiawu kilumbu, Falawo wukamba mambu amama kuidi zimfumu zi Ngipiti, ayi mintuadisi basola va khati basi Isaeli: 7 “Bikanu kubue bavana bititi muingi bavangila mateya. Baveka bafueti tomba bititi bi kuvangila mateya. 8 Vayi lufueti kuba kuika muingi bavanga yoyawu thalu yi mateya baba vanganga. Bikanu kudekula thalu, kibila bawu basiedi ko beni kisalu ki kuvanga, diawu badi mu kutubila: ‘Tuntomba wutuvana nsua muingi tuevana minkhailu kuidi Nzamb’itu.’ 9 Luba buelanu kisalu, muingi babika baka thangu yi kukuwa mambu Mose kantuba.”

10 Mu phila ayoyo, zimfumu zi Ngipiti ayi mintuadisi basola va khati basi Isaeli, baye kamba dikabu: “Buakabu butubidi Falawo: ‘Tuisinkuiza bue luvananga ko bititi muingi muvangila mateya. 11 Benu veka mufueti kue tomba bititi muingi kuvangila mateya, vayi yisinkuiza dekula ko thalu yi mateya mufueti vanga.’” 12 Mu phila ayoyo, dikabu batiamuka mu ntoto woso wu Ngipiti, muingi kue nonga bititi biaba sialanga mu zitsola bo baba velanga mbongu. 13 Zimfumu zi Ngipiti baba kuba kuikanga mu kutuba: “Kadika mutu mu beni kafueti manisa thalu yi mateya kafueti vanga mu kilumbu, dedi bo luaba vangilanga mu thangu baba kuluvananga bititi.” 14 Mvandi zimfumu zi Ngipiti Falawo kabieka muingi kukengidila kisalu, baba bulanga mintuadisi mi Isaeli. Zimfumu beni zi Ngipiti ba bayuvula: “Kibila mbi benu lube khambu dukisila kuvanga thalu yi mateya luaba vanganga mu kilumbu?”

15 Bosi, mintuadisi basola va khati basi Isaeli muingi kutuadisa kisalu, baye kamba Falawo: “Kibila mbi ngie mfumu widi mu kuvangila mambu amomo kuidi bisadi biaku? 16 Buabu basi bue tuvananga ko bititi bi kuvangila mateya, kheti bobo badi mu kutukamba: ‘Lufueti vanga yoyawu thalu yi mateya luaba vanganga.’ Mvandi ba kutubulanga. Ayi zimfumu wubieka muingi ba tukengidila, bawu badi fotu.” 17 Vayi Falawo wutuba: “Benu lusiedi ko kisalu kiwombo muingi kuvanga, diawu luidi mu kutubila: ‘Tuntomba wutuvana nsua muingi tuevana minkhailu kuidi Yave.’ 18 Buabu vutukanu mu kisalu. Basinkuiza bue luvananga ko bititi muingi kuvangila mateya, vayi kheti bobo mufueti vanga yoyawu thalu yi mateya luaba vanganga.”

19 Mintuadisi basola va khati basi Isaeli, bamona ti baba mu mambu maphasi mu kibila ki bisalu baba kuika kuvanga, mu kuba kamba: “Bikanu kudekula thalu yi mateya lufueti vanga mu kilumbu.” 20 Bosi, mintuadisi beni bananguka vantuala Falawo, ayi bayenda vaba Mose ayi Aloni baba kuba vingila. 21 Ayi bawu baba kamba: “Bika Yave kalufundisa, kibila benu luma tukitula batu bakhambulu luvalu vantuala Falawo, ayi vantuala bisadi biandi. Ayi mvandi benu luma bavana kibila muingi batuvonda.” 22 Bosi Mose wusambila kuidi Yave mu kutuba: “A Yave, kibila mbi matuadisila ziphasi kuidi dikabu adidi, ayi kibila mbi wumfididi akuku? 23 Tona kilumbu yiyoluka na Falawo muingi kunzabikisa mambu wukhamba, nandi wubuela kuvangila mambu maphasi kuidi dikabu, ayi ngie wisimvanga ko ni diambu muingi kuvukisa dikabu diaku.”

6 Bosi Yave wukamba Mose: “Buabu ngie wemmona mambu yinkuiza vangila Falawo. Minu yinkuiza nkuika muingi kabika dikabu diama dienda, ayi mvandi yinkuiza sadila mangolo mami muingi yivanga Falawo ka lukukisa ku Ngipiti.”

2 Nzambi wukamba Mose: “Minu yidi Yave. 3 Minu yaba monikinanga Abalahami, Izaki ayi Yakobi ayi yaba kuba kambanga ti yidi Nzambi Nkua Ngolo Zioso, vayi yisa bazabikisa ko buboti matedi dizina diama Yave. 4 Mvandi yivanga yawu luwawanu lu kuba vana ntoto wu Kanani, ntoto wo bazingila buka zinzenza. 5 Buabu, minu veka yima kuwa manyongi ma basi Isaeli mu kibila ki ziphasi basi Ngipiti badi mu kuba tuadisa, ayi yima tebuka monyo luwawanu yivanga.

6 “Buabu, kamba kuidi basi Isaeli: ‘Minu yidi Yave, yinkuiza lubotula mu ziphasi basi Ngipiti badi mu kulutuadisa, ayi yinkuiza lukula va kivika. Minu yala sadila mangolo mami muingi kutuadisa ziphasi ziwombo kuidi basi Ngipiti ayi yinkuiza luvukisa. 7 Minu yala luvanga luba dikabu diama ayi minu yala ba Nzamb’inu, ayi benu luala zaba ti minu yidi Yave Nzamb’inu no wunkuiza lubotula mu ziphasi basi Ngipiti badi mu kulutuadisa. 8 Minu yala lunata ku ntoto yikanikisa kuidi Abalahami, Izaki, ayi Yakobi. Ayi yala luvana wawu muingi wuba kiuka kinu. Minu yidi Yave.’”

9 Bosi Mose wuzabikisa zitsangu aziozio kuidi basi Isaeli, vayi mu kibila ki kiunda ayi ki mambu maphasi baba viokila, bawu basa vua ko nkinza mambu Mose kaba kamba.

10 Yave wubue kamba Mose: 11 “Yendanu vantuala Falawo ntinu wu Ngipiti ayi nkambanu kavana basi Isaeli nsua wu kubasika ku Ngipiti.” 12 Vayi Mose wukamba Yave: “Boti basi Isaeli basa vua ko nkinza mambu yibe bakamba, bukiedika ti Falawo nandi wunkuiza kikinina mawu, mu kuzaba ti minu yiyolukanga ko buboti?” 13 Vayi Yave wubue tebula monyo Mose ayi Aloni zithuadusulu kaba vana muingi bakamba basi Isaeli ayi Falawo ntinu wu Ngipiti ti, bawu batambula kiyeku ki kubotula basi Isaeli ku Ngipiti.

14 Ababa bawu zimfumu zi makanda zi matata mawu. Rubem muana wutheti wu Isaeli wubuta: Hanoki, Palu, Eziloni ayi Karmi. Amomo mawu makanda ma Rubem.

15 Simioni wubuta: Jemuel, Jamim, Oadi, Jakim, Zoar ayi Sauli, muana kabuta na nkietu musi Kanani. Amomo mawu makanda ma Simioni.

16 Amama mawu mazina ma bana ba Levi mu kutadila makanda mawu: Gerson, Koati ayi Merari. Levi wuzinga 137 di mimvu.

17 Gerson wubuta: Libni ayi Simei mu kutadila makanda mawu.

18 Koati wubuta: Anrão, Izar, Hebrom ayi Uzieli. Koati wuzinga 133 di mimvu.

19 Merari wubuta: Mali ayi Muzi.

Amomo mawu maba makanda ma Levi, mu kutadila makanda mawu.

20 Anrão wukuela Yokebedi khomba tat’andi. Ayi Yokebedi wubuta: Aloni ayi Mose. Anrão wuzinga 137 di mimvu.

21 Izar wubuta: Kora, Nefegue ayi Zicri.

22 Uzieli wubuta: Mizaeli, Elizafã ayi Sitri.

23 Aloni wukuela Elizeba muana Aminadabi khomba yinkietu yi Nasoni. Elizeba wubuta bana ababa: Nadabi, Abiú, Eliazali ayi Itamar.

24 Kora wubuta: Asir, Elcana ayi Abiazafi. Abobo bawu baba mu dikanda di zikoraita.

25 Eliazali muana wu Aloni wukuela muana wu Putiel ayi nandi wubuta muana dibakala ayi wumvana dizina Fineia.

Abobo bawu zimfumu zi basi Levi mu kutadila makanda mawu.

26 Mose ayi Aloni bawu Yave kavana kiyeku mu kuba kamba: “Benu lufueti botula basi Isaeli ku Ngipiti, ayi lufueti kuba natina mu mangumba.” 27 Mose ayi Aloni, bawu bayoluka na Falawo ntinu wu Ngipiti muingi babasisa basi Isaeli ku Ngipiti.

28 Mu kilumbu Yave kayoluka na Mose ku ntoto Ngipiti, 29 Yave wukamba Mose: “Minu yidi Yave. Zabikisa kuidi Falawo ntinu wu Ngipiti mambu moso yikukamba.” 30 Bosi Mose wukamba Yave: “Minu yisa zaba ko kukoluka buboti, buabu buidi Falawo kankuiza ndiuwila?”

7 Bosi Yave wukamba Mose: “Minu yima kukitula buka Nzambi kuidi Falawo ayi khomb’aku Aloni wunkuiza yoluka va mvingi’aku buka ḿbikudi. 2 Ngie fueti zabikisa mambu moso kuidi Aloni ayi nandi wunkuiza kamba mawu kuidi Falawo. Bosi Falawo wunkuiza bika basi Isaeli babasika ku Ngipiti. 3 Minu yinkuiza bika muingi ntinu Falawo katatamana kuba ntu ngolo ayi mu phila ayoyo, yinkuiza tuadisa zitsingulu ziwombo ayi yinkuiza vanga mangitukulu mawombo ku Ngipiti. 4 Vayi Falawo kalasa tumukina ko mambu luala kunkamba. Diawu minu yala sadila mangolo mami muingi kutuadisa ziphasi kuidi basi Ngipiti, ayi yala botula dikabu diama Isaeli ku ntoto Ngipiti ayi yala fundisa basi Ngipiti. 5 Ayi basi Ngipiti bala zaba ti minu yidi Yave, bo yala sadila mangolo mami muingi kuba tuadisa ziphasi ayi kubasisa basi Isaeli ku Ngipiti.” 6 Mose ayi Aloni bavanga mamoso Yave kaba kamba. Bawu bavangila buna buawu. 7 Bo bayenda kue yoluka na Falawo, Mose wuba 80 di mimvu ayi Aloni wuba 83 di mimvu.

8 Bosi Yave wukamba Mose ayi Aloni: 9 “Falawo na kutuba: ‘Vanganu mangitukulu muingi yizaba boti mambu luntuba madi makiedika,’ buna ngie Mose fueti kamba Aloni: ‘Bonga nkawu ayi kuba wawu vantuala Falawo.’ Ayi nkawu beni wunkuiza kituka nyoka yinneni.” 10 Bosi Mose ayi Aloni bayenda vantuala Falawo, ayi bavanga mamoso mu phila Yave kaba tumina. Aloni wukuba nkawu’andi vantuala Falawo ayi vantuala bisadi biandi, ayi nkawu beni wukituka nyoka yinneni. 11 Vayi Falawo wutumisa batu ba luzabu ayi zinganga zi minkisi, ayi zinganga beni zi minkisi mvandi bavanga muingi minkawu miawu mikituka zinyoka mu kusadila kindoki. 12 Kadika mutu mu bawu wukuba nkawu’andi vatsi, ayi miawu mikituka zinyoka zinneni. Vayi nyoka* yi Aloni yimina zinyoka zioso zi zinganga zi minkisi. 13 Vayi kheti bobo, Falawo wumonisa ntu ngolo dedi bo Yave katubila, ayi kasa kikinina ko mambu Mose ayi Aloni bankamba.

14 Bosi Yave wukamba Mose: “Falawo ntu ngolo wuke yandi. Nandi bemanga kubika dikabu babasika ku Ngipiti. 15 Yono vameni, Falawo wala kuenda ku muila wu Nilu. Ayi ngie mvaku fueti kuenda ku disimu di muila beni muingi kuendengana, mvandi fueti nata nkawu wo wukituka nyoka. 16 Ngie fueti kamba Falawo: “Yave, Nzambi yi basi Ebeleo* bethuma kuidi ngiewu, ayi betuba: “Bika dikabu diama benda ku thandu muingi bembuongimina, vayi nati bubu ngie wisintumukina ko mawu. 17 Buakabu butubidi Yave: “Mu phila ayiyi ngie wunkuiza zabila ti minu yidi Yave. Yembanda nkawu awuwu widi mu mioko miama mu muila wu Nilu, ayi muila beni wunkuiza kituka menga. 18 Zifu zioso zidi mu muila wu Nilu zinkuiza fua, ayi muila woso wunkuiza ba fuku mbi. Ayi basi Ngipiti balasa bue nunga ko kunua nlangu wu Nilu.”’”

19 Bosi Yave wukamba Mose: “Kamba Aloni: ‘Bonga nkawu’aku ayi nonuna wawu mu minlangu mioso midi ku Ngipiti, kuba kuandi mila, zitho zi minlangu, bibuindi ayi mu bibuangu bioso banlundilanga nlangu muingi mikituka menga.’ Mu phila ayoyo, ntoto woso wu Ngipiti wunkuiza wala menga, nati mu minlangu midi mu biuma bavangila mu mabaya ayi mamanya.” 20 Mose ayi Aloni bavangila buna buawu Yave kaba kambila. Aloni wubanda nkawu mu muila wu Nilu vantuala Falawo ayi vantuala bisadi biandi, bosi muila woso wukituka menga. 21 Zifu zi muila wu Nilu zimana kufua ayi muila beni wutona kunuka fuku mbi. Diawu basi Ngipiti basa bue nunga ko kunua nlangu wu muila wu Nilu. Mu phila ayoyo, ntoto woso wu Ngipiti wuyiza wala menga.

22 Vayi zinganga zi minkisi zi Ngipiti bavanga momawu mu kusadila kindoki. Diawu Falawo katatiminina kuba ntu ngolo dedi bo Yave katubila, ayi kasa tumukina ko mambu Mose ayi Aloni bankamba. 23 Bosi Falawo wuvutuka ku nzo’andi ayi kasa vua ko nkinza mambu mamonika. 24 Mu phila ayoyo, basi Ngipiti boso basika bisima mu ndeku muila wu Nilu muingi babaka nlangu wumboti wu kunua. Kibila nlangu wu Nilu wusa ba ko wumboti muingi kunua. 25 Vavioka sambuadi di bilumbu tona Yave kabivisa nlangu wu Nilu.

8 Yave wukamba Mose: “Yenda kuidi Falawo ayi nkamba: ‘Buakabu butubidi Yave: “Bika dikabu diama babasika ku Ngipiti muingi bembuongimina. 2 Ngie kutatamana kumonisa ntu ngolo mu kukhambu bika dikabu diama benda, yinkuiza tuadisa tsingulu yi bisioto* ku ntoto woso wu Ngipiti. 3 Muila woso wu Nilu wunkuiza wala bisioto ayi biawu biala kota ku nzo’aku, ku kivinga kiaku ayi biala ba va kika kiaku. Mvandi biala kota mu zinzo zi bisadi biaku, zi dikabu diaku ayi biala wala mu bibuangu bamvangilanga mapha ayi mu zindonga zinu. 4 Bisioto beni biala tuadisa ziphasi kuidi ngiewu, kuidi bisadi biaku ayi kuidi dikabu diaku dioso.”’”

5 Yave wubue kamba Mose: “Kamba Aloni: ‘Nonuna nkawu’aku mu mila, mu zitho zi nlangu wu Nilu ayi mu bibuindi, muingi kutuadisa bisioto ku ntoto woso wu Ngipiti.’” 6 Aloni wunonuna nkawu’andi mu minlangu mi Ngipiti, bosi bisioto biwala ku Ngipiti. 7 Vayi zinganga zi minkisi bavanga momawu mu kusadila kindoki, bawu mvawu batuadisa bisioto ku Ngipiti. 8 Bosi Falawo wutumisa Mose ayi Aloni ayi wuba kamba: “Lombanu kuidi Yave muingi kamanisa tsingulu ayiyi yi bisioto, kibila minu yintomba kuluvana nsua muingi luevana minkhailu kuidi Yave.” 9 Bosi Mose wukamba Falawo: “Ngie veka mfumu fueti kukhamba kilumbu mbi yifueti lomba kuidi Nzambi, muingi nandi kamanisa tsingulu ayiyi yi bisioto yidi mu kutuadisa ziphasi kuidi ngiewu, kuidi bisadi biaku ayi kuidi dikabu diaku. Vayi bisioto beni binkuiza ba to mu muila wu Nilu. 10 Falawo wutuba: “Lomba kimba yono.” Mose wumvutudila: “Mankuiza vangimina dedi bo matubila, muingi ngie Falawo wuzaba ti vasi ko Nzambi yinkaka yilutidi kena Nzamb’itu Yave. 11 Ku nzo’aku, ku nzo bisadi biaku ayi ku nzo dikabu diaku kuisinkuiza bue ba ko bisioto, vayi binkuiza ba to mu muila wu Nilu.”

12 Mu phila ayoyo, Mose ayi Aloni bananguka vaba Falawo ayi Mose wulomba kuidi Yave muingi kamanisa bisioto biaba tuadisa ziphasi kuidi Falawo. 13 Yave wukikinina mambu Mose kandinda mu nsambu. Mu phila ayoyo, bisioto biba mu zinzo, ku nganda ayi mu zitsola bifua. 14 Bakupika bisioto beni mu bikhuku binneni ayi ntoto woso wu Ngipiti wutona kunuka fuku mbi. 15 Bo Falawo kamona ti tsingulu yi bisioto yimana, nandi wumonisa ntu ngolo dedi bo Yave katubila, ayi wumanga kuvana nsua muingi basi Isaeli babasika ku Ngipiti.

16 Yave wukamba Mose: “Kamba Aloni: ‘Nonuna nkawu’aku ayi bita wawu va tsi ayi mbumbungu yi ntoto yinkuiza kituka zimbu ku tsi yoso yi Ngipiti.’” 17 Aloni wunonuna nkawu’andi ayi wubita wawu va tsi, bosi mbumbungu beni yi ntoto, yikituka zimbu ku ntoto wu Ngipiti. Ayi zimbu beni zituadisa ziphasi kuidi batu ayi kuidi bibulu. 18 Zinganga zi minkisi zi basi Ngipiti mvandi bameka kutuadisa zimbu mu kusadila kindoki, vayi basa nunga ko. 19 Bosi zinganga zi minkisi bakamba Falawo: “Amomo madi mangolo* ma Nzambi’awu.” Vayi Falawo wutatamana kumonisa ntu ngolo dedi bo Yave katubila, ayi kasa vua ko nkinza mambu Mose ayi Aloni bankamba.

20 Bosi Yave wukamba Mose: “Yono va meni Falawo wala kuenda ku muila wu Nilu ayi ngie fueti kuendengana kuna ayi fueti kunkamba: ‘Buakabu butubidi Yave: “Bika dikabu diama babasika ku Ngipiti muingi bembuongimina. 21 Vayi ngie kumanga kubika dikabu diama benda, yinkuiza tuadisa maveku mala kota ku nzo’aku, ku nzo bisadi biaku ayi mu zinzo zi batu boso badi ku Ngipiti. Ayi maveku beni mala tembakana mu bibuangu bioso. 22 Mu kilumbu beni, ku divula di Gozen kunkalanga dikabu diama, kuawu to kuala khambu ba maveku beni. Mu phila ayoyo, ngie wala zaba ti minu Yave yidi ku ntoto awuwu. 23 Minu yinkuiza vasa dikabu diaku ayi dikabu diama. Yono ngie wala mona mambu amomo kusalama.”’”

24 Ayi mawu Yave kavanga, vamonika minkangu miwombo mi maveku ayi mawu matona kukota ku nzo Falawo, ku nzo bisadi biandi ayi mawala ku ntoto woso wu Ngipiti. 25 Bosi Falawo wutumisa Mose ayi Aloni ayi wuba kamba: “Yendanu muingi luevana minkhailu kuidi Nzamb’inu, vayi lufueti vangila mawu ku ntoto Ngipiti. 26 Vayi Mose wunkamba: “Disi ko diyindu dimboti kuvangila mawu akuku, kibila basi Ngipiti bankuiza dasuka ba kutumona kuvana ntindu minkhailu amiomio kuidi Nzamb’itu Yave. Buabu, befu kuvangila mawu vantual’awu, bukiedika ti bawu basinkuiza tukuba ko mamanya? 27 Diawu tunkuiza vanga viage yi bilumbu bitatu ku thandu, ayi kuawu tuala vanina Yave Nzamb’itu minkhailu, dedi bo naveka katukambila.”

28 Falawo wutuba: “Yikuluvana nsua muingi luevana minkhailu kuidi Yave Nzamb’inu ku thandu. Vayi bikanu kukuenda beni kinanu ayi ava luenda dindanu theti kuidi Nzambi muingi kamanisa maveku kabe tuadisa.” 29 Mose wumvutudila: “Bo yennanguka avava, yendinda kuidi Yave muingi kavanga mawu ayi yono maveku masinkuiza bue tuadisa ko ziphasi kuidi Falawo, kuidi bisadi biaku ayi kuidi dikabu dioso. Vayi, bika kubue tuvuna mu kubalula mayindu mukhambu tuvana nsua wu kuevana minkhailu kuidi Yave.” 30 Bo Mose kananguka vaba Falawo, nandi wudinda kuidi Yave muingi kamanisa tsingulu yi maveku. 31 Mu phila ayoyo, Yave wuvanga mambu moso Mose kandinda. Bosi Nzambi wumanisa maveku maba ku nzo Falawo, ku nzo bisadi biandi ayi mu zinzo zi dikabu dioso. Mu phila ayoyo, ku ntoto woso wu Ngipiti kuisa bue ba ko maveku. 32 Bo Falawo kamona ti Nzambi wumanisa tsingulu yi maveku, nandi wubue monisa ntu ngolo ayi kasa bika ko basi Isaeli benda.

9 Diawu Yave kakambila Mose: “Yenda kuidi Falawo ayi nkamba: ‘Buakabu butubidi Yave Nzambi yi basi Ebeleo:* “Bika dikabu diama benda muingi bembuongimina. 2 Ngie kumanga kuba vana nsua muingi benda, 3 buna zaba kuaku ti Yave wunkuiza vonda bibulu biaku. Nzambi wunkuiza tuadisa tsingulu yinkuiza vonda mimvalu, ziphunda, zikamela, zingombi ayi mamemi. 4 Vayi Yave wala vasa bibulu bi basi Isaeli ayi bi basi Ngipiti. Mu phila ayoyo, valasa fua ko ni kibulu kimueka ki basi Isaeli.”’” 5 Mvandi Yave wutsikikidi kilumbu mambu beni mankuiza monika, mu kutuba: “Yono Yave wunkuiza vanga mambu amomo mamonika ku Ngipiti.”

6 Mu kilumbu kilanda, Yave wuvanga mawu. Bibulu bioso bi basi Ngipiti bitona kufua, vayi vasa fua ko ni kibulu kimueka mu bibulu bi basi Isaeli. 7 Bo Falawo katuma bafiongunina mawu, bawu babakula ti vasa fua ko ni kibulu kimueka mu bibulu bi basi Isaeli. Vayi kheti bobo, Falawo wutatamana kumonisa ntu ngolo ayi kasa bika ko basi Isaeli benda.

8 Bosi Yave wukamba Mose ayi Aloni: “Wesanu dibombi* mu mioko minu, ayi Mose kafueti muanga dibombi beni ku yilu vantuala Falawo. 9 Ayi dibombi beni dinkuiza kituka mbumbungu yi ntoto yinkuiza wala ku Ngipiti. Ayi mbumbungu beni yinkuiza tuadisa bikhuzu* bidi mafinya* kuidi batu ayi kuidi bibulu ku ntoto woso wu Ngipiti.”

10 Mu phila ayoyo, bawu bayenda kuidi Falawo na dibombi, bosi Mose wumuanga dibombi beni ku yilu ayi diawu dituadisa bikhuzu biba mafinya kuidi batu ayi kuidi bibulu. 11 Zinganga zi minkisi ayi basi Ngipiti boso bayiza ba bikhuzu bidi mafinya. Diawu zinganga zi minkisi basa nungina ko kukuenda vantuala Mose. 12 Vayi Yave wubika muingi Falawo katatamana kumonisa ntu ngolo dedi bo Yave katubila, ayi nandi kasa kikinina ko mambu Mose ayi Aloni bankamba.

13 Yave wukamba Mose: “Yono va meni fueti kuenda kuidi Falawo ayi fueti kunkamba: ‘Buakabu butubidi Yave Nzambi yi basi Ebeleo: “Bika dikabu diama benda muingi bembuongimina. 14 Kutona mu thangu ayiyi, yinkuiza tuadisa zitsingulu ziama zioso kuidi ngiewu, kuidi bisadi biaku ayi kuidi dikabu diaku dioso, muingi ngie wuzaba ti vasi ko ni Nzambi yinkaka widi buka minu mu nza yoso. 15 Kibila khanu minu yibe tuadisa tsingulu muingi ku kuvonda ayi kuvonda dikabu diaku dioso. 16 Vayi yibe bikila muingi ngie wutatamana kuzinga mu kibila akiki: muingi ku kumonisa mangolo mami ayi muingi dizina diama diba dizabakana mu nza yimvimba. 17 Vayi kheti bobo, ngie widi mu kumonisa lungundayi ayi khidi tatamana kumonisa ntu ngolo mu kumanga kubika dikabu diama benda. 18 Diawu, yono mu kilokula akiki, yinkuiza nokisa mvula wungolo wu mamanya ma gelu wo kawunokiziabu ko ku ntoto wu Ngipiti tona bafonda divula beni. 19 Diawu tuma bisadi biaku balunda bibulu biaku bioso bidi ku thandu mu phaka. Kibila batu boso ayi bibulu bakhambu ba basuama, bankuiza fua mu kibila ki mvula wungolo wu mamanya ma gelu.”’”

20 Mu bisadi bi Falawo, baboso bakikinina mambu Yave katuba, mu nsualu batuma balunda bibulu biawu mu ziphaka ayi bakamba bisadi biawu basuama. 21 Vayi baboso bakhambu kikinina mambu Yave katuba, basa tuma ko muingi batula bibulu biawu mu ziphaka, ayi basa kamba ko bisadi biawu basuama.

22 Yave wukamba Mose: “Vumuna mioko miaku kuyilu muingi mvula wu mamanya ma gelu wutona kunoka ku Ngipiti. wawu wunkuiza tulula batu, bibulu ayi bivatu bioso bidi mu zitsola zi basi Ngipiti.” 23 Mose wunonuna nkawu’andi kuyilu ayi Yave wunokisa mvula wu mamanya ma gelu, mvandi Yave wuvanga vayuwakana zinzazi ayi vamonika mbazu ku ntoto woso wu Ngipiti. 24 Vanoka mvula wu mamanya ma gelu ayi vakhati mamanya beni vaba monika mbazu. Mvula beni wuba wungolo ayi ku Ngipiti kuabasa nokanga ko ntindu mvula awowo. 25 Mvula beni wutulula bivatu bioso mu zitsola zi basi Ngipiti ayi mvandi wutulula batu ayi bibulu bikhambu ba bisuama. 26 Ku divula di Gozen kuaba kalanga basi Isaeli, kuawu to kukhambu noka mvula wungolo wu mamanya ma gelu.

27 Bosi Falawo wutumisa Mose ayi Aloni, ayi wuba kamba: “Khumbu ayiyi minu yima vola disumu, Yave nandi wunnunga, minu ayi dikabu diama befu tuidi fotu. 28 Lombanu kuidi Yave, muingi mvula wu mamanya ma gelu ayi zinzazi bimana. Mu phila ayoyo, minu yinkuiza lubika luenda ayi benu lualasa bue kala ko akuku.” 29 Mu kibila akiokio, Mose wunkamba: “Bo yinkuiza basika ku divula, minu yinkuiza sambila kuidi Yave. Zinzazi ayi mvula wu mamanya ma gelu binkuiza mana, muingi ngie wuzaba ti Yave nandi vuidi ntoto woso. 30 Vayi kheti bobo, minu yizebi kuama ti ngie ayi bisadi biaku luisinkuiza kinzika ko Yave Nzambi.”

31 Nti wu linho* ayi mbongu yi cevada bimana kutuluka, kibila mbongu yi cevada yaba belama kukuela ayi nti wu linho wuba biteka. 32 Vayi trigu ayi espelta* bisa tuluka ko, kibila mbongu ayoyo yabasa fika kuelanga ko. 33 Bosi Mose wunanguka vaba Falawo ayi wubasika ku divula. Nandi wusambila kuidi Yave. Mu phila ayoyo, zinzazi ayi mvula wu mamanya ma gelu bimana. 34 Bo Falawo kamona ti zinzazi ayi mvula wu mamanya ma gelu bimana, nandi wubue sumuka ayi va kimueka na bisadi biandi, babue monisa ntu ngolo. 35 Falawo wutatamana kukanga ntima dedi bo Yave kakambila Mose, ayi kasa bika ko basi Isaeli babasika ku Ngipiti.

10 Yave wukamba Mose: “Yenda kuidi Falawo, kibila minu veka yibe bika muingi nandi ayi bisadi biandi batatamana kumonisa ntu ngolo. Yibe bikila mawu, muingi yivanga mangitukulu amomo vantual’awu. 2 Mvandi yibe bikila mawu kumonika, muingi benu luzabikisa mawu kuidi bana binu ayi kuidi batekulu binu, ziphasi zioso yituadisa kuidi basi Ngipiti, ayi mangitukulu moso yivanga vantual’awu. Mu phila ayoyo, benu luala zaba ti minu yidi Yave, Nzambi yikiedika.”

3 Bosi Mose ayi Aloni bayenda vaba Falawo ayi bankamba: “Buakabu butubidi Yave, Nzambi yi basi Ebeleo:* ‘Nati thangu mbi ngie wala tatamana kumonisa ntu ngolo mukhambu kuthumukina? Bika dikabu diama babasika ku Ngipiti muingi bembuongimina. 4 Vayi bo widi mu kumanga kubika dikabu diama benda, yono yinkuiza tuadisa mindedeka* ku kizunga kiaku kioso. 5 Mindedeka beni miala mana kutembakana va tsi, ayi benu lualasa nunga ko kumona ntoto. Miawu miala mana kudia biuma bisiedi bo vamonikini mvula wu mamanya ma gelu, mvandi minkuiza dia mbongu yoso yidi mu zitsola. 6 Mindedeka beni miala kota ku nzo’aku, mu zinzo zi bisadi biaku ayi mu zinzo zi dikabu dioso di Ngipiti. Vamonikiniabu ko ntindu mindedeka amiomio ku Ngipiti, tona mu thangu zikhaya ziaku nati bubu.’” Bosi Mose wunanguka vaba Falawo ayi wuyenda kuandi.

7 Bosi Falawo bankamba kuidi bisadi biandi: “Nati thangu mbi dibakala adiodio kala tatamana kututula boma? Bika basi Isaeli babasika ku Ngipiti muingi bebuongimina Yave Nzambi’awu. A mfumu, ngie wisimmona ko ti ntoto wu Ngipiti widi mu kumana kutuluka?” 8 Mu phila ayoyo, Falawo wutumisa Mose ayi Aloni ayi wuba kamba: “Yendanu muingi lue buongimina Yave Nzamb’inu. Vayi khambanu, banani bankuenda?” 9 Mose wumvutudila: “Tunkuiza nata matoko, biboba, bana bitu ba babakala ayi ba bakietu. Mvandi tunkuiza nata mamemi ayi zingombi zitu, kibila tunkuiza vanga nkungi muingi kuzitisa Yave.” 10 Falawo wukamba Mose ayi Aloni: “Benu lummuena ti minu yinkuiza lubika muingi luenda na bana binu? Minu kuvanga mawu, buna Yave keyinu. Benu mayindu mambi madi yinu. 11 Babakala bawu to bafueti kuenda muingi kue buongimina Yave, kibila mawu benu ludinda.” Bosi bakukisa Mose ayi Aloni vaba Falawo.

12 Yave wukamba Mose: “Nonuna nkawu’aku muingi kutuadisa mindedeka ku Ngipiti. Mindedeka beni minkuiza dia bivatu bioso bisobidi bo vamonikini mvula wu mamanya ma gelu.” 13 Muna thangu beni, Mose wunonuna nkawu’andi, ayi Yave wusadila phemu yifumina ku leste ayi wufila yawu ku ntoto woso wu Ngipiti mu builu boso. Bo buisi bukia, phemu beni yituala mindedeka miwombo. 14 Mindedeka beni mitiamuka ku kizunga kioso ki Ngipiti, ayi miawu mituadisa ziphasi ziwombo ku ntoto wu Ngipiti. Yawu khumbu yitheti ayi yitsuka kumonika ntindu mindedeka amiomio. 15 Mindedeka beni mitiamuka ku Ngipiti yoso, ayi miawu mituadisa kitombi ku Ngipiti. Mindedeka beni midia mbongu yoso ayi meza ma minti masobila bo vamonika mvula wu mamanya ma gelu. Ku tsi yoso yi Ngipiti kusa bue ba ko nti wuba meza, ni mbongu mu zitsola.

16 Bosi Falawo wutumisa Mose ayi Aloni, ayi wuba kamba: “Minu yibe sumuka vantuala Yave Nzamb’inu ayi vantual’inu. 17 Diawu yiku ludinda, bue ndemvukilanu khumbu ayiyi, lombanu kuidi Yave Nzamb’inu muingi kamanisa tsingulu ayiyi yidi mu kututuadisa ziphasi.” 18 Bosi Mose wunanguka vaba Falawo ayi wudinda muingi Yave kamanisa tsingulu beni. 19 Mu phila ayoyo, Yave wuvanga muingi phemu yifumina ku oeste yivevumuna mindedeka beni mu ḿbu wubenga. Vasa sobila ko ni ndedeka wumueka ku kizunga kioso ki Ngipiti. 20 Vayi Yave wubika muingi Falawo katatamana kukanga ntima, ayi kasa bika ko basi Isaeli babasika ku Ngipiti.

21 Bosi Yave wukamba Mose: “Nonuna nkawu’aku ku yilu muingi ku ntoto wu Ngipiti kuwala kitombi kingolo kinkuiza vanga batu babika ku buemona ko bankuenda.” 22 Mose wunonuna nkawu’andi ku yilu ayi kuyiza monika kitombi kingolo ku Ngipiti mu bilumbu bitatu. 23 Basi Ngipiti basa nunga ko kumona bankaka mu bilumbu bitatu, mvandi basa nunga ko kubotuka va kibuangu baba. Vayi ku divula kuaba kalanga basi Isaeli, kuba kiezila. 24 Bosi Falawo wutumisa Mose ayi wunkamba: “Yebuongiminanu Yave na bana binu, vayi bikanu kunata mamemi ayi zingombi zinu.” 25 Vayi Mose wukamba Falawo: “Befu kukhambu nata bibulu bitu, buna ngiewu wunkuiza tuvana bibulu tunkuiza vana minkhailu miviku kuidi Yave Nzamb’itu. 26 Befu tuzebiabu ko bibulu mbi tuala vana minkhailu miviku kuidi Yave, nati tuala vitila kuna. Diawu tunkuiza nata bibulu bitu bioso ni kimueka tuisimbika ko, kibila biawu tuala sadila muingi kuvana minkhailu kuidi Yave Nzamb’itu.” 27 Yave wubika muingi Falawo katatamana kumonisa ntu ngolo ayi Falawo kasa bika ko muingi basi Isaeli babasika ku Ngipiti. 28 Bosi Falawo wukamba Mose: “Botuka vantual’ama, ayi yimengi bue kumona akuku. Kibila ngie kubue vutuka akuku yinkuiza kuvonda.” 29 Mu kibila akiokio, Mose wukamba Falawo: “Yinkuiza vangila dedi bo matubila, yalasa bue monika ko vantual’aku.”

11 Yave wukamba Mose: Yeka bue tuala tsingulu yinkaka kuidi Falawo ayi kuidi basi Ngipiti boso. Mu kibila ki tsingulu beni, Falawo wunkuiza luvana nsua muingi lubasika ku Ngipiti. Ayi phila kala luvanina nsua beni, mala ba buka nandi wu lukukisa ku Ngipiti. 2 Buabu kamba dikabu dioso di Isaeli, kuba kuandi babakala ayi bakietu ti, bafueti dinda kuidi basi Ngipiti bankalanga yawu va nsengi biuma bi palata ayi bi wola.” 3 Yave wuvanga muingi basi Isaeli babaka lunungu va mesu ma basi Ngipiti. Mvandi, bisadi bi Falawo ayi basi Ngipiti boso baba kinzikanga beni Mose.

4 Bosi Mose wukamba Falawo: “Buakabu butubidi Yave: ‘Bubu va khati sika builu, minu yinkuiza viokila ku Ngipiti, 5 ayi yinkuiza vonda bana boso batheti ku ntoto wu Ngipiti, kutonina kuidi muana wutheti wu Falawo nati muana wutheti wu mvika. Mvandi yinkuiza vonda bana batheti bambakala ba bibulu bioso bi basi Ngipiti. 6 Ku ntoto woso wu Ngipiti kunkuiza ba bidilu. Ayi yawu khumbu yitheti ayi yitsuka kunkuiza monika ntindu mambu amomo ku Ngipiti. 7 Vayi ni diambu dimbi dialasa monikina ko basi Isaeli ayi bibulu biawu. Mvandi ni kheti mbua yala batula boma, muingi benu luzaba ti Yave kalenda suasisa basi Ngipiti na basi Isaeli.’ 8 Ayi bisadi biaku bioso bala fukama vantual’ama ayi bala tuba: ‘Basika ku Ngipiti na dikabu dioso.’ Bosi minu yala basika.” Bo kamana kutuba mambu amomo, Mose wunanguka vaba Falawo mu ngazi.

9 Bosi Yave wukamba Mose: “Falawo kasinkuiza kuyuwila ko, mu kibila akiokio minu yinkuiza vanga mangitukulu mawombo ku Ngipiti.” 10 Mose ayi Aloni bavanga mangitukulu moso Nzambi kaba tuma vantuala Falawo, vayi Yave wubika muingi Falawo katatamana kumonisa ntu ngolo, ayi nandi kasa bika ko basi Isaeli babasika ku Ngipiti.

12 Bosi Yave wukamba Mose ayi Aloni mambu amama ku Ngipiti: 2 “Ayiyi yawu yinkuiza ba ngonda yitheti yi mvu mu kalendario’inu. 3 Wufueti kamba kuidi dikabu dioso di Isaeli: ‘Mu kilumbu kumi ki ngonda ayiyi, kadika dikanda bafueti kubika muana dimemi. 4 Vayi boti dikanda beni basinkuiza nunga ko kudia muana dimemi dioso mu kilumbu kimueka, buna bafueti tumisa dikanda dinkaka difikama muingi badia va kimueka, mu kutadila thalu yi kadika dikanda ayi kitesu kio kadika mutu kalenda nunga kudia. 5 Kibulu beni kifueti ba kimbakala kidi mvu mueka, ayi kilendi ba ko kibela. Kiawu kilenda ba muana dimemi voti muana khombo. 6 Lufueti lunda kibulu beni nati kilumbu 14 ki ngonda ayiyi, ayi mu kilumbu beni, dikabu dioso di Isaeli bafueti vonda kiawu va masika ma builu. 7 Lufueti bonga mua menga ayi kuvinda mu zikhonzu ziwadi zi muelu, ayi va yilu muelu wu nzo lunkuiza dila kibulu beni.

8 “Lufueti kuanga kibulu beni ayi kudila kiawu mu mapha makhambulu luvi, ayi meza mandudi, muna builu beni. 9 Mulendi dia ko mbizi beni yikhunzu voti kutokisa yawu, vayi lufueti yanga yayoso ku mbazu kubunda malu mandi, ntu ayi biuma bidi mu khati. 10 Bikanu kulunda ni kitini muingi kudia mu kilumbu kinkaka, vayi va kusobila kitini, lufueti vika kiawu ku mbazu. 11 Lufueti dila kibulu beni mu phila ayiyi: lufueti kanga ziphonda* mu lukietu, kuvuata zisandali, kusimba minkawu ayi mvandi lufueti dila kiawu mu thinu thinu. Kibila yidi Pasika yi Yave. 12 Kibila mu builu beni, minu yala viokila ku Ngipiti ayi yala vonda bana boso batheti ba babakala ba basi Ngipiti, kuba kuandi ba batu ayi ba bibulu. Ayi yala fundisa zinzambi zioso zi basi Ngipiti. Minu yidi Yave. 13 Menga mo luala vinda mu zinzo zinu, mala ba kidimbu. Ayi bo minu yala mona mawu bo yala vioka, yalasa luvonda ko bo yala vonda basi Ngipiti.

14 “‘Benu lufueti tebukilanga monyo kilumbu akiki, ayi lufueti vanga nkungi mu kilumbu beni, muingi kuzitisa Yave mu zimbandu zinu zioso. Lufueti kemba nkungi mu kilumbu beni. Awowo widi nsiku wala kadidila. 15 Lufueti dia mapha makhambulu luvi mu sambuadi di bilumbu. Mu kilumbu kitheti, lufueti botula luvi loso luidi mu zinzo zinu, kibila mutu wundia kioso kiuma kidi luvi, kutonina mu kilumbu kitheti nati mu kilumbu sambuadi, bafueti kumvonda. 16 Mu kilumbu kitheti ayi mu kilumbu ki sambuadi, lufueti kutakana muingi kubuongimina Nzambi. Mulendi vanga ko ni kisalu mu bilumbu abiobio, vayi lufueti kubika to biuma lunkuiza dia.

17 “‘Vanganu Nkungi wu Mapha Makhambulu Luvi, kibila kilumbu akiokio, kiawu yala lubasisa ku Ngipiti mu mangumba. Ayi lufueti kembanga nkungi mu kilumbu akiokio mu zimbandu zinu zioso. Awowo widi nsiku wala kadidila. 18 Benu lufueti dia mapha makhambulu luvi mu ngonda yitheti, kutonina va masika ma builu bu kilumbu 14, nati va masika ma builu bu kilumbu 21 ki ngonda beni. 19 Mu sambuadi di bilumbu, mu zinzo zinu mulendi ba ko luvi, kibila woso mutu wundia kiuma kidi luvi, kuba kuandi nzenza voti musi Isaeli, bafueti kumvonda. 20 Benu mulendi dia ko ni kiuma kidi luvi, vayi benu boso mufueti dia mapha makhambulu luvi.’”

21 Mose wutumisa bakulutu boso ba Isaeli ayi wuba kamba: “Sodilanu makanda minu muana dimemi voti muana khombo, muingi badia mu Pasika. 22 Bosi bonganu mua kisafi ki hissopo, buikanu wawu mu menga madi mu dibola, ayi vindanu mu zikhonzu ziwadi zi muelu ayi va yilu muelu, mu zinzo zinu. Ayi ni mutu kabika basika ku nzo beni nati buisi bunkia. 23 Ayi bo Yave kala vioka muingi kuvonda bana batheti ba basi Ngipiti, ayi bo kala mona menga mu mielu mi zinzo zinu, Yave kalasa bika ko muingi tsingulu ayoyo yivonda bana binu batheti ba babakala.

24 “Tebukilanganu monyo kilumbu akiokio, ayi awowo widi nsiku wala kadidila, kuidi benu ayi kuidi bana binu. 25 Bo luala kota ku ntoto Yave kankuiza luvana, dedi bo katubila, benu lufueti kemba nkungi awowo. 26 Bana binu ba kulukuvula: ‘Kibila mbi lunkembilanga nkungi awowo?’ 27 Benu lufueti kuba vutudila: ‘Tunkembilanga wawu muingi kuzitisa Yave no wuvonda bana batheti ba basi Ngipiti, vayi wuvukisa dikabu ditu. Wawu widi nkungi wu Pasika.’”

Bosi dikabu bafukama ayi bayinika bizizi biawu va tsi. 28 Basi Isaeli bavangila mambu moso mu phila Yave kakambila Mose ayi Aloni. Bawu bavangila buna buawu.

29 Bosi va khati tsika builu, Yave wuvonda bana boso batheti ba basi Ngipiti. Kutonina kuidi muana wutheti wu Falawo, nati muana wutheti wu kisadi wuba mu buloku. Wuvonda mvandi bana batheti ba bibulu bi basi Ngipiti. 30 Va builu beni, bo Falawo, bisadi biandi ayi basi Ngipiti boso bakotuka, bawu batona kukuana ayi kudila, kibila ku Ngipiti yoso kuisa ba ko nzo yikhambu fua mutu. 31 Muna builu beni, Falawo wutumisa Mose ayi Aloni, ayi wuba kamba: “Basikanu ku Ngipiti, benu ayi dikabu dioso di Isaeli. Yenda buongiminanu Yave dedi bo lutubila. 32 Yendanu, natanu mamemi minu ayi zingombi zinu zioso, dedi bo lutubila. Mvandi lindanu kuidi Nzambi muingi katsakumuna.”

33 Basi Ngipiti baba kuika basi Isaeli muingi babasika mu thinu ku Ngipiti, mu kutuba: “Benu kumanga fika kuenda, befu boso tunkuiza fua.” 34 Bosi basi Isaeli babonga masa ma kuvangila mapha makhambulu luvi, batula mawu mu dibola ayi bazinga dibola beni minledi ayi banatina biawu mu mavangiti. 35 Basi Isaeli bavanga mambu moso Mose kaba kamba, ayi balinda kuidi basi Ngipiti biuma bi palata ayi bi wola, mvandi balinda bikhutu. 36 Yave wuvanga muingi dikabu di Isaeli babaka lunungu va mesu ma basi Ngipiti, ayi basi Ngipiti baba vana biuma bioso bawu balinda. Mu phila ayoyo, basi Isaeli banata biuma bi basi Ngipiti.

37 Thalu yi basi Isaeli bananguka dimalu ku divula di Ramese, ayi bayenda ku Sukoti, yiba 600.000 di babakala kubotuka kuandi bana balezi. 38 Bawu bayenda va kimueka na nkangu wunneni wu batu bakhambu ba basi Isaeli. Mvandi banata mamemi mawombo ayi zingombi ziwombo. 39 Ayi bawu batona kuvanga mapha mu kusadila masa batuala ku Ngipiti, masa beni masa ba ko luvi, kibila baba kukisa mu thinu, ayi basa bue baka ko thangu yi kukubikila biuma bintombulu muingi kudia.

40 Basi Isaeli bazingila ku Ngipiti mu 430 di mimvu. 41 Kilumbu badukisa 430 di mimvu, kiawu dikabu di Yave babasika ku Ngipiti mu mangumba. 42 Mu builu abubu, benu lufueti kembanga nkungi muingi kuzitisa Yave, kibila nandi wulukula ku Ngipiti. Kidi kilumbu basi Isaeli bafueti tebukilanga monyo Yave, mu zimbandu ziawu zioso.

43 Yave wukamba Mose ayi Aloni: “Awuwu wawu nsiku yikuluvana matedi Pasika: Nzenza kalendi dia ko bidia bi Pasika. 44 Vayi, boti vadi mutu mu benu widi mvika kasumbila mu zimbongo, buna kafueti kunzengusu pheni, muingi kaba wufuana mu kudia bidia bi Pasika. 45 Nzenza weka yaku mimvu miwombo ayi kisadi kiaku, mvandi balendi dia ko bidia bi Pasika. 46 Lufueti dila muana dimemi voti muana khombo beni, ku nzo yimueka to. Mulendi nata ko mbizi yi kibulu beni ku nganda, ayi mulendi bokuna ko mimvesi miandi. 47 Dikabu dioso di Isaeli, bafueti kemba nkungi wu Pasika. 48 Boti nzenza wuntomba kukemba Pasika muingi kuzitisa Yave, buna babakala boso bankalanga ku nzo’andi bafueti zengusu zipheni. Ba kuvanga mawu, buna nandi wunkuiza ba wufuana muingi kudia bidia bi Pasika, kibila nandi weka buka musi Isaeli. Vayi dioso dibakala wukhambu zengusu pheni, kalendi dia ko bidia bi Pasika. 49 Batu boso bafueti tumukina nsiku awowo, kuba kuandi musi Isaeli voti zinzenza bankalanga yinu.”

50 Mu phila ayoyo, basi Isaeli boso bavanga mambu Yave katuma Mose ayi Aloni. Bawu bavangila buna buawu. 51 Muna kilumbu beni, Yave wubasisa basi Isaeli ku Ngipiti mu mangumba.

13 Bosi Yave wubue kamba Mose mambu amama: 2 “Tula va khonzu bana batheti ba babakala ba basi Isaeli muingi baba bama, kibila muana wutheti wu dibakala wumbutuka, kuba kuandi wu mutu voti wu kibulu, badi bama.”

3 Mose wukamba dikabu dioso: “Lufueti tebukilanga monyo kilumbu akiki kio lubasika ku Ngipiti, ntoto wu buvika, kibila Yave wusadila mangolo mandi muingi kutubotula ku Ngipiti. Diawu tulendi dia ko ni kiuma kidi luvi. 4 Bubu befu tuidi mu kubasika ku Ngipiti mu ngonda yi Abibe.* 5 Bo Yave kala lunata ku ntoto wu basi kanani, wu zi hitita, wu zi amoreu, wu zi heveu ayi wu zi jebuzeu, ntoto kakanikisa zikhaya zinu, kibuangu kiwedi leta ayi wika,* benu lufueti kembanga nkungi awuwu mu ngonda ayiyi. 6 Lufueti dianga mapha makhambulu luvi mu sambuadi di bilumbu, ayi mu kilumbu ki sambuadi, lufueti kemba nkungi muingi kuzitisa Yave. 7 Lufueti dia mapha makhambulu luvi mu sambuadi di bilumbu, ayi lulendi bika ko kioso kiuma kidi luvi mu zinzo zinu. Mvandi lufueti botula luvi va kizunga kinu kioso. 8 Mu kilumbu beni ki nkungi, ngie fueti kamba bana baku mambu amama: ‘Yidi mu kukembila nkungi awuwu mu kibila ki mambu mamboti Yave kaphangila bo kambasisa ku Ngipiti.’ 9 Nsiku awowo wufueti ba buka kidimbu va koko kuaku, ayi va mbulu’aku, muingi ku kutebulanga monyo ti fueti zabikisa minsiku mi Yave, kibila Yave wusadila mangolo mandi muingi ku kubasisa ku Ngipiti. 10 Ngie fueti kembanga nkungi awowo mu kadika mvu mu thangu basikika.

11 “Bo Yave kankuiza kuvana ntoto wu basi kanani dedi bo ka kukanikisila ayi kakanikisila kuidi zikhaya ziaku, 12 ngie fueti vana kuidi Yave bana batheti ba babakala, kuba kuandi ba batu voti ba bibulu, kibila Yave nandi wuba vuidi. 13 Ngie fueti kula muana wutheti wumbakala wu ziphunda ziaku mu kuvana dimemi, ngie kukhambu vanga mawu, buna fueti vonda muana wutheti wu phunda beni mu kumbita nti ku dikosi. Mvandi lufueti kula bana binu batheti ba babakala.

14 “Bana baku ba kukuvula: ‘Kibila mbi wumvangila mambu amomo?’ Ngie fueti kuba kamba: ‘Kibila Yave wusadila mangolo mandi muingi ku tubasisa ku Ngipiti ntoto wu buvika. 15 Bo Falawo kamonisa ntu ngolo ayi bo kamanga ku tubasisa ku Ngipiti, Yave wuvonda bana boso batheti ba babakala ba basi Ngipiti, kuba kuandi ba batu voti ba bibulu. Diawu yidi mu kuvanina kuidi Yave bibulu bitheti bimbakala, ayi mvandi yidi mu kukudila bana bama batheti ba babakala.’ 16 Akiokio kiala ba buka kidimbu va koko kuaku ayi va mbulu’aku, kibila Yave wusadila mangolo mandi muingi ku tukula ku Ngipiti.”

17 Bo Falawo kavana nsua muingi dikabu babasika ku Ngipiti, Nzambi kasa bika ko muingi bawu bendila mu nzila yimviokila ku ntoto wu basi filistea kheti yawu nzila yiluta ba yifikama. Kibila Nzambi wutuba: “Ḿba dikabu balenda balula mayindu ayi kutomba kuvutuka ku Ngipiti ba kudengana batu ba kuba nuanisa.” 18 Diawu Nzambi kanatina dikabu diandi mu nzila yi thandu yinkuenda ku ḿbu wubenga. Basi Isaeli babasika ku Ngipiti mu mangumba. 19 Mose mvandi wunata mimvesi mi Yozefi, kibila Yozefi wuvanga bana ba Isaeli kuleva phesi mu kuba kamba: “Bukiedika, Nzambi wala vutula thalu’andi kuidi benu, diawu bo luala kuenda, lufueti nata mimvesi miama.” 20 Basi Isaeli bananguka ku Sukoti ayi bavundila ku Etam kibuangu kidi ku ndeku thandu.

21 Yave waba tuadisanga dikabu di Isaeli mu phila ayiyi: Va muinya nandi waba sadilanga dituti muingi kuba monisa nzila, va builu nandi waba sadilanga mbazu muingi kuba vana kiezila. Mu phila ayoyo, basi Isaeli baba nunganga kudiata va muinya ayi va builu. 22 Dituti diabasa zimbalanga ko vantuala basi Isaeli va muinya, ayi mvandi mbazu yabasa zimbalanga ko vantuala basi Isaeli va builu.

14 Bosi Yave wukamba Mose: 2 “Kamba basi Isaeli muingi bavutuka ayi bevundila ku Pi-Hairoti, kizunga kidi va khonzu Migdoli ayi ḿbu, vantuala Baal-Zefom. Benu lufueti vundila ku khonzu ḿbu, vantuala Baal-Zefom. 3 Bosi Falawo wunkuiza tuba mambu amama: ‘Basi Isaeli badi mu kudiengila tsi mu phamba, mukhambu zaba ko bankuenda. Bawu babe zimbala ku thandu.’ 4 Yinkuiza bika Falawo kamonisa ntu ngolo, nandi wunkuiza lulandakana, ayi minu yinkuiza zitisa dizina diama mu kutulula Falawo ayi masodi mandi. Bosi basi Ngipiti bala zaba ti minu yidi Yave.” Ayi basi Isaeli bavanga mamoso baba kamba.

5 Bosi bakamba Falawo ti basi Isaeli badi mu kutina. Muna thangu beni, Falawo ayi bisadi biandi babaka makani ma kulandakana basi Isaeli, ayi batuba: “Kibila mbi tube babikila benda? Mimvika mitu basi Isaeli bama tina.” 6 Mu phila ayoyo, Falawo wukubika makalu mandi. Nandi ayi masodi mandi, balandakana basi Isaeli. 7 Nandi wukubika makalu moso ma mimvita ma Ngipiti, kubunda mvandi 600 di makalu malutidi, ayi kadika dikalu diba masodi. 8 Mu phila ayoyo, Yave wubika Falawo ntinu wu Ngipiti katatamana kumonisa ntu ngolo, ayi nandi wulandakana basi Isaeli, vayi basi Isaeli baba kuenda mukhambu mona boma. 9 Basi Ngipiti balandakana basi Isaeli mu makalu mawu moso ma mimvita, ayi baye babata va kibuangu baba vundila, va ndeku ḿbu ku Pi-Hairoti, kibuangu kiba vantuala Baal-Zefom.

10 Bo basi Isaeli bavumuna thalu ayi bamona ti Falawo waba fikama vo baba, bawu batona kudila ayi kudinda lusalusu kuidi Yave. 11 Bawu bakamba Mose: “Bukiedika ti ku Ngipiti kuisi ko biziami muingi tuiza fuila ku thandu? Wummona mambu ma tutuadisila mu kutubotula ku Ngipiti? 12 Tusa kukamba ko mambu amama bo tuba ku Ngipiti: ‘Wutubika tuba mimvika mi basi Ngipiti?’ Kibila bulutidi kuba mimvika mi basi Ngipiti, kena kuiza fuila ku thandu.” 13 Vayi Mose wukamba dikabu: “Bikanu kuba boma, banu bakuikama ayi monanu mambu Yave kankuiza vanga muingi kuluvukisa. Kibila basi Ngipiti abobo lummona bubu, luisinkuiza bue bamonanga ko. 14 Vasinkuiza tombulu ko benu kunuana, kibila naveka Yave, nandi wunkuiza lunuanina.”

15 Ayi Yave wukamba Mose: “Kibila mbi widi mu kutatamana kundindila lusalusu? Kamba basi Isaeli bananguka va kibuangu badi mu kuvundila. 16 Ngie fueti nonuna nkawu’aku mu ḿbu, muingi ḿbu wukabuka, ayi benu lunkuiza viokila va khati ḿbu mu ntoto wuyuma. 17 Minu yinkuiza bika muingi basi Ngipiti bamonisa ntu ngolo, ayi bawu bankuiza lulandakana. Mu phila ayoyo, minu yinkuiza zitisa dizina diama mu kutulula Falawo ayi masodi mandi, kubunda mvandi makalu mandi ma mimvita. 18 Ayi basi Ngipiti bankuiza zaba ti minu yidi Yave, bo yinkuiza zitisa dizina diama, mu kutulula Falawo va kimueka na makalu mandi moso ma mimvita.”

19 Bosi, mbasi yi Nzambi yikiedika yiba kuntuala dikabu di Isaeli, yiyenda kumbus’awu, ayi dituti dio diba kuntual’awu, mvandi diyenda kumbusa. 20 Dituti beni diyiza ba va khati tsika dikabu di Isaeli ayi masodi ma Ngipiti. Diawu diaba tuadisa kitombi ku khonzu masodi ma Ngipiti, vayi diaba tuadisa kiezila ku khonzu basi Isaeli. Mu phila ayoyo, masodi ma basi Ngipiti basa fikama ko vaba basi Isaeli.

21 Bosi Mose wunonuna nkawu’andi mu ḿbu, ayi Yave wutuadisa phemu yifumina ku khonzu leste mu builu beni muingi kuzibula ḿbu, mu phila ayoyo, va khati ḿbu vamonika nzila yi ntoto wuyuma. 22 Bo ḿbu wukabuka, nlangu wuba ku khonzu lukietu ayi ku khonzu lubakala wuba buka bibaka, bosi basi Isaeli basabuka ḿbu mu ntoto wuyuma. 23 Basi Ngipiti na makalu mawu moso ma mimvita, batona kulandakana basi Isaeli va khati ḿbu. 24 Ava buisi kukia, vana khati mbazu ayi dituti, Yave wutala masodi ma basi Ngipiti, ayi wuvanga muingi basi Ngipiti baba yazuka yazuka. 25 Nzambi wuvanga muingi makalu ma mimvita ma basi Ngipiti, mabika kubue diata buboti, diawu bawu batubila: “Ndokuanu tutina basi Isaeli, kibila Yave nandi widi mu kunuana yitu va mvingi’awu.”

26 Bosi Yave wukamba Mose: “Nonuna nkawu’aku mu ḿbu, muingi nlangu wubuila basi Ngipiti ayi makalu mawu moso ma mimvita.” 27 Muna thangu beni, Mose wunonuna nkawu’andi mu ḿbu, ayi bo buisi bukia, nlangu wu ḿbu wuvutuka mu phila wubela. Basi Ngipiti bameka kutina muingi bavuka, vayi Yave wuba diamisa mu ḿbu. 28 Bo nlangu wu ḿbu wuvutuka mu phila wubela, wawu wudiamisa masodi ma basi Ngipiti, bo balandakana basi Isaeli va kimueka na makalu mawu moso ma mimvita. Ayi ni wumueka mu bawu kasa vuka ko.

29 Vayi basi Isaeli badiata va khati ḿbu mu ntoto wuyuma, ayi nlangu wu ḿbu wuba ku khonzu lubakala ayi ku khonzu lukietu, wuba buka bibaka. 30 Mu phila ayoyo, mu kilumbu beni Yave wuvukisa basi Isaeli boso mu mioko mi basi Ngipiti, ayi bawu bamona zimvumbi zi basi Ngipiti ku disimu, mu ndeku ḿbu. 31 Basi Isaeli bamona phila Yave kasadila mangolo mandi muingi kutulula masodi ma basi Ngipiti, ayi dikabu dioso batona kukinzika Yave ayi kumonisa kiminu mu Yave, ayi mu kisadi kiandi Mose.

15 Mu thangu beni, Mose ayi basi Isaeli bayodila Yave nkunga awuwu:

“Yinkuiza yodila Yave nkunga, kibila nandi matambula nkembu wuwombo.

Nandi madiamisa mu ḿbu masodi ma basi Ngipiti ayi makalu mawu.

 2 Yah* nandi wu kuphananga mangolo, kibila nandi weka mvukisi’ama.

Anono nandi Nzambi’ama, ayi minu yala tatamana kunzitisa. Nandi widi Nzambi yi tat’ama, minu yala tatamana kunkembisa.

 3 Yave widi wupisuka mu mimvita, Yave diawu dizina diandi.

 5 Mayo manneni maba diamisa, ayi bawu badiama buka dimanya dinsinda kutsi nlangu.

 9 Zimbeni zitu batuba: ‘Befu tunkuiza balandakana, ayi kuba bakidila.

Tunkuiza bonga biuma biawu bioso.

Ayi tuala bavondila mu zimbedi zitu.’

11 Nzambi mbi yinkaka yidi buka ngiewu, a Yave?

Bukiedika ti vadi nzambi yinkaka wulutidi bunlongo kena ngiewu,

no tulenda zitisila mu minkunga mu kibila ki mambu ma kukuitukila kamvanganga?

12 Bo ngie wunonuna koko kuaku ku lubakala, ntoto wumina zimbeni zitu.

Ayi batu boso bankalanga ku Kanani, bala ba mu kiunda.

16 Bawu bala ba mu boma ayi bala titubuka.

18 Yave wala tatamana kuyala mvu ka mvu.

20 Bosi Mirian khomba yi nkietu yi Aloni no wuba ḿbikudi, wubonga kisiku ki minkunga* ayi va kimueka na bakietu bankaka baba kuenlandakananga, baba sika bisiku beni ayi baba kina. 21 Mirian waba tambudilanga nkunga beni, mu kuyola:

“Yimbidilanu Yave, kibila nandi matambula beni nzitusu.

Nandi wudiamisini mu ḿbu, makalu ayi masodi mawu.”

22 Bosi Mose ayi basi Isaeli, bananguka ku Ḿbu Wubenga, ayi bayenda ku thandu yidi ku Sur. Bawu badiata bilumbu bitatu ku thandu beni, vayi basa bakula ko nlangu. 23 Bosi bavitila ku kizunga baba tedilanga Mara,* vayi basa nunga ko kunua nlangu wuba ku kizunga beni, kibila wuba beni ndudi. Diawu bavanina kibuangu beni dizina Mara. 24 Bosi dikabu ditona kukuana kuidi Mose, mu kutuba: “Mbi tuennua?” 25 Mose wudinda lusalusu kuidi Yave, ayi Yave wummonisa mua nti. Bo Mose kakuba mua nti beni mu nlangu, nlagnu wuyiza ba wumboti muingi kunua.

Nzambi wuvanga mambu moso amomo, muingi batu boso bazaba mambu mbi Nzambi kaba tomba muingi basi Isaeli bavanga. Nandi wuba thota muingi kumona boti bankuiza ntumukina voti ndamba. 26 Nzambi wuba kamba: “Minu yidi Yave Nzamb’inu, benu kukuwa mbembu’ama, kuvanga mambu masulama va mesu mami, ayi benu kuteka matu mu zithumu ziama ayi minsiku miama, yisinkuiza lutuadisa ko zitsingulu dedi zio yituadisidi basi Ngipiti, kibila minu yidi Yave ayi yala tatamana kulukieba.”

27 Bosi bawu bavitila ku kizunga ki Elim, kuba 12 di zitho zi nlangu, ayi 70 di maba.* Mu phila ayoyo, bawu bavundila va kibuangu beni vaba muila.

16 Bo dikabu di Isaeli bananguka ku kizunga ki Elim, bawu bavitila ku thandu yi Sim, yidi ku khonzu Elim ayi Sinai mu kilumbu 15 ki ngonda yimmuadi tona babasika ku Ngipiti.

2 Bosi dikabu di Isaeli badasukila Mose ayi Aloni ku thandu. 3 Bawu baba tuba: “Khanu lutubikizi kuandi ku Ngipiti muingi Yave katuvondila kuna, bo tube dianga kuitu zinzungu zitu zi zimbizi ayi mapha, boso kua tube tombilanga. Vayi benu luma tuala dikabu dioso akuku, muingi tuiza fuila mu nzala.”

4 Yave wukamba Mose: “Minu yinkuiza buisa bidia tona ku diyilu. Ayi kadika mutu mu dikabu kafueti basika muingi kuenonga bidia kafueti dia mu kilumbu, ayi yinkuiza zaba boti benu lunkuiza tumukina nsiku’ama voti ndamba. 5 Vayi mu kilumbu kinsambanu, basi Isaeli bafueti nonga kitesu kilutidi na kio bannonganga kadika kilumbu.”

6 Bosi Mose ayi Aloni bakamba dikabu di Isaeli: “Bo buisi bunkuiza yila, benu lunkuiza zaba ti Yave, nandi wulubotula ku ntoto wu Ngipiti. 7 Yono va meni luala mona nkembu wu Yave, kibila Yave wuyuwidi mambu lutubidi. Buabu kibila mbi benu lu tudasukidi?” 8 Mose wubue tuba: “Va masika bo Yave kankuiza luvana zimbizi ayi kankuiza luvana mapha va meni, benu lunkuiza zaba ti Yave wuyuwidi mambu lutubidi. Vayi zabanu kuinu ti Yave, nandi lutubidi bubi kubika kuandi befu.”

9 Bosi Mose wukamba Aloni: “Kamba basi Isaeli: ‘Yave wuntomba kukoluka yinu, kibila wuyuwidi mambu lutubidi, diawu kutakananu avava.’” 10 Bo Aloni kamana kukoluka na dikabu, bawu babalula thalu ku thandu, ayi nkembu wu Yave wumonika mu matuti.

11 Yave wubue kamba Mose: 12 “Yiyuwidi mambu basi Isaeli batubidi, diawu wuba kamba mambu amama: ‘Va masika benu lunkuiza dianga zimbizi, ayi va meni lunkuiza dianga mapha. Mu phila ayoyo, benu lunkuiza zaba ti minu yidi Yave Nzamb’inu.’”

13 Va masika vamonika zi codornize* zimana kuwala va tsi, ayi va meni vamonika maná yimana kuwala va tsi buka binoko.* 14 Bo binoko biyuma, va tsi vamonika biuma biluelu biba buka gelu va tsi. 15 Bo basi Isaeli bamona mawu, bakiyuvusa bawu na bawu: “Bio mbi?” Kibila basa zaba ko ntindu mbi biuma binani. Mose wuba kamba: “Abiobio bidi bidia Yave kama luvana muingi ludia. 16 Alulu luawu lutumu Yave kavana kuidi basi Isaeli: ‘Kadika mutu kafueti bonga kitesu kankuiza dia. Kafueti bonga gomor* yimueka mu kadika mutu, mu kutadila thalu yi batu badi ku nzo’andi.’” 17 Basi Isaeli bavanga mambu Mose kaba kamba. Bankaka mu bawu banonga bidia biwombo, vayi bankaka banonga mua nkadu. 18 Ayi bo bazonga bidia beni mu zigomor, vasa sobila ko kuidi bo babonga bidia biwombo, ayi vasa kambu ko kuidi bo banonga mua nkadu, kibila kadika mutu wunonga kitesu kio kankuiza dia.

19 Bosi Mose wuba kamba: “Ni mutu kalendi lunda ko bidia muingi kudia mu kilumbu kinlanda.” 20 Vayi bawu basa tumukina ko mambu Mose kaba kamba. Bo bankaka mu bawu balunda bidia muingi kudia mu kilumbu kilanda, bidia balunda biba zifinyu ayi biaba nuka fuku mbi. Mu kibila akiokio, Mose wuba dasukila. 21 Bawu baba nonganga biawu kadika kilumbu va meni, mu kitesu kio kadika mutu kaba nunganga kudia. Vayi bo muinya waba tekanga, bidia biaba sialanga biaba siulubukanga.

22 Mu kilumbu kinsambanu, bawu baba nonganga kitesu kilutidi: Zigomor wadi mu kadika mutu. Bosi bakulutu ba dikabu baye kamba mawu kuidi Mose. 23 Mose wuba kamba: “Buakabu butubidi Yave: Yono kidi kilumbu ki kukemba nkungi wu kisabala kuidi Yave. Diawu vanganu mapha mankuiza tombulu, ayi lambanu biuma bintombulu mu nlangu, bosi lundanu maná mansobila, muingi ludia mu kilumbu kinlanda.” 24 Mu phila ayoyo, bawu balunda maná masobila muingi kudia mu kilumbu kilanda dedi bo Mose kaba kambila, ayi maná beni balunda, masa bola ko ayi masa ba ko zifinyu. 25 Bosi Mose wuba kamba: “Bubu dianu maná lulundizi, kibila tuidi mu kukemba nkungi wu kisabala kuidi Yave. Maná masinkuiza bua ko mu kilumbu akiki. 26 Benu lunkuiza nonginanga maná mu sambanu di bilumbu, vayi mu kisabala kilumbu ki sambuadi, kuisinkuiza buanga ko maná muingi kunonga.” 27 Vayi mu kisabala kilumbu ki sambuadi, bankaka mu basi Isaeli bayenda muingi kue nonga maná, vayi basa kue bata ko ni kiuma.

28 Bosi Yave wukamba Mose: “Nati thangu mbi benu luala tatamana kukhambu tumukina zithumu ayi minsiku miama? 29 Mu kumona ti kisabala kidi kilumbu kinlongo kuidi Yave, diawu kaluvanina nsua muingi mu kilumbu kisambanu lunonganga bidia lunkuiza dia mu bilumbu biodi. Kibila mu kisabala kilumbu ki sambuadi, ni mutu kalendi botuka ko va kibuangu kadi.” 30 Mu phila ayoyo, dikabu baba vundanga mu kisabala kilumbu sambuadi.

31 Basi Isaeli baba tedilanga bidia beni baba kue nonganga “maná.” Biawu biba biphembi buka zitheti zi coentro, ayi biba lueki buka zibulacha bavangila mu wika.* 32 Mose wuba kamba: “Buakabu butubidi Yave: ‘Nonganu gomor yimueka yi maná, ayi lundanu yawu muingi zimbandu zinu bamona bidia yilu vana bo yilubasisa ku Ngipiti.’” 33 Diawu Mose kakambila Aloni: “Bonga gomor yimueka yi maná ayi tula yawu mu kibasa vantuala Yave, muingi zimbandu zinkuiza bamona.” 34 Bosi Aloni wubonga kibasa beni kiba maná, ayi wutula kiawu mu kasu yi kimbangi,* dedi bo Yave kakambila Mose. 35 Basi Isaeli batatamana kudia maná mu 40 di mimvu, nati bavitila ku ntoto wu basi Kanani. 36 Gomor yimueka yidi kikhuku ki kumi ki efa.*

17 Basi Isaeli bananguka ku thandu yi Sim, ayi baba kuevundilanga mu bibuangu biviakana dedi bo Yave kaba kambila, bosi bawu bavundila ku Refidim. Vayi va kibuangu beni vasa ba ko nlangu muingi dikabu banua.

2 Bosi dikabu batona kukuambisa Mose mu kutuba: “Wutuvana nlangu muingi tunua.” Vayi Mose wuba kamba: “Kibila mbi benu luidi mu kukhuambisila? Ayi kibila mbi luidi mu kutotila Yave?” 3 Vayi basi Isaeli baba beni phuila, diawu baba tombila nlangu. Bawu badasukila Mose ayi bankamba: “Kibila mbi wutubotudidi ku Ngipiti ayi kututuala ku kibuangu akiki, muingi befu, bana bitu ayi bibulu bitu tufuila mu phuila yi nlangu?” 4 Bosi Mose wudinda lusalusu kuidi Yave mu kutuba: “Mambu mbi yifueti vangila dikabu adidi? Mikukhambu vanga dioso diambu, bawu bankuiza khuba mamanya.”

5 Yave wukamba Mose: “Yenda vantuala dikabu, ayi nata mua bakulutu mu basi Isaeli, mvandi nata nkawu wo wuvangila mangitukulu mu muila wu Nilu. 6 Bo wala kuenda vantuala dimanya ku Horebe, minu yala ba yaku. Ngie fueti bita nkawu beni va dimanya ayi diawu diala basisa nlangu muingi dikabu banua.” Bosi Mose wuvanga mambu Nzambi kankamba vantuala basi Isaeli. 7 Mose wutedila kibuangu beni Massá* ayi Meribá,* kibila basi Isaeli banyambisa ayi bathota Yave mu kutuba: “Yave widi kuandi yitu voti ndamba?”

8 Bo basi Isaeli baba ku Refidim, basi Amaliki bayiza ku banuanisa. 9 Bosi Mose wukamba Yosua: “Sola mua babakala muingi kue nuanisa basi Amaleki. Yono minu yala maka va mbata mongo na nkawu wu Nzambi yikiedika va koko.” 10 Yosua na babakala kasola bayenda muingi kue nuanisa basi Amaleki dedi bo Mose kaba kambila. Vayi Mose, Aloni ayi Hur bamaka va mbata mongo.

11 Bo mioko mi Mose miaba tatamananga mivumuka kuyilu, basi Isaeli baba nunganga, vayi bo Mose kaba kululanga mioko, basi Amaleki baba nunganga. 12 Bo Mose kaba mona mioko kutiva, Aloni ayi Hur babonga dimanya ayi Mose wukala va mbata dimanya beni. Bosi Aloni ayi Hur basimba mioko mi Mose, wunkaka wusimba koko ku lubakala ayi wunkaka wusimba koko ku lukietu. Mu phila ayoyo, mioko mi Mose mitatamana minonuka kuyilu nati va masika ma builu. 13 Mu phila ayoyo, Yosua ayi babakala kasola banunga basi Amaleki.

14 Bosi Yave wukamba Mose: “Sonika mambu amama mu buku muingi luma tebukilanga monyo, ayi kamba mawu kuidi Yosua: ‘Minu yala kubula basi Amaleki va ntoto ayi ni mutu kalasa bue batebukilanga ko monyo.’” 15 Bosi Mose wutunga kikuma ayi wutedila kikuma beni Yave-Nissi,* 16 ayi wutuba: “Mu kumona ti basi Amaleki babe vueza luyalu lu Yah, Yave wala tatamana kuba nuanisa mu zimbandu zioso.”

18 Jetru nganga nzambi yi Midia, kikuekizi ki Mose, wuyuwa mambu moso Nzambi kavangila Mose ayi dikabu dioso di Isaeli, ayi phila Yave kavukisila dikabu di Isaeli ku Ngipiti. 2 Bo Mose kafila nkazi’andi Zípora ku nzo kikuekizi kiandi Jetru, nandi wunyamba. 3 Mose mvandi wufila bana bandi babuadi ku nzo kikuekizi kiandi. Wumueka mu bana bandi baba ntedilanga Gerson,* kibila Mose wutuba: “Yima mvanina dizina adiodio, kibila minu yeka nzenza ku ntoto wu kinanu.” 4 Muana wunkaka wumvana dizina Eliezeli,* kibila nandi wutuba: “Yima mvanina dizina adiodio, kibila Nzambi yi tat’ama widi nsadisi’ama, nandi wuphukisa mu mioko mi Falawo.”

5 Bosi Jetru kikuekizi ki Mose va kimueka na nkazi Mose ayi bana bandi, baye dengana Mose ku thandu kibuangu baba vundila ku mongo wu Nzambi yikiedika. 6 Jetru wufila thumu ayiyi kuidi Mose: “Minu kikuekizi kiaku Jetru, yidi mukuiza kudengana va kimueka na nkazi’aku ayi bana baku babuadi.” 7 Mu thinu Mose wuye dengana kikuekizi kiandi, wufukama vantual’andi ayi wumvana besu. Kadika mutu mu bawu wuyuvula wadi yandi buidi kadidi, bosi bakota ku tenda.

8 Mose wuzabikisa kuidi kikuekizi kiandi mambu moso Yave kavangila Falawo ayi basi Ngipiti, mu kibila ki basi Isaeli. Mvandi wunkamba bikaku baviokila mu nzila ayi phila Yave kaba vukisila mu bikaku beni. 9 Jetru wuyangalala kuzaba mambu moso Yave kavangila basi Isaeli mu kuba kula ku Ngipiti. 10 Diawu Jetru katubila: “Bika Yave, no wulukula mu mioko mi Falawo ku ntoto wu Ngipiti mu kulubotula va kivika, kazitusu. 11 Buabu yima zaba ti Yave lutidi kena zinzambi zioso, mu kibila ki mambu kavangidi basi Ngipiti bawedi lungundayi ayi baba tovula dikabu diandi.” 12 Bosi Jetru kikuekizi ki Mose wuvana Nzambi nkhailu wuviku. Aloni ayi bakulutu boso ba Isaeli, baye dia va kimueka na kikuekizi ki Mose vantuala Nzambi yikiedika.

13 Mu kilumbu kilanda, Mose wukala muingi kufundisa dikabu dedi bo kaba vangilanga, ayi dikabu dioso diaba kuendanga kuidi Mose kutonina va meni nate va builu. 14 Bo Jetru kamona mambu moso Mose kaba vanga, nandi wukamba Mose: “Kibila mbi widi mu kuvangila mambu mu phila ayoyo? Kibila mbi widi mu kufundisila dikabu ngie veka kutona va meni nate va builu?” 15 Mose wuvutudila kikuekizi kiandi: “Yimvangilanga mawu mu phila ayiyi, kibila dikabu dioso dinkuizanga kuidi minu muingi bazaba mambu Nzambi kantomba. 16 Bo batu buadi bambakasana mambu bawu bankuizanga kuidi minu muingi yiba fundisa ayi ku bazabikisa makani ma Nzambi yikiedika ayi minsiku miandi.”

17 Jetru wunkamba: “Phila widi mu kuvangila mambu yisi ko yimboti. 18 Ngie kutatamana kuvangila mambu mu phila ayoyo, ngie ayi dikabu lunkuiza ba beni bavonga, kibila disi ko diambu dimboti kuvanga kisalu kioso akiokio ngie veka. 19 Buabu yuwa malongi yekuvana ayi Nzambi wunkuiza ba yaku. Bukiedika ngie fueti tatamana kuba mvuala wu dikabu vantuala Nzambi yikiedika, ayi ngie fueti zabikisa mambu ma dikabu kuidi Nzambi. 20 Mvandi ngie fueti longa dikabu dioso minsua ayi minsiku mi Nzambi, fueti basudikisa mambu bafueti vanga ayi phila bafueti vangila mambu beni. 21 Ngie fueti sola mua babakala mu dikabu muingi baba zifumu zi dikabu, dedi zimfumu zi 1.000 di batu, zimfumu zi 100 di batu, zimfumu zi 50 di batu, ayi zimfumu zi 10 di batu. Bawu bafueti ba batu bankinzikanga Nzambi, batu ba lufiatu ayi bantubanga kiedika mu mambu moso, 22 muingi bafundisanga dikabu. Ayi va kumonika mambu maphasi, buna bafueti tuala mawu kuidi ngiewu, vayi boti mambu beni masi ko phasi, buna bawu bafueti dedikisa mawu. Mu phila ayoyo, ngie wunkuiza ba wuvokuka ayi bawu bankuiza kusadisa. 23 Ngie kuvanga mawu ayi boti madi mu luzolo lu Nzambi, buna ngie wunkuiza vanganga kisalu kiaku mu khambu ba beni wuvonga ayi batu boso bala ba mu mayangi ayi mu ndembama.”

24 Mose wukikinina malongi kikuekizi kiandi kamvana ayi wuvanga mamoso bankamba. 25 Mose wusola babakala bafuana mu dikabu di Isaeli ayi wuba bieka zimfumu zi dikabu, dedi zimfumu zi 1000 di batu, zimfumu zi 100 di batu, zimfumu zi 50 di batu, ayi zimfumu zi 10 di batu. 26 Mu phila ayoyo, babakala beni bawu baba fundisanga dikabu. Bo vaba monikanga mambu maphasi ma kudedikisa, bawu baba natanga mawu kuidi Mose muingi nandi kafundisa mawu, vayi bawu baba fundisanga mambu makhambulu phasi. 27 Bosi Jetru wukanina kikuekizi kiandi Mose ayi Jetru wuvutuka ku ntoto’andi.

19 Bo vavioka zingonda zitatu tona basi Isaeli babasika ku Ngipiti, mu kiokiawu kilumbu* bawu bavitila ku thandu yi Sinai. 2 Bawu bananguka ku Refidim ayi bayenda ku thandu yi Sinai, ayi bavundila ku ndeku mongo wuba kuna.

3 Bosi Mose wutombuka ku mongo wu Nzambi yikiedika, kuna mongo beni Yave wuntela ayi wunkamba: “Zabikisa mambu amama kuidi dikanda di Yakobi, bana ba Isaeli: 4 ‘Benu veka lumueni phila yi luvukisidi ku Ngipiti, ayi phila yi lukiebidi dedi bo mbemba* kankiebilanga bana bandi ku tsi mavavi mandi, bo yilutuedi akuku. 5 Buabu benu kutumukina mambu yi kulukamba ayi benu kukinzika luwawanu yimvanga yinu, buna benu lunkuiza ba dikabu disolu mu makabu moso, kibila minu yivuidi ntoto woso. 6 Benu luala ba dikabu dinlongo ayi zinganga nzambi bala yala buka mintinu.’ Amomo mawu fueti kamba basi Isaeli.”

7 Bosi Mose wukutikisa bakulutu boso ba dikabu ayi wuba zabikisa mambu moso Yave kankamba. 8 Ayi dikabu dioso batuba mu khumbu yimueka: “Tuidi bakubama muingi kuvanga mambu moso Yave kama tuba.” Bosi Mose wuye zabikisa kuidi Yave mambu dikabu batuba. 9 Ayi Yave wukamba Mose: “Tala, minu yinkuiza yoluka yaku va khati dituti, muingi dikabu bayuwa mambu yinkuiza kukamba ayi muingi bawu baba kiminu mu ngiewu.” Mu phila ayoyo, Mose wukamba Yave mambu dikabu batuba.

10 Yave wukamba Mose: “Yenda kuidi dikabu ayi wuba kamba muingi bayidiodisa bubu ayi yono, mvandi bafueti sukula bikhutu biawu. 11 Ayi mu kilumbu kintatu, lufueti ba bakubama kibila kiawu kilumbu Yave kala kuluka ku Mongo Sinai vantuala dikabu dioso. 12 Tula zindilu mu mongo woso ayi kamba dikabu: ‘Ni mutu kabika kumaka ku mongo beni, ayi ni mutu kabika sabuka zindilu. Kibila woso mutu wunkuiza vanga mawu, wunkuiza fua. 13 Ni mutu kalendi simba ko mutu besabuka zindilu, vayi bafueti kunkuba mamanya voti kumvondila mu madionga. Kuba kuandi kibulu voti mutu, bafueti kumvonda.’ Vayi bo lunkuiza yuwa biyoko bi tulumbeta, dikabu dioso balenda maka ku mongo.”

14 Bosi Mose wukuluka ku mongo ayi wuyenda vaba dikabu, ayi wuba kamba bayidiodisa ayi basukula bikhutu biawu. 15 Nandi wukamba dikabu: “Kubamanu mu kilumbu kintatu. Ayi bikanu kubundana nyitu na bakietu binu.”

16 Mu kilumbu kintatu va meni, vayuwakana zinzazi ayi vamonika zitsiemu, mvandi vamonika dituti dinneni difuka mongo woso, ayi vayuwakana biyoko bi tulumbeta. Mu kibila akiokio, dikabu dioso batona kutitubuka mu boma. 17 Bosi Mose wunata dikabu muingi bedengana Nzambi yikiedika, ayi bawu batelama va ndeku mongo. 18 Mongo woso wu Sinai waba basika muisi, kibila Yave wukuluka ku mongo beni va khati mbazu. Muisi waba basika ku mongo beni, wuba buka muisi wu fulu yi mbazu, mu kibila akiokio mongo woso waba titubuka. 19 Bo biyoko bi tulumbeta bibuelama, Mose wuyoluka ayi Nzambi yikiedika wuntambudila.

20 Yave wukuluka ku Mongo wu Sinai, bosi Yave wutela Mose, ayi Mose wutombuka kuna. 21 Yave wukamba Mose: “Kuluka ayi kamba dikabu muingi ni mutu kabika sabuka ndilu muingi kumona Yave, kibila ba kuvanga mawu, bawombo mu bawu bankuiza fua. 22 Ayi zinganga nzambi bamfikamanga vantuala Yave kadika thangu, mvandi bafueti kuyidiodisa muingi Yave kabika kuba vonda. 23 Bosi Mose wukamba Yave: “Dikabu basinkuiza maka ko ku Mongo Sinai, kibila ngie wu tulubula, mu kutuba: “Tula zindilu mu mongo beni ayi kitula wawu wunlongo.’” 24 Vayi Yave wunkamba: “Kuluka, bosi bue tombuka ku mongo na Aloni, vayi kawubika zinganga nzambi ayi dikabu basabuka zindilu, muingi biza dengana Yave, kibila ba kuvanga mawu bankuiza fua.” 25 Bosi Mose wuyenda vaba dikabu ayi wuba kamba mambu amomo.

20 Bosi Nzambi wutuba mambu amama:

2 “Minu yidi Yave, Nzamb’inu no wulubotula ku Ngipiti ntoto wu buvika. 3 Minu to yidi Nzamb’inu, diawu bikanu kubue tomba zinzambi zinkaka.

4 Bika kuvanga kitumba voti kufikula kioso kiuma kinkaka muingi kufuanikisa kiuma kidi ku diyilu, kidi va ntoto ayi kidi mu nlangu. 5 Wulendi fukama ko vantual’awu ayi ku bibuongimina, kibila minu Yave Nzambi’aku, yintomba bambuongimina to minu. Ayi yimfundisanga bana ayi batekulu mu kibila ki zinzimbala zi matata mawu. 6 Vayi yimmonisanga luzolo ayi lukuikumunu kuidi nkuna wu batu ba kunzolanga ayi bantumukinanga zithumu ziama.

7 “Bikanu kusadila dizina di Yave Nzamb’inu mu phila yikhambu fuana, kibila Yave wala fundisa baboso bansadilanga dizina Diandi mu phila yikhambu fuana.

8 “Lufueti tatamana kutadila kilumbu ki Kisabala, kilumbu kinlongo. 9 Lufueti vanganga bisalu binu mu sambanu di bilumbu, 10 vayi kisabala kilumbu ki sambuadi kidi ki Yave Nzambi’aku. Mu kilumbu akiokio ngie wulendi vanga ko kisalu, muan’aku wu dibakala, wu nkietu, bisadi biaku bioso ayi bibulu biaku mulendi vanga ko ni kisalu. 11 Kibila Yave wuvanga diyilu, ntoto, ḿbu ayi biabioso bidi muawu mu sambanu di bilumbu, vayi mu kilumbu ki sambuadi nandi wuvunda. Diawu Yave kasakumunina kisabala ayi katudila kiawu kilumbu kinlongo.

12 “Zitisa tat’aku ayi mam’aku muingi wuzinga bilumbu biwombo ku ntoto Yave Nzambi’aku kankuiza kuvana.

13 “Bika kuvonda wadi yaku.

14 “Bika kuvanga kiphinga.

15 “Bika kukuiba.

16 “Bika kuta kimbangi ki luvunu matedi wadi yaku.

17 “Bika kuzinina nzo yi wadi yaku. Bika kuzinina nkazi wu wadi yaku, ni kisadi kiandi ki dibakala, ki nkietu, ngombi’andi, phund’andi voti kioso kiuma kinkaka ki wadi yaku.”

18 Bo dikabu dioso bayuwa lusuku lu tulumbeta, lu zinzazi, zitsiemu ayi bamona mongo beni kufutubuka muisi, bawu batona kutitubuka ayi batatuka ku kinanu. 19 Diawu dikabu bakambila Mose: “Wutuzabikisa mambu Nzambi kantuba, kibila Nzambi na kutatamana kukoluka yitu khanu tunkuiza fua.” 20 Vayi Mose wukamba dikabu: “Bikanu kumona boma, kibila Nzambi yikiedika wuntomba ku luthota muingi lutatamana kunkinzika ayi lubika sumuka.” 21 Mu kibila akiokio, dikabu ditatuka ku kinanu vayi Mose wufikama va dituti vaba Nzambi yikiedika.

22 Bosi Yave wukamba Mose: “Amama mawu fueti kamba basi Isaeli: ‘Benu veka luma mona ti minu yima kolukila yinu kuku diyilu. 23 Bikanu kuvanga zinzambi zi palata ayi zi wola muingi kubuongimina, vayi minu to lufueti buongimina. 24 Ngie fueti vanga kikumu mu kusadila ntoto, ayi va mbata kikuma beni vawu wunkuiza vanina minkhailu miviku ayi minkhailu mi kithuadi, mu kuvana mamemi minu ayi zingombi. Minu yinkuiza sola bibuangu lunkuiza mbuongiminanga ayi yinkuiza banga yinu mu bibuangu beni muingi ku lusakumuna. 25 Ngie kuthungila kikuma mu kusadila mamanya, bika kuzenga mawu. Kibila ngie kuzenga mawu mu kusadila bisadulu binu, buna masinkuiza ba ko manlongo va mesu mami. 26 Ayi bika kuvanga bikada muingi wumakina va kikuma kiama, kibila ngie kumakina vana mu bikada, pheni’aku yinkuiza monika.’

21 “Nzambi wukamba Mose muingi kavana minsua amimi kuidi basi Isaeli:

2 “Ngie kusumba musi Ebeleo muingi kaba mvik’aku, nandi kafueti kusadila mu sambanu di mimvu, vayi mu mvu wu sambuadi nandi kalasa bue ba ko mvik’aku, ayi kalenda kuenda kuandi mukhambu futa ni kiuma. 3 Boti naveka wuyiza, buna bo kala kuenda kafueti kuenda naveka. Boti widi wukuela, buna kafueti kuenda na nkazi’andi. 4 Vayi boti mfumu’ndi nandi wumvana nkazi, ayi nkazi beni na kubuta bana ba babakala ayi ba bakietu, buna nkazi na bana kambuta, bala ba bamfumu’andi. Mu phila ayoyo, kisadi beni na kukuenda wala bika dikanda diandi kuidi mfumu’andi. 5 Vayi kisadi beni na kutatamana kutuba: “Minu yinzolanga mfumu’ami, nkazi’ama, bana bama ayi yimengi muingi bakhula’, 6 buna mfumu’andi wala kunnata vantuala Nzambi. Bosi wala kumfikika va muelu voti va bibaka bi muelu, ayi mfumu’andi wala kuntobula dikutu mu thumbu. Mu phila ayoyo, nandi wala ba kisadi ki mfumu’andi mu luzingu luandi loso.

7 “Boti tata wunsumbisa muan’andi wunkietu muingi kaba mvika, muana beni wunkietu balasa kunkula ko dedi bo bankudilanga dibakala. 8 Boti mutu no bensumba kasa kuangalala ko mu nandi ayi wummanga muingi kaba kimasi kiandi, buna nandi kalenda kunsumbisa kuidi noso kua mutu, vayi kalendi kunsumbisa ko kuidi nzenza, kibila mfumu’andi kasa monisa ko lukuikumunu mu kisadi kiandi. 9 Vayi na kumvana muingi kaba nkazi wu muan’andi, buna mfumu’andi kafueti kuntadila buka muan’andi. 10 Muan’andi na kubue kuela nkietu wunkaka, buna kafueti tatamana kuvana nkietu beni tat’andi kamvana biuma bioso nkietu wukuela kadi nsua wu kutambula, bikhutu ayi bidia. 11 Nnuni’andi na kukhambu kumvana biuma abiobio bitatu, buna kisadi beni kalenda kuenda kuandi mukhambu futa ni kiuma.

12 “Woso mutu wumvanga wadi yandi phasi ayi mutu beni na kufua, buna mvandi bafueti kumvonda. 13 Vayi boti nandi bevanga mawu mukhambu lutia, ayi boti minu Nzambi yikiedika yibe bika mawu kumonika, minu yinkuiza monisa kuidi mutu bevonda wadi yandi mukhambu lutia kibuangu kafueti tinina. 14 Boti mutu bedasukila wadi yandi ayi wumbaka makani ma kumvonda, buna mvandi bafueti kumvonda, kheti nandi betinina va kikuma kiama. 15 Woso mutu wumbula tat’andi ayi ngudi’andi, bafueti kumvonda.

16 “Woso mutu wunnata wadi yandi mu lukuiku muingi kuensumbisa voti kaba mvik’andi, bafueti kumvonda.

17 “Woso mutu wunsinga tat’andi ayi ngudi’andi, bafueti kumvonda.

18 “Boti batu buadi badi mu kunuana ayi wumueka mu bawu wumviva wadi yandi dimanya voti kiuma kinkaka, ayi mutu beni kasa fua ko vayi bevangana phasi: 19 Ayi bumviokila thangu na kutona kudiatila mu nti, buna mutu wumvanga phasi balasa kumvonda ko, vayi kafueti tatamana kunsadisa nati kala beluka.

20 “Mfumu kisadi na kusuva kisadi kiandi khuba nati kamfua, buna mfumu beni kafueti tambula tsembolo. 21 Vayi va kuvioka kilumbu kimueka voti bilumbu biodi bosi kisadi beni fuidi, buna mfumu yi kisadi beni kasinkuiza tambula ko tsembolo, kibila nandi wunsumbila mu zimbongo ziandi.

22 “Boti babakala buadi badi mu kunuana, ayi wumueka mu bawu wumbunda nkietu widi buemba, ayi nkietu beni na kufika buta ava thangu kufuana, kheti nkietu beni ayi muana basa vangana ko phasi, buna mutu widi fotu wunkuiza futa kuidi nnuni vuidi nkietu, mu kutadila thalu yo mimfundisi bankuiza sikika. 23 Vayi va kufua mutu, buna mutu widi fotu mvandi bafueti kumvonda. 24 Boti diesu kabe tobula mvandi bafueti kuntobula diesu, boti dienu kabe botula mvandi bafueti kumbotula dienu, boti koko kabe bokuna, mvandi bafueti kumbokuna koko, boti kulu mvandi bafueti kumbokuna kulu, 25 na kuvika wunkaka mvandi bafueti kumvika, na kulueka mvandi bafueti kunlueka ayi na kuvanga wunkaka phasi mvandi bafueti kumvanga phasi.

26 “Boti mfumu yi kisadi betobula diesu di kisadi kiandi, buna nandi kasinkuiza bue ba ko kisadi kiandi, vayi kafueti kumbika kenda mu kibila ki diesu kabe ntobula. 27 Ayi na kubotula dienu di mvik’andi, kisadi beni kasinkuiza bue ba ko mvik’andi, vayi kafueti kumbika kenda mu kibila ki dienu kabe ḿbotula.

28 “Boti ngombi yimbakala yindumva mutu ayi mutu beni kandumva fuidi, buna bafueti vondila ngombi beni mu mamanya, ayi ni mutu kalendi dia ko mbizi yi ngombi beni. Ayi mutu vuidi ngombi beni balendi kumvanga ko phasi. 29 Vayi boti balubula mutu vuidi ngombi ti yawu yidi kifu ki kudumvanga batu ayi nandi wumanga kutula ngombi beni mu phaka, buna bafueti vondila ngombi beni mu mamanya ayi mvandi bafueti vonda mutu vuidi ngombi. 30 Vayi ba kunzengila nkanu wu kufuta biuma va mvingi luzingu luandi, buna nandi kafueti futa biuma bioso bankuiza ndinda muingi kuvukisa luzingu luandi. 31 Vayi boti ngombi yimbakala bedumva muana dibakala voti muana wunkietu ayi muana beni na kufua, buna mvandi bafueti vonda mutu vuidi ngombi beni, voti kunzengila nkanu wu kufuta biuma va mvingi luzingu luandi. 32 Boti ngombi yimbakala bedumva kisadi ki mutu wunkaka ayi kisadi beni fuidi, buna mutu vuidi ngombi kafueti futa mutu vuidi kisadi 30 di zisikulu,* vayi bafueti vondila ngombi beni mu mamanya.

33 “Boti mutu bebotula kiuma kimfuka dibulu, voti besika dibulu, ayi na kubika dibulu beni yambi, ayi ngombi voti phunda yakubua muna ayi yakufua, 34 mutu vuidi dibulu beni wunkuiza futa kuidi mutu vuidi kibulu thalu yi kibulu kibe fua, ayi kibulu kifua kinkuiza ba ki mutu vuidi dibulu. 35 Boti ngombi yibe vonda ngombi yi mutu wunkaka, bafueti sumbisa ngombi yibe vonda yinkaka. Mutu vuidi ngombi yibe vonda yinkaka ayi mutu vuidi ngombi yibe fua bafueti kabana zimbongo. Mvandi bafueti kabana ngombi yibe fua. 36 Vayi boti mutu vuidi ngombi yibe vonda yinkaka wuzaba ti ngombi’andi yiba kifu ki kudumva, ayi kasa yitula ko mu phaka, buna nandi wunkuiza futa kuidi mutu vuidi ngombi yibe fua ngombi yinkaka, ayi ngombi yibe fua yinkuiza ba yandi.

22 “Mutu na kukuiba ngombi voti dimemi, ayi na kusumbisa kibulu beni voti kukivonda, kafueti futa 5 di zingombi va mvingi ngombi beni ayi 4 di mamemi va mvingi dimemi beni.

2 (“Ba kubuila muivi wunlula nzo va builu muingi kukuiba, ba kunlueka voti kumvonda, buna mutu bemvonda kasinkuiza ba ko fotu. 3 Vayi boti muivi beni va muinya kankuiba, buna mutu wu kumvonda wunkuiza ba fotu.)

“Muivi beni kafueti futa biuma kabe kuiba. Vayi na kukhambu baka bu kufutila, bafueti kunsumbisa muingi kufuta biuma kabe kuiba. 4 Ba kumbakula na kibulu beni kimonyo, kuba kuandi ngombi, phunda voti dimemi, buna kafueti futa bibulu biodi va mvingi kibulu kabe kuiba.

5 “Woso mutu wunnata bibulu muingi kuedia bititi ku tsol’andi, ayi wumbika bibulu biandi muingi bivitila nati ku tsola yi mutu wunkaka, buna nandi kafueti vana kitini ki tsol’andi kilutidi, kuidi mutu wuvuidi tsola bibulu biandi babe kue dila.

6 “Boti mutu betatika mbazu muingi kuvika bititi mu tsol’andi, ayi mbazu beni ya kuvitila mu tsola yi mutu wunkaka ayi kuvika bikunusu bidi mu tsola beni, buna mutu betatika mbazu, kafueti futa biuma bibe via mu tsola yingana.

7 “Boti mutu babe mvana zimbongo voti biuma binkaka muingi kalunda ku nzo’andi, muivi na kukuiba biawu ayi ba kumbuila, buna muivi beni kafueti futa bitesu biodi mu biuma kabe kuiba. 8 Ba kukhambu bakula muivi beni, buna mutu no bavana biuma muingi kalunda, bafueti kunnata vantuala Nzambi yikiedika muingi bazaba boti nandi bekuiba biuma beni voti ndamba. 9 Boti batu buadi bamfindana ziphaka matedi nani vuidi ngombi, phunda, dimemi, bikhutu voti kioso kua kiuma kinkaka kibe zimbala, ayi wumueka mu bawu na kutuba: ‘Kidi kiama.’ Buna ba babuadi bafueti kuenda vantuala Nzambi yikiedika. Ayi woso mutu no Nzambi kankuiza tuba ti nandi widi fotu, kafueti vana kuidi wadi yandi bitesu biodi mu biuma kabe kuiba.

10 “Boti mutu bevana kibulu kiandi kuidi wadi yandi muingi kakieba, kuba kuandi ngombi, phunda, dimemi voti kioso kua kibulu kinkaka bantuilanga, ayi kibulu beni kia kuvangana phasi, kia kufua, voti ba kukikuiba, ayi ba kukhambu bakula muivi, 11 buna ba babuadi bafueti kuenda muingi baba fundisa. Ayi mutu no bavana bibulu muingi ka bikieba na kutuba ti kasa bikuiba ko, ayi na kuleva phesi vantuala Yave Nzambi, buna mutu vuidi bibulu beni kafueti kikinina mawu. Ayi mutu bavana bibulu beni, kasinkuiza futa ko ni kiuma. 12 Vayi boti mutu bavana bibulu beni nandi wuyiba biawu, buna kafueti futa kuidi mutu wuvuidi biawu. 13 Boti kibulu beni babe kivonda kuidi kibulu kinsitu, buna nandi kafueti nata kibulu beni kifua muingi kuvana bivisa mu mawu. Mu phila ayoyo, nandi kasinkuiza futa ko ni kiuma mu kibila ki kibulu babe vonda kuidi kibulu kinsitu.

14 “Vayi boti mutu bedeva kibulu ayi kibulu beni kia kuvangana phasi voti kia kufuila mu mioko mi mutu beni, buna nandi kafueti futa kuidi mutu vuidi kibulu. 15 Kibulu beni kia kuvangana phasi voti kia kufuila vantuala mutu vuidi kiawu, buna mutu bedeva kiawu kasinkuiza futa ko kibulu kinkaka va mvingi kibulu beni. Vayi wunkuiza futa to zimbongo kabe devila kibulu.

16 “Dibakala na kuvukumuna muana nkietu no ka kabundiniabu ko nyitu ayi bakhambu kanikisa dikuela, ayi na kubundana yandi nyitu, buna nandi kafueti futa biuma bamvananga muingi kukuela nkietu. Ayi nkietu beni wunkuiza ba nkazi’andi. 17 Vayi boti tata kasinkikinina ko muingi muan’andi kakuela dibakala beni, buna dibakala beni kafueti futa biuma bamvananga muingi kukuela nkietu.

18 “Mufueti vonda zindoki zioso zi bakietu.

19 “Woso mutu wumbundana nyitu na kibulu, bafueti kumvonda.

20 “Woso mutu wumvana minkhailu kuidi zinzambi zinkaka kubika kuandi kuidi Yave, bafueti kumvonda.

21 “Bikanu kukuamisa ayi kuvueza nzenza wunkalanga va khat’inu, kibila benu mvinu muba zinzenza ku ntoto wu Ngipiti.

22 “Bikanu kukuamisa mfuizi voti muana kisiana.* 23 Ngie kuba kuamisa ayi ba kulinda lusalusu luama, minu yinkuiza yuwa manyongi mawu. 24 Mu kibila akiokio minu yinkuiza dasuka ayi yinkuiza luvondila mu zimbedi. Bakazi binu bankuiza ba bisita ayi bana binu bankuiza ba bana batsiana.

25 “Boti ngie bedevisa zimbongo kuidi mutu wukhambulu mbakulu, kuba kuandi musi dikabu voti mutu wunkaka wunkalanga yinu, bika kuvingila kutambula zimbongo zinkaka va mbata.

26 “Ngie kubonga divunga di wadi yaku muingi kusimbidila nati kamfuta pholu’aku, ngie fueti vutula diawu ava buisi kukuila. 27 Kibila diawu to divunga dike yandi muingi kavungisila bo kanlala. Buabu ngie kubonga diawu, mbi kankuiza vungisila bo kanlala? Na kundinda lusalusu, minu yinkuiza yuwa manyongi mandi, kibila yidi nkua kiadi.

28 “Bika kuvueza Nzambi, ayi bika kusinga bakulutu ba dikabu.

29 “Mu thangu yifuana ngie fueti kuphananga minkhailu mu bivatu biaku bi vinu ayi nzeta. Ayi lufueti kuphananga bana binu batheti ba babakala. 30 Lufueti vanganga mambu amama bo lumvana zingombi voti mamemi: Bo bana ba zingombi voti mamemi bambutuka, bawu bafueti kala na zingudi ziawu mu sambuadi di bilumbu, bosi mu kilumbu kinana, lufueti kumvana kuidi minu.

31 “Benu lufueti ba dikabu dinlongo va mesu mami. Bikanu kudia kibulu babe vonda kuidi kibulu kinsitu, vayi lufueti vana mbizi yi kibulu beni kuidi zimbua.

23 “Bika kutiamuna zitsangu zi luvunu. Ayi ba kutumisa muingi kuta kimbangi ku nzo yi lufundusu, bika kutuba luvunu muingi kusadisa mutu widi fotu. 2 Bika kulandakana bankaka bo bamvanga mambu mambi, ayi bika kuta kimbangi ki luvunu muingi kubuela mioko nkangu wu batu. 3 Bika kumonisa luvasanu kheti bo wumfundisa mambu ma mutu wukhambulu mbakulu.

4 “Ngie kumona ngombi yimbakala voti phunda yi mbeni’aku yibe zimbala, ngie fueti nata kibulu beni kuidi no vuidi kiawu. 5 Ngie kumona phunda yi mutu wu kulendanga yibe bua na mfuna, bika kuviokila bobo mukhambu sadisa mutu vuidi yawu, kutelimisa phunda beni.

6 “Bo wumfundisa mutu wukhambulu mbakulu, bika kumvangila mambu mambi.

7 “Bika kuvunina wadi yaku mambu, ayi bika kuzengila mutu khambulu fotu nkanu wu lufua, kibila minu yala fundisa mutu wumvanganga mambu amomo.

8 “Bo wumfundisa bankaka, bika kutambula zimbongo muingi kubuela mioko mutu widi fotu, kibila mawu malenda balula mayindu ma mutu wumfundisilanga mu phila yisonga.

9 “Bikanu kukuamisa zinzenza zinkalanga va khat’inu. Benu luzebi buboti mbi binsundula kuba nzenza, kibila benu mvinu luba zinzenza ku ntoto wu Ngipiti.

10 “Ngie fueti vata ntoto’aku ayi wala kongula mimbutu mu sambanu di mimvu. 11 Vayi mu mvu wu sambuadi, ngie wulendi vata ko mu tsol’aku muingi kuvundisa yawu. Mu phila ayoyo, biuma biala buta mu tsol’aku biala ba bidia bi batu bakhambulu mbakulu, ayi bio bawu bala bika, biala ba bidia bi bibulu binsitu. Mawu mvandi fueti vanga mu zitsola ziaku zi minti mi makundi ma vinu ayi ma olive.

12 “Ngie fueti vanga bisalu biaku mu sambanu di bilumbu, vayi mu kilumbu ki sambuadi ngie wulendi vanga ko ni kisalu, muingi mimvika miaku, zinzenza bankalanga yaku, ngombi’aku yimbakala ayi bibulu biaku binkaka, babaka bu kuvundila.

13 “Lufueti tumukina mambu moso yima lukamba. Bikanu kusambidila zinzambi zinkaka ni kutanguna mazina mawu.

14 “Kadika mvu, benu lufueti vanganga minkungi mitatu muingi kunzitisa. 15 Mu ngonda yi Abibe, ngonda benu lubasika ku Ngipiti, lufueti kembanga Nkungi wu Mapha Makhambulu Luvi dedi bo yilukambila. Ayi mu sambuadi dioso di bilumbu lunkuiza vangila nkungi beni, lulendi dia ko mapha madi luvi. Ayi bo lunkuiza mbuogimina, ni mutu kalendi kuiza ko mioko yi mioko mukhambu tuala nkhailu. 16 Lufueti kemba Nkungi wu Kuvela Mimbutu Mitheti* Miyela mu zitsola zinu, mvandi lufueti kemba Nkungi wu Zitenda ku tsuka bo lunkuiza vela mimbutu mu zitsola zinu. 17 Khumbu zitatu mu mvu, babakala boso ba dikabu bafueti kuendanga vantuala Yave, Mfumu yikiedika.

18 “Bika kuvana menga ma nkhailu’ama va kimueka na biuma bidi luvi. Ayi lulendi lunda ko mafuta ma kibulu lumvanina minkhailu mu minkungi miama nati mu kilumbu kinlanda.

19 “Ngie fueti nata ku nzo Yave Nzambi’aku mimbutu mitheti milutidi mio wumvela.

“Ayi bika kuvonda muana khombo khidi kuema.

20 “Yinkuiza fila mbasi vantual’inu muingi kalukieba mu viage lunkuiza vanga, ayi kalunata ku ntoto yilukubikila. 21 Tekanu matu ayi tumukinanu mambu kankuiza lukamba. Bikanu kumonisa ntu ngolo, kibila nandi wunkuizila mu dizina diama, ayi kalasa lemvukila ko zinzimbala zinu. 22 Vayi benu kutumukina mambu moso kalukamba ayi kuvanga mambu moso kantuba, minu yinkuiza nuanisa zimbeni zinu zioso ayi kuba tulula. 23 Kibila mbasi’ama wala kuenda vantual’inu ayi wala kulunata ku ntoto wu zi amoreu, wu zi hitita, wu zi perizeu, wu basi kanani, wu zi haveu ayi wu zi jebuzeu. Ayi minu yala tulula mimvila mioso amiomio. 24 Bika kufukimina ni kubuongimina zinzambi ziawu ayi bika kulandakana bikhulu biawu, vayi lufueti tulula bikuma bansambidilanga zinzambi ziawu ayi makunzi mawu manlongo. 25 Lufueti buongimina to Yave Nzamb’inu, benu kuvanga mawu nandi wala kulusakumuna mu kuluvana nlangu ayi bidia. Mvandi wala manisa zimbela va khat’inu. 26 Ku ntoto yinkuiza luvana, bakietu binu balasa ba ko bisita ayi balasa volukanga ko memba. Mvandi yala kulusakumuna muingi luzinga mimvu miwombo.

27 “Minu yala vanga mimvila amiomio bambona boma, ayi yala vanga mimvila amiomio bantomba kulunuanisa baba yazuka yazuka. Yala kulusadisa kununga zimbeni zinu ayi bawu bala kulutina. 28 Minu yala vanga muingi zimbeni zinu baba boma ayi baba yazuka yazuka. Ayi bo benu luala kue fikamanga, minu yala kukisa zi heveu, basi kanani ayi zi hitita vantual’ini. 29 Minu yisinkuiza kukisa ko mimvila mioso amiomio mu mvu wumueka, kibila minu kuvanga mawu, buna bibuangu bankalanga bisinkuiza bue ba ko batu ayi khanu bibulu binsitu binkuiza buelama ayi biawu bilenda kuluvanga phasi. 30 Minu yinkuiza bakukisa malembi malembi nati dikabu dinu dinkuiza buelama mu thalu, muingi luzingila mu kizunga kioso.

31 “Minu yala sikika zindilu zi kizunga kinu, kiawu kiala tonina ku Ḿbu Wubenga nati ku ḿbu wu basi Filisteia, mvandi kutonina ku thandu nati ku Muila wu Eufrates. Kibila minu yala kuluvana mangolo muingi lununga batu bankalanga mu bizunga bioso abiobio ayi benu luala kuba kukisa. 32 Bikanu kuvanga yawu luwawanu ni kubuongimina zinzambi ziawu. 33 Lulendi bika ko muingi bawu bazinga yinu va kimueka, kibila balenda kuluvukumuna muingi kusumuka. Mvandi lulendi buongimina ko zinzambi ziawu kibila mawu malenda kulutuadisa ziphasi.”

24 Bosi Yave wukamba Mose: “Maka ku mongo muingi tudengana. Fueti nata Aloni, Nadabi, Abiú ayi 70 di bakulutu ba basi Isaeli, ayi lufueti fukimina ku kinanu muingi lumbuongimina. 2 Mose to fueti fikama vadi Yave. Vayi batu bankaka balendi fikama ko, ayi balendi maka ko ku mongo.”

3 Bosi Mose wuye zabikisa kuidi dikabu mambu moso Yave katuba, ayi zithumu kamvana. Ayi dikabu dioso bantambudila mu khumbu yimueka: “Tuidi bakubama muingi kutumukina mambu moso Yave kama tuba.” 4 Mu phila ayoyo, Mose wusonika mambu moso Yave kankamba. Bosi va meni mu kilumbu kilanda, nandi wutunga kikuma va mbata mongo, mvandi wutelimisa vana 12 di makunzi. Makunzi beni mansundula 12 di mimvila mi Isaeli. 5 Bosi Mose wufila mua matoko ma basi Isaeli muingi be vika minkhailu, bawu basadila bana ba zingombi zimbakala muingi kuvana minkhailu mi kuvutudila kithuadi na Yave. 6 Mose wubonga mua menga ayi wutula mawu mu bibobola, ayi wudukula menga mankaka va mbata kikuma. 7 Bosi Mose wubonga buku yi luwawanu ayi wutanga yawu vantuala dikabu mu mbembu yinangama. Ayi dikabu dioso batuba: “Tuidi bakubama muingi kutumukina mambu moso Yave kama tuba.” 8 Diawu Mose kabongila mua menga ayi wumuanga mawu kuidi dikabu, ayi wutuba: “Amama mawu menga ma luwawanu Yave kama vanga yinu, mu kutadila mambu moso luma kuwa.”

9 Mose, Aloni, Nadabi, Abiú ayi 70 di bakulutu ba Isaeli batombuka ku mongo, 10 ayi bamona Nzambi yi Isaeli. Kutsi bitambi bi Nzambi kuba kiuma kiba buka dimanya di safira,* kiuma beni kiba kidiodila buka diyilu. 11 Nzambi kasa vonda ko bakulutu ba Isaeli. Mu kimona mesu, bawu bamona Nzambi yikiedika ayi badia ayi banua.

12 Bosi Yave wukamba Mose: “Tombuka ku mongo muingi wiza ndengana ayi kala kuna. Minu yinkuiza kuvana mamanya mo yinkuiza sonika zithumu muingi wuzabikisa kuidi dikabu.” 13 Mose ayi nsadisi’andi Yosua bakubama, ayi Mose wumaka ku mongo wu Nzambi yikiedika. 14 Vayi Mose wukamba bakulutu ba dikabu: “Lutuvingilanu avava nati befu tuala vutuka. Aloni ayi Hur bensiala yinu muingi ku lusadisa kudedikisa moso mambu lunkuiza tombila lusalusu.” 15 Bosi Mose wutombuka ku mongo mu thangu dituti diaba fuka mongo beni.

16 Nkembu wu Yave wutatamana kumonika ku mongo wu Sinai, ayi dituti ditatamana kufuka mongo mu sambanu di bilumbu, vayi mu kilumbu ki sambuadi vana khati dituti, Nzambi wutela Mose. 17 Kuidi basi Isaeli, nkembu wu Yave waba monikina buka mbazu yinlema. 18 Bosi Mose wukota va khati dituti ayi wumaka ku mongo. Ayi nandi wukala kuna mongo beni 40 di bilumbu.

25 Bosi Yave wukamba Mose: 2 “Kamba dikabu muingi baphana minkhailu. Ayi minkhailu bankuiza vanina mu ntima woso, lufueti tambula miawu. 3 Minkhailu dikabu bankuiza vana mifueti ba: “Wola, palata, cobre, 4 minledi mivangulu mu minsinga mi linho mi ndimba azul, minledi mi violeta, minledi mibenga, minledi mivangulu mu minsinga mi linho, minledi mivangulu mu mika mi zikhombo, 5 nkanda wu dimemi dimbakala didi matoni mabenga, nkanda wu foca, mabaya ma acácia, 6 mafuta ma minda, balsamu yi kuvangila malasi ma kubiekila, malasi ma kuvikila minkhailu, 7 mamanya ma ônix, ayi mamanya mankaka mathalu muingi kutula mu éfode, ayi mu kikhutu ki thulu. 8 Bawu bafueti kuphangila nzo yinlongo ayi minu yinkuiza kala va khati’awu. 9 Benu lufueti vanga nzo yinlongo ayi biuma bioso bimba ku khati, mu kulandakana ntungulu yinkuiza lumonisa.

10 “Benu lufueti vanga kasu mu kusadila mabaya ma acácia. Kasu beni yifueti ba zikovadu* wadi ayi ndambu mu kukula, kovadu yimueka ayi ndambu mu kutanduka, ayi kovadu yimueka ayi ndambu mu kuzangama. 11 Bosi ngie fueti vinda Kasu yoso wola, kuba kuandi ku nganda ayi ku khati. 12 Ayi fueti vanga makongi manna ma wola, ayi kukuika mawu mu yilu malu manna ma kasu beni. Makongi muadi mafueti ba ku khonzu lubakala, ayi mamuadi ku khonzu lukietu. 13 Ngie fueti vanga mua minti mu kusadila mabaya ma nti wu acácia, ayi fueti vinda miawu wola. 14 Ngie fueti kosa mua minti beni mu makongi madi mu zikhonzu zi Kasu, muingi lubaka bu kunatinanga kasu beni. 15 Mua minti beni mifueti tatamana kuba mu makongi madi mu Kasu, ayi mulendi botula ko miawu. 16 Ngie wunkuiza tula mu khati Kasu beni mamanya yinkuiza kuvana, mo yinkuiza sonika kumi di minsiku.

17 “Ngie fueti vanga tampa yi wola yidi zikovadu wadi ayi ndambu mu kukula, ayi kovadu yimueka ayi ndambu mu kutanduka, muingi kufuka Kasu beni. 18 Vanga bitumba biodi bi wola bi zikerubim va mbata tampa. 19 Bitumba beni bi zikerubim wunkuiza vanga, kimueka fueti kukitula ku khonzu lubakala, kinkaka ku khonzu lukietu va mbata tampa. 20 Bitumba beni bi zikerubim, bifueti talasana, ayi kadika kitumba kifueti yinika kizizi kiandi mu Kasu. Ayi bafueti yalumuna mavavi mawu muingi kufuka tampa. 21 Ngie fueti tula mu Kasu beni, mamanya yinkuiza kuvana muidi kumi di minsiku, ayi fueti fuka tampa beni va mbata Kasu. 22 Minu yinkuiza yolukilanga yaku va mbata tampa. Ayi va khati tsika zikerubim zidi va mbata Kasu yi Luwawanu, minu yala kuzabikisanga zithumu fueti kamba basi Isaeli.

23 “Ngie fueti vanga meza yidi zikovadu wadi mu kukula, kovadu yimueka mu kutanduka, ayi kovadu yimueka ayi ndambu mu kuzangama. Fueti vangila yawu mu mabaya ma nti wu acácia. 24 Ngie fueti vinda meza yoso wola, fueti tula nkukulu* mu meza beni ayi kuvinda yawu wola. 25 Ngie fueti babika mua kiuma kidi phiba buka dikanda mu zikhonzu zioso zi meza. Ayi fueti tula nkukulu wo wunkuiza vinda wola mu kiuma beni wunkuiza babika mu meza. 26 Fueti vanga makongi manna ma wola, ayi tula mawu mu zikhonzu zinna zi meza, vo bakuika malu manna ma meza. 27 Makongi beni mafueti ba makuiku mu mua kiuma lunkuiza babika mu meza. Ayi muawu lunkuiza vuakika mua minti mi kunatina meza. 28 Ngie fueti vangila mua minti beni mu mabaya ma nti wu acácia, ayi fueti vinda miawu wola. Miawu wunkuiza natinanga meza.

29 “Fueti vanga zindonga, zikopu, bibasa ayi bibobola. Biawu wunkuiza sadilanga muingi kuvanina minkhailu mi malavu. Fueti vangila biawu mu wola. 30 Ayi fueti tatamana kutulanga mapha manlongo va meza yidi vantual’ama.

31 “Ngie fueti vanga kandelabru* yi wola. Kandelabru beni yifueti ba libandu, kulu, matafi, zikopu, zimbotau, ayi biteka. Biuma bioso abiobio, bifueti ba bikuiku mu kiuma kimueka. 32 Mu kulu ku kandelabru beni mufueti ba sambanu di matafi. Matafi matatu ku khonzu yimueka, ayi matafi matatu ku khonzu yinkaka. 33 Mu kadika ditafi di kandelabru mufueti ba biteka bitatu bidi buka biteka bi nti wu amêndoa, mvandi mufueti ba zimbotau. Buawu bufueti bela sambanu dioso di matafi madi mu kandelabru. 34 Ayi mu kulu ku kandelabru beni, mufueti ba biteka binna bidi buka biteka bi nti wu amêndoa, ayi mvandi mufueti ba zimbotau. 35 Ku tsi matafi matheti kufueti ba botão, ku tsi matafi mammuadi kufueti ba botão, ayi ku tsi matafi muadi mantatu, mvandi kufueti ba botão. 36 Zimbotau, matafi ayi kandelabru, bifueti ba kiuma kimueka to kivangulu mu wola. 37 Ngie fueti tula mu kandelabru beni, sambuadi di zikopu zi minda, ayi bo lunkuiza tatikanga minda beni, miawu minkuiza vananga kiezila va kibuangu kioso. 38 Fueti vanga biuma bi kudokisila* minda ayi biuma bi kubotudila dibombi. Fueti vangila biawu mu wola. 39 Fueti sadila talentu yimueka yi wola, muingi kuvangila kandelabru ayi biuma bioso abiobio. 40 Fueti vangila biuma bioso abiobio, mu kulandudila ntungulu yibe kumonisa ku mongo akuku.

26 Ngie fueti sadila kumi di minledi mivangulu mu minsinga mi linho, minledi mi ndimba azul, minledi mi violeta ayi minledi mibenga, muingi kuvangila nzo yinlongo. Mvandi fueti fikula zikerubim mu minledi beni. 2 Kadika nledi wufueti ba 28 di zikovadu* mu kukula ayi 4 di zikovadu mu kutanduka. Minledi mioso mifueti ba kutola kumueka. 3 Fueti londikisa maboko matanu ma minledi muingi miba nledi wumueka, ayi mvandi fueti bue londikisa maboko matanu mankaka ma minledi muingi miba nledi wumueka. 4 Fueti vanga mua makongi mu kusadila minsinga mi ndimba azul ayi kutula mu ḿbilu wu maboko matanu matheti wunkuiza londa, ayi fueti tula mvandi makongi ma minsinga beni mu ḿbilu wu maboko matanu mammuadi wunkuiza londa. 5 Fueti vanga 50 di mua makongi mu kusadila minsinga mi ndimba azul ayi kutula mu kikhuku kitheti ki maboko ma minledi, mvandi fueti bue tunga 50 di mua makongi ma minsinga mi ndimba azul muingi kutula mu kikhuku kimmuadi ki maboko ma minledi, vo bikhuku bia bibiodi binkuiza denginina. 6 Ngie fueti vanga 50 di mua bisengu bi wola bikondalala muingi kubundisa maboko moso ma minledi wunkuiza londikisa. Mu phila ayoyo, nzo yinlongo yinkuiza ba kiuma kimueka.

7 “Mvandi fueti vanga 11 di minledi mu mika mi zikhombo muingi kufuka kuyilu nzo yinlongo. 8 Kadika nledi wufueti ba 30 di zikovadu mu kukula, ayi 4 di zikovadu mu kutanduka. Ayi 11 dioso di minledi mifueti ba kutola kumueka. 9 Mu minledi amiomio, ngie fueti londa maboko matanu ma minledi ayi sambanu di maboko mansiala, mvandi fueti ku malonda. Vayi diboko dinsambanu fueti futika diawu kuntuala nzo yinlongo. 10 Fueti tunga 50 di mua makongi ma minsinga ayi kutula mawu mu ḿbilu wu kikhuku kitheti ki maboko ma minledi wunkuiza londa. Mvandi fueti bue vanga 50 di mua makongi ma minsinga ayi kutula mawu mu ḿbilu wu kikhuku kimmuadi ki maboko ma minledi wunkuiza londa. 11 Fueti vanga 50 di mua bisengu bi cobre bikondalala muingi kubundikisa kikhuku kitheti ayi kimmuadi ki maboko ma minledi wunkuiza londa, muingi kufuka nzo yinlongo. Mu phila ayoyo, nzo yoso yinlongo yinkuiza ba kiuma kimueka. 12 Minledi minkuiza sobila, minkuiza ba milelama ku mbusa nzo yinlongo. 13 Ayi minledi beni minkuiza sobila, fueti zengidika miawu mu kitesu ki kovadu yimueka, muingi kufuka zikhonzu ziwadi zi nzo yinlongo.

14 “Mvandi fueti vanga nledi mu nkanda wu dimemi widi matona ma benga muingi kufuka kuyilu nzo yinlongo. Ayi va mbata nledi beni fueti fuka vana nledi wuvangulu mu nkanda kibulu bantedilanga foca.

15 Ngie fueti telimisa makunzi mu kusadila mabaya ma nti wu acácia, muingi kuvanga zi armações* zi nzo yinlongo. 16 Kadika dikunzi di zi armações difueti ba 10 di zikovadu mu kuzangama ayi kovadu yimueka ayi ndambu mu kutanduka. 17 Kadika dikunzi difueti ba mabaya muadi mabundana. Ayi buawu buala bela makunzi moso wala tula mu nzo yinlongo. 18 Fueti telimisa 20 di makunzi ma nzo yinlongo ku khonzu sul.

19 “Ngie fueti vanga 40 di biuma bi palata bi kuvuakika makunzi, muingi kutula kutsi 20 di makunzi moso: biuma biodi bi kuvuakika makunzi muingi kuvuakika mabaya muadi matheti wunkuiza bundisa. Ayi mawu wufueti vanga mu makunzi moso wunkuiza telimisa. 20 Ku khonzu norte yi nzo yinlongo, fueti telimisa mvandi 20 di makunzi. 21 Ngie fueti vanga 40 di biuma bi palata bi kuvuakika makunzi: biuma biodi bi kuvuakika makunzi muingi kuvuakika mabaya muadi matheti wunkuiza bundisa. Ayi mawu wufueti vanga mu makunzi moso wunkuiza telimisa. 22 Kumbusa nzo yinlongo ku khonzu oeste, fueti telimisa 6 di makunzi. 23 Mvandi fueti telimisa makunzi muadi muingi kutula mu zithokongo* ziwadi zidi kumbusa nzo yinlongo. 24 Fueti vangila makunzi beni mu kubundikisa mabaya muadi kutonina ku wanda nate ku yilu vadi dikongi ditheti. Ayi buawu fueti vangila makunzi mamuadi mo wunkuiza sadila muingi kuvanga zithokongo kumbusa. 25 Mu phila ayoyo, vankuiza ba 8 di makunzi ayi 16 di biuma bi palata bi kuvuakika makunzi beni: biuma biodi bi kuvuakika makunzi binkuiza sikimisa dikunzi ditheti. Ayi buawu bufueti bela makunzi moso mankaka.

26 “Fueti vanga minkamba mu kusadila mabaya ma nti wu acácia: fueti tula 5 di minkamba mu makunzi madi ku khonzu sul yi nzo yinlongo, 27 mvandi 5 di minkamba mu makunzi madi ku khonzu norte yi nzo yinlongo. Ayi 5 di minkamba minkaka fueti tula miawu mu makunzi madi ku khonzu oeste yi nzo yinlongo. 28 Nkamba wala ba va khati tsika makunzi, wufueti tonina ku khonzu yimueka nati ku khonzu yinkaka.

29 “Fueti vinda wola mu makunzi moso ayi wala vanga mu makunzi beni, makongi ma wola muala viokila minkamba, ayi fueti vinda mvandi minkamba beni wola. 30 Fueti vangila nzo yinlongo mu kulandakana ntungulu yima kumonisa ku mongo awuwu.

31 “Ngie fueti tunga minledi mu minsinga mi linho mi ndimba azul, minledi mi violeta, minledi mibenga ayi minledi mivangulu mu minsinga mi linho, ayi fueti fikula muna zikerubim. 32 Minledi beni minkuiza ba milelama mu makunzi manna ma nti wu acácia mo wunkuiza vinda wola. Fueti kobika mu makunzi beni mua bisengu bi wola. Makunzi beni mafueti ba mavuakama mu biuma binna bi palata. 33 Ngie fueti vuakika nledi* mu mua bisengu beni bi wola, bosi fueti nata kasu yi luwawanu ku khati, ku mbusa nledi beni. Ayi nledi beni wawu wunkuiza kabula Kibuangu Kilutidi Kinlongo na Kibuangu Kinlongo. 34 Fueti fuka tampa va Kasu yi Luwawanu yidi ku Kibuangu Kilutidi Kinlongo.

35 “Ngie fueti tula meza ku khonzu yinkaka yi nledi wu nzo yinlongo. Meza beni yifueti ba ku khonzu norte ayi kandelabru ku khonzu sul yi nzo yinlongo vantuala meza. 36 Ngie fueti tunga minledi mu minsinga mi linho mi ndimba azul, minledi mi violeta, minledi mibenga ayi minledi mivangulu mu minsinga mi linho, muingi kutula va khotolo nzo yinlongo. 37 Fueti ledika nledi beni mu makunzi matanu mavangulu mu nti wu acácia, ayi fueti vinda mawu wola. Ayi fueti tula mu makunzi beni, mua bisengu bi wola. Mvandi fueti vuakika makunzi beni mu tanu di biuma bi cobre bi kusikimisila makunzi.

27 Ngie fueti vanga kikuma mu mabaya ma nti wu acácia, ayi kiawu kifueti ba dedi mueka mu zikhonzu zia zinna. Zikovadu zitanu mu kukula, zikovadu zitanu mu kutanduka, ayi zikovadu zitatu mu kuzangama. 2 Ngie fueti tula ziphoka zinna mu zikhonzu zia zinna zi kikuma beni, ayi fueti vinda cobre mu kikuma kioso. 3 Fueti vanga mua biuma bi kubotudila dibombi, zipa, bibobola, minsomo, ayi biuma bi kunatina mbazu. Biuma bioso wunkuiza sadila va kikuma, bifueti ba bi cobre. 4 Ngie fueti vanga kianga ki cobre kidi buka dikondi, ayi fueti tula makongi manna mu zikhonzu zia zinna zi kianga beni. 5 Fueti tula kianga beni mu khati kikuma, ayi kiawu kifueti ba vakhati tsika kikuma. 6 Fueti vanga mua minti mu mabaya ma acácia, ayi fueti vinda miawu cobre. 7 Fueti vuakika mua minti beni mu makongi madi mu zikhonzu zia ziwadi, muingi wubaka bu kunatinanga kikuma beni. 8 Ngie fueti vanga kikuma ki mabaya kidi yambi mu khati, fueti vangila kiawu mu kulandakana ntungulu yibe kumonisa ku mongo akuku.

9 “Fueti vanga luphangu lu nzo yinlongo, ayi fueti tula muna minledi mivangulu mu minsinga mi linho. Ku khonzu sul yi luphangu beni, kufueti ba 100 di zikovadu mu kukula. 10 Fueti telimisa 20 di makunzi, ayi fueti vanga 20 di biuma bi cobre muingi kuvuakika makunzi beni. Ayi fueti kuika mu makunzi beni mua bisengu bi palata. 11 Ku khonzu norte yi luphangu, mvandi lufueti tula minledi. Khonzu beni mvandi yifueti ba 100 di zikovadu mu kukula. Mvandi fueti telimisa 20 di makunzi, ayi 20 di biuma bi cobre muingi kuvuakika makunzi beni. Ayi fueti kuika mu makunzi beni mua bisengu bi palata. 12 Ku khonzu oeste yi luphangu, mvandi kufueti ba minledi. Ku khonzu beni kufueti ba 50 di zikovadu mu kutanduka, ayi fueti telimisa 10 di makunzi, ayi fueti vanga 10 di biuma muingi kuvuakika makunzi beni. 13 Ku khonzu leste yi luphangu ko kumbasikilanga thangu, mvandi kufueti ba 50 di zikovadu mu kutanduka. 14 Ku khonzu lubakala yi muelu wu luphangu, fueti tula mvandi minledi. Vawu, vafueti ba 15 di zikovadu mu kukula, ayi fueti telimisa vana makunzi matatu. Mvandi fueti vanga biuma bitatu muingi kuvuakika makunzi beni. 15 Ku khonzu lukietu yi muelu wu luphangu, fueti tula mvandi minledi. Vawu, vafueti ba 15 di zikovadu mu kukula, ayi fueti telimisa vana makunzi matatu. Mvandi fueti vanga biuma bitatu muingi kuvuakika makunzi beni.

16 “Va muelu wu luphangu, vafueti ba nledi wuvangulu mu minsinga mi linho mi ndimba azul, nledi wu violeta, nledi wubenga, ayi nledi wu vangulu mu minsinga mi linho. Vawu vafueti ba 20 di zikovadu mu kukula, ayi fueti telimisa vana makunzi manna ayi biuma binna muingi kuvuakika makunzi beni. 17 Makunzi moso wunkuiza telimisa mu luphangu, fueti kuika muawu mua bisengu bi palata, mvandi fueti vanga biuma bi cobre muingi kuvuakika makunzi beni. 18 Luphangu loso lufueti ba 100 di zikovadu mu kukula, 50 di zikovadu mu kutanduka, ayi zikovadu zitanu mu kuzangama. Fueti tula mu luphangu beni minledi mivangulu mu minsinga mi linho, ayi fueti vanga biuma bi cobre muingi kuvuakika makunzi. 19 Biuma bioso wunkuiza sadila ku nzo yinlongo, kubunda mvandi biuma bi kusikimisila nzo beni, ayi biuma bi kusikimisila luphangu, bifueti vangulu mu cobre.

20 “Ngie fueti kamba basi Isaeli muingi batualanga nzeta yi minda yivangulu mu makundi ma minti mi olive, muingi minda midi ku nzo yinlongo mitatamananga kuba mitatama. 21 Ku nzo yinlongo va kibuangu kinlongo kidi va ndeku Kasu yi Luwawanu, Aloni ayi bana bandi bankuiza vanganga mamoso muingi minda mitatamananga kuba mitatama vantuala Yave, tonina va masika ma builu nati va meni mu kilumbu kinlanda. Awowo, widi nsiku basi Isaeli bafueti tumukinanga mu zimbandu ziawu zioso.

28 “Ngie fueti tumisa Aloni na bana bandi Nadabi, Abiú, Itamar ayi Eliazali, muingi wuba bieka zinganga Nzambi. 2 Ngie fueti vangila khomb’aku Aloni bikhutu bi zinganga nzambi, ayi bikhutu beni binkuiza mvanga kuba kitoko ayi kutambula nkembu. 3 Tumisa batu bo yiveni nduenga ayi phevi yinlongo, ayi wuba kamba muingi bavangila Aloni bikhutu bi zinganga nzambi, kibila nandi wunkuiza ba nganga nzambi.

4 “Abibi biawu bikhutu fueti vanga: kikhutu ki thulu, éfode, dizuela dikhambulu mioko, dizuela dikula didi matona, dilensu ayi phonda. Fueti vangila Aloni ayi bana bandi bikhutu abiobio, muingi bawu bavanganga kisalu ki zinganga nzambi. 5 Batu bapisuka bankuiza vanga bikhutu beni, bafueti sadila wola, minledi mivangulu mu minsinga mi linho mi ndimba azul, minledi mi violeta, minledi mibenga ayi minledi mivangulu mu minsinga mi linho.

6 “Fueti sadila minledi mivangulu mu minsinga mi linho mi ndimba azul, minledi mi violeta, minledi mibenga, minledi mivangulu mu minsinga mi linho ayi wola, muingi kuvanga éfode. Ayi yawu yifueti ba yitungu. 7 Éfode beni yifueti ba minlunga miodi mu mavangiti, ayi miawu mifueti ba mikangama mu zikhonzu zia ziwadi. 8 Phonda wunkuiza kanga mu éfode beni muingi kuyisikimisa, fueti vangila yawu mu biuma abibi: wola, nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho.

9 “Ngie fueti bonga mamanya muadi ma ônix, ayi fueti sonika muna mazina ma 12 di bana ba Isaeli. 10 Fueti sonika sambanu di mazina mu dimanya dimueka, ayi sambanu di mazina mu dimanya dinkaka. Kutonina dizina di muana wutheti nati di muana wutsuka. 11 Fueti sola mutu wupisuka mu kubuongisa mamanya mathalu muingi kasonika mazina ma 12 di bana ba Isaeli mu mamanya beni mathalu. Bosi fueti kunkamba katula mamanya beni mu mua minlunga mi wola. 12 Ngie fueti tula mamanya beni mu mua minlunga midi mu mavangiti ma éfode, ayi mu mamanya beni, muawu bankuiza tebukilanga monyo bana ba Isaeli. Mu phila ayoyo, Aloni wala tatamana kunatanga mazina amomo mu mavangiti, muingi minu Yave yitebukilanga monyo dikabu diama. 13 Ngie fueti vanga mua makongi ma wola, 14 mua ziphanga wadi zi wola zidi buka minsinga, ayi fueti vuakika ziphanga beni mu mua makongi madi va mbata.

15 “Fueti tuma mutu wupisuka mu kutunga minledi muingi kavanga kikhutu ki thulu ki kufundisila. Kikhutu beni kifueti vangulu buka éfode: fueti sadila wola, nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho. 16 Bo bamfutika kikhutu beni, kiawu kifueti ba dikanda dimueka di koko* mu kukula, ayi dikanda dimueka di koko mu kutanduka. 17 Ayi fueti vuakika mu kikhutu beni mintanda minna mi mamanya mathalu. Mu ntanda wutheti mufueti ba mamanya amama mathalu: rubi, topazio ayi esmeralda. 18 Mu ntanda wummuadi mufueti ba: turquesa, safira ayi jaspe. 19 Mu ntanda wuntatu mufueti ba: dimanya di léshem, ágata ayi ametista. 20 Mu ntanda wunna mufueti ba: crisólito, ônix ayi jade. Mamanya amomo mathalu mafueti ba mavuakama mu makongi ma wola. 21 Kadika dimanya bafueti sonika muna dizina di muana wu Isaeli. Bala sonika mazina beni dedi bo bantudilanga kidimbu. Ayi mawu mala sundula 12 di mimvila mi Isaeli.

22 “Ngie fueti tula mu kikhutu beni mua ziphanga zi wola zidi buka minsinga. 23 Fueti tula mu kikhutu beni ki thulu minlunga miodi mi wola, ayi miawu mifueti ba mu zikhonzu zia ziwadi zi kikhutu. 24 Ayi fueti tula mua ziphanga beni zi wola zidi buka minsinga, mu minlunga miodi midi mu zikhonzu ziwadi zi kikhutu beni. 25 Ngie fueti kobika mua ziphanga beni mu minlunga miodi, ayi fueti kanga ziawu mu minlunga mi éfode midi mu mavangiti kuntuala. 26 Mvandi fueti vanga minlunga miodi mi wola, ayi fueti tula miawu mu zikhonzu ziwadi zi wanda zi kikhutu ki thulu ku khati, ku khonzu yintalasana na éfode. 27 Fueti vanga mvandi minlunga miodi mi wola ayi fueti tula miawu ku khonzu nganda yi éfode mu wanda, muidi makongi muadi madi mu mavangiti va khonzu mandenginina, vayilu phonda yi éfode. 28 Muingi kusikimisa kikhutu ki thulu, vankuiza tombulu kukanga makongi ma kikhutu ki thulu na makongi ma éfode, mu kusadila nsinga wu ndimba azul. Mu phila ayoyo, kikhutu ki thulu kinkuiza sikama mu éfode, va mbata phonda.

29 “Bo Aloni kala kotanga ku nzo yinlongo, kafueti vuata kikhutu ki thulu ki lufundusu, muidi musonama mazina ma mimvila mi Isaeli, muingi minu Yave yitebukilanga monyo dikabu diama. 30 Ngie fueti tula mu kikhutu ki thulu ki lufundusu, Urim ayi Tumim.* Ayi Aloni wala kotanga na kikhutu akiokio vantuala Yave. Mu phila ayoyo, Aloni wala tatamananga kunata va mbata ntima, vantuala Yave biuma abiobio bala sadilanga muingi kufundisa bana ba Isaeli.

31 “Fueti vanga dizuela dikhambulu mioko, mu kusadila nledi wuvangulu mu minsinga mi linho mi ndimba azul, dio wunkuiza tula kutsi éfode. 32 Fueti bika mu kikhutu beni mua phuasa, muingi kukosila ntu bo bamvuata. Ayi fueti tunga mua phuasa beni mu kutula mua kisengu, buka bikhutu bannuaninanga mimvita, muingi kibika bakuka. 33 Mu ḿbilu wu kikhutu beni, ngie fueti tula muna biteka bidi buka makundi ma romã, mu kusadila nledi wuvangulu mu minsinga mi linho mi ndimba azul, nledi wu violeta ayi nledi wubenga. Mvandi fueti tula muna mua zingunga zi wola. 34 Mu ḿbilu woso wu dizuela beni, ngie fueti kuesobikisanga muna biteka bidi buka makundi ma romã ayi mua zingunga zi wola. 35 Aloni wala vuatanga kikhutu akiokio bo kamvanga kisalu ki zinganga nzambi. Ayi biyoko bi zingunga beni biala kuwakananga bo kankota ku nzo yinlongo vantuala Yave, ayi bo kambasika muingi kabika fua.

36 “Ngie fueti vanga thata yi wola ayi kusonika muna mambu mama: ‘Yave nandi tho yi bunlongo.’ 37 Fueti kanganga thata beni va mbata dilensu, ku khonzu yintuala mu kusadila nsinga wu ndimba azul. 38 Thata beni yifueti ba va mbunzu* yi Aloni, ayi Aloni nandi wunkuiza ba kiyeku ki kufundisa woso mutu wunsumuka mu matedi biuma binlongo bio basi Isaeli bavedisa bo bavana minkhailu minlongo. Thata beni yinkuiza tatamana va mbunzu yi Aloni, muingi basi Isaeli babaka lunungu lu Yave.

39 “Ngie fueti tunga dizuela dikula divangulu mu minsinga mi linho didi matona, ayi fueti vanga mvandi phonda.

40 “Mvandi fueti vangila bana ba Aloni mazuela makula, ziphonda ayi malensu. Biuma abiobio binkuiza batuadisa nkembu ayi kuba vanga baba kitoko. 41 Fueti vuika bikhutu abiobio kuidi Aloni ayi bana bandi. Fueti kuba bieka, mu kuba tetika mioko ayi kuba dukudila nzeta yinlongo. Mu phila ayoyo, bawu bankuiza vanganga kisalu ki zinganga nzambi. 42 Vanga mvandi zikupa mu nledi wuvangulu mu minsinga mi linho, muingi bawu bafuka zipheni ziawu. Ayi zikupa beni zifueti tonina mu lukietu nati mu masoko.* 43 Aloni ayi bana bandi bafueti vuatanga zikupa beni bo bankota ku nzo yinlongo voti bo bamvanga kisalu kinlongo va kikuma, muingi bawu babika ba fotu ayi babika fua. Awowo wufueti ba nsiku kuidi Aloni ayi kuidi dikanda diandi dioso.

29 “Amama mawu fueti vanga muingi ku badiodisa ayi baba bafuana mu kuvanga kisalu ki zinganga nzambi: Fueti bonga muana ngombi ayi mamemi muadi mambakala makhambulu mabela. 2 Fueti vanga mapha makhambulu luvi, mapha madi buka minlunga makhambulu luvi bakanga mu mafuta, ayi mapha madi buka bipata makhambulu luvi bavinda mafuta. Fueti vangila mapha beni mu falinya yi trigu yilutidi yimboti. 3 Fueti tula mapha moso amomo mu kiphanya, ayi vana mawu va kimueka bo wumvana minkhailu mi muana ngombi ayi mamemi muadi mambakala.

4 “Fueti nata Aloni ayi bana bandi va khotolo nzo yinlongo, ayi fueti kuba kamba muingi bayisukula. 5 Bosi vuika Aloni bikhutu bi nganga nzambi. Mvuika dizuela dikula mioko, dizuela dikhambulu mioko, éfode, kikhutu ki thulu, ayi fueti kunkanga phonda mu lukietu. 6 Ngie fueti kunkanga dilensu ku ntu, ayi kutula va mbata dilensu beni thata yidi kidimbu kinlongo. 7 Bosi fueti bonga malasi ma kubiekila muingi kundukudila ku ntu.

8 “Bosi tumisa bana ba Aloni ayi wuba vuika bikhutu bi zinganga nzambi. 9 Mvandi fueti kanga ziphonda mu lukietu lu bana ba Aloni, dedi bo bekangila Aloni. Ayi wuba vuika malensu ku ntu. Aloni ayi bana bandi, bawu bankuiza vanganga kisalu ki zinganga nzambi, ayi awowo widi nsiku wala kadidila. Ayoyo, yawu phila fueti biekila Aloni ayi bana bandi.

10 “Bosi fueti tuala muana ngombi va khotolo nzo yinlongo, Aloni ayi bana bandi, bala tetika mioko va ntu muana ngombi beni. 11 Vondila muana ngombi beni vantuala Yave va khotolo nzo yinlongo. 12 Buika luzala luaku mu menga ma muana ngombi beni, ayi vinda mawu mu ziphoka zidi va kikuma. Bosi bonga menga mansobila ayi dukula mawu va kikuma. 13 Bosi fueti vika va kikuma biuma abibi bi kibulu: mafuta moso madi mu mindia, mafuta madi mu bifula, ayi mafuta ma zirins.* 14 Vayi mbizi yi muana ngombi beni, nkanda ayi matuvi mandi, ngie fueti kue mavikila ku nganda kibuangu kinkalanga dikabu. Awowo widi nkhailu muingi kulemvukila masumu.

15 “Bosi fueti bonga muana dimemi, Aloni ayi bana bandi bafueti tetika mioko miawu va ntu muana dimemi beni. 16 Ayi vonda muana dimemi beni, bosi bonga menga mandi muingi wumuaka mu zikhonzu zioso zi kikuma. 17 Ayi zenga dimemi beni mu bitini, sukula mindia ayi malu mandi, bosi tula bitini beni va mbata kikuma va kimueka na ntu. 18 Vika dimemi dioso va mbata kikuma. Wawu widi nkhailu wuviku widi mfimbu wumboti wunkuiza vana kuidi Yave. Awowo widi nkhailu wuviku wu Yave.

19 “Bosi fueti bue bonga dimemi dinkaka, Aloni ayi bana bandi bafueti tetika mioko miawu va ntu dimemi beni. 20 Fueti vonda dimemi beni ayi kubonga mua menga muingi kuvinda mu dikutu di khonzu lubakala di Aloni ayi di bana bandi. Mvandi fueti vinda menga beni mu luzala lu ngudi lu koko ayi kulu ku lubakala ku Aloni ayi ku bana bandi. Ayi muaka menga mankaka mu zikhonzu zioso zi kikuma. 21 Bosi bonga mua menga madi va kikuma ayi mua malasi ma kubiekila, ayi muaka mawu kuidi Aloni ayi kuidi bana bandi. Mvandi muaka mawu mu bikhutu biawu, muingi bawu ayi bikhutu biawu baba banlongo.

22 “Bosi bonga mafuta ma kibulu kioso, nkil’andi, mafuta ma mindia, mafuta ma bifula, zirins ayi mafuta mawu, mvandi bonga kulu ku lubakala ku kibulu beni, kibila awowo widi nkhailu wu kubiekila. 23 Mu kiphanya ki mapha kidi vantuala Yave, bonga muna dipha dimueka divindubuka, dipha dimueka bakanga mu mafuta didi buka nlunga, ayi dipha dimueka didi buka kipata. 24 Tula mapha moso amomo mu mioko mi Aloni ayi mi bana bandi, ayi bawu bafueti nyikuna mawu mu mioko miawu kuntuala ayi kumbusa, kibila widi nkhailu banyikuna vantuala Yave. 25 Bosi bonga mapha beni mu mioko miawu ayi vika mawu va kikuma kio bamvikilanga minkhailu, muingi mabasisa mfimbu wumboti wunkuangidika Yave. Kibila widi nkhailu wuviku wu Yave.

26 “Bonga thulu* wu dimemi besadila muingi kubieka Aloni, ayi nyikuna wawu kuntuala ayi kumbusa, vantuala Yave. Bosi ntima wu kibulu beni wunkuiza ba waku. 27 Ngie fueti bonga thulu ayi kulu ku dimemi besadila muingi kubieka Aloni ayi bana bandi, ayi diengisa biawu vantual’ama. Mu phila ayoyo, biawu binkuiza ba binlongo. Bosi biawu binkuiza ba bi zinganga nzambi. 28 Mu kumona ti bitini abiobio bi kibulu bidi binlongo, biawu binkuiza ba bi Aloni ayi bana bandi. Bidi minkhailu minlongo basi Isaeli bafueti vananga. Kidi kitini kinlongo bankuiza vananga kuidi Yave, mu minkhailu miawu mi kuvutudila kithuadi. Awowo widi nsiku wala kadidila.

29 “Bo Aloni kala fua, wumueka mu bana bandi no wunkuiza mvinginina, nandi wala vuata bikhutu biandi binlongo. 30 Nganga nzambi no wunkuiza mvinginina, ayi no wunkuiza kotanga ku nzo yinlongo muingi kukuenda ku kibuangu kinlongo, nandi wunkuiza vuata bikhutu abiobio mu sambuadi di bilumbu.

31 “Ngie fueti bonga dimemi besadila muingi kubieka Aloni ayi bana bandi, ayi lambila diawu va kibuangu kinlongo. 32 Aloni ayi bana bandi bafueti dila mbizi yi kibulu beni mu mapha madi mu kiphanya, va khotolo nzo yinlongo. 33 Muingi babaka nlemvu wu masumu mawu, bawu bafueti dia biuma abiobio babe vana minkhailu muingi kuba bieka zinganga nzambi. Vayi ni mutu wunkaka kasi ko nsua wu kudia biawu, kibila bidi binlongo. 34 Va kusobila mbizi yi kibulu voti dipha babe sadila muingi kubieka, lufueti vika biawu ku mbazu mu kilumbu kinlanda. Mulendi dia ko biawu kibila bidi binlongo.

35 “Fueti vangila Aloni ayi bana bandi mamoso mu phila yima kumonisina, ayi fueti kuba bieka zinganga nzambi mu sambuadi di bilumbu. 36 Kadika kilumbu ngie fueti vananga nkhailu wu muana ngombi, mu kibila ki masumu ayi muingi kuvedisa kikuma. Ngie fueti vedisa kikuma beni muingi kiba kinlongo. 37 Ngie fueti vedisa kikuma mu sambuadi di bilumbu, muingi kiawu kiba kinlongo. Ayi woso mutu wunsimba kikuma beni, kafueti ba wunlongo.

38 “Kadika kilumbu ngie fueti vananga minkhailu amimi va kikuma: mamemi muadi madi mvu mueka. 39 Dimemi dimueka va meni ayi dimemi dinkaka va masika ma builu. 40 Dimemi ditheti fueti vana diawu va kimueka na kikhuku ki kumi ki efa* yi falinya yilutidi, basobikisa na kikhuku kinna ki him* yi nzeta yi makundi ma olive, ayi nkhailu wu malavu wu kikhuku kinna ki him ki vinu. 41 Ngie wunkuiza vananga dimemi dinkaka va builu, va kimueka na nkhailu wu trigu ayi nkhailu wu malavu mu kio kiawu kitesu na minkhailu bevana va meni. Ngie wunkuiza vikanga biawu muingi kubasisa mfimbu wumboti wunkuangidika Yave. 42 Wunkuiza ba nkhailu wuviku wunkuiza vananga mu zithangu zioso, mu zimbandu zinu zioso vantuala Yave, va khotolo nzo yinlongo vo yinkuiza kumonikinanga muingi kukoluka yaku.

43 “Va kibuangu beni, vawu mvandi yinkuiza monikinanga kuidi basi Isaeli, ayi kiawu kinkuiza ba kinlongo mu kibila ki nkembu’ama. 44 Yinkuiza vedisa nzo yinlongo ayi kikuma, mvandi yinkuiza vedisa Aloni ayi bana bandi, muingi baba zinganga nzambi. 45 Yinkuiza kala va khati basi Isaeli, ayi minu yinkuiza ba Nzambi’awu. 46 Ayi bawu bala zaba ti minu yidi Yave Nzambi’awu, no wuba botula ku ntoto wu Ngipiti, muingi yikala va khati’awu. Minu yidi Yave Nzambi’awu.

30 “Vanga kikuma ki kuvikilanga malasi, fueti vangila kiawu mu mabaya ma nti wu acácia. 2 Kikuma beni kifueti ba dedi mueka mu zikhonzu zia zinna, kovadu yimueka mu kukula, kovadu* yimueka mu kutanduka ayi kovadu wadi mu kuzangama. Ayi fueti kuika muna ziphoka. 3 Ngie fueti vinda kikuma kioso wola: Kutonina kuyilu, mu zikhonzu zioso ayi mu ziphoka. Fueti vanga nkukulu* yi wola mu zikhonzu zioso zi kikuma beni. 4 Ngie fueti vanga mvandi makongi muadi ma wola muwanda nkukulu mu zikhonzu wadi zi kikuma, muingi kuvuakika mua minti wunkuiza natinanga kikuma beni. 5 Fueti vangila mua minti beni mu mabaya ma nti wu acácia ayi fueti vinda miawu wola. 6 Fueti tula kikuma beni vantuala nledi widi va khonzu kasu yi luwawanu yo bafuka tampa, vo minu yinkuiza kumonikinanga.

7 “Bo Aloni kala buongisanga minda kadika meni, nandi wala vikanga malasi madi mfimbu wumboti va kikuma. 8 Ayi bo nandi kala tatikanga minda kadika masika ma builu, mvandi wala vikanga malasi madi mfimbu wumboti. Awowo widi nkhailu luala tatamananga kuvana vantuala Yave, mu zimbandu zinu zioso. 9 Lulendi vika ko ntindu wunkaka wu malasi va kikuma beni, ni minkhailu miviku, voti minkhailu mi zitheti. Mvandi lulendi vanina ko vana minkhailu mi malavu. 10 Khumbu mueka mu mvu, Aloni wunkuiza vedisanga kikuma mu kudakisanga mu ziphoka zi kikuma beni mua menga ma kibulu kio kamvana nkhailu mu kibila ki masumu ma dikabu. Ayi lufueti vanganga mawu mu zimbandu zinu zioso. Mu phila ayoyo, kikuma beni kiala ba kinlongo va mesu ma Yave.”

11 Bosi Yave wukamba Mose: 12 “Kadika khumbu wunkuiza tanganga thalu yi batu badi mu dikabu di Isaeli, kadika mutu bantanga kafueti vana nkhailu kuidi Yave va mvingi luzingu luandi. Lufueti vanganga mawu muingi lubika monikina ni diambu dimbi. 13 Batu boso wunkuiza tanga bafueti vana ndambu sikulu, mu kutadila sikulu* bansadilanga ku nzo yinlongo, yidi 20 di zigera.* Ndambu sikulu beni widi nkhailu lufueti vana kuidi Yave. 14 Batu boso wunkuiza tanga badi kutonina 20 di mimvu nati kuyilu, bafueti vana nkhailu awowo kuidi Yave. 15 Vasintombulu ko mutu widi busina kuvana bilutidi, ni mutu khambulu beni mbakulu kuvana biluelu. Baboso bafueti vana nkhailu beni wu ndambu sikulu kuidi Yave muingi kuvukisa miela miawu. 16 Ngie fueti tambula zimbongo zi palata basi Isaeli bankuiza vana, muingi kusadila ziawu mu bisalu bi nzo yinlongo, ayi muingi Yave katebukilanga monyo basi Isaeli. Mu phila ayoyo, benu lunkuiza vukisa miela minu.”

17 Yave wubue kamba Mose: 18 “Vanga dibola di cobre, mvandi vanga kiuma ki cobre ki kutetikanga dibola, ayi tula diawu va ndeku khotolo yi nzo yinlongo ayi va ndeku kikuma, ayi tula mu dibola beni nlangu muingi luyisukulanga. 19 Aloni ayi bana bandi, bankuiza lavilanga mioko ayi malu mu dibola beni. 20 Bo bawu bala kotanga ku nzo yinlongo ayi bo bala fikamanga va kikuma muingi kuvanga kisalu kiawu, voti kuvana minkhailu miviku kuidi Yave, bafueti kuyisukulanga muingi babika fua. 21 Bawu bafueti lavanga mioko ayi malu muingi babika kufua. Awowo, widi nsiku wala kadidila muingi nandi ayi dikanda diandi balandakananga mu zimbandu ziawu zioso.”

22 Yave wubue kamba Mose: 23 “Tomba biuma bi kuvangila malasi madi mfimbu wumboti, 6 di zikilu zi mira bakhambu siulumuna, 3 di zikilu zi canela yidi mfimbu wumboti ayi 3 di zikilu zi cálamo yidi mfimbu wumboti, 24 ayi 6 di zikilu zi cássia. Zongila biuma bioso abiobio, mu kutadila sikulu bansadilanga ku nzo yinlongo, ayi bonga him* yimueka yi nzeta yi makundi ma olive. 25 Bosi bonga biuma bioso abiobio muingi wuvanga malasi manlongo ma kubiekila, ayi lufueti vangila mawu mu keba keba. Mawu mankuiza ba malasi manlongo ma kubiekila.

26 “Ngie wala sadila malasi beni muingi wuvedisa nzo yinlongo, kasu yi luwawanu, 27 meza na biuma biandi bioso, kandelabru na biuma biandi bioso, kikuma ki kuvikila malasi, 28 kikuma ki kuvikila minkhailu na biuma biandi bioso, ayi dibola na kiuma ki kutetika dibola beni. 29 Vedisa biawu muingi biba binlongo. Ayi woso mutu wunsimba biuma beni, kafueti ba wunlongo. 30 Ayi ngie wunkuiza vedisa Aloni na bana bandi muingi kuba bieka zinganga nzambi.

31 “Ngie fueti kamba basi Isaeli: ‘Amama mankuiza ba malasi mami manlongo ma kubiekila, mu zimbandu zinu zioso. 32 Ni mutu kalendi vinda ko mawu mu nyitu, ni kuvanga malasi mandedakana na amomo. Mawu madi manlongo. Mafueti tatamana kuba manlongo kuidi benu. 33 Woso mutu wukhambulu nsua wumvanga malasi madi madedakana dedi amama, ayi wumvinda mawu mu nyitu, bafueti kumvonda.’”

34 Bosi Yave wukamba Mose: “Tomba biuma abibi bidi mfimbu wumboti mu kitesu kidedakana: Mabeti ma estoraque, ônica, gálbano yidi mfimbu wumboti ayi olíbano yimboti. 35 Fueti vanga malasi mu kusadila biuma abiobio bidi mfimbu wumboti, ayi fueti vangila malasi beni mu keba keba. Fueti tula muawu tsalu, ayi mawu mankuiza ba mavedila ayi manlongo. 36 Ngie fueti nyika mua ndambu mu biawu nati binkuiza ba fuelu fuelu,* ayi fueti nata mua ndambu ku khati nzo yinlongo, vantuala kasu yi luwawanu vo minu yinkuiza yolukilanga yaku. Malasi amomo, mafueti ba manlongo kuidi benu. 37 Bika kusobikisa biuma abiobio bamvangilanga malasi manlongo muingi kuvanga malasi maku veka. Kibila malasi amomo madi manlongo kuidi Yave. 38 Woso wumvanga malasi madi madedakana buka amomo muingi kuvinda mu nyitu, bafueti kumvonda.”

31 Yave wubue kamba Mose: 2 “Minu yibe sola Bezaleli, muana wu Uri, ayi Uri widi muana wu Hur widi mu mvila wu Yuda. 3 Minu yinkuiza mvana phevi yinlongo, nduenga ayi phisulu yi kuvanga ntindu woso wu bisalu bi kufikula, 4 muingi kafikula, kavanga biuma bi wola, bi palata ayi bi cobre. 5 Mvandi muingi kazaba kubuongisa mamanya ma thalu ayi kufikula biuma muna, ayi kuvanga mintindu mioso mi bisalu bamvangilanga mu mabaya. 6 Mvandi yibe sola Ooliabi muana wu Aizamaki widi mu mvila wu Dan, muingi kasadisa Bezaleli. Mvandi yinkuiza vana nduenga kuidi batu boso bapisuka, muingi bavanga biuma bioso abibi yima kukamba ku mongo akuku: 7 Nzo yinlongo, kasu yi luwawanu, tampa yi kasu, biuma bioso binkuiza ba ku nzo yinlongo, 8 meza na biuma biandi bioso, kandelabru yi wola na biuma biandi bioso, kikuma ki kuvikila malasi, 9 kikuma ki kuvikila minkhailu na biuma biandi bioso, dibola na kiuma ki kutetika dibola beni, 10 mazuela mavangulu mu minsinga mi linho, mazuela manlongo mo Aloni ayi bana bandi bankuiza sadilanga mu kisalu ki nganga nzambi, 11 malasi ma kubiekila ayi malasi madi mfimbu wumboti bankuiza sadilanga ku nzo yinlongo. Bawu bankuiza vanga biuma bioso abiobio yima kutuma.”

12 Yave wubue kamba Mose: 13 “Kamba basi Isaeli: ‘Benu lufueti tatamana kutumukina nsiku wu kilumbu ki kisabala, kibila wawu widi kidimbu minu yivanga yinu mu zimbandu zinu zioso, muingi luzaba ti minu Yave minu yi kuluvedisa. 14 Tumukinanu nsiku matedi kisabala, kibila kidi kilumbu kinlongo kuidi benu. Woso wummanga kutumukina nsiku beni, bafueti kumvonda. Ayi woso mutu wumvanga kisalu mu kilumbu akiokio, mvandi bafueti kumvonda. 15 Lufueti vanga bisalu binu mu sambanu di bilumbu, vayi mu kisabala kilumbu sambuadi, lufueti vunda. Kibila kiawu, kidi kinlongo kuidi Yave, ayi woso mutu wumvanga kisalu mu kisabala bafueti kumvonda. 16 Basi Isaeli bafueti tatamananga kutumukina nsiku wu kisabala, ayi bafueti tatamana kutebukilanga monyo kilumbu ki kisabala mu zimbandu ziawu zioso. Awowo, widi nsiku wala kadidila. 17 Akiokio kidi kidimbu kiala kadidila matedi minu ayi dikabu di Isaeli, kibila mu sambanu di bilumbu Yave wuvanga diyilu ayi ntoto, vayi mu kilumbu sambuadi nandi wuvunda.’”

18 Bo Nzambi kamana kukoluka na Mose ku mongo Sinai, nandi wumvana mamanya muadi mo naveka Nzambi kasonika Kumi di Minsiku.

32 Bo dikabu bamona ti Mose waba kala kisina mu kukuluka ku mongo, bawu baye kutakana vaba Aloni ayi bankamba: “Tusa zaba ko mambu mbi mabe monikina Mose awowo no wutubotula ku ntoto wu Ngipiti. Diawu wutuvangila nzambi muingi ka tutuadisa.” 2 Mu kibila akiokio, Aloni wuba kamba: “Botulanu bilunga bi wola bidi mu makutu ma bakazi binu, bana binu ba bakietu ayi ba babakala, ayi tualanu biawu kuidi minu.” 3 Mu phila ayoyo, dikabu dioso babotula bilunga bi wola biba mu makutu mawu, ayi baye vana biawu kuidi Aloni. 4 Bosi Aloni wubonga wola beni bantuadila, wutula yawu mu kibobola ayi wusiulumuna yawu, ayi wuvanga kitumba kiba buka muana ngombi. Bosi basi Isaeli batona kutuba: “A Isaeli, anono nandi nzambi’aku no wukubotula ku ntoto wu Ngipiti.”

5 Bo Aloni kamona mawu, wutunga kikuma va ndeku kitumba beni. Bosi Aloni wutuba: “Yono tunkuiza kemba nkungi muingi kuzitisa Yave.” 6 Mu kilumbu kilanda va meni, bavana minkhailu miviku ayi minkhailu mi kithuadi. Bosi dikabu bakala muingi kudia ayi kunua. Ayi batelama muingi kukemba nkungi.

7 Bosi Yave wukamba Mose: “Kuluka, kibila dikabu diaku dio wubotula ku Ngipiti bama vekuka. 8 Bawu bama vekuka mu thinu, mukhambu landakana mambu yiba tuma. Bama vanga kitumba kidi buka muana ngombi, ayi badi mu kufukama vantuala kitumba beni mu kuvana minkhailu ayi badi mu kutuba: “ A Isaeli, anono nandi nzambi’aku no wukubotula ku ntoto wu Ngipiti.’” 9 Yave wubue kamba Mose: “Dikabu adiodio, ntu ngolo badi. 10 Diawu bika kumeka kuthula nkaku, kibila minu yeka bavonda baboso, mu kibila ki nganzi yidi, ayi mu nzil’aku, minu yinkuiza vanga dikabu dinneni.”

11 Bosi Mose wulomba kuidi Yave Nzambi’andi mu kutuba: “A Yave, kibila mbi befuemina dikabu diaku, ayi wuntomba kuba vondila, dikabu dio ngie veka wukula ku Ngipiti, mu mangolo mawombo ayi mu mangitukulu? 12 Kibila ngie kuvanga mawu, khanu basi Ngipiti bankuiza tuba: ‘Mayindu mambi maba yandi, diawu kaba botudila ku ntoto wu Ngipiti muingi kuba nata ku mongo ayi kuba vondila kuna.’ Buabu lemvuka vumbika nganzi’aku, ayi balula mayindu maku ma kuvonda dikabu diaku. 13 Tebukila monyo bisadi biaku Abalahami, Izaki, ayi Isaeli bo ngie veka wukanikisa mu kuleva phesi, bo wutuba: ‘Yinkuiza vanga nkun’inu wuba wuwombo buka zimbuetila ku diyilu, ayi yinkuiza vana nkun’inu ntoto wo yibe lumonisa, muingi wuba kiuka kiawu mu zithangu zioso.’”

14 Mu kibila akiokio, Yave wubalula makani mandi ma kuvonda dikabu diandi.

15 Bosi Mose wukuluka ku mongo na mamanya muadi muba Zithumu. Mamanya beni maba masonama mu zikhonzu zia ziwadi, kuntuala ayi kumbusa. 16 Naveka Nzambi wuvanga mamanya beni ayi naveka wusonika zithumu ziba muna. 17 Bo Yosua kayuwa dikabu kutenduka, nandi wukamba Mose: “Yidi mu kukuwa biyoko bi mvita va kibuangu kidi dikabu.” 18 Vayi Mose wutuba:

19 Mu phila ayoyo, bo Mose kavitila, nandi wumona kitumba ki muana ngombi bavanga, ayi bo kamona ti dikabu baba kina, nandi wudasuka ayi wukuba va tsi va ndeko mongo, mamanya maba yandi muba musonama zithumu, ayi mawu mabudika. 20 Mose wubonga kitumba beni bawu bavanga, wusiulumuna kiawu ku mbazu, bosi wutula kiawu mu nlangu wuba vana, ayi wuba kamba banua nlangu beni. 21 Ayi Mose wukamba Aloni: “Kibila mbi ngie bebikila dikabu adiodio ba kuvukumuna kuvola disumu adiodio dingolo?” 22 Aloni wuvutudila Mose: “A mfumu’ama bika kudasuka, ngie zebi buboti ti dikabu adiodio mayindu mambi makala yawu. 23 Bawu babe khamba: ‘Tusa zaba ko mambu mbi mabe monikina Mose, dibakala no wutubotula ku ntoto wu Ngipiti, diawu wutuvangila nzambi muingi ka tutuadisa.’ 24 Diawu minu yiba kambidi: ‘Woso mutu widi biuma bi wola, kabotula muingi katuala kuidi minu.’ Bosi minu yikubizi biawu ku mbazu, ayi biawu bikitukizi kitumba akiokio kidi buka muana ngombi.”

25 Mose wumona ti Aloni kasa nunga ko kutuadisa buboti dikabu, ayi wuba yekula muingi bavanga moso mambu batidi, ayi mawu mavanga muingi zimbeni ziawu baba vueza. 26 Bosi Mose wutelama va khotolo kibuangu kiba dikabu, ayi wutuba: “Woso widi ku khonzu Yave, kiza akuku.” Zilevita zioso baye kutakana vaba Mose. 27 Ayi Mose wukamba zilevita beni: “Buakabu butubidi Yave Nzambi yi basi Isaeli: ‘Bonganu zimbedi zinu ayi zungidilanu kibuangu kioso kidi dikabu, muingi luvonda batu boso babe vola disumu, kuba kuandi zikhomba zinu voti bakundi binu.’” 28 Zilevita beni bavanga mamoso Mose kaba tuma. Mu kibila akiokio, 3.000 di babakala bayiza fua mu kilumbu beni. 29 Bosi Mose wutuba: “Luyidiodisanu muingi luvanga kisalu ki Yave, kibila bubu benu lube vonda batu boso babe vola disumu, kuba kuandi bana binu voti zikhomba zinu. Nzambi wunkuiza lusakumuna mu kibila akiokio.”

30 Mu kilumbu kilanda, Mose wukamba dikabu: “Benu lube vola disumu dingolo, diawu minu yemmaka ku mongo muingi kuedengana Yave ayi kundinda muingi ka mulemvukila.” 31 Mu phila ayoyo, Mose wuvutuka vaba Yave, ayi wutuba: “Dikabu babe vola disumu dingolo, kibila babe vanga nzambi yi kitumba ki wola. 32 Buabu, boti ngie tidi, wuba lemvukila mu disumu babe vola, vayi boti wisi balemvukila ko, buna kubula dizina diama mu buku besonika.” 33 Vayi Yave wukamba Mose: “Minu yala kubula to mu buku, dizina di woso mutu wumvola disumu. 34 Buabu yenda, ayi nata dikabu ku ntoto yibe kukamba. Mbasi’ama wala kuenda vantual’inu, vayi bo thangu yala fuana, minu yala kuba fundisa mu kibila ki disumu babe vola.” 35 Bosi Yave wubika dikabu batona kuviokila mu ziphasi, mu kibila ki kitumba ki muana ngombi kio Aloni kavanga.

33 Yave wubue kamba Mose: “Tuadisa dikabu dio wubasisa ku Ngipiti muingi kuba nata ku ntoto yikanikisa Abalahami, Izaki ayi Yakobi mu kutuba: ‘Yala vana ntoto awuwu kuidi nkun’aku.’ 2 Yala fila mbasi’ami vantual’inu, ayi minu yala kukisa basi kanani, zi amoreu, zi hitita, zi perizeu, zi heveu ayi zi jebuzeu. 3 Yendanu ku ntoto wuwedi wika.* Vayi minu yisinkuenda ko va khat’inu, kibila benu luidi dikabu didi ntu ngolo, minu kukuenda yinu, khanu yinkuiza luvondila mu nzila.”

4 Bo dikabu bayuwa mambu amomo, bawu batona kudila ayi basa bue vuata ko bilunga ayi biuma binkaka bi kuyibuongisila. 5 Yave wukamba Mose: “Kamba basi Isaeli: ‘Benu luidi dikabu didi ntu ngolo. Khanu yima luvonda mu mua thangu. Buabu botulanu bilunga binu ayi biuma binkaka bi kuyibuongisila bo yinyindula mambu mbi yifueti ku luvangila.’” 6 Diawu basi Isaeli babotudila bilunga ayi biuma binkaka bi kuyibuongisila bo baba ku mongo wu Horebi.

7 Bosi Mose wubonga tend’andi ayi wuye telimisa yawu mu mua kinanu ku nganda kibuangu kiba dikabu, ayi wutedila yawu tenda yi lukutukunu. Baboso baba tombanga kuzaba mayindu ma Yave mu dioso kua diambu, baba kuenda ku tenda beni yi lukutukunu. 8 Bo Mose kaba kuendanga ku tend’andi, dikabu dioso baba telamanga va muelu zitenda ziawu, ayi baba talanga Mose nati kankota ku tenda beni yi lukutukunu. 9 Mu phila ayoyo, bo Mose kaba kotanga ku tenda yi lukutukunu, dituti diaba kulukanga va khotolo tenda beni, mu thangu Nzambi kaba kolukanga na Mose. 10 Bo dikabu baba monanga dituti va khotolo tenda yi lukutukunu, kadika mutu mu bawu, waba fukamanga va khotolo tend’andi. 11 Yave waba kolukanga na Mose dedi bo mutu kankolukilanga na wadi yandi. Bo Mose kaba vutukanga ku kibuangu kiba dikabu, kisadi kiandi Yosua muana wu Num, nandi waba sialanga ku tenda yi lukutukunu.

12 Mose wukamba Yave: “Ngie wukhamba: ‘Nata dikabu adiodio’, vayi wusa kunzabikisa ko nani wunkuenda yami. Mvandi ngie veka wutuba: ‘Minu yi kuzebi buboti ayi ngie widi luvalu va mesu mami.’ 13 Boti minu yidi luvalu va mesu maku, lemvuka nzabikisa makani maku muingi minu yi kuzaba, ayi yitatamana kuba mutu wu luvalu va mesu maku. Mvandi bika kuzimbakana ti dikabu adidi diaku.” 14 Diawu Nzambi kakambila Mose: “Minu yinkuiza yenda yaku ayi yinkuiza kuvana ndembama.” 15 Mose wukamba Nzambi: “Boti wisinkuenda ko yitu, buna bika ku tukamba tunanguka avava. 16 Ngie kukhambu kuenda yitu, buidi batu bankuiza zabila ti minu ayi dikabu adidi tuidi luvalu va mesu maku? Ayi buidi tunkuiza bela disuasana na mimvila minkaka midi va ntoto, ngie kukhambu kuenda yitu?”

17 Yave wukamba Mose: “Yinkuiza vanga mambu mandinda, kibila ngie widi luvalu va mesu mami, ayi minu yi kuzebi buboti.” 18 Bosi Mose wukamba Nzambi: “Lemvuka, mbonisa nkembu’aku.” 19 Nzambi wumvutudila: “Minu yinkuiza viokila vantual’aku muingi wumona nkembu’ama, ayi yinkuiza kuzabikisa matedi dizina diama Yave. Yinkuiza vua nkinza woso mutu yitidi kuvua nkinza, ayi yinkuiza mona kiadi woso mutu yitidi kumona kiadi.” 20 Vayi Nzambi wubue tuba: “Ngie wulendi mona ko kizizi kiama, kibila vasi ko mutu kalenda mona kizizi kiama ayi kutatamana kuzinga.”

21 Yave wubue tuba: “Tala, vadi kibuangu kidi kifikama na vo minu yidi, ayi ngie wulenda telama vana va mbata dimanya. 22 Bo minu yinkuiza vioka muingi kumonisa nkembu’ama, yinkuiza kukamba wukota mu nsuku dimanya ayi yinkuiza kufuka koko kuama nati minu yinkuiza vioka. 23 Bosi bo yinkuiza botula koko kuama, ngie wunkuiza mona mbus’ama. Vayi kizizi kiama ni mutu kalendi mona ko kiawu.”

34 Yave wukamba Mose: “Bonga mamanya muadi madi dedimueka na mamanya mo maba minsiku, ayi minu yinkuiza sonika mu mamanya beni minsiku mio miba mu mamanya matheti mo ngie wubula. 2 Yono mu meni kubama muingi wutombuka ku Mongo Sinai, ayi minu yinkuiza yoluka yaku kuna mbata mongo beni. 3 Ni mutu wunkaka kalendi kuenda ko yaku ku mongo beni, ni kheti kuba va kibuangu kifikama. Mvandi ni ngombi voti dimemi bafueti dila ku mongo beni.”

4 Mu phila yoyo, Mose wubonga mamanya muadi maba dedimueka na mamanya kavanga mu khumbu yitheti, bosi mu kilumbu kilanda va meni, nandi wutombuka ku Mongo Sinai dedi bo Yave kankambila, ayi wunata mamanya beni kakubika. 5 Bosi Yave wukuluka va mongo beni mu dituti va kibuangu kiba Mose, ayi wunzabikisa ntindu mbi mutu Yave kadi. 6 Yave wuvioka vantuala Mose ayi wunkamba: “Yave, Yave, Nzambi nkua nlemvu, nkua kiadi, widi mvibudulu, widi luzolo lukuikama ayi nkua kiedika. 7 Nzambi wummonisanga luzolo lukuikama kuidi zimbandu ziwombo, wunlemvukilanga zinzimbala ayi masumu. Vayi wala fundisa bana ayi batekulu mu kibila ki zinzimbala zi matata mawu, mu zimbandu ziawu zioso.”

8 Muna thangu beni Mose wufukama ayi wunyinika kizizi kiandi va tsi. 9 Bosi wutuba: “A Yave, boti minu yidi luvalu va mesu maku, lemvuka a Yave yiza muingi wenda yitu, kheti befu tuidi dikabu didi ntu ngolo. Lemvukila zinzimbala ayi masumu mitu, ayi kikinina muingi tuba dikabu diaku.” 10 Nzambi wumvutudila: “Yidi mu kuvanga yaku luwawanu. Yinkuiza vanga mangitukulu mawombo vantuala dikabu, mo kayivengiabu ko kuidi dikabu dinkaka. Ayi batu boso bala mona mambu ma kukuitukila ma Yave, kibila yala kuluvangila mambu mawombo ma kukuitukila.

11 “Teka matu mu mambu yaku kamba bubu. Yinkuiza kukisa vantual’inu basi amorreu, basi kanani, zi hitita, zi perizeu, zi heveu ayi zi jebuzeu. 12 Banu keba keba muingi lubika vanga luwawanu na batu bankalanga ku ntoto benu luidi mu kukuenda, muingi mawu mabika ba ntambu kuidi benu. 13 Vayi benu lufueti tulula bikumu biawu, makunzi mawu manlongo ayi mamanya mawu ma kubuongimina. 14 Benu mulendi buongimina ko zinzambi zinkaka, kibila Yave widi Nzambi nkua kiphala wuntombanga babuongimina to nandi. 15 Banu keba keba muingi lubika vanga luwawanu na batu bankalanga ku ntoto benu luidi mu kukuenda, kibila mu thangu bankuiza buongimina zinzambi ziawu ayi bamvana minkhailu, bawu balenda kulutumisa muingi ludia minkhailu beni. 16 Benu kuvanga mawu, khanu bana binu ba babakala bankuiza kuela bana bawu ba bakietu, ayi bo bana bawu bankuiza buongimina zinzambi ziawu, bana binu ba babakala mvawu bankuiza buongimina zinzambi beni.

17 “Bikanu kuvanga zinzambi zi bisengu.

18 “Benu lufueti kembanga Nkungi wu Mapha Makhambulu Luvi. Lufueti dianga mapha makhambulu luvi mu sambuadi di bilumbu, dedi bo yima kukambila. Ayi lufueti vangilanga mawu mu thangu yisikika, mu ngonda yi Abibe, kibila ngonda yi Abibe yawu lubasika ku Ngipiti.

19 “Bana boso batheti ba babakala badi bama, kuba kuandi ba batu voti ba bibulu. 20 Ngie fueti vana dimemi va mvingi muana wutheti wu phunda muingi kunkula, vayi ngie kumanga kunkula, buna fueti kumvonda mu kumbita nti ku dikosi. Benu lufueti kula bana binu boso batheti ba babakala, ayi ni mutu kalendi kuiza ko vantual’ama mioko yi mioko.

21 “Benu lufueti vanga bisalu binu bioso mu sambanu di bilumbu. Vayi mu Kisabala kilumbu sambuadi, lufueti vunda. Lufueti vunda kheti mu thangu yi kukubika ntoto, voti mu thangu yi kuvela mbongu.

22 “Lufueti kembanga Nkungi wu Zisabala, bo mumvela mimbutu mitheti miyela mi trigu. Ayi lufueti kembanga Nkungi wu Zitenda ku tsuka mvu.

23 “Babakala boso ba dikabu bafueti kuendanga khumbu tatu mu mvu vantuala Yave Mfumu yikiedika, Nzambi yi Isaeli. 24 Minu yinkuiza kukisa mimvila mioso vantual’inu, ayi yinkuiza buela zindilu zi kizunga kinu. Ni mutu kalasa zininanga ko ntoto’inu, bo luala kuendanga khumbu zitatu mu mvu vantuala Yave Nzamb’inu.

25 “Mulendi vana ko menga ma nkhailu’ama va kimueka na biuma bidi luvi. Ayi mulendi lunda ko nkhailu wu nkungi wu pasika nati mu kilumbu kinlanda.

26 “Benu lufueti natanga ku nzo Yave Nzamb’inu mimbutu mitheti milutidi lunkongula mu zitsola zinu.

“Ayi mulendi lamba ko muana khombo mu kusadila leta yi ngudi’andi.”

27 Yave wubue kamba Mose: “Ngie fueti sonika mambu amama yima tuba, kibila yinkuiza vanga yaku luwawanu ayi yinkuiza vanga luwawanu na basi Isaeli, mu kutadila mambu beni. 28 Mose wukala kuna mongo na Yave mu 40 di bilumbu. Nandi kasa dia ko ni kiuma ayi kasa nua ko nlangu. Ayi nandi wusonika mu mamanya Kumi di Minsiku mi Luwawanu.

29 Bosi Mose wukuluka ku Mongo Sinai na mamanya muadi kasonika Kumi di Minsiku mi Luwawanu. Bo Mose kakuluka, nandi kasa zaba ko ti kizizi kiandi kiaba lezaba beni, bo kayoluka na Nzambi. 30 Bo Aloni ayi basi Isaeli boso batala Mose, bawu bamona ti kizizi kiandi kiaba lezama beni, diawu babela boma mu kumfikama.

31 Vayi Mose wuba tela, diawu Aloni ayi bakulutu boso ba dikabu bafikimina vaba Mose, ayi nandi wuyoluka yawu. 32 Bosi basi Isaeli boso bafikama vo kaba, ayi nandi wuba zabikisa mambu moso Yave kankamba ku Mongo Sinai. 33 Kadika khumbu Mose kaba mananga kukoluka yawu, nandi waba fukanga nledi ku kizizi kiandi. 34 Vayi bo Mose kaba kuendanga vantuala Yave muingi kukoluka yandi, nandi waba botulanga nledi ku kizizi kiandi nati mu thangu kaba botukanga vana. Bosi waba kuendanga kuidi basi Isaeli muingi kuba zabikisa zithumu Nzambi kamvana. 35 Basi Isaeli baba monanga ti kizizi ki Mose kiaba lezamanga beni, diawu Mose kaba fukilanga nledi ku kizizi kiandi, nati mu thangu kamvutuka kuidi Nzambi muingi kukoluka yandi.

35 Bo vavioka mua thangu, Mose wukutikisa dikabu dioso di Isaeli ayi wuba kamba: “Amama mawu Yave kantomba benu luvanga: 2 Benu lufueti vanga bisalu binu mu sambanu di bilumbu, vayi mu kisabala kilumbu sambuadi benu lufueti vunda, kibila kidi kilumbu kinlongo va mesu ma Yave. Woso mutu wala vanga kisalu mu kisabala bafueti kumvonda. 3 Mu kisabala, ni mutu kabika kutatika mbazu ku nzo’andi.”

4 Mose wubue kamba basi Isaeli: “Amama mawu Yave kantomba muingi benu luvanga: 5 ‘Lufueti vana Yave minkhailu. Baboso badi mintima mikubama bafueti vana minkhailu kuidi Yave, kuba kuandi: Wola, palata, cobre, 6 nledi wuvangulu mu minsinga mi linho mi ndimba azul, nledi wu violeta, nledi wubenga, nledi wuvangulu mu minsinga mi linho, nledi wuvangulu mu mika mi khombo, 7 minledi mivangulu mu nkanda mamemi madi matona mabenga, minledi mivangulu mu nkanda kibulu bantedilanga foka, mabaya ma nti wu acácia, 8 mafuta ma minda, bálsamo yi kuvangila malasi ma kubiekila, ayi malasi madi mfimbu wumboti, 9 mamanya ma ônix ayi mamanya mankaka mathalu muingi kutula mu éfode ayi mu kikhutu ki thulu.

10 “‘Batu boso badi bapisuka bafueti kuiza muingi kuvanga biuma abibi Yave kantomba: 11 Nzo yinlongo, biuma bi kufuka nzo yinlongo beni, makunzi, biuma bi kukobika mu makunzi, minkamba ayi mvandi biuma bi kuvuakika makunzi, 12 kasu yi luwawanu, mua minti mi kunatina kasu beni, tampa ayi nledi wumvasa kibuangu kinlongo na kilutidi kinlongo, 13 meza na biuma biandi bioso, mua minti mi kunatina meza beni, mapha manlongo, 14 kandelabru na biuma biandi bioso, minda ayi mafuta ma minda beni, 15 kikuma ki kuvikila malasi na mua minti mi kunatina kikuma beni, malasi ma kubiekila, malasi madi mfimbu wumboti, nledi muingi kutula va khotolo nzo yinlongo, 16 kikuma ki kuvikila minkhailu na biuma biandi bioso, kianga ki cobre kidi buka dikondi, mua minti mi kunatina kikuma beni, dibola ayi kiuma ki kutetika dibola beni, 17 minledi mi luphangu, makunzi ma luphangu, biuma bi kuvuakika makunzi, nledi muingi kutula va khotolo luphangu, 18 biuma bi kusikimisila nzo yinlongo, biuma bi kusikimisina luphangu na mua minsinga miawu, 19 bikhutu bivangulu mu minsinga mi linho bankuiza sadilanga ku nzo yinlongo, bikhutu binlongo bi nkulutu wu zinganga nzambi Aloni, ayi bikhutu bi bana bandi bio bankuiza vangilanga kisalu ki nganga nzambi.’”

20 Bo dikabu dioso di Isaeli bayuwa mambu baba kamba, bawu babotuka vaba Mose. 21 Baboso baba mintima mikubama bavana minkhailu kuidi Yave muingi kuvanga nzo yinlongo, biuma bioso bankuiza sadilanga kuna, ayi bikhutu binlongo bi zinganga nzambi. 22 Babakala ayi bakietu boso baba mintima mikubama, batuala minkhailu mi wola kuidi Yave. Bawu batuala: Bilunga, minsanga ayi biuma binkaka bi wola bi kuyibuongisila. 23 Ayi baboso baba minledi mivangulu mu minsinga mi linho mi ndimba azul, minledi mi violeta, minledi mibenga, minledi mivangulu mu minsinga mi linho, mivangulu mu mika mi zikhombo, mivangulu mu nkanda mamemi madi matona mabenga ayi mivangulu mu nkanda kibulu bantedilanga foka, batuala biawu. 24 Baboso baba palata, cobre, mabaya ma nti wu acácia, batuala biawu muingi kuvana nkhailu kuidi Yave.

25 Bakietu boso baba bapisuka mu kutunga minledi, batuala biuma bavanga dedi: Nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho. 26 Mvandi bakietu boso baba mintima mikubama batunga minledi mu mika mi zikhombo.

27 Zimfumu zi makanda batuala mamanya ma ônix ayi mamanya mankaka mathalu muingi kutula mu éfode ayi mu kikhutu ki thulu. 28 Batuala mvandi bálsamo, mafuta ma minda, malasi ma kubiekila ayi malasi madi mfimbu wumboti. 29 Babakala ayi bakietu boso baba bakubama, batuala minkhailu muingi kuvanga kisalu Yave katuma mu nzila Mose. Basi Isaeli boso bavana minkhailu kuidi Yave mu ntima woso.

30 Mose wukamba basi Isaeli: “Yave besola Bezaleli muana wu Uri ayi Uri widi muana wu Hur widi mu mvila wu Yuda. 31 Nzambi wumveni phevi yinlongo, nduenga ayi phisulu yi kuvanga ntindu woso wu bisalu bi kufikula, 32 muingi kafikula, ayi kavanga biuma bi wola, bi palata ayi bi cobre. 33 Mvandi muingi kazaba kubuongisa mamanya mathalu ayi kufikula biuma muna, ayi kuvanga mintindu mioso mi bisalu bamvangilanga mu mabaya. 34 Mvandi Nzambi wuveni Ooliabi muana wu Aizamaki widi mu mvila wu Dan, phuila yi kulongisa bankaka. 35 Nzambi wuba veni phevi yinlongo, muingi kufikula biuma mu mamanya mathalu, kufikula biuma mu minledi mivangulu mu minsinga mi linho mi ndimba azul, minledi mi violeta, minledi mibenga, minledi mivangulu mu minsinga mi linho ayi mvandi minledi minkaka. Babakala abobo beka nzailu, nduenga ayi phisulu yi kuvanga ntindu woso wu bisalu bi kufikula.

36 “Bezaleli wunkuiza sala va kimueka na Ooliabi, ayi batu boso Yave kaveni nduenga ayi phisulu yi kuvanga bisalu bioso binlongo, dedi bo Yave kavanini nsua.”

2 Bosi Mose wutumisa Bezaleli, Ooliabi ayi babakala boso Yave kavana phevi yinlongo ayi nduenga, mvandi wutumisa babakala boso baba mintima mikubama muingi kuyivana mu kisalu beni. 3 Mose wuba vana minkhailu mioso basi Isaeli batuala muingi kubuela mioko kisalu kinlongo. Vayi basi Isaeli batatamana kutuala minkhailu kadika kilumbu.

4 Bo batona kuvanga kisalu kinlongo, batu boso baba nzailu batona kukuenda kuidi Mose wumueka wumueka, 5 ayi bankamba: “Dikabu badi mu kutuala beni minkhailu, kuvioka mio mintombulu muingi kuvanga kisalu Yave katuma.” 6 Diawu Mose katumina muingi bavana ndubu ayiyi kuidi dikabu dioso: “Bikanu kubue tuala minkhailu muingi kubuela mioko kisalu kinlongo.” Mu phila ayoyo, basa bue kikinina ko ni mutu katuala minkhailu. 7 Bisadulu basi Isaeli bavana muingi kubuela mioko kisalu, bivioka kena bio biaba tombulu muingi kumanisa kisalu beni.

8 Mu phila ayoyo, babakala boso baba nduenga ayi nzailu, bavanga nzo yinlongo mu minledi mivangulu mu minsinga mi linho mi ndimba azul, nledi wu violeta, nledi wubenga ayi minledi mivangulu mu minsinga mi linho. Bosi Bezaleli wufikula zikerubim mu minledi beni. 9 Kadika nledi wuba 28 di zikovadu* mu kukula ayi 4 di zikovadu mu kutanduka. Minledi mioso amiomio miba dedi mueka mu kutola. 10 Nandi wulonda maboko matanu ma minledi muingi miba nledi wumueka ayi wubue londa maboko matanu mankaka ma minledi muingi miba nledi wumueka. 11 Bosi wutunga mua minsinga mi linho yi ndimba azul, ayi wuta miawu mu ḿbilu wu maboko matanu ma minledi mitheti. Mawu mvandi kavanga kutsuka minledi mitanu minkaka. 12 Nandi wuvanga 50 di mua makongi mu kusadila minsinga mi ndimba azul ayi wutula mu kikhuku kitheti ki maboko ma minledi, mvandi wuvanga 50 di mua makongi ma minsinga mi ndimba azul ayi wutula mu kikhuku kimmuadi ki maboko ma minledi, vo bikhuku bia bibiodi bidenginina. 13 Bosi nandi wubue vanga 50 di mua bisengu bi wola bikondalala muingi kubundikisa maboko moso ma minledi kalondikisa. Mu phila ayoyo, nzo yoso yinlongo yiyiza ba kiuma kimueka to.

14 Bosi nandi wuvanga 11 di minledi mu mika mi zikhombo muingi kufuka kuyilu nzo yinlongo. 15 Kadika nledi wuba 30 di zikovadu mu kukula ayi 4 di zikovadu mu kutanduka. Ayi 11 dioso di minledi miba kutola kumueka. 16 Nandi wulonda tanu di maboko ma minledi, bosi wubue londa sambanu di maboko ma minledi minkaka. 17 Bosi wutunga 50 di mua makongi ma minsinga ayi wutula mawu mu ḿbilu wu kikhuku kitheti ki maboko ma minledi kalonda. Mvandi wubue tunga 50 di mua makongi ma minsinga ayi wutula mawu mu ḿbilu wu kikhuku kimmuadi ki maboko ma minledi kalonda. 18 Ayi wuvanga 50 di mua bisengu bi cobre bikondalala muingi kubundikisa kikhuku kitheti ayi kimmuadi ki maboko ma minledi kalonda.

19 Nandi wuvanga nledi mu nkanda wu dimemi dimbakala didi matona mabenga muingi kufuka kuyilu nzo yinlongo. Ayi va mbata nledi beni, wufuka nledi wuvangulu mu nkanda wu kibulu bantedilanga foca.

20 Bosi wutelimisa makunzi ma mabaya ma acácia, muingi kuvanga zi armações* zi nzo yinlongo. 21 Kadika dikunzi diba kumi di zikovadu mu kuzangama ayi kovadu yimueka ayi ndambu mu kutanduka. 22 Kadika dikunzi diba mabaya muadi mabundana, ayi buawu bubela makunzi moso ma nzo yinlongo. 23 Mu phila ayoyo, nandi wutelimisa 20 di makunzi ku khonzu sul yi nzo yinlongo. 24 Bosi wuvanga 40 di biuma bi palata bi kuvuakika makunzi, muingi kutula kutsi 20 di makunzi moso: biuma biodi bi kuvuakika makunzi muingi kuvuakika mabaya muadi mo kabundisa, ayi mawu kavanga mu makunzi moso katelimisa. 25 Ku khonzu norte yi nzo yinlongo, mvandi wutelimisa 20 di makunzi. 26 ayi wubue vanga 40 di biuma bi kuvuakika makunzi: biuma biodi bi kuvuakika makunzi muingi kuvuakika mabaya muadi matheti kabundisa, ayi mawu kavanga mu makunzi moso katelimisa.

27 Kumbusa nzo yinlongo ku khonzu sul, mvandi wutelimisa sambanu di makunzi. 28 Mvandi wutelimisa makunzi muadi muingi kutula mu zithokongo* ziwadi zidi kumbusa nzo yinlongo. 29 Wuvangila makunzi beni mu kubundisa mabaya muadi kutonina kuwanda nati kuyilu vadi dikongi ditheti. Ayi buawu kavangila makunzi mamuadi mo kasadila muingi kuvanga zithokongo. 30 Vaba 8 di makunzi ayi 16 di biuma bi palata mo kavuakika makunzi beni: biuma biodi bi kuvuakika makunzi mo kavuakika kadika dikunzi.

31 Nandi wuvanga minkamba mu mabaya ma acácia, wutula minkamba mitanu mu makunzi maba ku khonzu sul yi nzo yinlongo. 32 Mvandi wutula minkamba mitanu mu makunzi maba ku khonzu norte yi nzo yinlongo. Ayi minkamba mitanu minkaka wutula miawu mu makunzi maba ku khonzu oeste yi nzo yinlongo. 33 Ayi wuvanga nkamba va khati tsika makunzi, wutonina ku khonzu yimueka nati ku khonzu yinkaka. 34 Nandi wuvinda wola mu makunzi moso, ayi wuvanga mu makunzi beni makongi ma wola mo muviokila minkamba ayi wuvinda mvandi minkamba beni wola.

35 Nandi wutunga minledi mivangulu mu minsinga mi linho mi ndimba azul, minledi mi violeta, minledi mibenga, minledi mivangulu mu minsinga mi linho ayi wufikula mu minledi beni zikerubim. 36 Bosi wulelika minledi beni mu makunzi manna kavangila mu mabaya ma acácia kavinda wola. Wukobika mu makunzi beni mua bisengu bi wola, ayi makunzi beni maba mavuakama mu mua biuma binna bi palata. 37 Bosi wutunga minledi mivangulu mu minsinga mi linho mi ndimba azul, minledi mi violeta, minledi mibenga ayi minledi mivangulu mu minsinga mi linho, ayi wutula miawu va khotolo nzo yinlongo. 38 Mvandi wuvanga makunzi matanu ayi wukobika muna mua bisengu. Wuvinda wola va tsongi makunzi beni, ayi mvandi wuvinda wola mu mua bisengu kakobika mu makunzi beni. Vayi tanu di biuma kavanga bi kuvuakika makunzi beni biba bi cobre.

37 Bosi Bezaleli wuvanga kasu mu mabaya ma acácia, Kasu beni yiba zikovadu wadi ayi ndambu mu kukula, kovadu yimueka ayi ndambu mu kutanduka ayi kovadu yimueka ayi ndambu mu kuzangama. 2 Ayi nandi wuvinda kasu yoso wola, kuba kuandi ku nganda ayi ku khati, ayi wuvanga nkukulu* mu Kasu beni. 3 Bosi wuvanga makongi manna ma wola va yilu malu manna ma kasu beni. Makongi muadi maba ku khonzu lubakala ayi makongi muadi ku khonzu yi lukhietu. 4 Bosi nandi wuvanga mua minti mu mabaya ma acácia, ayi wuvinda miawu wola. 5 Ayi wukosa mua minti beni mu makongi madi mu zikhonzu zi kasu muingi kunatinanga Kasu beni.

6 Nandi wuvanga tampa yi wola yiba zikovadu wadi ayi ndambu mu kukula ayi kovadu yimueka ayi ndambu mu kutanduka. 7 Ayi wuvanga bitumba biodi bi wola bi zikerubim va mbata tampa. 8 Bitumba beni bi zikerubim kavanga, kimueka wutula kiawu ku khonzu lubakala ayi yinkaka wutula kiawu ku khonzu lukhietu va mbata tampa. 9 Bitumba beni bi zikerubim biaba talasananga, ayi kadika kitumba kiyinika kizizi kiandi va mbata tampa yi Kasu, ayi biawu biyalumuna mavavi mawu muingi kufuka tampa.

10 Bosi nandi wuvanga meza yiba zikovadu wadi mu kukula, kovadu yimueka mu kutanduka ayi kovadu yimueka ayi ndambu mu kuzangama. Wuvangila meza beni mu mabaya ma acácia. 11 Nandi wuvinda meza beni wola, ayi wuvanga nkukulu mu zikhonzu zioso zi meza ayi mvandi wuvinda nkukulu beni wola. 12 Bosi wubabika mua kiuma kidi phiba buka dikanda di koko mu zikhonzu zioso zi meza ayi wutula nkukulu yo kavinda wola mu kiuma beni kababika mu meza. 13 Mvandi wuvanga makongi manna ma wola, ayi wutula mawu mu zikhonzu zinna zi meza vo bakuika malu manna ma meza beni. 14 Wukuika makongi beni mu mua kiuma kababika mu meza, ayi muawu kavuakika mua minti mi kunatina meza beni. 15 Bosi wuvanga mua minti mu mabaya ma acácia muingi kunatinanga meza, ayi wuvinda wola mu mua minti beni. 16 Nandi wuvanga zindonga, zikopu, bibasa ayi bibobola, abiobio biawu biuma baba sadilanga muingi kuvanina minkhailu mi malavu. Nandi wuvangila biawu mu wola.

17 Bosi wuvanga kandelabru yi wola. Kandelabru beni yiba dibandu, kulu, matafi, zikopu, zimbotau ayi biteka. Biuma bioso abiobio, biba bikuikama mu kiuma kimueka. 18 Mu kulu ku kandelabru beni muba sambanu di matafi. Matafi matatu ku khonzu yimueka ayi matafi matatu ku khonzu yinkaka. 19 Mu kadika ditafi di kandelabru muba biteka bitatu bidi buka biteka bi nti wu amêndoa, mvandi muba zimbotau. Buawu bavangila sambanu dioso di matafi maba mu kandelabru beni. 20 Ayi mu kulu ku kandelabru beni muba biteka binna bidi buka biteka bi nti wu amêndoa ayi muba mvandi zimbotau. 21 Kutsi matafi matheti kuba botão, kutsi matafi mammuadi kuba botão ayi kutsi matafi mantatu mvandi kuba botão. 22 Zibotão, matafi ayi kandelabru, biba bikuikama mu kiuma kimueka to kivangulu mu wola. 23 Nandi wutula mu kandelabru beni sambuadi di zikopu zi minda, mvandi wuvanga biuma bi kudokisilanga* minda ayi biuma bi kubotudila dibombi. 24 Nandi wusadila talentu* yimueka yi wola muingi kuvangila kandelabru ayi biuma bioso abiobio.

25 Bosi wuvanga kikuma ki kuvikila malasi. Wuvangila kiawu mu mabaya ma acácia. Kikuma beni kiba dedi mueka mu zikhonzu zia zinna, kovadu yimueka mu kukula, kovadu yimueka mu kutanduka ayi kovadu wadi mu kuzangama ayi wukuika mu kikuma beni ziphoka. 26 Nandi wuvinda kikuma kioso wola kutonina kuyilu mu zikhonzu zioso ayi mu ziphoka, mvandi wuvanga nkukulu wu wola mu zikhonzu zioso zi kikuma beni. 27 Mvandi wuvanga makongi muadi ma wola mu wanda nkukulu, mu zikhonzu wadi zi kikuma muingi kuvuakika mua minti mi kunatina kikuma beni. 28 Bosi wuvanga mua minti mu mabaya ma acácia ayi wuvinda miawu wola. 29 Mvandi wuvanga malasi manlongo ma kubiekila ayi malasi madi mfimbu wumboti.

38 Nandi wuvanga kikuma ki kuvikila minkhailu mu mabaya ma nti wu acácia. Ayi kiawu kiba dedi mueka mu zikhonzu zia zinna, zikovadu zitanu mu kukula, zikovadu zitanu mu kutanduka ayi zikovadu zitatu mu kuzangama. 2 Bosi wukuika ziphoka zinna mu zikhonzu zinna zi kikuma beni ayi wuvinda cobre mu kikuma kioso. 3 Wuvanga mua biuma bi kubotudila dibombi, zipa, bibobola, minsomo ayi biuma bi kunatina mbazu. Biuma bioso abiobio bi kusadila va kikuma, wuvangila biawu mu cobre. 4 Mvandi wuvanga kianga ki cobre kidi buka dikondi ayi wutula kianga beni mu khati kikuma, ayi kiawu kiba va khati tsika kikuma. 5 Nandi wukuika makongi manna mu zikhonzu zinna zi kikuma mo muviokila kianga muingi kunatina kikuma beni. 6 Mvandi wuvanga mua minti mu mabaya ma acácia ayi wuvinda cobre mu mua minti beni. 7 Nandi wuvuakika mua minti beni mu makongi madi mu zikhonzu zia ziwadi muingi kunatinanga kikuma. Ayi kikuma beni kavanga kiba yambi mu khati.

8 Mvandi wusadila lumuenu lu cobre lo bakietu baba sadilanga va khotolo nzo yinlongo, muingi kuvanga dibola ayi kiuma ki kutetika dibola beni.

9 Nandi wuvanga luphangu lu nzo yinlongo ayi wutula muna minledi mivangulu mu minsinga mi linho. Ku khonzu sul yi luphangu beni kuba 100 di zikovadu mu kukula. 10 Nandi wutelimisa 20 di makunzi ma cobre ayi wuvanga 20 di biuma bi cobre muingi kuvuakika makunzi beni. Ayi wukuika mu makunzi beni mua bisengu bi palata. 11 Ku khonzu norte yi luphangu mvandi wutula minledi, ku khonzu beni mvandi kuba 100 di zikovadu mu kukula. Wutelimisa 20 di makunzi ma cobre ayi wuvanga 20 di biuma bi cobre bi kuvuakika makunzi. Ayi wukuika mu makunzi beni mua bisengu bi palata. 12 Ku khonzu oeste yi luphangu kuba minledi ayi ku khonzu beni kuba 50 di zikovadu mu kutanduka. Wutelimisa kumi di makunzi ma cobre ayi wuvanga kumi di biuma bi cobre bi kuvuakika makunzi. Ayi wukuika mu makunzi beni mua bisengu bi palata. 13 Ku khonzu leste yi luphangu kumbasikilanga thangu, kuba 50 di zikovadu mu kutanduka. 14 Ku khonzu lubakala va khotolo luphangu wutula minledi, vawu vaba 15 di zikovadu mu kukula ayi wutelimisa vana makunzi matatu ayi biuma bitatu kavuakika makunzi beni. 15 Ku khonzu yi lukietu va khotolo luphangu mvandi wutula minledi, vawu vaba 15 di zikovadu mu kukula ayi wutelimisa vana makunzi matatu ayi biuma bitatu kavuakika makunzi beni. 16 Mu zikhonzu zioso zi luphangu, nandi wutula minledi mivangulu mu minsinga mi linho. 17 Biuma bioso bi kuvuakika makunzi bavangila biawu mu cobre. Mua bisengu ayi biuma bi kulondikisila bavangila biawu mu palata ayi va tsongi makunzi bavinda vana palata. Makunzi moso maba mu luphangu muba biuma bi palata bi kulondikisila.

18 Va khotolo luphangu vaba minledi mivangulu mu minsinga mi linho mi ndimba azul, minledi mi violeta, minledi mibenga ayi minledi mivangulu mu minsinga mi linho. Vawu vaba 20 di zikovadu mu kukula ayi 5 di zikovadu mu kuzangama. 19 Makunzi manna katelimisa ayi biuma binna bi kuvuakika makunzi beni, bivangulu mu cobre. Wuvangila mu palata biuma bi kukobika mu makunzi ayi biuma bi kulondikisila ayi wuvinda va tsongi makunzi beni palata. 20 Biuma bioso bi kusikimisina nzo yinlongo ayi biuma bi kusikimisina luphangu, bivangulu mu cobre.

21 Abiobio biawu biuma basadila ku nzo yinlongo ko kuba kasu yi luwawanu. Basi Levi batambula kiyeku akiokio kuidi Mose muingi kuvanga biuma beni. Ayi Itamar muana Aloni nganga nzambi nandi wutuadisa kisalu beni. 22 Bezaleli muana wu Uri ayi Uri muana wu Hur widi mu mvila wu Yuda, nandi wuvanga biuma bioso Yave katuma Mose. 23 Nandi wusala va kimueka na Ooliabi muana Aizamaki widi mu mvila wu Dan. Ooliabi wuba mfikudi ayi wuba wupisuka mu kutunga biuma mu minledi mivangulu mu minsinga mi linho mi ndimba azul, minledi mi violeta, minledi mibenga ayi minledi mivangulu mu minsinga mi linho.

24 Wola yoso basadila muingi kuvanga bisalu ku nzo yinlongo, yiba 29 di zitalentu* ayi 730 di zisikulu,* mu kutadila sikulu baba sadilanga ku nzo yinlongo. 25 Palata yoso dikabu bavana yiba 100 di zitalentu ayi 1.775 di zisikulu, mu kutadila sikulu baba sadilanga ku nzo yinlongo. 26 Ndambu yi sikulu batambula kuidi kadika mutu wusonama mu thangu batanga babakala baba kutonina 20 di mimvu nati kuyilu, yiba yidedakana na ndambu sikulu baba sadilanga ku nzo yinlongo. Thalu yoso yi babakala batangu yiba 603.550 di batu.

27 Basadila 100 di zitalentu muingi kuvanga biuma bi kuvuakika makunzi ma nzo yinlongo, ayi biuma bi kuvuakika makunzi ma luphangu lu nzo yinlongo. Mvandi bavanga 100 di biuma bi kuvuakika makunzi mu kusadila 100 di zitalentu. Mawu mansundula talentu yimueka mu kadika kiuma ki kuvuakika dikunzi. 28 Nandi wusadila 1.775 di zisikulu zi palata muingi kuvanga mua bisengu bi kukobika mu makunzi ayi wuvinda palata va tsongi makunzi beni, bosi wu mabundikisa.

29 Cobre yoso bavana muingi kuvanga kisalu, yiba 70 di zitalentu ayi 2.400 di zisikulu. 30 Mu cobre yoso ayoyo, nandi wuvanga biuma bi kuvuakika makunzi maba va khotolo nzo yinlongo. Kikuma, kianga ki kutula mu kikuma beni, biuma bioso baba vangilanga kisalu va kikuma, 31 biuma bi kuvuakika makunzi moso ma luphangu, biuma bi kuvuakika makunzi maba va khotolo luphangu, mvandi biuma bi kusikimisina nzo yinlongo, ayi biuma bi kusikimisina luphangu lu nzo yinlongo.

39 Basadila minledi mivangulu mu minsinga mi linho mi ndimba azul, nledi wu violeta ayi nledi wubenga muingi kuvangila bikhutu binlongo bi kuvangila kisalu ki zinganga nzambi. Mvandi bavanga bikhutu binlongo bi Aloni dedi bo Yave kakambila Mose.

2 Nandi wuvanga éfode mu wola, nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho. 3 Bavanga mua zithata zi wola ayi bakanga muna nsinga wuvangulu mu linho wu ndimba azul, nledi wu violeta, nledi wubenga ayi nledi wuvangulu mu minsinga mi linho. 4 Éfode beni yiba minlunga miodi mu mavangiti, ayi miawu miba mikangama mu zikhonzu zia ziwadi. 5 Wuvanga phonda yo kakanga mu éfode muingi kusikimisa yawu. Wuvangila yawu mu nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho, dedi bo Yave kakambila Mose.

6 Wubonga mamanya ma ônix ayi wusonika muna 12 di mazina ma bana ba Isaeli. Ayi wuvuakika mamanya beni mu mua minlunga mi wola. 7 Nandi wuvuakika mamanya beni mu minlunga mi éfode mimviokila mu mavangiti, muingi Nzambi katebukilanga monyo bana ba Isaeli. Bavangila mawu dedi bo Yave katumina Mose. 8 Bosi wuvanga kikhutu ki thulu dedi bo kavangila éfode. Ayi wuvangila kiawu mu kusadila: wola, nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho. 9 Bo baba futikanga kikhutu beni, kiawu kiaba banga dedimueka mu zikhonzu zioso. Dikanda dimueka di koko mu kukula ayi dikanda dimueka di koko mu kutanduka. 10 Ayi wutula mintanda minna mi mamanya mathalu mu kikhutu beni. Mu ntanda wutheti wutula rubi, topázio ayi esmeralda. 11 Mu ntanda wummuadi wutula turquesa, safira ayi jaspe. 12 Mu ntanda wuntatu wutula dimanya di léshem, ágata ayi ametista. 13 Mu ntanda wunna wutula crisólito, ônix ayi jade. Mamanya amomo mathalu, bavuakika mawu mu makongi ma wola. 14 Kadika dimanya dithalu, basonika muna dizina di muana wu Isaeli. Basonika mazina beni dedi bo bantudilanga kidimbu, ayi mawu maba sundula 12 di mimvila mi Isaeli.

15 Nandi wutula mu nledi beni mua ziphanga zidi buka mua minsinga. 16 Wutula mu kikhutu beni ki thulu minlunga miodi mi wola, ayi miawu miba mu zikhonzu zia ziwadi zi kikhutu. 17 Bosi wutula mua ziphanga beni zi wola zidi buka minsinga, mu minlunga miodi midi mu zikhonzu zia ziwadi zi kikhutu beni. 18 Nandi wukobika mua ziphanga beni mu minlunga miodi, ayi wukobika ziawu mu minlunga miodi mi éfode midi mu mavangiti kuntuala. 19 Bosi wuvanga minlunga miodi mi wola ayi wutula miawu mu zikhonzu ziwadi zi wanda zi kikhutu ki thulu ku khati, ku khonzu yintalasana na éfode. 20 Bosi bavanga mvandi minlunga miodi mi wola, ayi batula miawu mu wanda éfode, muidi makongi muadi madi mu mavangiti, va khonzu mandenginina, vayilu phonda yi éfode. 21 Bosi nandi wubonga nsinga wu ndimba azul, ayi wukanga mu makongi ma kikhutu ki thulu na makongi ma éfode, muingi kikhutu ki thulu kiba kisikama mu éfode va mbata phonda, dedi bo Yave katumina Mose.

22 Nandi wuvanga dizuela dikhambulu mioko, mu nledi wuvangulu mu minsinga mi linho mi ndimba azul, dio katula kutsi éfode. 23 Nandi wubika mua phuasa mu dizuela beni muingi kukosilanga ntu bo bamvuata diawu. Wutunga mu phuasa beni mua bisengu buka kikhutu bannuaninaga mimvita, muingi kibika bakuka. 24 Mu ḿbilu wu dizuela beni dikhambulu mioko, bawu batunga biteka bidi buka makundi ma romã, mu kusadila nledi wuvangulu mu minsinga mi linho mi ndimba azul, nledi wu violeta ayi nledi wubenga. 25 Mu ḿbilu wu dizuela beni, basobikisa biteka bidi buka makundi ma romã ayi mua zingunga zi wola. 26 Nandi wusobikisa biteka bidi buka makundi ma romã ayi mua zingunga zi wola. Buawu kavangila mu ḿbilu woso wu dizuela baba sadilanga mu kisalu ki zinganga nzambi, dedi bo Yave kakambila Mose.

27 Bavangila Aloni na bana bandi mazuela makula mu nledi wuvangulu mu minsinga mi linho. 28 Bavanga dilensu di Aloni, malensu mankaka ayi bikupa mu nledi wuvangulu mu minsinga mi linho. 29 Mvandi bavanga phonda mu nledi wuvangulu mu minsinga mi linho mi ndimba azul, nledi wu violeta, nledi wubenga ayi nledi wuvangulu mu minsinga mi linho, dedi bo Yave kakambila Mose.

30 Bawu bavanga thata yi wola ayi basonika muna: “Yave nandi tho yi bunlongo.” 31 Ayi batula mu thata beni nsinga wu linho wu ndimba azul, ayi bakanga yawu mu dilensu, dedi bo Yave kakambila Mose.

32 Mu phila yoyo, bawu bamanisa kuvanga bisalu matedi nzo yinlongo. Ayi basi Isaeli bavanga mamoso Yave kakamba Mose. Bawu bavangila buna buawu.

33 Bosi banata kuidi Mose biuma bioso bavanga matedi nzo yinlongo: biuma bi kukobika mu makunzi, makunzi, minkamba, biuma bi kuvuakika makunzi, 34 minledi mi kufuka kuyilu nzo yinlongo mivangulu mu nkanda mamemi midi matona mabenga, minlendi mivangulu mu nkanda kibulu bantedilanga foca, nledi waba vasanga kibuangu kinlongo na kibuangu kilutidi kinlongo, 35 kasu yi luwawanu na mua minti mi kunatina kasu beni, tampa yi kasu, 36 meza na biuma biandi bioso, mapha manlongo, 37 kandelabru yi wola na biuma biandi bioso, minda ayi mafuta ma minda, 38 kikuma ki wola, malasi ma kubiekila, malasi madi mfimbu wumboti, nledi wu kutula va khotolo nzo yinlongo, 39 kikuma ki cobre na biuma biandi bioso, kianga ki cobre, mua minti mi kunatina kikuma beni, dibola, kiuma ki kutetika dibola, 40 minledi mi kutula mu luphangu, makunzi na biuma bi kuvuakika makunzi beni, nledi wu kutula va khotolo luphangu, minsinga miandi ayi biuma bi kusikimisila luphangu beni, mvandi biuma bioso bavanga muingi kusadila ku nzo yinlongo, 41 bikhutu binlongo bi kuvangila kisalu ki zinganga nzambi, bikhutu binlongo bi nganga nzambi Aloni, ayi bikhutu bi bana bandi muingi kuvangila kisalu ki zinganga nzambi.

42 Basi Isaeli bavanga bisalu bioso mu kulandudila phila Yave katumina Mose. 43 Bo Mose kafiongunina bisalu bioso bavanga, nandi wumona ti bawu bavangila buna buawu Yave katumina. Bosi Mose wuba sakumuna.

40 Bosi Yave wukamba Mose: 2 “Mu kilumbu kitheti mu ngonda yitheti, ngie fueti telimisa nzo yinlongo. 3 Fueti nata kasu yi luwawanu ku khati nzo yinlongo, ayi yawu yifueti ba kumbusa nledi wunkabula kibuangu kinlongo na kibuangu kilutidi kinlongo. 4 Ngie fueti nata meza ku khati nzo yinlongo ayi kutula va mbata meza beni biuma bifueti ba vana. Mvandi fueti nata kandelabru ayi kutatika minda mi kandelabru beni. 5 Bosi tula kikuma ki kuvikila malasi vantuala kasu yi luwawanu, ayi tula nledi va khotolo nzo yinlongo.

6 “Ngie fueti tula kikuma ki kuvikila minkhailu va ndeku khotolo nzo yinlongo. 7 Fueti tula dibola va khati tsika khotolo nzo yinlongo na kikuma, ayi fueti tula nlangu mu dibola beni. 8 Bosi vanga luphangu lu nzo yinlongo, ayi tula minledi va khotolo luphangu beni. 9 Bonga malasi ma kubiekila, muanga mawu mu nzo yinlongo ayi mu biuma bioso bidi muawu muingi wuvedisa biawu. Mu phila ayoyo, biawu binkuiza ba binlongo. 10 Mvandi fueti muanga malasi va kikuma ki kuvikila minkhailu, ayi biuma biandi bioso muingi kuvedisa kiawu. Mu phila ayoyo, kikuma beni kinkuiza ba kinlongo. 11 Mvandi fueti muanga malasi mu dibola ayi mu kiuma ki kutetika dibola beni, muingi biba binlongo.

12 “Bosi kamba Aloni ayi bana bandi, benda va ndeku khotolo nzo yinlongo, muingi bayisukula. 13 Ngie fueti vuika Aloni bikhutu binlongo ayi kundukudila malasi muingi kumvedisa. Mu phila ayoyo, nandi wunkuiza ba wufuana muingi kuvanganga kisalu ki zinganga nzambi. 14 Bosi tumisa bana ba Aloni ayi wuba vuika mazuela makula. 15 Mvandi fueti kuba dukudila malasi dedi bo bedukudila kuidi tat’awu. Mu phila ayoyo, bawu mvawu bankuiza ba zinganga nzambi.”

16 Mose wuvanga mambu moso Yave kankamba. Nandi wuvangila buna buawu.

17 Mu kilumbu kitheti mu ngonda yitheti mu mvu wummuadi, batelimisa nzo yinlongo. 18 Mose wutelimisa nzo yinlongo mu kukosa makunzi mu biuma bi kuvuakika makunzi, ayi mu kutula minkamba. 19 Nandi wufuka minledi kuyilu nzo yinlongo, dedi bo Yave kantumina.

20 Bosi wubonga mamanya maba Kumi di Minsiku, ayi wutula mawu mu kasu yi luwawanu. Mvandi wuvuakika mua minti mu kasu ayi wufuka tampa mu kasu beni. 21 Nandi wunata kasu yi luwawanu ku khati nzo yinlongo, ayi wutula kasu beni kumbusa nledi waba vasanga kibuangu kinlongo na kibuangu kilutidi kinlongo, dedi bo Yave kankambila.

22 Bosi wunata meza ku khati nzo yinlongo ku khonzu yinkaka yi nledi, ku khonzu norte. 23 Ayi wutetika mapha va mbata meza vantuala Yave, dedi bo Yave kankambila.

24 Bosi wukosa kandelabru ku nzo yinlongo vantuala meza ku khonzu sul. 25 Wutatika minda vantuala Yave, dedi bo Yave kankambila.

26 Bosi wutula kikuma ki wola ku nzo yinlongo, ku khonzu yinkaka yi nledi, 27 muingi bavikilanga vana malasi, dedi bo Yave kakambila Mose.

28 Bosi nandi wutula nledi va khotolo nzo yinlongo.

29 Mose wutula kikuma ki kuvikila minkhailu va ndeku khotolo nzo yinlongo, muingi kuvaninanga minkhailu miviku, ayi minkhailu mi zitheti, dedi bo Yave kankambila.

30 Bosi wutula dibola va khati tsika nzo yinlongo na kikuma, ayi wutula mu dibola beni nlangu muingi bayisukulanga. 31 Mose, Aloni ayi bana bandi, basukula mioko ayi malu mawu mu dibola beni. 32 Ava kukota ku nzo yinlongo voti kuvanga kioso kiuma va kikuma, bawu baba sukulanga mioko ayi malu, dedi bo Yave kakambila Mose.

33 Bosi Mose wuvanga luphangu lu nzo yinlongo, ayi wutula minledi va khotolo luphangu beni.

Mu phila ayoyo, Mose wumanisa kuvanga kisalu kioso. 34 Bosi dituti ditona kufuka nzo yoso yinlongo. Diawu nzo yoso yinlongo yiyiza wadila nkembu wu Yave. 35 Mose kasa baka ko bu kukotila ku nzo yinlongo, kibila dituti ditatamana vana, ayi nzo yoso yinlongo yiwala nkembu wu Yave.

36 Bo dituti diaba botukanga va nzo yinlongo, basi Isaeli baba nangukanga muingi kutatamana viage. 37 Vayi, basi Isaeli babasa nangukanga ko muingi kutatamana viage boti dituti disimbotuka ko va nzo yinlongo. 38 Kibila dituti di Yave diaba banga va mbata nzo yinlongo va muinya, ayi va builu mbazu yaba banga vana. Ayi basi Isaeli boso baba monanga mambu amomo.